Hanv 1941-ant, France-antlea Paris xarant zolmolo. Mhoji famil titli girest nasli. Mhaka xikonk khub avoddttalem. Punn hanv dha vorsancho zalo tednam mhaka TB zali. Mhojim pulma vo lungs oskot zalʼlim dekhun dotoran mhaka bed-aruch nhidon ravonk sanglem. Ani hea pasot, iskolak vochpachem mhaka bond korchem poddlem. Tor zaite mhoine porian, dictionary vachun ani University of Paris-a thaun radio-cher ietaleo teo kariavolli aikon hanv mhozo vell sartalo. Punn uprant, hanv boro zalo ani iskolak vochonk xokta mhunn dotoran mhaka sanglem tednam hanv ekdom khuxal zalo. Ani hanvem chintlem, ‘Dotor kortat tem kam khoreaninch kitlem borem zaun asa!’ Ani tednam thaun hanv-ui duent lokank boro korunk sodhtalo. Tor, ‘Tum vhoddlo zalea uprant kitem zatolo?’ mhunn mhozo daddy mhaka vichartalo tednam hanv taka sodanch, ‘Mhaka dotor zaunk zai!’ mhunn sangtalo. Karonn dotor zavop mhojea jivitant ekdom mhotvachem aslem.

Ami Catholic dhormachim aslim. Punn Deva vixim mhaka chodd kainch khobor nasli. Ani hanv zaitea prosnanche zobab zannam zaunk sodhtalo. Hanv university-nt dotorachem xikop korunk laglea uprantuch jivit khorench konnem tori rochlam mhunn mhaka khatri zali.

Hanvem poilech pavtti eka zhaddache cells microscope-ant polloile tednancho mhaka ugddas asa. Gormi ani thonddai-e thaun rakhunk eka cell-a bhitor kitli bori manddavoll asa tem polloun hanv ojap zalo. Tea bhair, eka cell-a bhitor asloli ek vost, zaka cytoplasm mhunnttat, tem mittant koxem lhan zata ani nitoll udkant koxem fulta tem hanvem polloilem. Jivea pranneanchea cells-am bhitor osli manddavoll asa dekhun bhailem vatavoronn  bodolta tednam taka tondd diunk tanchea bhitor bodol zata. Tor hea barik vostumnim asloli manddavoll hanvem polloili tednam, jivit apxinch ieunk na mhunn mhaka khatri zali.

Hanv dotorachem xikop kortolo tea dusrea vorsak, ek Dev asa mhunn mhaka anik purave mellʼlle. Ami munxachea kuddi vixim xiktana, amchim bottam bagounk ani nitt korunk amcho hat koso modot korta tem ami xiklim. Amche muscles vo snaiu ani haddam jea toren sangata kam kortat tem khorench ojapachem. Udharonnak, amchea hatichea eka muscle-ak amchea bottachea dusrea hadda sangata zoddun haddtta tea xirecho don bhagamnim vantto zata. Ani oso vantto zata dekhun tachea modem aslolea zagea thaun bottachea pontak pavta tea xirek vochonk zago melltta. Hea bottamnim aslole ghott tissue tanchea-tanchea zagear tankam ghott dovortat. Osli bori manddavoll nasli zalear bottantleo xiro nittuch urta asleo ani bottam halounk kotthin zata aslem. Tor hantuntlean, munxachi kudd eka borea Zannaran rochlea mhunn mhaka sarkem dison ailem.

Toxench, bhurgeachea zolma vixim hanvem obheas kelo tednam hea Zannarachem kam polloun hanv anikui ojap zalo. Ek bhurgem zolmochea poilim, taka oxygen aplea avoi thaun, umbilical cord-a udexim melltta. Tea pasot, bhurgeachea lungs-ant aslolem alveoli, mhunnche varem bhorta tosleo dhaktteo poteo, fulon asonant. Punn zoso tea bhurgeacho zolmoncho vell lagim pavta, tea alveoli-chea bhitor ek vost utpon zata, zaka surfactant mhunnttat. Ani bhurgem zolmon poilech pavtt svas gheta tednam ojapachem kitem ghoddtta: Tea bhurgeachea kallzant aslolo ek burak bond zata ani rogot lung-ant vochonk lagta. Tea vellar, hea alveoli-nt varo bhoron tem fulta tednam tem chittkon urona zaunk surfactant modot korta ani tem bhurgem apunn zaun svas gheunk lagta.

Devachi hi rochnna polloun tachea vixim zannam zaunk, hanv Bible anik bore toren vachunk laglo. 3,000 vorsam poilim Jehovan Israel raxttrak nitollsanne vixim dilʼle kaide hanvem vachle tednam hanv ojap zalo. Zoxem, eklean soimbachi goroz kelea uprant tem dhampunk zai aslem, porot-porot hat dhuvunk zai asle, ani konnakui dusreank posorta toslem duens zalam zalear taka heram thaun pois dovrunk zai aslem, osle kaide Devan dilʼle. (Lev. 13:50; 15:11; D.S. 23:13) Punn osli nitollsann pallina zalear duens koxem posorta tea vixim vidneanikank fokot 150 vorsam poilinch kollon ailam. Tea bhair, Levi-Xastr pustokant, loingik sombonda vixim Devan dilʼle kaide Israelitkar pallttale tednam akʼkhea raxttrachi bholaiki bori urtali. (Lev. 12:1-6; 15:16-24) Tor hantuntlean mhaka kollon ailem ki Israelitkaramnim he kaide pallʼlle zalear tankam boreak poddtta aslem ani Devachem besanv tancher asta aslem. Tor tea vellar Devachem nanv hanv noko aslear pasun, Bible Devan prerit kela mhunn mhaka khatri zali.

Mhojem xikop choltalem tednam hanv Lydie nanvachea eka cheddvak mellʼllo. Ami mogan poddlim ani 1965-ant kazar zalim. Tea vellar mhojem xikop azun somponk naslem. 1971 vorsa porian amkam tin bhurgim zalim. Ani soglim mellon amkam sov bhurgim asat. Mhojea kamant toxench amchea familint Lydie-n mhaka boro tenko dilo.

Mhozo svotacho clinic suru korchea poilim hanv  tin vorsa porian eka hospital-ant kam kortolo. Ek dis mhojea clinic-ant ek zoddpem ailem. Hanv tea ghova pasot vokhdam boroitalo tednam tachea bailen mhaka mhunnttlem: “Dotor, rogot naslolinch vokhdam di ha, please.” Hanvem ojap zaun vichralem: “Khorench? Kiteak?” Tinnem mhunnttlem: “Ami Jehovachim Sakxi.” Jehovache Sakxi ani rogta vixim tim kitem patietat tem hanvem kednanch aikonk naslem. Tea bailen mhaka tim rogot kiteak ghenant tea vixim Bible-antlim thoddim versam dakhoilim. (D.I. 15:28, 29) Ani uprant, tinnem ani tichea ghovan fuddarak Devachem Raj tras, koxtt ani moronn pasun kaddun uddoitolem mhunn mhaka sanglem. (Prok. 21:3, 4) Tednam hanvem mhunnttlem: “Hem tor mhojea bhurgeponna voilem sopon! Ani heach pasot tor hanv ek dotor zalʼlo!” Hanv itlea umedin bhorlo ki ami dedd vor pasun uloilim. Tim gelea uprant, hanv Catholic dhorm soddun ditolo mhunn hanvem chintlem. Ani jea Rochnnarak hanv itlo man ditalo, taka ek nanv asa, ani tem nanv, Jehova mhunn mhaka kollon ailem.

Tea uprant, tem zoddpem anik tin pavtti mhojea clinic-ant ailem. Ani dor ek pavtt ami eka vora poros chodd vell uloilim. Tachea uprant, Bible-a vixim anik ulounk hanvem tankam mhojea ghora apoilim. Lydie amchea sangata Bible obheasak bosonk toiar zalem. Punn Catholic dhormacheo thoddeo xikounneo sarkeo nasleo mhunn manun gheunk tem toiar naslem. Ani hea pasot hanvem eka padrik amchea ghora apoilo. Ani rat zaum porian, fokot Bible-uch uzar korun igorjent xikoitalim tea xikounneam vixim ami bhasabhas keli. Ani ti bhasabhas zalea uprant, Jehovachech Sakxi sot xikotale mhunn Lydie-k khatri zali. Ani magir Jehova pasot amcho mog itlo vaddlo ki 1974-ant ami dogaimnim bautizm ghetlo.

Hanv munxakulla pasot Devachea udʼdhexa vixim xiklo tednam Lydie-n ani hanvem Jehovak amchea jivitant poilo zago dilo. Ani ami amchea bhurgeank Devachea dorjeam pormonnem vaddoitolim mhunn ami ghott nichov kelo. Ami tankam Devacho ani lokancho mog korunk xikoilem ani oxem kelolean amchea familicho ekvott anik ghott zalo.—Mt. 22:37-39.

Hanv ani Lydie sodanch ek-sarke nirnnoi ghetalim ani hem amchim bhurgim borea bhaxen somzonk pavlim. “Tumchem ulovop itlench zaum-di: hoi zalear hoi, nhoi zalear nhoi” ho amcho ghoracho kaido aslo mhunn tim zannam aslim. (Mt. 5:37) Udharonnak ek pavtt, amchi 17 vorsanchi dhuv aplea ixttam sangata bhair bhonvonk vochonk sodhtalem. Punn Lydie-n taka  vochonk diunk na. Tachea eka ixttam mhunnttlem: “Tuji mummy na mhunntta zalear tum daddy-ik vichar.” Mhojea dhuven mhunnttlem: “Tacho kainch faido na. Tancho dogaincho-i nirnnoi ekuch asta.” Ani osleo khubxeo ghoddnneo asat jeo ugddas korun ami dogaim hanstat. Ami mellon Bible-antlim totvam apnnaitat hem amchim sovui bhurgim pollounk pavlim. Aiz amchea familichim choddxim zannam Jehovachi seva kortat mhunn ami Jehovak upkari zaun asat.

Sot xiklea uprant, Jehovachi seva poili dovrunk hanvem tharailʼlem. Tori astana, dotor zaun hanv jem kitem xiklo tem Jehovachea lokank modot korunk hanv uzar korunk sodhtalo. Ani hea pasot, poilim Paris-ant aslolea Bethel-ant, ani uprant Louviers-ant aslolea novea Bethel-ant hanvem ap-khuxen dotor mhunn seva keli. Hanv Bethel-ant commuter mhunn seva korunk laglear sumar 50 vorsam zaleant. Ani hea vorsamnim, hanvem zaitim borim ixttam keleant. Tantuntlim thoddim atam 90 vorsam poros chodd piraiechim asat. Ek dis mhaka Bethel-ant kam korpi ek novoch bhav mellʼllo. Ani 20 vorsam poilim tachea avoichi delivery hanvenuch kelʼli mhunn mhaka kollon ailem. Hem zannam zaun hanv ekdom ojap ani khuxal zalo!

Itlim-i vorsam pasun Jehova aplea songottnne udexim aplea lokank koso margdorxon dita ani tankam koso samballtta tem polloun tache pasot mhozo mog anikui vaddlo. Sumar 1980 hea vorsa, Sonchalon Monddollan, dotor ani hospital-ant kam korpi heram pasot, Jehovache Sakxi rogot kiteak ghenant tem somzaunk, United States-ant ek kariavoll toiar keli.

Uprant 1988-ant, Sonchalon Monddollan, Bethel-ant, Hospital Mahiti Khatem, hea nanvachem ek novem khatem suru kelem. Survatek hem khatem United States-ant aslolea Hospital Liaison Somitinchem vo HLC-chem kam polloun ghetalem, jeo Jehovachea Sakxeank rogot nastana ilaz korunk dotor sodhunk modot kortaleo. Ani uprant, sonvsarbhor ani France-ant pasun osleo somiti stapon keleo. Tor hea toren, modotichi goroz aslolea duent bhav-bhoinnank Jehovachem songotton mogan modot korta tem polloun mhaka khub borem dista.

Dotorachem kam mhaka sogleam poros chodd avoddttalem. Punn jivitachi Zhor, Jehova Deva vixim lokank zannam zaunk ani tachi seva korunk modot korop, hea kama poros chodd mhotvachem mhunn mhaka kollon ailem. Tor hea pasot, hanv retire zalea uprant, Lydie ani hanv niemit pioneer mhunn seva korunk laglim ani lokank Devachea Rajea vixim porgottunk laglim. Ani aiz pasun, lokancho jiv salvar korchea hea kamant ami amchean zata titlo vavr kortat.

Azun porian hanv duent lokank bore korunk mhojean zata titlem korta. Punn sogleam poros boro dotor pasun lokanchem duens vo moronn kaddun uddounk xokona mhunn hanv zannam. Tor hanv oslea fuddarachi vatt polloita jednam dukh, duensam ani moronn aschem na. Ho fuddar Jehova beginuch haddcho asa ani thoim hanv sasnak jieunk pavtolo. Tednam Devache rochnne vixim ani khas korun munxache kuddi vixim hanv anik kholaien xikonk pavtolo. Khorench, mhojea bhurgeponna voilem sopon fuddarak purnn toren ghoddon ietolem ani tem jivit ekdom borem astolem mhunn mhaka kainch dubhav na!