Au tubu di taon 1941. Au dohot keluargakku tinggal di Paris, Prancis. Keluarga na sederhana do hami. Lomo hian do rohakku marsiajar, alai tikki marumur sappulu taon, hona TBC ma au jala ikkon so ma au sikkola. Lungun hian do rohakku tikki i. Didokkon dokter, ikkon istirahat total do au asa unang lam parah paru-parukku. Jadi saleleng piga-piga bulan, di jabu ma au. Hujahai ma kamus jala hubege ma siaran Radio Sorbonne na marisi acara pendidikan na dibahen Universitas Paris. Dung i, didok dokter ma nga malum be sahittu jala nga boi be au sikkola. Las hian ma rohakku tikki i. Didok rohakku, ‘Jago hian do akka dokter on!’ Mulai sian i, marcita-cita ma au pamaluppon halak na marsahit. Jadi molo disukkun bapakku aha do cita-citakku, sai hudokkon do, “Naeng gabe dokter do au.” Jadi mulai sian i berupaya do au asa boi gabe dokter, jala i do na paling penting di ngolukku.

Katolik do hami sekeluarga. Dang godang na huboto taringot Debata. Jala godang do sukkun-sukkunku na so taralusi dope. Alai dung kuliah au, mulai ma au yakin memang botul-botul do adong na manoppa saluhut tano on.

Huingot dope tikki parjolo sahali au mambahen penelitian tu bunga tulip mamakke mikroskop. Longang hian do rohakku tikki i, alana sel bunga tulip i boi melindungi dirina tikki mohop ari manang tikki ngali ari. Huida do muse sitoplasma (salah satu zat di bagasan sel i) kisut tikki hona sira, jala mengembang tikki hona aek. Ala boi songon i sel ni bunga tulip i, gabe boi ma bunga i menyesuaihon dirina tu lingkunganna. Dung huboto songon i rumitna rancangan ni bunga tulip i, gabe yakin ma au dang mungkin i adong sandiri. Pasti adong do na mambahen i.

 Dung dua taon au kuliah, lam godang ma huida bukti na patuduhon tutu do adong Debata. Hea do hami marsiajar taringot tubuh manusia. Diparsiajari hami ma taringot struktur ni tanganta on, na mambahen jari-jaritta dang kaku jala boi maniop barang. Luar biasa do letak dohot cara kerja ni otot, urat, dohot jaringan pengikat na adong di tanganta on. Misalna, adong do urat na menyambungkan otot ni tanganta tu tulang di ruas na paduahon di jari-jaritta. Urat i tarbagi dua, gabe adong ma celah di tonga-tonga ni urat i. Dung i adong ma urat na asing na masuk lewat celah i tu ujung ni jari-jaritta. Asing ni i, ala adong jaringan pengikat di tanganta on, gabe tetap ma urat i di posisina. I ma na mambahen jari-jaritta on dang kaku jala boi maniop barang. On sude patuduhon, malo hian do na merancang tubuh manusia.

Longang do muse rohakku tikki mamparsiajari songon dia bayi boi bernafas sandiri dung tubu. Tikki di kandungan dope bayi i, ibana mandapot oksigen marhite tali pusar ni omakna asa boi bernafas. Alani i alveoli (kantong-kantong udara na massai gelleng) na di bagasan paru-paruna dang marisi udara dope, jala dang mengembang dope. Piga-piga minggu andorang so tubu bayi i, adong ma cairan na melapisi bagian dalam ni alveoli i. Goar ni cairan i, i ma surfaktan. Ala adong surfaktan, gabe boi ma annon mengembang alveoli i molo nungnga marisi udara. Dung tubu bayi i, tartutup ma lubang di jantungna. Gabe boi ma mengalir darah tu paru-paruna. Dung i, mulai ma marisi udara alveoli di paru-paruna. Gabe boi ma bayi i bernafas sandiri.

Lomo hian do rohakku mamboto ise do na manoppa saluhutna on. Alani i, mulai ma au serius manjaha Bibel. Takjub do au tikki hujaha patik na dilehon Debata tu halak Israel lobi sian 3.000 taon naung salpu taringot kebersihan. Diparettahon Debata do tu halak Israel molo buang kotoran nasida, ikkon ditanom do kotoranna i. Ikkon jotjot do nasida cuci tangan, maridi, jala ikkon dikarantina do halak na hona sahit na menular. (3 Mus. 13:50; 15:11; 5 Mus. 23:13) Nungnga dipaboa Bibel hian taringot i sude, hape baru 150 taon naung salpu do akka ilmuwan mamboto taringot penyebaran penyakit. Asing ni i, adong do muse patik taringot seks di bukku 3 Musa. Tujuanna lao manjaga halak Israel asa tetap sehat. (3 Mus. 12:1-6; 15:16-24) Dung hujaha i sude, gabe boi ma huattusi dilehon Debata pe patik tu halak Israel, asa tetap sehat do nasida. Jala pasu-pasuonna do akka halak na unduk tu parettana i. Gabe lam pos ma rohakku molo Bibel on memang tutu do sian Debata. Alai dang huboto dope goar ni Debata di tikki i.

Tikki kuliah dope au, pajuppang ma au tu sahalak borua na margoar si Lydie. Jatuh cinta ma au tu ibana. Dung i menikah ma hami di taon 1965. Kuliah dope au di tikki i. Di taon 1971, nga adong tolu gellengnami. Dung i tubu ma tolu nai, gabe onom ma sude. Burju hian do si Lydie. Denggan do diurus ibana keluarganami, jala sai didukung ibana do au.

Dung tolu taon au karejo di rumah sakit, hubahen ma klinikku sandiri. Dang sadia leleng, adong ma sapasang suami istri na hupaboa nakkin ro lao marubat. Tikki hubahen resep tu suamina,  didokkon istrina ma songon on, “Tolong ma jo Dokter, unang ma adong dibahen kandungan ni mudar di obatnami i da.” Tarsonggot do au. Husukkun ma, “Boasa?” Didok istrina i ma muse, “Saksi Jahowa do hami.” Dang hea dope huboto taringot Saksi Jahowa manang pendirian ni nasida taringot mudar. Dibukka istrina i ma Bibel jala dipatudu ma ayat lao patorakkon boasa nasida dang mamakke mudar. (Ul. 15:28, 29) Dung i, dipatudu nasida ma tu au aha na lao bahenon ni Harajaon ni Debata. Dang adong be sitaonon, sahit, dohot hamatean. (Pgk. 21:3, 4) Hudokkon ma, “I do na huharappon masa mulai sian na gelleng dope au! Alani i do au gabe dokter. Lomo rohakku mangurupi halak na marsitaonon.” Massai ganjang do pakkataionnami i, sappe sada satonga jom. Dung lao nasida, hudokkon ma di rohakku dang olo be au Katolik, ala nga huboto Jahowa do hape goar ni Debata!

Dung i, tolu hali ma nasida ro tu klinikku. Jala sahali pajuppang, olo do lobi sian sajom hami makkata-hatai. Huundang ma nasida ro tu jabukku, asa boi unggodang na huparsiajari taringot Bibel. Memang si Lydie pe olo do dohot marsiajar. Alai dang terima ibana tikki didok adong piga-piga ajaran ni Katolik na sala. Alani i, huundang ma sahalak pastor tu jabunami. Sappe borngin do hami berdebat taringot ajaran ni gareja. Holan Bibel do na dipakke hami. Ujungna gabe pos ma roha ni si Lydie, ajaran ni Saksi Jahowa do na sittong. Alani i, gabe lam tamba ma holongnami tu Jahowa, jala tardidi ma hami di taon 1974.

Adong do na muba di ngolukku dung huparsiajari taringot Jahowa dohot tujuanna manoppa jolma di tano on. Gabe manomba Jahowa ma na paling penting di ngolunami. Berupaya do hami pagodang-godangkon ianakkonnami sesuai tu prinsip ni Bibel. Diajarhon hami do tu nasida boha carana makkaholongi Debata dohot akka dongan. Hasilna gabe lam kompak ma hami sekeluarga.—Mat. 22:37-39.

Boi do diida gellengnami, sai sapandapot do au dohot si Lydie tikki mambahen keputusan. Diboto nasida do hata ni Jesus na mandok, “Molo olo dok ma ‘Olo’, molo dang dok ma ‘Dang’.” On do peraturan na marlakku di jabunami. (Mat. 5:37) Misalna, hea ma sada tikki borunami siakkangan naeng lao dohot akka donganna. Tikki i, 17 taon dope umurna. Alai dang dipaloas si Lydie ibana lao. Jadi didok sada sian donganna i ma tu ibana, “Molo dang dipaloas omakmu ho lao, sukkun ma tu bapakmu!” Alai  didokkon borunami i ma, “Dang adong guna ni i. Sai torus do halak i sapandapot.” Olo do mekkel au dohot si Lydie molo mangingot pengalaman sisongon i. Takkas ma, boi diida sude gellengnami sai sapandapot do hami mangulahon prinsip ni Bibel. Mandok mauliate do au tu Jahowa alana saonari godangan sian anggota keluargakku dohot do gabe sisomba Jahowa.

Memang manomba Jahowa do na paling penting di ngolukku. Alai lomo do tong rohakku mamakke kemampuanku lao mangurupi akka dongan. Alani i mendaftar ma au gabe dokter lao mangurupi keluarga Betel di Paris, jala di pudian ni ari mangurupi keluarga Betel di Louviers. Nungnga hampir 50 taon au gabe komuter di Betel. Godang do tong anggota keluarga Betel na gabe ale-alekku. Saonari piga-piga sian nasida nungnga marumur 90 taon lobi. Adong sada pengalaman na unik. Pajuppang ma au tu sahalak donganta na baru masuk Betel. Dang hurippu au do hape na mangurupi omakna tikki manubuhon ibana 20 taon naung salpu!

Lam tamba taon, lam tamba do holongku tu Jahowa. Apalagi ma molo huida songon dia Jahowa manogu-nogu dohot manjaga naposona marhite organisasina. Misalna hira-hira taon 1980, dibahen Punguan na Mangaradoti Organisasi ma sada program di Amerika Serikat. Tujuanna lao mangalehon penjelasan tu akka dokter taringot pendirian ni Saksi Jahowa tu mudar.

Dung i di taon 1988, dibentuk Punguan na Mangaradoti Organisasi ma sada departemen na baru di Betel, i ma Layanan Informasi Rumah Sakit. Departemen on ma na mengawasi Panitia Penghubung Rumah Sakit (PPRS). Mulana, holan di Amerika Serikat do dibentuk PPRS. Tujuanna lao mangurupi pasien Saksi asa mandapot perawatan medis tanpa darah. Alai di pudian ni ari, dibentuk ma PPRS di liat portibi on, termasuk ma di Prancis. Longang do rohakku mangida songon dia organisasi ni Jahowa mangurupi akka donganta na marsahit dohot na makkaporluhon bantuan!

Najolo gabe dokter do na paling penting di ngolukku. Alana gabe boi au pamaluppon akka halak na marsahit. Alai ujungna husadari ma, na paling penting i ma mangurupi akka halak asa mananda Jahowa jala manomba Ibana. Alani i dung pensiun au, merintis biasa do au dohot si Lydie. Dilehon hami do godang tikki setiap bulan lao marbarita na uli. Jala sahat tu saonari pe, berupaya do hami asa toktong semangat marbarita na uli.

Memang sahat tu saonari berupaya dope au mangurupi akka halak na marsahit. Alai husadari ma, dokter na paling malo pe di portibi on dang boi pamaluppon sude halak na marsahit jala mambahen dang adong be hamatean. Alani i, tarpaima do au haduan tikki dang adong be na marsahit jala dang adong be na mate. Annon di tano na imbaru, boi ma au marsiajar taringot toppaan ni Debata saleleng ni lelengna, termasuk ma i taringot cara kerja ni tubuh manusia. Saut ma sude na huharappon tikki dakdanak dope au. Pasti luar biasa do molo masa i sude!