Wojiŋ le exwe 1941 mɛ le Paris le France. Mìwo xomu lɔ deje abɔ o, kpɔ denyi dɔkunɔ o. Enukplakpla jɔnɔ ji nɔŋ, eyi taɖo ci ŋɖo exwe amɛwo yí lé kpɛnɣidɔ̀ keŋ mi suklu yiyiɔ, eve nɔŋ sugbɔ! Dotowo mɔ ŋɖo aci ba ji, ɖo anyi jokuwo degbewakɔ dɔ nywiɖe o. Eyi taɖo na nɔ wleci sugbɔɔ, ŋzannɔ anyi gamɛ sɔ hlɛnnɔ nu le enugɔnmɛjiji wema mɛ yí gbeɖonɔ to hladio ci yí nyi winivɛshite Sorbonne tɔ le Paris. Hwenu anyi doto nu mɔ nyɛŋhɛn nayi suklu hɔntɔn ɖo edɔ̀ lɔ mi nɔŋ ɔ, ejɔ ji nɔŋ keke. Ŋnu le nyɛɖeki mɛ mɔ, ‘Enunywi ŋtɔ teŋ yí dotowo wanɔ!’ Eyi ŋdrɔɛ mɔ nyɛ can navada dɔ̀ nɔ dɔ̀nɔwo. Hweɖekpokpuinu nɔ danyɛ biɔ ŋse mɔ, nyi nyɛŋji mɔ navawa le agbe mɛ maɔ, ŋɖonɔ ŋci mɔ, “navanyi doto.” Lé eyi do yí dotodɔ vanyi edɔ vevitɔ nɔŋ le agbe mɛ nɛ.

Katoliki yí mìwo xomu lɔ yinɔ. Vɔ ŋdenya nu sugbɔ so Mawu nu o yí ŋdekpɔ ɖoŋci nɔ anyi nyɔbiɔse sugbɔtɔwo o. Ci ŋvatɔ enu kplakpla so dotoxwe nyɔwo nu le winivɛshite gbɔxwe yí ŋvakando ji mɔ wa wowa agbe lɔ.

Ŋɖo ŋwi ŋkɔtɔ ci ŋkpɔ lé nuvileagbu aciwo tɔ le do le mashinni mɛ. Ejiŋ nɔŋ ci ŋkpɔ lé nuvileagbu lɔwo glɔnkɔ ta nɔ wowoɖekiwo so zozu koɖo fafa nu. Ŋgbekpɔ ŋɖeka le nuvileagbu lɔwo mɛ ci yí na mɔ nɔ wole eje mɛɔ, wohwenɔ, vɔ nɔ wole eshi mɛmi mɛɔ, wogangannɔ. Enujikpekpe cɛwo koɖo ebuwo na enuvileagbuwo tɛnŋ trɔnɔ do nɔnɔmɛwo nu sɔ koɖo texwe ci wole. Ci ŋkpɔ lé wowa nuvileagbu ɖekaɖeka do yí enyi enukpacamɛɔ, ŋvakando ji mɔ agbe lɔ dejɔ le yiɖeki shi o.

 Ci ŋle xwe amɛvetɔ lɔ mɛ nɔ dotodɔ kplakpla lɔɔ, ŋkpɔ kpeɖoji sugbɔ ciwo yí dasɛ mɔ Mawu li. Ci mìkplakɔ nu so agbetɔ lankpu nuɔ, mìkpla mɔ aba yí na mìwo lɔviwo ŋwlanɔ yí gbejɔnɔ. Lé woɖo elanciwo koɖo exuwo do yí enushianu wakɔ dɔ alɔlealɔmɛ nyi enukpacamɛ. Le kpɔwɛ mɛ, ŋkpla mɔ ekan ɖeka so aba mɛ yi exu amɛvetɔ mɛ nɔ mìwo lɔvi. Ekan lɔ vama do amɛve keŋ hun emɔ nɔ ekan bu nɔ ato mɛ keŋ ayi nugbɔvi nɔ lɔvi lɔwo. Elanciwo hɛnnɔ ekan cɛwo do lɔvi xu lɔwo nu nywiɖe. Nɔ wodewa mìwo lɔviwo ahan ɔ, ekan lɔwo axoci do te yí mìwo lɔviwo dagbewanɔ dɔ nywiɖe o. Ci ŋkpɔ lé wowa agbetɔ lankpu doɔ, ŋdo jeshi mɔ Mɛ ci yí wɛ nyaŋɖɛ haan.

Ci ŋgbekpla lé Gbɛɖotɔ lɔ wɛ keke evi ci woji trololo tɔnɔ gbɔngbɔn ɔ, ejiŋ nɔŋ taŋ. Ŋkpla mɔ nɔ vihwɛ ɖe le dɔmɛ nɔ nɔlɔɔ, yiŋtɔ degbɔnnɔ aya o, ɖo éxɔnɔ aya mɛmi so nɔlɔ gbɔ to ehɔnkan mɛ. Eyi taɖo aya denɔnɔ akpo hwɛhwɛ ciwo yí le joku yitɔ mɛ o. Nɔ ekpɔtɔ kwɛshila ɖewo gbɔxwe woajiɔ, eshi vevi ɖeka ci woyɔnɔ mɔ surfactant janɔ do akpo hwɛhwɛ lɔwo mɛ. Nɔ woji evi lɔ yí egbɔn ŋkɔtɔɔ, enujiŋ ɖeka jɔnɔ. Totu ɖeka le ɖeviɛ ji mɛ cunɔ, ecɛ na yí ehun ɖonɔ joku lɔ mɛ. Le gaxoxo vevi ŋtɔ́ mɛɔ, eshi ci yí tɔ mɔ surfactant lɔ na yí akpo lɔwo hunnɔ blaŋ yí aya ɖonɔ wo mɛ. Zeɖekatɔntɔn ɔ, vihwɛ lɔ ŋtɔ tɔnɔ gbɔngbɔn.

Ci ŋji mɔ nanya nu so Mɛ ci yí wa enujiŋ cɛwo nuɔ, ŋtɔ Bibla hlɛnhlɛn veviɖe. Ewu exwe 3000 yɛ yí Mawu do esewo nɔ Izraɛliviwo yí eɖowo xo nuxu so lanmɛsɛn mɛ nɔnɔ nu. Ci ŋhlɛn woɔ, ejiŋ nɔŋ sugbɔ. Mawu nu nɔ Izraɛliviwo mɔ woɖo aku du gbɔxwe ayi kpaji, woɖo alenɔ shi blaŋblaŋ, yí nɔ mɛɖe lé edɔ̀bamɛ ɖeɔ, woasɔɛ do azɔge le amowo gbɔ. (1 Ese. 13:50; 15:11; 2 Ese. 23:13) Bibla xo nuxu so enyɔ cɛwo nu xoxoxo, vɔ exwe 150 van cɛ yɛ gbɔxwe jɔjɔmɛnununyatɔwo vamɔŋje lé edɔ̀vɔn ɖe wɛ yí kakanɔ mɛ. Ŋmɔŋje mɛ hɛnnɛ mɔ ese ci wodo le Ese Wema ŋkɔtɔ mɛ kudo mɛmɛnɔnɔ nu le gbɔdɔndɔn nyɔwo mɛ kpedo Izraɛli jukɔn lɔ pleŋ nu yí wonɔ lanmɛsɛn mɛ. (1 Ese. 12:1-6; 15:16-24) Ŋvado jeshi mɔ Izraɛliviwo nyɔna ŋci yí Gbɛɖotɔ lɔ do ese cɛwo do, yí ecu shi nɔ mɛ ciwo yí nyì ese lɔwo. Ŋvatɔ kankando ji mɔ Mawu gbɔ yí Bibla so, vɔ hwenɔnuɔ, ŋdejeshi yi ŋkɔ kpetii o.

Hwenu ŋkpɔtɔ le winivɛshite yí kplakɔ dotodɔ lɔɔ, ŋdo go cugbejɛ ɖeka, étɔ mɔ Lydie, yi nu jɔ ji nɔŋ. Yí mìlé alɔ le xwe 1965 mɛ hwenu ŋma exwe nɛni ci ŋɖo awa le winivɛshite lɔ mɛ. Keke mìaje exwe 1971 mɛɔ, nyɛ koɖo Lydie ji vi amɛtɔn. Mìwo viwo pleŋ nyi amadɛn. Lydie kpedo ŋnu koŋ le anyi dɔ lɔ koɖo ɖeviɛwo hɛnhɛn mɛ.

Ŋwa dɔ exwe amɛtɔn le dotoxwe axɔsu tɔ mɛ gbɔxwe yí vahun nyɛŋtɔ tɔ. Dejinjin o yí asu koɖo ashi ciwo nu ŋxo nuxu so le tɔtɔmɛ va mɔ nyɛ le da dɔ̀ nɔ yewo. Cikewo yí ŋjikɔ atɔ ŋwlɛŋwlɛ nɔ ŋsu lɔ yí ashiɛ nu nɔŋ mɔ: “Doto, ŋɖe kuku, ehundodo yɛ dele mɛ lo.” Ekpacaŋ, yí ŋbiɛ se mɔ: “Nyaoa?  Nyi yí taɖoɔ?” Eyi eɖo ŋci mɔ: “Yehowa Kunuɖetɔwo yí mìnyi.” Ŋdenya ŋɖekɛ so Yehowa Kunuɖetɔwo koɖo lé wokpɔnɔ ehundodo do hwenɔnu o. Nyɔnu lɔ sɔ yi Bibla ti yí hlɛn mawunyɔkpukpui ci wokpɔ taɖo yí gbe mɔ yewodahun nɔŋ. (Edɔ. 15:28, 29) Le yi goduɔ, nyɔnu lɔ koɖo asuɔ dasɛ enu ciwo yí Mawu Fyɔɖuxu avawa le Bibla mɛ nɔŋ, avaɖe efunkpekpewo, edɔ̀lelewo koɖo eku si. (Enyɔ. 21:3, 4) Eyi ŋnu mɔ: “Enyɔ ci mínukɔ nɔŋ yɛ nyi enu ɖeka ci ŋjijiɛ so vihwɛ mɛ! Ji ŋjijiɛ mɔ naɖe efunkpekpewo kpɔtɔ nɔ amowo taɖo yí mɔ nanyi doto.” Enyɔ lɔ jɔ ji nɔŋ keke mìkan seŋ na nɔ gaxoxo ɖeka koɖo fan. Ci asu koɖo ashi lɔ yiɔ, ŋnu le nyɛɖeki mɛ mɔ ŋdagbeyi Katoliki ke o. Ŋnya hɔntɔn mɔ Gbɛɖotɔ ci nu yí jɔ ji nɔŋ ɖo ŋkɔ ɖeka, eyi nyi Yehowa!

Asu koɖo ashi Kunuɖetɔ lɔwo gbeva anyi dotoxwe lɔ zetɔn, yí nɔ wovaɔ, mìkannɔ seŋ wu gaxoxo ɖeka. Ŋnu nɔ wo mɔ wo le va anyi xomɛ nɔ mìatɛnŋ avo akan seŋ le Bibla mɛ wu. Lydie lɔn mɔ yeakpla Bibla lɔ koɖo mì, vɔ ci wodasɛ nɔ mì le Bibla mɛ mɔ Katoliki nukplakpla ɖekatɔwo denyi nyɔnɔnwiɔ, Lydie delɔn do ji o. Eyi ŋyɔ fada ɖeka mɔ yɛ le va axomɛ. Mìzan Bibla yí dɔn nyɔ koɖi so cɔci nukplakplawo nu keke ezan shin. Seŋkankan cɛ na yí Lydie vakando ji mɔ Yehowa Kunuɖetɔwo yí kplakɔ nyɔnɔnwi lɔ amowo. So hwenɔnuɔ, lɔnlɔn ci mìɖo nɔ Yehowa vasɛnkɔŋ doji yí mì amɛve lɔwo wa ʒinʒindoshimɛ le exwe 1974 mɛ.

Ci ŋkpla nu so enu ci Mawu ɖo mɔ yeawa nɔ agbetɔwo nuɔ, ewa dɔ do ŋji yí ŋtrɔ anyi tajinuwo le agbe mɛ. Yehowa sɛnsɛn yí vanyi enuvevitɔ nɔ nyɛ koɖo Lydie le agbe mɛ. Mìɖui mɔ mìazan Bibla gɔnmɛɖosewo asɔ hɛn mìwo viwo. Gɔnmɛɖose ciwo yí nyi woalɔn Mawu yí agbelɔn amɛkpena yí mìkpla mìwo viwo. Ecɛ na yí lɔnlɔn koɖo ɖekawawa le mìwo xomu lɔ mɛ.—Mt. 22:37-39.

Nɔ nyɛ koɖo Lydie ɖo ŋwi enu ciwo yí jɔ vayiɔ, ejɔnɔ ji nɔ mì, ɖo ɖeviɛwo kpɔ mɔ egbe le ju nɔ mì. Wonya enyɔ ci Yesu nu mɔ “Míwo nuxuxoxo ɖogbe a nyi ‘Ɛɛ, ɛɛ’ alo ‘Oo, oo,’” eyi taɖo ɖeviɛwo nya le axwe lɔ mɛ mɔ nɔ nyɛŋnu nyɔ ɖeɔ, eyi ke yewo nɔ anu. (Mt. 5:37) Le kpɔwɛ mɛ, ci mìwo vi nyɔnuvi xoxutɔ ɖo xwe 17 ɔ, Lydie deɖe mɔ  ni nɔ ado gbɛ koɖo yi hamɛtɔwo o. Yi hamɛtɔ ɖeka nu ni mɔ: “Nɔ enɔo gbe mɔ eoŋgbedo ha koɖo mìɔ, biɔ gbe edaoa!” Eyi mìwo vi nyɔnuvi lɔ ɖo ŋci ni mɔ: “Datrɔ ŋɖe o. Ðo egbe le ju nɔ wo gashiagamɛ.” Nyɔnɔnwi yɔ, mìwo vi amadɛn lɔwo nya mɔ nyɛ koɖo ashinyɛ sɔ gbe ɖo ju keŋ wanɔ do Bibla gɔnmɛɖosewo ji. Mìdo akpe nɔ Yehowa mɔ amɛ sugbɔ le mìwo xomu gangan lɔ mɛ sinkɔ le egbɛ mɛ.

Ci nyɔnɔnwi lɔ trɔ anyi tajinuwo can ɔ, ŋji mɔ nazan dotodɔ ci ŋkpla lɔ asɔ kpedo Mawu mɛwo nu. Eyi taɖo ŋtɔ lɔnlɔn faa dɔ wawa le Betɛli le Paris yí le ŋkɔ mɛɔ, le Betɛli yoyu ci wovacu do Louviers jugan mɛ. Ŋwa dɔ le Betɛli ɖyi bla yi exwe 50 han. Le hwenɔtɔ́nuɔ, ŋwa xlɔwo ɖɛ le Betɛli xomumɛtɔwo mɛ yí eɖewo le wo mɛ ɖo exwe 90 gbɛ. Gbesɔ kpe niɔ, ejɔ ji nɔŋ mɔ ŋdo go koɖo Betɛli xomumɛtɔ yoyu ɖeka gbeɖeka. Ekpacaŋ mɔ ci mìle seŋ kankɔɔ, mìva do jeshi mɔ enyɛ yí kpedo nɔlɔ nu yí eji exwe 20 vayi!

Ci exwewo vayikɔ yí ŋkpɔ lé Yehowa kplɔkɔ yi mɛwo yí gbecɔnkɔ alɔ wo ji to yi habɔbɔ lɔ jiɔ, lɔnlɔn ci ŋɖo ni gbesɛnŋ doji. Le tɔtɔmɛ nɔ exwe 1980-woɔ, Edɔjikpɔha lɔ wa toto keŋ akpedo mɛ ciwo yí wanɔ dɔ le dotoxwewo nu le Etats-Unis nɔ woamɔŋje gbeta ci Yehowa Kunuɖetɔwo sɔ mɔ yewodado hun mɛ.

Le xwe 1988 mɛɔ, Edɔjikpɔha lɔ ɖo dɔwaxu yoyu ɖeka do Betɛli yí woyɔɛni mɔ Service d’information médicale. Le tɔtɔmɛɔ, dɔwaxu cɛ yí kpɔnɔ Dotoxwe Kacaca Jikpɔgbɛ (CLH) ciwo yí le Etats-Unis ji yí wokpenɔdo Kunuɖetɔ dɔ̀nɔwo nu nɔ woakpɔ doto ciwo yí xɔ gbe mɔ yewodado ehun nɔ mì o. Ci wovatɔ CLH-wo ɖoɖo do xexe lɔ pleŋ mɛɔ, wovaɖo do France hɛnnɛ. Ci ŋkpɔ lé Yehowa habɔbɔ lɔ lekɔ bu nɔ nɔviŋsu koɖo nɔvinyɔnu ciwo yí le eʒan mɛ doɔ, ewa dɔ do ŋji keke!

Sasaɔ, dotodɔ yí ŋlɔn doŋkɔ. Vɔ ci ŋvatrɔ yí bu tamɛ kpɔ so anyi tajinuwo nuɔ, ŋvado jeshi mɔ enuvevitɔ lɔ yí nyi mɔ, mada dɔ̀ nɔ amowo le gbɔngbɔn mɛ, makpedo wo nu nɔ woajeshi Yehowa Mawu, Gbɛɖotɔ lɔ keŋ asin. Eyi taɖo ci ŋɖegbɔ dɔ yí xɔ gbɔndomɛɔ, nyɛ koɖo Lydie xɔ gashiagamɛ mɔɖeɖedɔ lɔ yí zannɔ gamɛ sugbɔ sɔ dranɔ Mawu Fyɔɖuxu ŋɛnywi lɔ. Mìgbekpɔtɔ wakɔ ci mìkpe le amɛhwlɛngandɔ cɛ mɛ.

Ŋkpɔtɔ wakɔ ci ji ŋkpe yí kpekɔdo dɔ̀nɔwo nu kankin. Vɔ ŋdo jeshi mɔ, nɔ doto ɖe nya dɔ keke can ɔ, dasun ji yí ada dɔ̀wo xloŋ alo aɖe eku si o. Eyi taɖo kpakpa sɔsɔŋ mɔ makpɔ hwenu ci yí vevisese, edɔ̀lele koɖo eku dagbeli o. Dajinjin o xexe yoyu lɔ ava, eyi nakpla nu sugbɔ so enujiŋ ciwo Mawu wa nu, vevitɔ lé ewa agbetɔ lankpu do. Hwenɔnuɔ, enu ci ŋdrɔkɔ le vihwɛ mɛ avamɛ keŋkeŋ. Ŋkando ji mɔ enunywiwo le ŋkɔ gbɔgbɔ!