Lón ewe 1941, ua uputiw lón France lón Paris. Ám we famili ese wéúéch. Ua kan sani le káé, nge atun a engol ieri ua fókkun semmwen me use chúen sussukul. Ekkewe tokter ra ereniei pwe upwe chék kokkoon wóón ai we peet pún ammatei mi apwangapwang. Ina minne, ren úkúkún fite maram ua chék ákkállea eú dictionary me aúseling ngeni ekkewe prokram wóón reitio seni ewe University of Paris. Lupwen nei we tokter a erá pwe ua chikar me ua tongeni ló sukul sefál, ua fókkun pwapwa. Ua kan pwisin ereniei, ‘Angangen tokter a fókkun amwarar!’ Seni ena atun, ua fókkun mochen echikara aramas seni ar kewe semmwen. Atun semei we a kan eisiniei ika met ua mochen féri lón manawei ika ua wattetá, iei met ua pélúwen ngeni iteitan, “Ua mochen upwe emén tokter.” Ai mochen wiliti emén tokter, ina met a kon aúchea lón manawei.

Ám we famili aua fiti Katolik. Nge fókkun ekis chék met ua silei usun Kot, me a tep ai kewe kapas eis use tongeni kúna pélúwer. Atun ua poputá káé pekin sáfei lón university, ina chék ewe atun ua kerán fókkun lúkú pwe manaw ese chék pwisin fisitá.

Ua chemeni ewe áeúin atun ua katoléch fán eú microscope eféú cell lón epé péén irá. Ua mmen mwaar ren án ekkewe cell tufichin túmúnúúr seni pwichikkar me patekkich. Ua pwal katol ifa usun ewe cytoplasm (och ménún lón ewe cell) a énnúrúfengeni atun emén a ninatá salt wóón me awatteelóói atun emén a waalong lón konik mi limeliméch. Pokiten ena me pwal chómmóng mettóch a tongeni féri, iwe kúkkúnún  ménúmanaw ra tongeni manaw lón sókkopaten leeni. Atun ua kúna tokoráráán eféú me eféú ekkewe cell, ua lúkú pwe manaw ese chék pwisin fisitá.

Lón oruuen ierin ai sukulen tokter, a pwal wor met ua kúna mi ánnetatá pwe mi wor Kot. Lón ai we class, atun aua káé usun inisin aramas, aua káé ifa usun péúch kewe (forearm) ra atufichi aútún péúch ar repwe tongeni nuumulóng me wenewu. Napanapen án ekkewe féicho kochu ngeni ekkewe chúú me ar angangfengen meinisin a mmen amwarar. Áwewe chék, ua káé pwe efóch tendon mi usun sáál lón péúch (forearm) a ochufengeni féichoon péúch ngeni ewe oruuofóchun chúún aútún péúch. Ei tendon a káimufesen lón ruu me ra féri efóch piriis mi atufichi án pwal efóch tendon epwe ssá fan ngeni lemwuchulóón aútún péúch. Ekkena tendon ra pach ngeni chúún aútún péúch. Ika ese iei usun fférún aútún péúch, ekkena tendon repwe kon mei me weneweneló, iwe esap kon múrinné angangen aútún péúch. A fókkun ffat ngeniei pwe ewe Chón Anapanapa inisin aramas, i emén mi fókkun tipachem.

Ua fen kon mwaar ren angangen ewe Chón Fératá atun ua káé ifa usun emén ménúkol a ngasangas mwirin an a uputiw. Atun ewe ménúkol a nóm lón luken inan we, ese lamot epwe ngasangas pún a angei oxygen seni inan we. Ina popun, ewe alveoli, weween ekkewe mettóch mi usun napanapen fúseng lón ammatan, esaamwo masou ásepwál. Nge fitu wiik me mwen an epwe uputiw, och lélé mi aúchea itan surfactant a pwélúoló ekkewe alveoli. Iwe mwirin án ewe semirit a uputiw me kerán ngasangas, ekkeei mettóch mi amwarar ra fis. Efóch pwaang lón ngasangasan a kesipiló. Ei a eriki ewe chcha ngeni ekkewe ammat. Iwe pokiten ewe lélé mi aúchea itan surfactant, ekkewe alveoli lón ewe ammat ra mwittir masou ren ásepwál. Mwittir chék ewe ménúkol a tongeni pwisin ngasangas.

Ua mochen sissilei ewe Emén mi féri ekkena esin mettóch mi amwarar, ina minne ua poputá le álleanifichi ewe Paipel. Ua fókkun mwaar ren ekkewe allúk mi weneiti pekin liméch mi nóm lón ewe pwonen etipeeú Kot a ngeni ekkewe chón Israel lap seni 3,000 ier a ló. Kot a allúkú ngeni ekkewe chón Israel ar repwe ireeló ar kiten mwéngé, tútú lón konik iteitan, me ar repwe áimuoló emén a wor esissil wóón pwe a semmwen. (Lif. 13:50; 15:11; Tut. 23:13) Ewe Paipel a fen fós usun ekkena mettóch, nge scientist ra chék kerán kúna lón ekkewe 150 ier ra ló ifa usun och samau a chéúló. Ua pwal mirititi pwe ekkewe allúk usun lisowu lón ewe puken Lifitikos, a túmúnú limeliméchún chón ewe mwúún Israel. (Lif. 12:1-6; 15:16-24) Ua esilla pwe ewe Chón Fératá a awora ekkeei allúk ngeni ekkewe chón Israel fán iten feiéchúúr me a efeiéchú chókkewe mi álleasochisiir. Ua lúkúlúk pwe ewe Paipel a pop seni Kot, ewe Kot usaamwo silei itan lón ena fansoun.

Atun ai university me káé ngeni pekin tokter, aua chufengen me emén fépwúl itan Lydie, ewe ua fókkun tongei. Aua apwúpwúlú lón ewe 1965 atun ua nóm lukanapen ierin ai sukul. Lón ewe 1971, úlúmén me lein néúm kewe wonomén  ra fen uputiw. Lydie a fókkun álilliséch ngeniei lón ai angangen tokter me lón ám famili.

Ua angang lón eú pioing úkúkún úlúngát ier me mwen ua poputááni ai we clinic. Ekiseló mwirin eú pean pwúpwúlú, iir nei kewe mineféén patient ua fen fós usur, ra etto sáfei rei. Itá upwele poputá le makkeei taropween án ewe mwán sáfei, nge pwúlúwan we a ereniei: “Tokter, kese mochen esap wor chcha lón ewe sáfei.” Fán máirú ua erá: “Fókkun? Pwata?” Neminna a erá: “Ám Chón Pwáraatá Jiowa.” Esap mwo fán eú ai rong usun Chón Pwáraatá Jiowa are minne ra eáni káit usun chcha. Ewe fefin a angei néún we Paipel me a áiti ngeniei ewe wokisin ar kefil ar resap angei chcha a lóngólóng wóón. (Föf. 15:28, 29) Mwirin, neminna me pwúlúwan we ra áiti ngeniei met án Kot we Mwú epwe féri, epwe amóeló riáfféú, semmwen, me máló. (Pwär. 21:3, 4) Fán pwapwa ua erá: “Oua apwóróusato och mettóch ua fókkun áneánei seni me lekúkkúni! Ua wiliti emén tokter pwe ua mochen amóeló riáfféú.” Ua fókkun mwasangasang ina popun aua pwóróusfengen úkúkún eú esopw awa. Mwirin chék án ekkena pwúpwúlú ra ló, use chúen mochen emén Katolik, me ua káé pwe a wor iten ewe Chón Fératá ua fókkun súféliti, itan Jiowa!

A fán úlúngát ám chufengen me ena pean pwúpwúlú me lón ai we clinic, me iteiten ám pwóróusfengen a lap seni eú awa. Ua etiwer ngeni imwei we pwe aupwe tongeni áeá watteen fansoun le pwóróusfengen wóón ewe Paipel. Ikaamwo Lydie a tipeeú le fiti ám káéén Paipel, nge ese lúkú pwe ekkóch ekkewe káit aua káé lón Katolik ra mwáál. Ina minne, ua etiwa emén priest ngeni imwem we. Aua áninifengen wóón áitien ewe lamalam tori lukenipwin, me aua chék néúnéú ewe Paipel. Ám na pwóppwóróusfengen a alúkúlúkú ngeni Lydie pwe minne Chón Pwáraatá Jiowa ra eáni káit, a enlet. Seni ena atun, a péchékkúleló ám tongei Jiowa tori ám me rúúemén aua papatais lón 1974.

Met ua káé usun minne Kot a tipeni fán iten aramas, a ekkesiwili met ewe mi kon lamot seni meinisin lón manawei. Ám me Lydie aua akkomwa lón manawem ám angang ngeni Jiowa. Aua tipeppós le ekkemmweni néúm kewe ren ám áiti ngeniir án Paipel kewe allúk. Aua áiti ngeniir ar repwe tongei Kot me aramas. Ina met a eririéchúfengenikem lón ám famili.​—Mat. 22:37-39.

Ám me Lydie aua kan takir atun aua kan chemesefáli ekiekin néúm kewe ren ám tipeeúló  fansoun meinisin wóón ám kefil. Ra silei pwe alon Jesus we “kopwe chök apasa, ‘Ewer, ewer,’ ika ‘Apw, apw,’” ina allúkún lón imwem we. (Mat. 5:37) Áwewe chék, atun emén me lein néúm kewe nengngin a 17 ierin, Lydie ese mut ngeni an epwe fiti eú kúmiin sáráfé. Emén me lón ena kúmi a ereni, “Ika inom na ese mut ngonuk, tingorei semom na!” Nge néúm na nengngin a ereni: “Ese wor lamotan. Ra tipechu fansoun meinisin.” Ewer, néúm kewe wonomén ra kúna pwe aua tipechu lón ám apwénúetá án Paipel kewe kapasen emmwen. Aua kilisou ngeni Jiowa pwe chómmóng me lein chón ám famili ra angang ngeni Jiowa lón ei fansoun.

Inaamwo ika ewe enlet a ekkesiwili met ewe ua kon aúcheani, nge ua mochen áeá tufichi lón ai angangen tokter le álisi néún Kot aramas. Iwe, ua álillis usun emén tokter lón ewe bethel lón Paris me mwirin lón ewe mineféén bethel lón Louviers. Ua kan ló álillis lón bethel arapakkan 50 ier. Lón ekkeei atun, ua chiechiéch ngeni ekkóch chón lón ewe familien bethel, ekkóch me leir a fen 90 som ieriir iei. Eú rán ua pwal máirú atun ua chuuri emén minefélóng lón bethel. Ua kerán silei pwe ngang ewe tokter mi wisen anéúnéú inan we atun a oupwatiw 20 ier a ló!

Lón ekkewe ier, ai tong ngeni Jiowa a péchékkúleló atun ua kúna ifa usun a áeá an we mwicheich le emmweni me túmúnú néún kewe aramas. Ina epwe lón ewe ier 1980, ewe Mwichen Soupwúngúpwúng a féri eú prokram lón Merika mi álisi ekkewe tokter me chón angangen pioing le wewefichiti án ekkewe patient Chón Pwáraatá Jiowa filatá ar resap angei chcha.

Iwe lón ewe 1988, ewe Mwichen Soupwúngúpwúng a apwúngaló fférútáán ewe Hospital Information Services lón Bethel. Ra wisen emmweni ewe Hospital Liaison Committees (HLC) mi ffér me lón Merika pwe epwe álisi ekkewe patient Chón Pwáraatá Jiowa le kúnékún néúr tokter mi súféliti ar kefil wóón chcha. Atun ei kókkót a kawor fán iten pwiich kewe meinisin wóón unusen fénúfan, ewe HLC a nóm lón France. Ua fókkun ingeló ai kúna ifa usun án Jiowa we mwicheich a álisi pwiich kewe mi semmwen atun ra osupwangen álillis!

Ua kon aúcheani ai angangen tokter. Nge, atun ua ekiekifichi met a kon aúchea me rei, ua mirititi pwe a kon lamot ai upwe álisi aramas le silei me angang ngeni Jiowa Kot, ewe Populapen manaw, lap seni ai álisiir le chikar seni ar samau. Mwirin chék ai ua retire, ám me Lydie aua regular pioneer, aua néúni fite fite awa iteiten maram lón ewe angangen afalafala kapas allimen ewe Mwúún Kot. Aua chúen achocho úkúkún ám tufich le fiti ei angang mi amanawa aramas.

Ua sópweló le álisi aramas mi samau úkúkún ai tongeni. Nge ua mirititi pwe pwal mwo ekkewe tokter mi sipeéch rese tongeni echikara meinisin semmwen are aúkatiw máló. Ina minne, ua mwétéresiti ewe atun esap chúen wor metek, samau, me máló. Lón ena ótót séfé a chék arapoto, esap wor muchún ai káé usun férien Kot kewe, kapachelong amwararen napanapen an féri inisin aramas. Ekiseló chék, epwe pwénútá met ewe ua áneánei seni lekúkkúni. Ua lúkúlúk pwe ewe mi múrinné seni meinisin epwele fis!