Natawo ko niadtong 1941 sa Paris, France, sa dili dato nga pamilya. Ganahan kong moeskuwela, maong naguol kaayo ko nga kinahanglan kong moundang ug eskuwela kay nasakit kog TB niadtong 10 anyos ko! Miingon ang mga doktor nga maghigda lang ko pirme aron dili mahago ang akong baga. Mao nga sulod sa pipila ka bulan, nagsige lang kog basa ug diksiyonaryo ug naminaw ug mga programa sa University of Paris nga gi-broadcast sa Radio Sorbonne. Dihang giingnan ko sa doktor nga naayo na ko ug puwede na kong mobalik ug eskuwela, nalipay kaayo ko. Nakaingon ko, ‘Nindot ang ginahimo sa mga doktor!’ Sukad niadto, nangandoy ko nga ayohon ang sakit sa mga tawo. Kon pangutan-on ko ni Papa unsay gusto nakong himoon inigkadako nako, pirme kong moingon, “Gusto kong mahimong doktor.” Mao nay nahimong pinakaimportante sa akong kinabuhi.

Katoliko ang among pamilya. Pero wala kaayo koy nahibaloan bahin sa Diyos ug daghan kog pangutana. Ayha pa ko mituo nga naay naghimo sa kinabuhi dihang mieskuwela na kog pagkadoktor diha sa unibersidad.

Nahinumdom ko sa una nakong pagkakita ug mga cell sa bulak nga tulip pinaagig microscope. Bilib kaayo ko sa paagi sa cell sa pagdepensa sa kaugalingon batok sa kainit ug kabugnaw. Nakita pod nako ang substansiya nga gitawag ug cytoplasm nga naa sulod sa cell. Mogamay ni kon butangag asin ug modako kon ibutang sa tubig. Tungod niini ug sa uban pang abilidad sa mga organismo, maka-adjust sila sa lainlaing kahimtang. Dihang nakita nako kon unsa ka komplikado ang disenyo sa cell, nakaingon ko nga naa gyoy naghimo sa kinabuhi.

 Sa akong ikaduhang tuig sa pag-eskuwela, mas nakombinsir ko nga naa gyoy Diyos. Sa subject nga anatomy, natun-an namo nga tungod sa disenyo sa atong bukton, mapikopiko ug matul-id nato ang atong mga tudlo. Maayo gyong pagkadugtong ang kaunoran ug ang mga bukog. Pananglitan, nakat-onan nako nga ang mga tendon nga nagkonektar sa usa sa mga kaunoran sa bukton ngadto sa tungatunga nga bukog sa tudlo magsanga. Tungod ana, ang usa pa ka tendon makaagi padulong sa tumoy sa tudlo ug maplastar pag-ayo. Ang lig-ong mga tissue nakatabang pod nga maplastar pag-ayo ang mga tendon diha sa mga bukog sa tudlo. Kon dili ingon ani ang pagkahimo sa atong mga tudlo, ang mga tendon hugot kaayo nga morag pisi sa pana ug ang atong mga tudlo dili mapikopiko. Kombinsido ko nga maalamon kaayo ang nagdisenyo sa lawas sa tawo.

Mas mibilib pa gyod ko sa Tigdisenyo sa kinabuhi dihang nakat-onan nako kon sa unsang paagi makaginhawa ang bata inigkatawo niya. Dihang naa pa ang bata sa tiyan sa iyang mama, dili siya kinahanglang moginhawa kay ang iyang oxygen maggikan sa iyang inahan pinaagi sa umbilical cord. Mao nga ang pormag balloon nga alveoli sulod sa baga wala pay sulod nga hangin. Sa hapit nang matawo ang bata, motungha ang substansiya nga gitawag ug surfactant sa sulod sa alveoli. Dayon inigkatawo sa bata, naay talagsaong mahitabo. Naay bangag sa kasingkasing sa bata nga mosira maong ang dugo mopaingon sa baga. Nianang tungora, ang surfactant makatabang nga masudlan dayog hangin ang alveoli. Tungod ana, makaya dayon sa bata nga moginhawag iya.

Gusto nakong mailhan ang naghimo nianang katingalahang mga butang, maong giseryoso nako pagbasa ang Bibliya. Nakadayeg ko sa mga balaod bahin sa kahinlo nga gihatag sa Diyos sa nasod sa Israel kapig 3,000 ka tuig kanhi. Gisugo sa Diyos ang mga Israelinhon nga tabonan ang ilang kinalibang, regular nga maligo ug manghunaw, ug ikuwarentinas kadtong dunay simtomas sa makatakod nga sakit. (Lev. 13:50; 15:11; Deut. 23:13) Ang Bibliya naghisgot niining mga butanga, pero sa milabayng 150 ka tuig lang nadiskobrehan sa mga siyentista kon sa unsang paagi makatakod ang mga sakit. Ang mga Israelinhon gihatagan pod ug mga balaod bahin sa sekso diha sa basahon sa Levitico, ug nakita nako nga nakahatag to nilag kaayohan sa pisikal. (Lev. 12:1-6; 15:16-24) Nakaingon ko nga gihatag sa Diyos ang maong mga balaod para sa ilang kaayohan ug iyang gipanalanginan kadtong mituman sa iyang mga sugo. Nakombinsir ko nga ang Bibliya gikan gyod sa Diyos—Diyos nga wala pa nako mailhi niadtong panahona.

Samtang nag-eskuwela ko sa pagkadoktor, nailaila nako ang dalaga nga si Lydie, ug nakagusto ko niya. Nagminyo mi niadtong 1965 pero wala pa ko mahuman sa akong pag-eskuwela. Pagka-1971, tulo na ang among anak ni Lydie, ug nadugangan pa nag tulo sa ulahi. Dako gyong tabang si Lydie sa akong trabaho ingong doktor ug sa among pamilya.

Tulo ka tuig kong nagtrabaho sa ospital ayha ko nag-ablig clinic. Dayon naay magtiayon, kadtong  duha ka pasyente nga akong gihisgotan sa sinugdan, nga gustong magpatambal. Dihang resetahan na unta nako ang bana, ang asawa mihangyo: “Dok, palihog, kanang tambal nga walay sagol nga dugo.” Nakurat ko ug ako siyang gipangutana: “Mao ba? Ngano man?” Siya mitubag: “Mga Saksi ni Jehova mi.” Wala pa ko sukad makadungog bahin sa mga Saksi ni Jehova o sa ilang pagtulon-an bahin sa dugo. Gikuha sa asawa ang iyang Bibliya ug iyang gipakita ang rason sa ilang desisyon nga dili mogamit ug dugo sa pagpatambal. (Buh. 15:28, 29) Dayon gipakita sa magtiayon kon unsa unyay himoon sa Gingharian sa Diyos; wad-on niini ang pag-antos, sakit, ug kamatayon. (Pin. 21:3, 4) Nakaingon ko: “Kabalo ba mo nga kanang inyong gisulti maoy akong gipangandoy sukad pa sa akong pagkabata! Nagdoktor ko kay gusto nakong matabangan ang mga tawong nag-antos.” Na-enjoy kaayo kong makig-estorya nila, maong naabtan mig usa ka oras ug tunga. Paghawa sa magtiayon, dili na ko gustong mag-Katoliko, ug nahibaloan nako nga ang Diyos nga akong gikabiliban naa diay ngalan—Jehova!

Katulo mi nagkita sa maong Saksi nga magtiayon sa akong clinic, ug kada kita namo, kapig oras mi mag-estorya. Gipaadto nako sila sa among balay aron mas magkaestorya pa mi bahin sa Bibliya. Bisag misugot si Lydie nga moapil sa Bible study, dili siya moangkon nga sayop ang ubang doktrina sa Katoliko nga gitudlo kanamo. Mao nga nangimbitar kog pari nga moadto sa among balay. Gabii na kaayo mi nahumag debate bahin sa mga pagtulon-an sa simbahan, ug Bibliya ra ang among gigamit. Tungod ato, nakombinsir si Lydie nga ang mga Saksi ni Jehova nagtudlo sa kamatuoran. Milawom ang among gugma kang Jehova nga Diyos maong nagpabawtismo mi niadtong 1974.

Ang akong nakat-onan bahin sa katuyoan sa Diyos para sa katawhan dako kaayog epekto sa akong mga prayoridad. Para namo ni Lydie, ang pag-alagad kang Jehova mao ang pinakaimportante sa among kinabuhi. Naningkamot mi nga mapadako ang among mga anak subay sa mga prinsipyo sa Bibliya. Gitudloan namo sila nga higugmaon ang Diyos ug ang mga tawo. Tungod ana, suod kaayo ang among pamilya.—Mat. 22:37-39.

Pirme ming magkauyon ni Lydie sa among mga desisyon bahin sa among mga anak, ug makakatawa ming mahinumdom sa ilang impresyon namo. Nahibalo sila nga gisunod namo ang sugo ni Jesus nga ‘ang “Oo” himoong oo, ang “Dili,” dili.’ (Mat. 5:37) Pananglitan, dihang 17 anyos  na ang among kamagulangang anak nga babaye, wala siya tugoti ni Lydie nga molaag uban sa mga batan-on. Giingnan siya sa iyang amiga, “Kon dili ka tugtan sa imong mama, pananghid sa imong papa!” Pero ang among anak mitubag: “Di nâ magsilbi. Pareho man nâ sila pirme ug desisyon.” Oo, nakita gyod sa among unom ka anak nga nagkahiusa mi sa pagpadapat sa mga prinsipyo sa Bibliya. Mapasalamaton mi kang Jehova kay karon, daghang membro sa among pamilya ang nag-alagad kang Jehova.

Ang kamatuoran nakausab sa akong mga prayoridad, pero gusto gihapon nakong gamiton ang akong pagkadoktor aron makatabang sa katawhan sa Diyos. Maong miboluntaryo ko ingong doktor sa Bethel sa Paris, ug sa ulahi sa bag-ong Bethel sa Louviers. Halos 50 ka tuig na kong commuter volunteer sa Bethel. Tungod ana, daghan kog nasuod sa pamilyang Bethel, ug ang uban nila kapig 90 anyos na. Kas-a, nalipay kaayo ko dihang nakailaila kog bag-ong Bethelite. Ako diay ang doktor nga nagpaanak sa iyang mama dihang natawo siya mga 20 ka tuig ang milabay!

Milalom ang akong gugma kang Jehova kay nakita nako sa daghang katuigan kon giunsa niya paggiya ug pagprotektar ang iyang katawhan pinaagi sa iyang organisasyon. Sa mga 1980, ang Nagamandong Lawas naghimog programa sa United States aron tabangan ang mga doktor ug medical personnel nga makasabot sa desisyon sa mga Saksing pasyente nga dili magpaabonog dugo.

Dayon niadtong 1988, ang Nagamandong Lawas naghimog bag-ong departamento sa Bethel nga gitawag ug Hospital Information Services. Sa sinugdan, kini nga departamento maoy nagdumala sa mga Hospital Liaison Committee (HLC) sa United States aron tabangan ang mga Saksing pasyente nga makakitag doktor nga nagtahod sa atong baroganan bahin sa dugo. Sa ulahi, naa nay mga HLC sa tibuok kalibotan, apil sa France. Nakadayeg gyod ko sa mahigugmaong tabang sa organisasyon ni Jehova sa mga igsoon nga naay sakit!

Ganahan kaayo ko sa akong trabaho ingong doktor. Pero samtang gipamalandong nako ang akong mga prayoridad, nakahunahuna ko nga ang pinakaimportanteng pagpang-ayo maoy espirituwal—ang pagtabang sa mga tawo nga makaila ug mag-alagad sa Usa nga naghatag sa kinabuhi, si Jehova nga Diyos. Pagretiro nako, nag-regular payunir mi ni Lydie aron makagahin mig daghang oras kada bulan sa pagsangyaw sa maayong balita sa Gingharian sa Diyos. Karon, ginahimo gihapon namo ang among maarangan niining makaluwas ug kinabuhi nga buluhaton.

Padayon gihapon kong nagatabang sa mga masakiton. Pero nahibalo ko nga bisan ang pinakamaayong doktor dili makaayo sa tanang sakit o makapugong sa kamatayon. Maong eksayted ko sa panahon nga mawala na ang pag-antos, sakit, ug kamatayon. Sa duol na kaayo nga bag-ong kalibotan, wala na unyay kataposan ang akong pagkat-on bahin sa mga gihimo sa Diyos, apil sa iyang katingalahang pagkadisenyo sa lawas sa tawo. Ang tinuod, ang akong gipangandoy sa bata pa ko wala pa gyod matuman tanan. Pero kombinsido ko nga hapit na ning matuman!