Yaḇeaḇen ro taun 1941 ro kota Paris, Prancis. Yaba ro kina ḇena pipi nabor syadi ḇa. Yamarisen kaku fa yafarkor. Mḇoi, fyor yaḇe umur taun ri samfur, yasmai dafduf sor ḇe tuberkulosis, ma jadi fa yara ḇe rumfarkor ḇa. Dokter doḇe na yaḇarek monda kukro paru-paru yedi syambraḇ ḇa. Inja ro paik riḇeḇeso anya, yabuk swaf naḇor fa yawasya kamus ma yarower acara pendidikan ro Radio Sorbonne, ḇesasyar ya iso Universitas Paris. Rofyor dokter doḇe yaprei kwar ma bisa yara ḇe rumfarkor ya wer, yamarisen kaku. Fyor anya yakara fararur ḇe dokter ima fararur ḇepyum kaku nairi. Inja ro fafisu ani, roi yakara iso yaḇe yafnoḇek snonggaku ḇeduf sya fa siprei. Rofyor kamam yedi ifuken aya rosai cita-cita yedi ido, na yakofen ker ḇe i yamarisen fa yakḇe dokter. Cita-cita yedine yamam na ḇe roi ḇefandun kaku ro kankenem yedi.

Kina nggoḇesyakam nggoro agama Katolik. Ḇape yakfawi pyum Allah ḇaim, ma yana fakfuken naḇor mboi yasmai kankarem na ḇaim. Rofyor yafarkor fa yaḇe dokter ro universitas, insape yakyar kankenem ine isya snar Allah iso ḇefrur na.

Yaswarepen fyor yaḇe pake randak mikroskop fa yabukimam sel ro tulip pampen. Yamanen kaku moḇ sel ani kyadaunwarek manggundi fyor moḇ na nasam ḇaido napnunek. Yamam kako roi sap ḇe sitoplasma (zat oso ḇero sel ani) nari imaryoi fyor isya ro moḇ ḇemasen ma nari kyamḇres kaḇer fyor isya ro war ḇesren na. Ma snar sel ani syambraḇ fa ifrur roi ḇeradine ma roi ḇesena, inja roi ḇekenem ḇekasun mgun sya bisa sikenem ro moḇ risai monda. Fararur ḇesamswen ro sel anna kam, nafrur fa yakyar kankenem ine isya ro manggundi ḇa.

 Ro taun ḇesuru fyor yaro farkarkor ḇekaki ya, yamam roi naḇor syadi wer ḇefasnai Allah ima isya kaku. Rofyor nggofarkor ḇaken ro snonggaku koine, nggofarkor nyan moḇsa ḇrayof koḇena nafrur fa brampin koḇena bisa kuper ma kofos na. Moḇ otot, urek, ma kor ḇero ḇrayof koḇena nafararur kayam rai, inema roi ḇepyum fafayaḇa. Imnis raris, urek ono naisya nefes otot ro ḇrayof koḇena kuker kor ḇesuru ro brampin koḇena. Ro dine, urek na nerwas ḇe suru inja swaf na naisya. Ramnai, urek ḇese ḇero sop ya syoyuk swaf ani ma rya ḇe brampin koḇena pum ya. Fasfesepen ḇesambraḇ nane nafrur fa urek anna ndraḇe moḇo ḇa, mḇoi naisya fanam ḇe kor ḇero brampin koḇena. Roi annane naisya ḇa ido, nari urek ḇero ḇrampin koḇena jadi fa kofnak na ḇa inja na kuper na wer ḇa. Ine nbairo ḇefrur ḇaken koḇenane ima Manḇedaw ḇefawinanem kaku.

Roi ḇefrur fa yamanen Manḇedaw koḇedi syadi wer iso rofyor yafarkor moḇsa kapira oso bisa iref knaref ro manggundi fyor snari kyapar i kwar. Fafisu ryo snari kapar ḇyedi, na iref knaref ro manggundi ḇa mboi ismai wam ro snari roro snepum ḇyedi. Iso ḇefnai fa balon udara ḇekasun kaku ḇero paru-paru ḇyedi, naser wam ya ḇaim. Minggu riḇeḇeso fanamnam kapira ani ḇyeḇeaḇen ya, cairan sap ḇe surfaktan na nekawef bar ḇandum balon udara ani. Cairan surfaktan nafrur fa bar ḇandum ro balon udara ani na ikrofyaye ḇa ma bisa iba mundi fyor wam na nsun ro na. Rofyor kapira ani ḇyeḇeaḇen ya, mura insape ifawi iref knaref ido, mgir ḇero ḇarmor ḇyedi nari ḇyas ḇa inja rik na namḇran ḇe paru-paru ḇyedi. Ramnai, wam na nani nsun ḇeri ḇe balon ḇekasun ro paru-paru ḇyedi. Mura kapira ani na iref knaref ro manggundi.

Yamarisen kaku fa yamambir pyum Manḇedaw ḇefrur roi ḇeba syadi ine. Inja yawasya pyum Refo ya. Sasoser Allah byuk ḇe er Israel nasyadi ro taun ri 3.000 naiwara, ḇekur saranden ma pararei ro ḇaken, yamanen kaku na. Imnis raris, Allah byuk parenta ḇe si insama rofyor sisawen war ḇeba ido fandun fa sḇayek na. Byuk parenta kako fa simyaren sḇan siḇrasna ma simasi. Ikofen kako mansei ḇesmai dafduf ḇemun pampan ido fandun fa sḇarek ḇesisye. (Im. 13:50; 15:11; Ul. 23:13) Fafisu iwara, Refo ikofenḇair kwar moḇsa dafduf na bisa nakren ḇe ḇesesya, mboi manfawawi sya insape sifawi roi ine indokada taun ri 150 aniwara. Mḇoi sasoser ine monda ḇa, sasoser ḇekur farbakḇuk ḇero syap Imamat kako nafnoḇek er Israel sya insama siduf ḇa. (Im. 12:1-6; 15:16-24) Inja yakara Manḇedaw koḇedi byuk sasoser anna ḇe er Israel sya faro payamyum sena ma byuk ḇarakas faro snonggaku ḇesouser parenta Ḇyena. Inja yakyar kaku Refo ima ryama ro Allah, mḇoi fafisu ya yafawi snonsnon Ḇyedi ḇaim.

Rofyor yafarkor fa yaḇe dokter anya, yasrow kuker Lydie i, ma yamarisen i. Nufarḇuk ro taun 1965, ma fafisu ya yamnai ro farkarkor yedine ḇaim. Ro taun 1971, aya ma Lydie nuna romawa ri kyor kwar, ma ḇarpur mura nuna romawa ri kyor wer. Lydie myam pyum kina nuḇedi, ma isaramper fararur yedi ḇe dokter ine.

 Rofyor yafararur ro rumḇeduf taun ri kyor raposa, yaḇas klinik fa yafararur ro manggundaya. Fyoro ḇa, imḇeswa oso surama fa suḇepriksa. Suiso yafawar ro randak ani. Fyor imḇe yafas resep obat faro eḇe snon ya, eḇe ḇin ya ikofen, ”Dokter, numewer obat sifrur ro rik na.” Inja yakandor kaku ma yafuken, ”Rosai ḇefnai i?” Kyarem ḇo doḇe, ”Numa Saksi-Saksi Yahwe sinu.” Fyor ani, yakrower ḇaim kuker Saksi-Saksi Yahwe sya ma rosai mamam sena kuker rik na. Swari dun Refo ya ma ikofenḇair mnuk-mnuk ḇefasnaḇair sai ḇefnai fa sumewer faro oḇat sifrur ro rik na. (Kis. 15:28, 29) Ramnai, swari su sukofenḇair ḇe aya rosai nari Karajan Allah ifrur ya. Karajan ani nari ipyos kandera, dafduf, ma marmar ya. (Why. 21:3, 4) Yaryaḇ kaku bo yakofen ḇe su, ”Roi mukofen nane iso roi yamarisen kaku fyor yaḇaḇa kaker ya! Yamarisen yaḇe dokter ine snaro imḇe yafnoḇek snonggaku ḇeduf sya.” Yamarisen kaku rosai sukofen na, inja nggofafyar swaf oras oser syadi. Rofyor suyawos ḇe aya ramnai, yamewer yaro Katolik werdi, ma insape yafawi kaku Manḇedaw koḇedi snonsnon Ḇyedi iso Yahwe!

Imbeswa ḇe Saksi ansuya surama kali ri kyor ro klinik yedine. Surama ido na nggofafyar isyadi swaf oras oser. Yor su fa surama ḇe rum yedi insama nggona swaf nabor fa nggawos Refo ine. Lydie i kako iso ro farkarkor Refo nggoḇedi, ma ifawi farkarkor ḇero Katolik na namnis kuker roi Refo fyarkor na ḇa mḇoi imewer ikofen kaku na ri. Inja, yor pastor oso fa ryama ḇe rum nuḇedi. Nggawos famfaḇri farkakor gereja na isof ro romfaḇru, ma nggoḇepake monda Refo ya. Roi nggawos ani nafrur fa Lydie ikyar Saksi-Saksi Yahwe sima sfarkor kakaku ya. Rofyor ani, nuswar Yahwe I inja nubuk kankenem nuḇedi ḇe I kuker nuḇebaptis ro taun 1974.

Snar yafawi kwar Allah marisen Ḇyena faro snonggaku sya, inja rosai yamam ḇe roi ḇefandun syadi ro kankenem yedi nefadwer. Aya ma Lydie numam monda faro fararmyan nuḇena ḇe Yahwe I. Nuna wos oser fa nufaduru romawa nuḇesi imnis farkankin ro Refo ya. Ma nufarkor si kako fa siswar Yahwe I ma snonggaku ḇesesya, inja kina nggoḇedi nggofanam syadi wer.​—Mat. 22:37-39.

Romawa nuḇesi bisa smam aya ma Lydie nufararur kayam ro roi risai monda. Inja sifawi roi nuyap kwar ro kina nggoḇedi isoine: ”Imḇo” ido imḇo ma ”Oroḇa” ido oroḇa, imnis Yesus wos  ḇyena. (Mat. 5:37) Fyor iwara inaikir nuḇedi oso ḇyeumur taun ri 17, imarisen iso bati ḇyesya. Ḇape, Lydie imewer fa iso si. Inja bati ḇyedi oso ikofen ḇe i, ”Snami imewer ido, wafuken pan kmami!” Mḇoi inaikir nuḇedi ikofen, ”Na jadi ḇa, na kamam imewer kako.” Aya ma Lydie nuswarepen fawar anna ido, na numbrif ker. Romawa ri wonem nuḇesi na smam nufararur kayam fa nusouser farkankin ḇero Refo na. Kirine nukofen kasumasa snaro, ro kina nggoḇedi sibor sfarmyan ḇe Allah Yahwe I.

Yaḇe yafnoḇek ḇeduf sya fa siprei ro dafduf sena, yamam na ḇe roi ḇefandun kaku ro kenem yedi wer ḇa, rariryano yamarisen yabuk fawawi ḇe dokter ine fa yafnoḇek Allah kawasa Ḇyesi. Inja, yamarisen fa yafarmyan ḇe dokter ro Betel ḇero Paris ma ḇarpur wer ro Betel ḇebabo ro Louviers. Yafnoḇek ḇe komuter ro swaf indokada taun ri 50. Ma ro swaf ani yafanam kaku kuker ḇefararur ro Betel ḇebor sya ma ḇeḇeso sya seumur taun ri 90 kwar. Yana fawar ḇepyum kako fyor yasrow kuker oso ḇesun babo ro Betel. Mgofawi ke, aya iso ḇefnoḇek pyan snari fa kyapar i indokada taun ri 20 aniwara!

Yaswar syadi Yahwe I fyor yamam moḇsa fyarkin ma kyadaunwarek kawasa Ḇyesi roro organisasi Ḇyedi. Ro taun 1980 ḇebo, Raryur Naek Ḇefarkin sya sifrur fasasos oso ro Amerika Serikat insama dokter ma perawat syakam bisa sifawi pyum moḇsa mamam Saksi Yahwe sya kuker rik ine rai.

Ramnai ro taun 1988, Raryur Naek Ḇefarkin sya sifrur departemen ḇebabo oso ro Betel sap na ḇe Layanan Informasi Rumah Sakit. Departemen ani myamwarek Panitia Penghuḇung Rumah Sakit (PPRS). Randak ya, sifrur PPRS ine ro sup Amerika Serikat monda fa sifnoḇek Saksi ḇeduf sya insama sismai pengoḇatan kuker rik ḇa. Mura sifrur fasasos PPRS ro moḇ nakam ro supswan ḇesiper, ro sup Prancis kako. Yamanen kaku moḇ Yahwe organisasi Ḇyedi fyasnai sawarwar fa isaramper pyum naek srar ḇeduf ma ḇefandun farfnoḇek sya.

Randak ya, yamam fararur ḇe dokter ine ḇe roi ḇefandun syadi ro kankenem yedi, snar bisa yafnoḇek snonggaku ḇeduf sya fa siprei. Ḇape ḇarpur mura yafawi roi ḇefandun syadi iso yafnoḇek si fa smambir ma sfarmyan ḇe Allah Yahwe I, Knam ro kankenem ya. Yaḇe pansyon ramnai, aya ma Lydie nufarmyan ḇe perintis biasa. Nubuk swaf nabor ro paik ḇe paik fa nubaryas angginem ḇepyum Karajan Allah. Kirine, nuḇesewar kaku fa nuso ker ro fararur ḇeyun ḇe kankenem ine.

Isof ro kirine, yaḇesewar kaker fa yafnoḇek snonggaku ḇeduf sya. Ḇape yafawi kaku, dokter sya sepande kaku rariryano jadi fa sifrur mnai dafduf nakam ḇa ma marmar ya ḇa kako. Inja, yawaf kaku fafisu dafduf ma marmar ya naisya wer ḇa. Kero wer dunya babo ryama, ma nari yana swaf nabor kaku fa yafarkor roi nabor syadi fa yafawi Allah fararur Ḇyena, imnis raris moḇsa ifrur ḇaken koḇena fa napyum kaku rai. Kirine, roi yamarisen kaku fyor yabaḇa kaker anya nakam ndarirya ḇaim. Ḇape yakyar, kero wer roi ḇepyum syadi ro roi yamarisen nakam na ndarirya kaku!