Del 1941, ya nace yo na Paris, France. Gendeh rico el diamon familia. Quierre-quierre yo aprende poreso imagina si paquemodo yo de triste cuando na edad de diez ya tiene yo enfermedad de tuberculosis y necesita yo descanza entra escuela. Ya habla el maga doctor que necesita yo esta na cama para evita cansa el de mio pulmon. Poreso, por cuanto meses yo ta le diccionario y ta oi maga programa na Radio Sorbonne del University of Paris. Cuando ya habla el de mio doctor que bueno ya yo y puede ya yo bira na escuela, bien alegre gayot yo. Ya habla yo na de mio mismo cuerpo, ‘Bueno gayot el cosa ta hace el maga doctor!’ Desde aquel tiempo, quierre yo cura con el maga gente na diila maga enfermedad. Si ta pregunta el de mio tata si cosa yo quierre hace si queda yo grande, igual lang pirmi el de mio contestacion, “Quierre yo queda doctor.” Ese ambicion amo el ya queda de con todo importante na de mio vida.

Catolico el diamon familia. Pero, nuay yo tanto cosa sabe acerca con Dios y manada yo maga pregunta que no sabe yo el contestacion. Ya queda lang yo convincido que ya crea con el vida despues yo principia estudia medicina na universidad.

Ya acorda yo con el primer vez cuando ya observa yo con el maga celula del tulip na microscope. Bilib yo cuando ya puede yo mira si paquemodo el maga celula ta protege con este mismo contra na calor y frieldad. Ya observa tambien yo que el cytoplasm (un substance adentro del celula) ta queda diutay si ta pone con este sal y ta queda grande si ta pone con este na puro agua. Por causa na este abilidad y na manada pa otro, el maga organismo ta puede adapta maskin pa ta cambia el diila alrededor. Cuando ya observa yo si paquemodo  de complicao el cada celula, ya queda yo convincido que nuay lang basta existi el vida.

Durante el de mio segundo año na universidad, ya puede yo mira mas manada evidencia que ta existi el Dios. Cuando ya estudia kame con el cuerpo del gente, ya aprende kame que por causa na diaton brazo (forearm), ta puede kita dubla y hace derecho con el diaton maga dedo. Bien maka-bilib gayot el posicion del maga muscle, ligament y tendon. Por ejemplo, ya aprende yo que el maga tendon ta conecta con el uno del maga muscle na diaton brazo na ika-dos bukuk del dedo. Este tendon ta dividi na dos que ta forma un bridge y ta permiti con el otro tendon que conectao na punta del dedo que man slide abajo con ese. El maga fuerte tissue ta agarra tambien con el maga tendon cerca na bukuk del dedo. Si nuay hace con el diaton maga dedo na este manera, el maga tendon hay queda apretao y derecho y gendeh enbuenamente man function el diaton maga dedo. Claro gayot yo ya puede mira que bien inteligente el quien ya diseña con el cuerpo del gente.

Mas yan bilib yo con el quien ya diseña con el vida cuando ya estudia yo si paquemodo ta nace el un bata. Cuando na vientre pa el bata, gendeh este necesita resulla cay ta saca este oxygen na de este nana. Poreso, nuay pa aire el alveoli, el maga diutay-diutay bag na pulmon. Cuanto semana antes nace, ta tiene especial liquido adentro del cada diutay bag. Despues, cuando nace ya el bata y principia resulla, tiene cosa ta sucede que bien maka-bilib. Ta cerra el agujero na corazon del bata para guinda el sangre na pulmon. Por causa na aquel especial liquido, el maga diutay bag pronto ta llena de aire. Poreso, el bata ta puede resulla solo-solo.

Quierre yo conoce con el Persona quien ya crea con ese maga marvelloso cosa poreso ya principia yo serioso le con el Biblia. Yan bilib yo con el maga ley acerca na salud que ya dale el Dios con el nacion de Israel mas de 3,000 año ya el ya pasa. Ya manda el Dios con el maga Israelita que entera con el diila suciu, regular laba con el diila mano na agua y man quarantine con el maskin quien persona quien tiene sintomas de contagioso enfermedad. (Lev. 13:50; 15:11; Deut. 23:13) El Biblia ya menciona acerca con este maga cosas pero el maga cientista ya discubri si paquemodo tan calayat el maga enfermedad del maga reciente siglo lang. Ya sabe tambien yo que el maga ley acerca na sexo na libro de Levitico ya ayuda para tiene buen salud el nacion. (Lev. 12:1-6; 15:16-24) Ya puede yo realiza que el Creador ya dale con este maga ley na maga Israelita para na diila bien y ya bendici le con aquellos obediente na de suyu maga mandamiento. Ya queda yo convincido que el Biblia inspirao de Dios—el Dios que no sabe yo el nombre na aquel tiempo.

Mientras na universidad yo y ta estudia medicina, ya conoce yo con el un joven mujer que si Lydie, con quien ya ama yo. Ya casa kame del 1965 cuando ta estudia pa yo. Pagka-1971, tres ya el diamon anak de Lydie na seis que tiene kame ahora. Ya suporta gayot conmigo si Lydie na de mio trabajo como un doctor y adentro na diamon familia.

Ya trabaja yo na hospital por tres año antes yo abri de mio clinic. Despues nuay tarda, el un maridable, el dos paciente que ya menciona yo  na introduccion, ya anda na de mio clinic. Cuando para escribi ya yo con el reseta del marido, el mujer ya habla: “Doc, pabor no inclui sangre na medicina.” Ya espanta yo y ya pregunta: “Deverasan? Porque?” Ya contesta le: “Maga Testigo de Jehova kame.” Nuay pa yo oi acerca na maga Testigo de Jehova o el cosa sila ta enseña acerca na sangre. El mujer ya saca con el de suyu Biblia y ya dale conmigo mira con el basejan del diila decision acerca na sangre. (Act. 15:28, 29) Despues, ele y el de suyu marido ya dale conmigo mira si cosa hay hace el Reino del Dios; hay quita este con el sufrimiento, enfermedad y muerte. (Rev. 21:3, 4) “El cosa ustedes ta habla conmigo amo el de mio ambicion cuando bata yo!” ya habla yo. “Ya queda yo un doctor para alivia con el sufrimiento del maga gente.” Ya gusta gayot yo con el cosa kame ya discuti poreso yan cuento kame por un hora y media. Cuando ya sale el maridable, sabe yo na de mio corazon que gendeh mas yo Catolico y ya aprende yo que el Creador con quien yo bien bilib tiene gale nombre—Jehova!

Tres beses pa kame yan mirajan pati el Testigo maridable na de mio clinic y cada vez tan cuento kame por mas de un hora. Ya invita yo kanila na diamon casa para tiene kame mas grande tiempo para discuti con el Biblia. Maskin pa ya conforma si Lydie que man junto na diamon Bible study, gendeh le ta admiti que mali el cuanto del maga doctrina del Catolico que ya enseña kanamon. Poreso, ya invita yo un padre na diamon casa. Yan debate kame acerca el maga enseñanza del iglesia maskin bien denoche ya, usando lang el Biblia. Ese discusion ya convinci con Lydie que el maga Testigo de Jehova ta enseña el verdad. Despues de ese, mas ya queda hondo el diamon amor para con Dios Jehova poreso ya decidi kame que bautiza del 1974.

Ya tiene gayot grande efecto na de mio maga prioridad el cosa yo ya aprende acerca na proposito del Dios na maga gente. Para kanamon de Lydie, el servicio con Jehova amo el ya queda de con todo importante cosa na diamon vida. Determinao kame que hace engranda con el diamon maga anak asegun na maga principio na Biblia. Ya enseña kame kanila que ama con Dios y con el maga gente poreso ya queda kame mas cerca como un familia.—Mat. 22:37-39.

Si ta pensa kame diamon pasada, ta puede kame re de Lydie cay para na diamon maga anak pirmi igual el diamon maga decision como mayores. Sabe sila que ta sigui na diamon casa con el instruccion de Jesus que “asigura que el de ustedes ‘Si’ quierre decir si, el de ustedes ‘Gendeh,’ gendeh.” (Mat. 5:37, NWT) Por ejemplo, cuando 17  el uno del diamon maga anak mujer, nuay con ele permiti si Lydie que sale junto con el grupo del maga jovenes. El un mujer na grupo ya habla con el diamon anak, “Si nuay contigo permiti el de tuyu nana, atraca con el de tuyu tata!” Pero, el diamon anak ya contesta con ele: “Nuay siempre se diferencia. Pirmi igual el diila decision.” Ya puede mira el diamon seis anak que igual kame ta aplica con el maga principio na Biblia. Ta rindi kame gracias con Jehova que ahora manada miembro del diamon familia el ta sirvi con Jehova.

Maskin pa el verdad ya cambia con el de mio maga prioridad, quierre yo usa con el cosa yo ya aprende como un doctor para ayuda con el maga siervo del Dios. Poreso, yan voluntario yo sirvi como un doctor na Bethel na Paris y despues, na nuevo Bethel na Louviers. Cerca 50 año ya yo tan commute para na Bethel. Ya tiene yo manada cerca amigo y amiga na familia Bethel y el cuanto kanila mas de 90 ya el edad. Nuay tambien yo expecta cuando ya puede yo conoce con el un nuevo Bethelite. Ya sabe yo que iyo gale el quien ya dale pari con el de suyu nana cuando priñada este con ele, maga 20 año ya el ya pasa!

Mientras ta pasa el tiempo, mas ta queda hondo el de mio amor con Jehova cuando ya puede yo observa si paquemodo le ta guia y ta protege con el de suyu maga siervo por medio na de suyu organizacion. Del maga 1980, el Cuerpo Gobernante ya hace un programa na United States para ayuda con el maga doctor para mas entende con el decision del maga Testigo de Jehova que gendeh abona sangre.

Despues del 1988, el Cuerpo Gobernante ya hace un nuevo departamento na Bethel que ta llama Hospital Information Services. Del primero, ese departamento ya mira con el maga Hospital Liaison Committee (HLC) que ya hace na United States para ayuda con el maga Testigo paciente para busca doctor quien ta respeta con el diila decision acerca na sangre. Cuando ya extende con este na entero mundo, ya tiene tambien maga HLC na France. Bilib gayot yo si paquemodo el organizacion de Jehova amable ta suporta con el maga enfermo hermano y hermana na tiempo de necesidad!

De antes, el de mio trabajo como un doctor amo el de con todo importante cosa na de mio vida. Pero mientras ya examina yo con el de mio maga prioridad, ya puede yo realiza que mas importante el espiritual curada—ayuda con el maga gente que conoce y sirvi con el Tuburan del vida, si Dios Jehova. Despues yo man retire, iyo y si Lydie ta dale manada hora cada mes para predica con el buen noticia acerca del Reino del Dios como maga regular pioneer. Ta hace siempre kame el diamon de con todo bueno na este trabajo que ta salva con el vida del maga gente.

Ta continua yo hace el cosa yo puede para ayuda con el maga enfermo. Pero, ya realiza yo que maskin el de con todo bueno doctor gendeh puede cura con el todo enfermedad o sangga con el muerte. Poreso, ta espera yo con el tiempo cuando nuay mas ya el dolor, enfermedad y muerte. Na ese nuevo mundo que bien cerca ya llega, hay puede yo aprende hasta para cuando acerca con el maga creacion del Dios, incluido el marvelloso manera que ya diseña le con el cuerpo del gente. Nuay pa completamente sucede el cosa yo quierre cuando bata. Pero, convincido yo que sucede gayot este!