ARTÍCULO DE ESTUDIU 9
Chinándanu ejemplu stiʼ Jesús ra gacanenu xcaadxi
«Jma nayecheʼ riuu binni ora rudii que ora ricaa» (HECH. 20:35).
CANCIÓN 17 «Riuuladxeʼ»
NI ZAZÍʼDINU *
1. ¿Ximodo naca xquidxi Jehová?
MACA cá lu Biblia ziale de ndaaniʼ ladxidóʼ xquidxi Jehová gúnicaʼ ni nabe né stale gana ne zinándacaʼ ca instrucción stiʼ Xiiñibe (Sal. 110:3). Cayaca cumplir profecía ca tiempu riʼ. Guiráʼ iza, né stale gana runi predicar ca xpinni Dios stale hora ne rúnicabe ni de guidubi ladxidóʼcabe ne sin guiáxacabe. Laaca riquiiñecabe tiempu stícabe para gacanécabe ca hermanu chuʼcaʼ gaxha de Jehová ne gudiicabe ni caquiiñecaʼ. Laaca ribee ca ancianu ne siervu ministerial stale tiempu para guni prepararcaʼ ca asignación ne discursu ni chitiidiʼ lu reunión, ne rúnicaʼ visita de pastoreu. ¿Xi pur rúnicabe ni yaʼ? Purtiʼ nadxiicabe Jehová ne prójimo stícabe (Mat. 22:37-39).
2. Casi ná Romanos 15:1-3, ¿xi ejemplu bisaana Jesús para laanu?
2 Biyubi Jesús modo gacané xcaadxi, lugar de ñuni ni racalaʼdxiʼ, ne laanu, ca xpínnibe, rúninu stipa chinándanu ejemplu stibe (biindaʼ Romanos 15:1-3). Pa gúninu ni, zabeendunu stale cosa ni galán. Jesús guníʼ: «Jma nayecheʼ riuu binni ora rudii que ora ricaa» (Hech. 20:35).
3. ¿Xi zadúʼyanu lu artículo riʼ?
3 Lu artículo riʼ zadúʼyanu caadxi cosa ni biʼniʼ Jesús para gunda gucané binni ne zadúʼyanu ximodo zanda chinándanu ejemplu stibe. Laaca zadúʼyanu xi zanda gúninu para chuʼnu jma dispuestu gacanenu xcaadxi.
CHINÁNDANU EJEMPLU STIʼ JESÚS
Neca maʼ bidxaga Jesús, ¿xi bíʼnibe ora guyé binni ra nuube? (Biiyaʼ párrafo 4).
4. ¿Ximodo bisihuinni Jesús rizaalaʼdxiʼ binni lugar de guni ni racalaʼdxiʼ?
4 Gucané Jesús binni neca maʼ bidxaga. Guiníʼ íquenu xi bíʼnibe ora yeyubi stale binni laabe dxi nuube gaxha de ti dani, zándaca gaxha de Capernaúm. Ti dxi ante, guidubi gueelaʼ biʼniʼ orar Jesús, ngue runi zándaca guizáʼ maʼ bidxaga. Peru ora bíʼyabe zeeda stale binni ra nuube, biabe ca pobre ne ca ni huará. Cadi bisiándasibe laacaʼ, sínuque laaca bidiibe tobi de ca discursu ni jma huayacané binni, laani nga Sermón del Monte (Luc. 6:12-20).
¿Ximodo zanda chinándanu ejemplu stiʼ Jesús? (Biiyaʼ párrafo 5).
5. ¿Ximodo rinanda ca xaíque stiʼ familia ejemplu stiʼ Jesús ora maʼ bidxágacaʼ?
5 Ximodo rinanda ca xaíque stiʼ familia ejemplu stiʼ Jesús. Guiníʼ íquenu yendá ti hermanu ra lidxi ne guizáʼ maʼ bidxaga purtiʼ biʼniʼ dxiiñaʼ. Peru dxi ca, rúnicabe adoración en familia. Ñanda niníʼ íquebe nusaanacabe ni para sti dxi, peru rinábabe Jehová gudii stipa laabe. Ricabi Jehová oración stibe, ne runi estudiárnebe familia stibe cásica rúnicabe ni guiráʼ semana. Gueelaʼ que biziidiʼ xiiñicabe ti cosa nabé risaca: neca maʼ bidxaga bixhózecaʼ ne jñaacaʼ, ni jma risaca para laacaʼ nga chuʼcaʼ gaxha de Jehová.
6. Bizeeteʼ ximodo biquiiñeʼ Jesús tiempu ni gulee para laa.
6 Gulee Jesús tiempu para gacané binni. Guiníʼ íquenu ni bizaaca Jesús, nin cadi xadxí gúnnabe guti xhamígube Juan Bautista ne guizáʼ nuube triste. Biblia ná: «Ora gunna Jesús ni, gudxiʼbaʼ ndaaniʼ ti canuá ne guyé zitu de raqué para chuʼ stubi» (Mat. 14:10-13). Nánnanu racalaʼdxiʼ Jesús chuʼ stubi. Nuu binni ora rati tuuxa binni ni nadxii, riuulaʼdxiʼ chuʼ stubi. Peru nánnanu qué ñanda ñuu Jesús stubi, purtiʼ maʼ cabeza stale binni laabe lugar ra zebe que. ¿Xi bíʼnibe yaʼ? Guníʼ íquebe xi guiráʼ caquiiñeʼ ca binni que ne «guizáʼ biabe laacaʼ». Bidiibe cuenta caquiiñeʼ ca binni que tu quixhedxí ladxidoʼcaʼ ne guiziidicaʼ de Dios, ngue runi gucanebe laacaʼ «ne bizulú bisiidibe laacaʼ stale cosa» (Mar. 6:31-34; Luc. 9:10, 11).
7, 8. ¿Ximodo rusihuinni ca ancianu zinándacaʼ ejemplu stiʼ Jesús ora caquiiñeʼ tuuxa hermanu tu gacané laa?
7 Ximodo rinanda ca ancianu ejemplu stiʼ Jesús. ¿Cadi dxandíʼ rusisácanu guiráʼ ni runi ca ancianu pur laanu la? Stale de laanu qué gánnanu xi guiráʼ ni rúnicabe. Guzéʼtenu ti ejemplu, ora rizaaca xiixa emergencia la? ca hermanu ni nuu lu Comité de Enlace né ca Hospital nagueendaca rigacanecaʼ ca hermanu ni caquiiñeʼ ni, ne stale biaje rúnicabe ni galaa gueelaʼ. Racá ridúʼyanu racané ca ancianu riʼ ne familia sticaʼ ca hermanu, lugar de gúnicaʼ ni riuuláʼdxicaʼ, purtiʼ riácabe laacaʼ.
8 Laaca racané ca ancianu ra cabí Yoo stiʼ Reinu ne xcaadxi yoo ni riquiiñeʼ para gaca adorar Dios, ne laaca racanécabe lu labor de socorro. Ne laaca riquiiñecabe stale tiempu para gusiidicabe, gacanécabe ne cúʼcabe gana ca hermanu de congregación. Naquiiñeʼ guni felicitarnu ca ancianu ne familia sticaʼ de guidubi ladxidoʼno. Racaláʼdxinu chuʼ Jehová gaxha de laacabe purtiʼ racanécabe né stale gana. Ne cásica guiráʼ xpinni Cristu, ca ancianu naquiiñeʼ gacanecaʼ congregación, peru cadi naquiiñeʼ guiaandaʼ laacabe laaca naquiiñeʼ gacanécabe familia stícabe.
XI ZACANÉ LAANU CHUULÁʼDXINU GACANENU XCAADXI
9. Casi ná Filipenses 2:4, 5, ¿ximodo naquiiñeʼ guiníʼ ique guiráʼ ca xpinni Cristu?
9 (Biindaʼ Filipenses 2:4, 5). Dxandíʼ, cadi guiranu nácanu ancianu, peru guiranu zanda guizíʼdinu modo gucané Jesús binni. Biblia ná «gúcabe casi ti esclavu» (Filip. 2:7). ¿Xi rusiidiʼ ca diidxaʼ riʼ laanu yaʼ? Ti esclavu nachaʼhuiʼ ruyubi modo gacané xpixuaanaʼ. Cumu nácanu esclavu stiʼ Jehová ne racanenu ca hermanu stinu la? nga runi, racaláʼdxinu iquiiñeʼ Dios laanu ne gacanérunu ca hermanu stinu. Guidúʼyanu caadxi sugerencia ni zacané laanu gúninu ni.
10. ¿Xi pregunta zanda guiníʼ íquenu?
10 Guníʼ ique xi cayúniluʼ. Guníʼ ique ndiʼ: «¿Ñee nuaaʼ dispuestu gusaanaʼ cosa ni riuuladxeʼ guneʼ para gacaniáʼ xcaadxi la? ¿Xi runeʼ ora rinábacabe naa chigannaʼ ti hermanu ni maʼ huaniisi o chicaaʼ ti hermana ni maʼ huaniisi para cheʼ reunión? ¿Ñee nagueendaca rigacaniáʼ gaca limpieza ra salón de asamblea o para gudiʼdu mantenimientu ra Yoo stiʼ Reinu la?». Dxi bidiʼnu xpídanu Jehová, gúdxinu laa zaquiiñenu tiempu stinu ne guiráʼ ni nápanu para gúninu ni ná. Nga runi, guizáʼ riuu Jehová nayecheʼ ora riquiiñenu ca ni para gacanenu xcaadxi de guidubi ladxidoʼno. Yanna, ¿xi zanda gúninu pa gudiʼnu cuenta cayaadxaʼ gúninu xiixa yaʼ?
11. Pa guni orarnu, ¿ximodo zacaneni laanu guiale de laanu gacanenu xcaadxi?
11 Biʼniʼ orar Jehová de guidubi ladxidoʼloʼ. Pa gudiiluʼ cuenta caquiiñeruʼ gúniluʼ xiixa, peru qué gápaluʼ deseu de gúniluʼ ni la? biʼniʼ orar Jehová de guidubi ladxidoʼloʼ. Gudxi laabe xi cayácaluʼ. Gudxi laabe xi cayuni sentirluʼ ne gunabaʼ laabe gudiibe lii «deseu ne poder» para gúniluʼ guiráʼ ni riuuláʼdxibe (Filip. 2:13).
12. ¿Ximodo zanda gacané ca hermanu joven ni maʼ guyuunisa organización stiʼ Dios?
12 ¿Ñee joven lii ne maʼ guyuunísaluʼ la? Pa zacá ni, gunabaʼ Jehová gudii lii deseu para gacaneluʼ jma ndaaniʼ congregación. Ndaaniʼ caadxi congregación, nuu jma ancianu que siervu ministerial, ne stale de ca siervu ministerial ca maʼ huaniisicaʼ. Cumu ziroobaʼ organización stiʼ Jehová la? nga runi caquiiñeʼ jma hermanu joven para gacanecaʼ ca ancianu gápacaʼ xquidxi Dios. Pa chigacaneluʼ ti lugar ra caquiiñeʼ jma joven la? ziuuluʼ nayecheʼ purtiʼ cusiécheluʼ Jehová, zuuyaʼ ca hermanu riuuláʼdxiluʼ gacaneluʼ xcaadxi ne ziécheluʼ ra gúniluʼ ni.
Biree ca xpinni Cristu de Judea ne gudíʼdicaʼ guiiguʼ Jordán para yendacaʼ guidxi Pela. Ca ni yendá primé cudiicaʼ ni gó ca ni yendá despué. (Biiyaʼ párrafo 13).
13, 14. ¿Xi zanda gúninu para gacanenu ca hermanu stinu? (Biiyaʼ imagen ni zeeda lu portada).
13 Biiyaʼ xi caquiiñeʼ ca hermanu. Apóstol Pablo bicaa ti conseju lu carta ni bicaa para ca hebreu: «Cadi guiaandaʼ laatu gacanetu stobi ne gudiitu de ni nápatu, purtiʼ zeeda gaca ni casi ti sacrificiu ni riuulaʼdxiʼ Dios guicaa» (Heb. 13:16). ¡Guizáʼ gucané ca diidxaʼ que laacabe! Qué nindaa de gucuaa ca hermanu de Judea carta riʼ, gupa xidé bisaanacaʼ lídxicaʼ, negocio sticaʼ ne familia sticaʼ ni cadi naca xpinni Cristu, ne bixooñecaʼ lade ca dani que (Mat. 24:16). Rihuinni dxíchica nabé risaca ngue gacanésaacabe. Pa maca de ante rinándacabe conseju ni bidii Pablo, maʼ qué zaca nagana para laacabe gúnicabe ni neza ra zécabe.
14 Zándaca cadi guiráʼ diʼ biaje zabi ca hermanu stinu laanu xi caquiiñecaʼ. Guiníʼ íquenu biaana ti hermanu viudu. ¿Ñee caquiiñeʼ hermanu riʼ chuʼ tu gacané laa guni guendaró stiʼ, gaca ca mandadu stiʼ o guiá ra lidxi la? Zándaca qué zanábabe ca hermanu gacanecaʼ laabe purtiʼ qué racaláʼdxibe gácabe ti carga para laacaʼ. Peru nánnanu ziéchebe pa gacanenu laabe. Cadi naquiiñeʼ guiníʼ íquenu maʼ nuu tu cayacané laabe o siempre zábibe laanu xi caquiiñebe. Galán guiníʼ íquenu ndiʼ: «Pa naa nga nizaacaʼ ni cazaacabe ca, ¿xi ñuuladxeʼ ñúnicabe pur naa?».
15. ¿Xi zanda gúninu pa racaláʼdxinu gacanenu xcaadxi?
15 Guyuu listu para gacaneluʼ. Nánnanu ndaaniʼ congregación stinu nuu hermanu ne hermana ni nuu listu para gacané xcaadxi. Ne qué rucaacabe laanu guiníʼ íquenu nácanu ti carga para laacabe, sínuque nánnanu zanda guidxíñanu laacabe para guinábanu gacanécabe laanu ne racaláʼdxinu chinándanu ejemplu stícabe. Ti ancianu ni láʼ Alan, ni napa 45 iza, gudixhe ique chuʼ listu para gacané xcaadxi. Sicaríʼ guniʼbe de ejemplu stiʼ Jesús: «Neca guizáʼ guyuu xhiiñaʼ Jesús, peru guiráʼ binni guyuulaʼdxiʼ guidxiña laabe ne qué nidxíbicaʼ guinábacaʼ gacanebe laacaʼ. Bidiicaʼ cuenta dxandíʼ rizaaláʼdxibe laacaʼ. Ni jma racalaʼdxeʼ nga gacaʼ casi Jesús ne guʼyaʼ ca hermanu naa casi tuuxa ni zanda gacané laacaʼ, ne gacaʼ nachaʼhuiʼ né laacaʼ».
16. ¿Ximodo racané Salmo 119:59, 60 laanu chinándanu ejemplu stiʼ Jesús?
16 Cadi guireʼnu gana pa qué ganda gúninu modo peʼ biʼniʼ Jesús (Sant. 3:2). Ti estudiante ni deruʼ caziidiʼ, qué zanda gaca casi peʼ maestru stiʼ, peru jma zaziidibe pa gúnibe stipa chinándabe ejemplu stiʼ maestru stibe biaʼ gándatiʼ. Zaqueca nga laanu, pa gúninu guiráʼ ni maʼ bizíʼdinu ora runi estudiarnu Biblia stúbinu ne rúninu stipa pur guchaʼnu, zanda chinándanu ejemplu ni bisaana Jesús para laanu (biindaʼ Salmo 119:59, 60).
NI ZABEENDUNU PA GACANENU XCAADXI
Ora racané ca ancianu ca hermanu cásica biʼniʼ Jesús la? rinanda ca joven ejemplu stícabe. (Biiyaʼ párrafo 17). *
17, 18. ¿Xi zabeendunu pa gacanenu binni casi biʼniʼ Jesús?
17 Ora racanenu ca hermanu stinu, rucaani xcaadxi gúnicaʼ zaqueca. Sicaríʼ guníʼ ti ancianu láʼ Tim: «Ndaaniʼ congregación stidu, nuu hermanu joven ni maʼ biʼniʼ progresar ne maʼ beeda gácacaʼ siervu ministerial purtiʼ biiyacaʼ ximodo naca xcaadxi hermanu ne yenándacaʼ ejemplu stícabe. Ejemplu stiʼ ca hermanu joven riguuni gana ca hermanu de congregación ne racanécabe ca ancianu».
18 Ndaaniʼ Guidxilayú riʼ nuu stale binni ni ruyubi puru si para laa, peru laanu, ca xpinni Jehová, maʼ gadxé laanu. Ejemplu stiʼ Jesús riguuni gana laanu ne rucaa ni laanu laaca gacanenu xcaadxi binni. Dxandíʼ, cumu binni ruchee laanu la? qué zanda diʼ gúninu modo peʼ biʼniʼ Jesús ni, peru zanda chinándanu ejemplu stibe (1 Ped. 2:21). Pa gúninu stipa chinándanu ejemplu stiʼ Jesús biaʼ gándatiʼ ne gacanenu binni la? ziuʼnu nayecheʼ purtiʼ nánnanu cusiéchenu Jehová.
CANCIÓN 13 Chinándanu ejemplu stiʼ Cristu
^ párrafo 5 Biyubi Jesús gacané xcaadxi lugar de ñuni ni racalaʼdxiʼ. Lu artículo riʼ zadúʼyanu ximodo zanda gacanenu xcaadxi cásica biʼniʼ Jesús ne xi ndaayaʼ zacaanu pa gúninu ni.
^ párrafo 57 NI RIHUINNI LU IMAGEN RIʼ: Cayuuyaʼ ti hermanuhuiiniʼ láʼ Daniel ziganna chupa ancianu bixhoze ra hospital. Ejemplu stiʼ ca ancianu riʼ bicaa ni laabe gacanebe ca hermanu de congregación. Cayuuyaʼ sti hermanuhuiiniʼ láʼ Benjamín, ni cayuni Daniel. Ejemplu stiʼ Daniel bicaani Benjamín gacané gaca limpieza ndaaniʼ Yoo stiʼ Reinu.
