Mi mi bon long 1941, long Paris, Franis. Famle blong mi oli no gat plante samting. Mi mi laekem blong lanem ol niufala samting. Be taem mi gat 10 yia, dokta i faenemaot se mi gat TB mo mi mas stop blong skul. !Long taem ya, mi harem nogud tumas! Dokta i talem se mi mas stap nomo long bed, from we sik ya i mekem lang blong mi i no strong. Taswe, blong plante manis mi stap ridim diksonari mo lesin long edukesen program blong yunivesiti blong Paris, we i stap kamaot long Radio Sorbonne. Taem dokta i talem long mi se sik blong mi i kam gud, mo se mi save gobak long skul, mi glad tumas. Mi stap tingting se: ‘!Man, wok blong dokta i gud tumas!’ Stat long taem ya, drim blong mi hemia blong givhan long ol man we oli sik. Taem papa blong mi askem se mi wantem mekem wanem long laef blong mi, oltaem mi givim sem ansa nomo, mi talem se: “Mi wantem kam wan dokta.” So impoten samting we mi wantem mekem long laef blong mi, hemia blong kam wan dokta.

Famle blong mi i katolik, be mi no save plante samting long saed blong God, mo i gat plante kwestin we mi no faenem ansa blong olgeta. Taem mi stat blong stadi from meresin long yunivesiti, long taem ya nao mi luksave se i gat wan Krieta.

Mi tingbaot faswan taem we mi yusum maekroskop blong lukluk ol smosmol sel long plant ya Tulip. Mi sapraes blong luk olsem wanem ol smosmol sel ya oli save protektem olgeta wan long hot taem mo koltaem. Mo tu, mi luk olsem wanem cytoplasm (hemia wan samting insaed long ol sel) i kam smol taem i stap long sol, mo i kam bigwan taem i stap long klin wota. Ol samting ya mo plante narafala moa, oli mekem se ol smol laef samting oli save gohed blong laef nomata se weta  i stap jenis. Taem mi luk olsem wanem ol smosmol sel ya oli wok, mi stat blong luksave se laef i no kamaot olsem nomo.

Long seken yia taem mi gohed blong stadi from meresin, mi luk plante moa pruf we i soemaot se i gat wan God. Taem mifala i stadi long bodi blong yumi, mi lanem olsem wanem han blong yumi i mekem se yumi naf blong benem o stretem ol fingga blong yumi. Fasin ya we ol masel blong yumi oli joen wetem ol bun, mo oli wok tugeta i nambawan tumas. Eksampol, mi lanem se i gat wan string we i joenem wan long ol masel blong han blong yumi, i go long seken bun blong fingga blong yumi. String ya i seraot long tu, mo i mekem se i gat spes blong wan narafala string i pas gud nomo aninit long hem i go kasem en blong fingga. Ol string ya oli pas klosap nomo long ol bun blong fingga. Sipos ol string oli no wok long fasin ya, ol fingga blong yumi oli no save wok gud. Hemia i mekem mi luksave klia se i mas gat wan man we i waes, we i disaenem bodi blong yumi.

Mi mi sapraes moa long wok blong Krieta ya taem mi lanem olsem wanem wan bebi i stat blong pulum win, jes afta we hem i bon. Taem bebi i stap long bel blong mama blong hem, hem i no nid blong pulum win, from we hem i kasem oksijen long mama blong hem. From samting ya, i no gat win yet insaed long ol smosmol bag blong win insaed long lang blong hem. Be sam wik bifo we hem i bon, i gat wan spesel wota i kavremap ol smosmol bag ya. Biaen, taem bebi i bon mo i pulum faswan win blong hem, plante nambawan samting i hapen. Wan hol long hat blong hem i sat, mo hemia i mekem se blad i save go long lang blong hem. From we i gat spesel wota long ol bag we i stap long lang blong hem, kwiktaem nomo ol bag ya oli fulap long win, mo hemia i mekem se bebi ya i save pulum win hem wan.

Mi wantem tumas blong kasemsave long Krieta ya we i wokem ol nambawan samting ya, so mi stat blong ridim gud Baebol mo mi traehad blong kasemsave long hem. Mi sapraes long ol loa long saed blong helt we God i givim long ol man Isrel bitim 3,000 yia i pas. God i talem long ol man Isrel blong oli mas berem sitsit blong olgeta, oli mas swim oltaem, mo sipos i gat wan man we i gat saen blong wan sik we i save pasem i go long narafala, hem i mas kwarantin. (Lev. 13:50; 15:11; Dut. 23:13) Baebol i tokbaot ol samting ya longtaem finis, be long ol 150 yia we i pas, ol saentis oli jes fanemaot olsem wanem ol sik oli pas. Mo ol loa long saed blong seks we buk blong Levitikas i tokbaot, i halpem ful nesen blong Isrel blong oli stap helti. (Lev. 12:1-6; 15:16-24) Mi luksave se Krieta i givim ol loa ya long ol man Isrel blong halpem olgeta, mo sipos oli obei long ol loa ya bambae hem i blesem olgeta. Hemia i mekem mi mi sua fulwan se Baebol i kamaot long God, wan God we long taem ya mi no save nem blong hem yet.

Taem mi stap skul long yunivesiti, mi mitim wan yangfala woman we nem blong hem Lydie, mo mi lavem hem. Mitufala i mared long 1965, we long taem ya mi stap skul yet. Mo long 1971, mitufala i gat 1 boe mo 2 gel. Afta long hemia, mitufala i gat 3 moa pikinini. Lydie i sapotem gud mi long wok blong mi olsem wan dokta mo long famle.

Mi wok long wan hospital blong 3 yia bifo we mi statem klinik blong mi. Smoltaem afta, olsem we mi tokbaot long stat, wan kapol i kam long klinik blong mi blong kasem tritmen. Taem mi  wantem raetemdaon meresin we hasban ya bambae i tekem, waef blong hem i talem se: “Plis Dokta, i no mas gat blad long meresin ya.” Mi sapraes mo mi talem se: “?Tru, from wanem?” Hem i talem se: “Mitufala i Witnes blong Jehova.” Mi neva harem ol man oli tokbaot ol Witnes blong Jehova, o tijing blong olgeta long saed blong blad. Woman ya i tekem Baebol blong hem mo i soem ol vas we i pruvum from wanem tufala i no wantem tekem blad. (Wok 15:28, 29) Biaen, hem mo hasban blong hem i soem long mi samting we Kingdom blong God bambae i mekem, we bambae i no moa gat fasin safa, sik, mo ded. (Rev. 21:3, 4) Mi glad tumas, nao mi talem se: “!Samting we yutufala i stap talem long mi, hemia nao samting we mi drim from taem mi pikinini!” Mi kam wan dokta from we mi wantem givhan long ol man we oli stap safa. Mi mi glad tumas, mekem se mifala i storian blong wan aoa haf. Afta we kapol ya i aot, long hat blong mi, mi no moa wantem stap olsem wan katolik. !Mo mi lanem se Krieta ya we i mekem ol nambawan samting blong sapraes ya, i gat wan nem, hemia Jehova!

Witnes kapol ya i kam tri taem long klinik blong mi, mo long trifala taem ya, mifala i storian blong bitim wan aoa. Mi invaetem tufala i kam long haos blong mi blong mifala i save storian moa long saed blong Baebol. Nating se Lydie i joen wetem mifala long Baebol stadi ya, be hem i no agri fulwan se sam long ol tijing blong katolik we mitufala i lanem bifo, oli rong. Taswe, mi invaetem wan pris i kam long haos blong mifala. Mifala i yusum Baebol blong pruvum ol tijing blong jos go kasem let long naet. Storian ya i pruvum long Lydie se ol Witnes blong Jehova oli stap tijim trutok. Afta long taem ya, mitufala i lavem Jehova moa, mo mitufala i baptaes long 1974.

Taem mi lanem stamba tingting blong God long saed blong ol man, hemia i jenisim tingting blong mi long saed blong ol samting we oli moa impoten long laef blong mi. Samting we i moa impoten long laef blong mi mo Lydie, hemia blong mekem wok blong Jehova. Mitufala i gat strong tingting blong tijim ol pikinini blong mitufala folem ol rul blong Baebol, mo blong oli lavem God mo ol man. Mo hemia i mekem se mifala i joen gud tugeta olsem wan famle.—Mat. 22:37-39.

Taem mi mo Lydie i tingtingbak, plante taem mitufala i laf from mitufala i tingbaot olsem wanem ol pikinini oli luksave se oltaem mitufala i agri long ol desisen blong mitufala. Oli save gud tok ya we Jisas i talem se: “‘Yes’ we yufala i talem i mas minim ‘yes’ nomo, mo ‘No’ we yufala i talem i mas minim ‘no’ nomo,” mo hemia i olsem wan rul tu long haos blong mifala. (Mat. 5:37) Eksampol,  taem bigfala gel blong mitufala i gat 17yia, Lydie i no letem hem i go aot wetem wan grup blong ol yangfala. Ale wan long ol yangfala i talem se: “!Sipos mama blong yu i no letem yu, yu go askem long papa blong yu!” Be gel blong mitufala i ansa se: “Hemia bae i sem mak nomo from we oltaem tufala i agri long ol desisen blong tufala.” Yes, ol sikis pikinini blong mitufala oli luksave se mitufala i gat wan tingting nomo taem mitufala i folem ol rul blong Baebol. Mitufala i talem tangkiu long Jehova, from we tede plante long famle blong mifala i wosipim Jehova.

Nating se trutok i jenisim tingting blong mi long saed blong ol impoten samting we mi wantem mekem long laef blong mi, be yet mi wantem yusum save blong mi olsem wan dokta blong givhan long ol man blong God. Taswe, mi mekem volontia wok olsem wan dokta long Betel long Paris mo biaen long niufala Betel long Louviers. Mi bin mekem wok olsem komiuta long Betel klosap 50 yia. Long taem ya, mi faenem plante gudfala fren we oli wok long Betel, we sam long olgeta naoia oli gat bitim 90 yia. Wan dei, mi sapraes taem mi mitim wan niufala Betelaet we mi fanemaot se 20 yia i pas, mi nao mi givhan long mama blong hem taem i bonem hem.

Long ol yia we i pas, taem mi luk olsem wanem Jehova i yusum oganaesesen blong hem blong lidim mo protektem ol man blong hem, hemia i mekem se mi lavem hem moa. Long stat blong ol yia 1980, Hed Kampani i putumap wan program long Yunaeted Stet blong givhan long ol dokta mo olgeta we oli wok long hospital, blong oli kasemsave long desisen blong ol Witnes blong no tekem blad.

Biaen long 1988, Hed Kampani i putumap wan niufala dipatmen long Betel, hemia Hospital Infomesen Dipatmen. Fastaem, dipatmen ya we i lukaot long Komiti Blong Toktok Wetem Ol Dokta i stap long Yunaeted Stet, blong halpem ol Witnes blong oli save faenem wan dokta we i respektem desisen blong yumi long saed blong blad. Be biaen, taem oli mekem arenjmen se Komiti ya i save stap tu long ol narafala kantri long wol, oli putumap Komiti ya long Franis. !Mi sapraes tumas blong luk olsem wanem oganaesesen blong Jehova i sapotem ol Brata mo sista we oli sik, long taem we oli nidim!

Fastaem, samting we i moa impoten long laef blong mi hemia blong mekem wok blong dokta. Be biaen, mi luksave se samting we i moa impoten hemia blong givhan long ol man blong oli save Jehova God we i stamba blong laef, mo blong oli wosipim hem. Afta we mi ritae, mi mo Lydie i mekem wok blong fultaem paenia mo mitufala i spenem plante aoa evri manis blong talemaot gud nius blong kingdom. Mitufala i stil mekem bes blong mitufala yet blong joen fulwan long wok ya we i save sevem laef blong ol man.

Mi gohed blong mekem samting we mi naf blong mekem blong givhan long olgeta we oli sik. Be mi luksave tu se wan beswan dokta i no naf blong finisim olgeta kaen sik mo blokem man blong i no save ded. Taswe, mi luk fowod long taem ya we bambae i no moa gat man i safa, i sik, mo i ded. Long niufala wol ya we i stap kam klosap moa, bambae mi naf blong lanem plante samting long saed blong ol kriesen blong God, inkludum nambawan fasin ya blong hem blong disaenem bodi blong yumi. Yes, long taem ya, drim we mi bin gat taem mi pikinini bambae i kamtru fulwan. !Mi sua se long fiuja bambae i gat plante moa blesing yet!