Mon ti ne Pari, Lafrans an 1941 e nou fanmir ti napa bokou larzan. Ler mon ti annan di-z-an, mon ti ganny tiberkiloz e mon ti bezwen aret al lekol. Sa ti fer mwan vreman sagren parski mon ti kontan aprann bann nouvo keksoz. Dokter ti dir ki mon devret reste lo lili pour mwan pa fatig mon poumon. Pour plizyer mwan, mon ti pas mon letan pe lir en diksyoner e pe ekout bann progranm edikasyonnel ki liniversite Pari ti pase lo radyo. Mon ti vreman kontan ler mon dokter ti finalman dir mwan ki mon’n byen e ki mon kapab retourn lekol. Mon ti dir dan mon menm, ‘Sa ki bann dokter i fer i enkrwayab!’ Depi sa, mon ti toultan anvi geri bann dimoun ki malad. Sak fwa ki mon papa ti demann mwan ki mon anvi fer ler mon gran, mon ti dir li mon anvi vin en dokter. Alor, sa keksoz pli enportan dan mon lavi ti pour vin en dokter.

Nou fanmir ti Katolik me mon pa ti konn bokou keksoz lo Bondye e mon ti annan en kantite kestyon. I ti apre ki mon ti’n konmans etidye pour vin en dokter ki mon ti asire ki i annan en Kreater.

Mon rapel sa premye fwa ki mon ti obzerv selil en plant anba en mikroskop. Mon ti enpresyonnen pour vwar lafason ki sa selil ti protez son lekor kont lasaler ek lafreser. Mon ti osi obzerv lafason ki cytoplasm (en keksoz ki dan en selil) i ratresi ler i ganny mete avek disel e lafason ki i elarzi ler i ganny mete dan delo. Sa abilite ek lezot abilite i ed bann lorganizm pour adapte dan diferan lanvironnman. Ler mon ti vwar  lafason ki sak selil i konplike, mon ti asire ki lavi pa’n vin par azar.

Pandan mon dezyenm lannen ki mon ti pe etidye pour vin en dokter, mon ti vwar plis levidans ki i annan en Bondye. Ler nou ti pe etidye lekor imen, nou ti aprann ki lafason nou lebra i ete, i ed nou ledwa bouze. I merveye lafason ki bann misk i zwenn avek lezo e lafason ki tou keksoz i mars ansanm. Par egzanp, mon ti aprann ki i annan bann tendons (ki parey en lakord) ki konekte bann misk dan nou lebra avek sa dezyenm lezo dan nou ledwa. Sa bann tendons i separ an de e sa i permet ki en lot tendon i pas anba li e i konekte avek nou bout ledwa. I annan bann tissues ki tenir bann tendons avek bann lezo dan ledwa. Si nou bann ledwa pa ti’n ganny fer dan sa fason, sa bann tendons ti pou drwat e red e nou ledwa pa ti pou bouz byen. Sa bann keksoz ti fer mwan vwar ki sa Enn ki’n kree lekor imen i vreman entelizan.

Ler mon ti aprann lafason ki en pti baba i konmans respire apre ki i’n ne, mon ti enpresyonnen avek lafason ki sa Kreater in kree nou. Ler en pti baba i ankor dan vant, i pa bezwen respire akoz i ganny loksizenn avek son manman. I pour sa rezon ki i napa ler dan sa bann pti sak dan son poumon. Me detrwa semenn avan ki i ne, i annan en lagli spesyal ki apel surfactant ki kouver anndan dan sa bann pti sak ki dan poumon sa pti baba. Apre, ler sa pti baba i ne e i respire pour premye fwa, i annan en keksoz enkrwayab ki arive. I annan en trou ki fermen dan leker sa pti baba e sa i fer disan al dan son poumon. Vi ki i annan sa lagli spesyal, sa bann pti sak pa kol ansanm ler poumon i ranpli avek ler. Deswit, sa pti baba i kapab respire lo li menm.

Mon ti anvi aprann konn sa Enn ki ti’n kree tou sa bann zoli keksoz. Alor, mon ti pran mon lektir Labib o serye. Bann lalwa konsernan lizyenn ki Bondye ti’n donn bann Izraelit plis ki 3,000 an pase ti vreman enpresyonn mwan. Bondye ti donn lord bann Izraelit pour anter zot malpropte, pour bennyen regilyerman e pour met nenport dimoun ki annan en maladi ki atrape, an karantenn. (Lev. 13:50; 15:11; Det. 23:13) Labib ti koz lo sa bann keksoz, me bann syantis in konpran sa dan sa dernyen 150 an. Osi, bann lalwa konsernan sèks ki dan Levitik ti ed nasyon Izrael pour reste an bonn sante. (Lev. 12:1-6; 15:16-24) Mon ti konpran ki sa Enn ki’n kree tou keksoz, ti donn bann Izraelit sa bann lalwa pour zot prop dibyen e ki i ti beni sa bann ki ti obei son bann komannman. Sa ti fer mwan asire ki Labib in ganny enspire par Bondye menm si sa letan mon pa ti konnen ki mannyer Bondye i apele.

Ler mon ti pe etidye pour vin en dokter, mon ti zwenn en fiy ki apel Lydie e mon ti tonm anmoure avek li. Nou ti marye an 1965 menm si mon pa ti ankor fini liniversite e an 1971, nou ti annan trwa zanfan. An tou nou ti annan sis zanfan. Lydie ti ed mwan en kantite dan mon travay konman en dokter e osi dan nou fanmir.

 Mon ti travay dan en lopital pour trwa-z-an e apre sa, mon ti ouver mon prop klinik. Pa tro lontan apre, sa koup marye ki mon ti’n koz lo la o konmansman ti vin kot mon klinik. Ler mon ti pe al ekri en preskripsyon pour sa msye, son madanm ti dir: “Dokter, silvouple, pa bezwen donn nou latizann ki annan disan ladan.” Mon ti sirprann, alor mon ti demann zot: “Vreman? Akoz?” Sa madanm ti dir: “Nou bann Temwen Zeova.” Mon pa ti’n zanmen tann konsernan bann Temwen Zeova oubyen konsernan sa ki zot ansennyen lo disan. Sa madanm ti pran son Labib e i ti montre mwan bann verse ki montre akoz zot pa servi disan. (Akt 15:28, 29) Apre, li ek son msye ti montre mwan sa ki Rwayonm Bondye pou fer. Sa Rwayonm pou fer ki i pou nepli annan soufrans, maladi ek lanmor. (Rev. 21:3, 4) Mon ti dir: “Sa ki zot pe dir mwan i en keksoz ki mon ti anvi depi ler mon ti ankor ptipti.” Mon ti osi dir: “Mon’n vin en dokter pour ed bann dimoun ki pe soufer.” Mon ti sitan kontan sa ki zot ti’n dir mwan, ki nou ti kontinyen koze pour enn erdtan edmi. Ler sa koup ti ale, mon ti’n deside ki mon pou nepli reste en Katolik. Mon ti osi aprann ki sa Enn ki’n kree tou keksoz i apel Zeova.

Apre sa, mon ti zwenn sa koup marye pour ankor trwa fwa dan mon klinik e sak fwa nou ti koze pour plis ki enn erdtan. Mon ti envit zot kot mwan pour nou kapab koz plis lo Labib. Menm si Lydie ti vin letid Labib ansanm avek nou, i pa ti aksepte ki serten keksoz ki Katolik ti ansennyen pa ti vre. Alor, mon ti envit en pret kot nou. Nou ti koz lo bann lansennyman legliz ziska tar dan lannwit e nou ti servi zis Labib. Sa ki nou ti koz lo la ti konvenk Lydie ki sa ki bann Temwen Zeova i ansennyen, i laverite. Apre sa, nou lanmour pour Zeova ti ogmante ziska ki nou ti deside pour batize an 1974.

Sa ki mon ti aprann konsernan lavolonte Bondye pour bann imen ti fer mwan sanz mon priyorite. Sa keksoz pli enportan pour nou de Lydie ti pour ador Zeova. Nou ti determinen pour elve nou bann zanfan dapre bann prensip Labib. Nou ti ansenny nou bann zanfan pour kontan Bondye ek zot prosen. Sa ti fer nou vin pli pros avek kanmarad.​—Mat. 22:37-39.

Kan nou de Lydie, nou mazin bann lannen ki’n pase, nou riye ler nou mazinen ki mannyer nou bann zanfan ti vwar sa linite ki i ti  annan ant nou de. Zot ti konnen ki dan nou lakour nou ti swiv lenstriksyon Zezi ki dir: “Fer sir ki ou ‘Wi’ i wi e ou ‘Non’ i non.” (Mat. 5:37) Par egzanp, ler enn nou fiy ti annan 17 an, Lydie ti anpes li al en landrwa avek en group zenn. Enn parmi sa bann zenn ti dir nou fiy, “Si ou manman pa oule les ou ale, demann ou papa!” Me nou fiy ti dir: “I pa vo lapenn. Zot toultan dakor.” Nou sis zanfan ti vwar ki nou ti ini e ki nou aplik bann prensip Labib. Nou vreman rekonesan anver Zeova ki ozordi en kantite nou bann fanmir i bann serviter Zeova.

Menm si sa ki mon ti’n aprann dan Labib ti’n sanz mon priyorite, mon ti anvi servi sa ki mon ti’n aprann konman en dokter pour ed pep Bondye. Alor, mon ti al ede konman en dokter kot Betel, Pari e pli tar ler Betel ti bouz Louviers. Mon’n al ede dan Betel pour preski 50 an. Pandan sa letan, mon’n fer en kantite bon zanmi dan Betel e serten i dan zot 90 an. En zour, mon ti sirprann ler mon ti zwenn en nouvo Betelit. Dan pe koze, nou ti realize ki mon ki ti sa dokter ki ti ed son manman ler i ti pe ganny li e sa i apepre 20 an pase.

Pandan bann lannen ki’n pase, mon lanmour pour Zeova in ogmante anmezir mon’n vwar lafason ki i servi son lorganizasyon pour gid e protez son pep. Boner dan bann lannen 1980, Konsey Direkter ti fer en progranm Leta-z-ini pour ed bann dokter ek bann dimoun ki travay dan domenn medikal, pour pli byen konpran akoz bann Temwen Zeova pa servi disan.

Apre, an 1988, Konsey Direkter ti fer en nouvo departman dan Betel ki apel Servis Lenformasyon Lopital. O konmansman, sa departman ti diriz travay ki bann Komite lyezon lopital (HLC) ti fer. Sa bann Komite lyezon lopital ti ganny fer Leta-z-ini pour ed bann Temwen Zeova trouv bann dokter ki respekte zot desizyon pour pa servi disan. Ler bann HLC ti ganny fer dan lezot pei, bann HLC ti osi ganny fer Lafrans. Mon vreman enpresyonnen ler mon vwar lafason ki lorganizasyon Zeova i ed bann frer ek ser ki malad.

Pour vin en dokter ti mon premye swa parski mon ti anvi ed bann dimoun ki ti malad. Me ler mon ti reflesir lo mon bann priyorite, mon ti konpran ki sa keksoz pli enportan i pour ed bann dimoun aprann konn e ador Zeova ki Sours lavi. Apre ki mon ti’n pran retret, nou de Lydie, nou ti fer servis pionye e nou ti pas plizyer erdtan tou le mwan pe anons sa bon nouvel lo Rwayonm Bondye. Nou ankor pe fer sa ki nou kapab dan sa travay predikasyon ki sov lavi.

Mon pe kontinyen fer sa ki mon kapab pour ed bann dimoun ki malad. Me mon realize ki menm sa pli bon dokter pa kapab geri tou maladi oubyen anpes en dimoun mor. Mon pe esper sa zour kan i pou nepli annan ni douler, ni maladi ek lanmor. Dan sa nouvo lemonn ki pe vini tre byento, mon pou annan leternite pour aprann plis lo bann keksoz ki Bondye in kree e sa i enkli sa fason merveye ki lekor imen in ganny fer. Sa ki mon ti anvi depi ler mon ti ankor ptipti pou byento vin vre. Mon asire ki dan lavenir i pou annan bann keksoz ki bokou pli meyer!