1941-mi Parisimi Frankrigimiit­tumi inun­ngor­punga. Ilaqut­takka pigis­saar­tuun­ngil­lat. Qulinik ukioqarlunga tuberkuloseqalerama nakorsat atuarun­naaq­qum­man­nga pakatseqaanga, atuar­nerami nuan­narigaluaqigakku. Puak­kali qajas­suuteq­qul­lugit nakorsat angerlarsimaf­fitsinni unin­ngaan­naq­quaan­nga. Qaam­mater­paaluit ingerlanerini oqaatsinik qinerlerfis­siat atuar­pakka, aamma ilin­niar­titaaneq pil­lugu Sorbon­nemi radiuk­kut Parisimi universitetip aal­lakaatitas­siai tusar­naar­tar­pakka. Nakorsap kiisami peq­qis­sinerarmanga atuariar­toq­qis­sin­naanerarmangalu nuan­naaqaanga. Imminut ima oqarfigaanga: “Nakorsat pik­koringaaramik!” Taamanik­kumiilli nap­parsimasunik katsorsaasaler­nis­sara takorloor­taler­para. Alliguma sun­ngorusun­nerlunga ataataga aperigaangat tamatigut ima akisar­para: “Nakorsan­ngorusup­punga.” Taamaat­tumik nakorsan­ngor­nis­sara inuuninni pingaar­ner­paatil­lugu anguniagariler­para.

Ilaqut­tak­kalu katuuliuvugut. Guutili pil­lugu ilisimasaqar­pian­ngilanga, apeq­qutis­sar­pas­suaqaraluar­pungalu akis­sutis­saqar­tin­ngisan­nik. Aatsaalli universitetimi nakorsatut ilin­nialerama pin­ngor­titaaner­put upper­narsivara.

Naasup tulipanip cel­lii mikroskopik­kut misis­soq­qaarak­kit eqqaamavara. Cel­lit kis­sar­tumut nil­ler­tumullu qanoq qisuariar­tar­nerat tupigusuutigeqaara. Aamma maluginiar­para cel­lit iluaniit­toq (cytoplasma) tarajulim­miitil­lugu mil­lisar­toq imermiitil­lugulu allisar­toq. Tamakku allar­pas­suillu pis­sutigalugit uumas­susil­lit min­nerit naleq­qus­sarsin­naas­suseqar­put. Sananeqaatit ataasiak­kaat tupin­nangaar­tumik katitigaanerat takugakku  paasiler­para inuuneq nalaatsor­nerin­nak­kut pilersiman­ngitsoq.

Nakorsan­ngor­niarlunga ukiut aap­pas­saan­nik ilin­niar­ninni Guutip piunera upper­narseq­qiin­nar­para. Timip sananeqaataanik ilin­niar­tin­neqar­nitsinni paasivar­put ikusitsin­niit assatsin­nut nukiit katitigaanerat pis­sutigalugu inus­sagut peqis­sin­naal­lutillu siaarsin­naasut. Nukitta saanitsin­nut atanerat suullu tamarmik ataqatigiil­luar­nerat tupin­naqaaq. Assersuutigalugu paasivar­put ikusitsin­niit assatsin­nut nukiit inus­satta saar­nginut qiterler­nut ataf­feqar­tunik ujaloqar­toq. Ujalorlu taanna marlun­ngorluni avis­saarfeqar­nera pis­sutigalugu akor­natigut ujaloq alla inus­satta nuuanut ataf­feqarsin­naavoq. Ujal­lullu taakku inus­satta saar­nginut qanit­tun­nguup­put. Inus­sagut taamatut sananeqaateqan­ngik­kaluar­pata naggus­satta noqarutaat sukangal­lutillu qerataq­qis­saarsimas­sagaluar­put inus­sagullu eqar­torujus­suus­sagaluarlutik. Tamatumuuna paasivara silas­soris­sumik Pin­ngor­titsisoqar­toq.

Pin­ngor­titsisutta suliai aatsaat iluamik tupigusuutigiler­pakka naalungiarsuup erniuniariarluni qanoq anersaar­tuler­tar­nera paasigakku. Suli naarmiuutil­luni anaanaminit iltilersor­neqar­tarami nam­mineerluni anersaar­tor­tariaqar­neq ajor­poq. Tamanna pis­sutigalugu puaani pul­lar­taaq­qat silaan­narmik immer­tar­tus­sat suli pul­las­siman­ngil­lat. Erniunis­saanulli sapaatit-akun­nialuit sioq­qul­lugit pul­lar­taaq­qat taakku imer­palasumik orsumik akulim­mik immer­tar­put. Taava inoorlaap anersaar­tuleq­qaar­nerani tupin­nar­tumik pisoqar­tar­poq. Inoorlaap uum­mataani putoq aalajangersimasoq milit­tarmat aak puaanut ingerlaaler­tar­poq. Puaanilu pul­lar­taaq­qat imer­palasumik orsumik akulim­mik imaqarmata iigar­tai immin­nut nip­pun­neq ajor­put, inoorlaarlu anersaar­tuleraangat silaan­narmik immeriaan­naasar­put. Taamaasil­lunilu inoorlaaq nam­mineerluni anersaar­torsin­naaler­tar­poq.

Tupin­narluin­nar­tunik Pin­ngor­titsisoq ilisarisimalerusuk­kakku pimoorus­sil­lunga Biibili atuar­taler­para. Peq­qin­nis­samut tun­ngatil­lugu inatsisit ukiut 3.000-t sin­nerlugit matuma sior­nagut Guutip Israalik­kun­nut tun­nius­simasai tupigusuutigaakka. Assersuutigalugu peq­quai annatik nunamut matoor­tas­sagaat, uffarlutillu asakulasas­sasut aamma tuniluus­sin­naasumik nap­paateqalersimasoq immik­koor­tin­neqar­tas­sasoq. (Mos 3. 13:50; 15:11; Mos 5. 23:14) Tamak­kua qangarsuarli Biibilimi atuar­neqarsin­naap­put, nap­paatilli qanor­piaq tuniluut­tar­nerat aatsaat ukiuni 150-ini kingul­lerni ilisimatusar­nik­kut paasil­luar­neqar­neruler­poq. Aamma atoqatigiin­nermut tun­ngatil­lugu inatsisit Israalik­kut inuiaqatigiit­tut peq­qis­suuneran­nut iluaqutaap­put. (Mos 3. 12:1-6; 15:16-24) Paasiler­paralu Pin­ngor­titsisoq iluaqutaasunik Israalik­kun­nut inatsisiliorsimasoq, tamak­kunun­ngalu naalat­toq pil­luaq­qusaraa. Qulariun­naar­paralu Biibili Guutimeersuusoq. Guutilli aqqa suli naluara.

Universitetimi nakorsan­ngor­niar­ninni arnan­nguaq Lydiemik atilik naapip­para asan­nilerfigalugulu. 1965-imi ilin­niar­nerma affaa nal­lerlugulu katip­pugut. 1971-imi pingasunik qitor­naqalereer­pugut. Nakorsatut sulininni ilaqutariin­nitsin­nilu Lydie anner­toq­qutigisaqaara.

 Ukiut pingasut nap­parsim­mavimmi sulereerlunga nakorsiar­tarfim­mik ammaavunga. Kingorna aap­pariit, aal­laq­qaam­mut eqqaasakka, nakorsiar­put. Nakorsaatis­saan­nut allagar­taq uiusumut tun­niun­nialerigalu nuliaasup ima oqarfigaanga: “Nakorsaatitta aat­taqan­ngin­nis­saat kis­saatigaar­put.” Tupigutsal­lunga aperaara: “Ilumut? Sooq?” Akivorlu: “Jehovamik Nalunaajaasuugatta.” Jehovap Nalunaajaasui aam­mullu isigin­nit­taasiat ilisimasaqarfigin­ngilakka. Arnaq sooq aam­mik atuerusun­ngin­nermin­nik Biibili najoq­qutaralugu nas­suiaavoq. (ApS 15:28, 29) Taava Biibilimi takutip­paat Guutip kun­ngeqarfini aqqutigalugu anniaatit, nap­paatit toqulu piujun­naarsik­kumaarai. (Saqq 21:3, 4) Nuan­naaqalunga oqarfigaak­ka: “Meeraal­lungali kis­saatigiuar­tak­kan­nik oqalut­tuup­pas­singa! Anniar­toqar­tan­ngin­nis­saami kis­saatigigaluaqigakku nakorsan­ngor­punga.” Oqaloqatigiil­luangaaratta nalunaaqut­tap-akun­nera affarlu oqaloqatigiip­pugut. Aap­pariit nakorsiar­tarfim­miit anim­mata katuuliujun­naar­nis­sara aalajangiup­para, paasivaralu tupin­nangaar­tunik Pin­ngor­titsisup aqqa tas­saasoq Jehova!

Aap­pariit taakku nakorsiar­tarfiutinni pingasoriarlunga oqaloqatigaakka, tamatigullu nalunaaqut­tap-akun­neranit ataatsimit sivisunerusumik oqaloqatigiit­tar­pugut. Biibili pil­lugu sivisunerusumik oqaloqatigiis­sin­naanias­sagatta uagutsin­nut pulaaq­quakka. Biibilimik misis­sueqatigiin­nitsinni Lydie akuusaraluarluni katuul­lit ilin­niar­titsis­sutigisar­tagaan­nik aal­laq­qaam­mut illersuigaluar­poq. Taamaat­tumik ullu alla palasi aggersar­para. Unnus­suarmut Biibili kisiat atorlugu oqaluf­fimmi ajoqersuutigineqar­tar­tut eqqar­tor­pagut. Lydiellu paasiar­tuler­paa Jehovap Nalunaajaasuisa ilin­niar­titsis­sutigisaat eqqor­tuusoq. Jehova asaleralut­tuin­naratsigu 1974-imi marluul­luta imermut morsutsin­neqar­pugut.

Guutip inun­nut siuner­taa paasigakku pingaar­ner­paatitakka allan­ngor­put. Jehovamut kif­far­tor­neq Lydiemut uan­nullu inuunitsinni pingaar­ner­paan­ngor­poq. Aalajangiup­par­put Biibili najoq­qutaralugu meeq­qagut perorsar­niarlugit. Guutimik inoqatitsin­nillu asan­nin­neq ilin­niar­titsis­sutigaagut, taman­nalu ilaqutariit­tut ataqatigiil­luar­nerulis­sutigaar­put. – Mat 22:37-39.

Aalajangiigaangatta Lydielu isumaqatigiit­tuaan­nar­ner­put qitor­natsin­nut qanoq sun­niuteqar­tar­nersoq eqqarsaatigigaangatsigu qungujut­tar­pugut. Nalun­ngilaammi aalajangiinerit eqqor­tit­tuaan­nar­nis­saan­nik Jiisusip najoq­qutas­siaa angerlarsimaf­fitsinni maleruagas­saasoq.  (Mat 5:37) Assersuutigalugu panip­put angajul­leq 17-inik ukioqarluni inuusut­toqatiminik peqateqar­nis­saminik anaanaminit itigar­titaam­mat ikin­ngutaasa ilaata ima oqarfigisimavaa: “Anaanavit itigar­tip­patit ataatat aperiin­nas­savat!” Panit­tali ima akisimavaa: “Iluaqutaanavian­ngilaq, isumaqatigiit­tuaan­nar­put.” Qitor­natta tamarmik qularutigisarsiman­ngilaat Biibilimik najoq­qutas­siat isumaqatigiil­luta maleruar­tarigut. Maanna qujamasoqaagut ilaqutar­pas­suagut Jehovamut kif­far­tormata.

Naak inuuninni pingaar­titakka allan­ngor­nikuugaluar­tut nakorsatut pigin­naasakka Guutip innut­taanut iluaqutis­satut atorusup­pakka. Tamanna pil­lugu Betelimi Parisimiit­tumi, kingor­nalu Louviersimi Betelitaami, nakorsatut ikiuuk­kiar­tor­taler­punga, ukiunilu 50-ingajanni taamatut kif­far­tor­punga. Kif­far­tor­ninni Betelimi ikin­ngutitaar­tor­punga, taak­kulu ilaat maanna 90-it sin­nerlugit ukioqar­put. Aamma ullut ilaanni Betelimi kif­far­tulerlaaq naapik­kakku tupaal­latsin­neqar­punga. Paasivarami ukiut 20-t tamatuma sior­nagut taanna inun­ngormat nakorsatut ikiuus­simal­lunga!

Jehovap peqatigiif­fini aqqutigalugu innut­taminik siulersuil­lunilu illersuisar­nera ukiut ingerlanerini maluginiar­tarakku Jehova asanerujar­tuin­nar­para. Assersuutigalugu Jehovap Nalunaajaasuisa aalersor­tik­kuman­ngin­nerat pil­lugu 1980-ik­kut aal­lar­tilaar­neranni USA-mi nakorsanut peq­qis­saasunullu paasititsiniaasus­sanik ataatsimiititaliamik Siulersuisoqatigiit pilersitsip­put.

Taava 1988-imi Siulersuisoqatigiit Nap­parsim­mavin­nut Paasis­sutis­siisarfik pilersip­paat. Aal­laq­qaam­mut USA-mi Nap­parsim­mavin­nut Attaveqar­titat * suliaat paasis­sutis­siisarfiup nak­kutigaat. Nap­parsim­mavin­nullu Attaveqar­titat nunani allani pilersin­neqarmata aamma Frankrigimi pilersin­neqar­put. Qatan­ngutinik nap­parsimasunik ikior­neqar­nis­samin­nik pisariaqar­titsisunik Jehovap peqatigiis­sor­tai asan­nil­lutik anner­toq­qusersuisar­nerat kil­litsis­sutigisaqaara!

Nakorsatut sulias­sat aal­laq­qaam­mut inuuninni pingaar­ner­paatip­pakka. Pingaar­titak­kali eqqarsaatigeq­qis­saar­til­lugit paasiler­para Jehova pil­lugu ilin­niar­titsineq taas­sumun­ngalu kif­far­tuler­nis­samik ikiuineq pingaar­nerusut. Soraar­nin­ngoreerlunga Lydielu pioneritut qaam­matit tamaasa nalunaaqut­tap-akun­ner­pas­suini Guutip kun­ngeqarfia pil­lugu nutaarsias­sat nuan­nersut oqaluus­sis­sutigisar­pagut. Maan­nalu suli sapin­ngisatsin­nik oqaluus­sisar­pugut.

Nap­parsimasunik sapin­ngisan­nik suli katsorsaaniar­tar­punga. Nalun­ngilarali nakorsani pik­korin­ner­paarluun­niit nap­paataarutsitsisin­naananilu toqumik atuuk­kun­naarsitsisin­naan­ngitsoq. Siunis­sami nunas­sami nutaami anniaatit, nap­paatit toqulu piujun­naar­nis­saat qilanaaraara. Aamma Guutip pin­ngor­titai tupin­nangaar­tut, soorlu inuup timaa, pil­lugit qaqugorsuarmut ilik­kagaqar­tar­nis­san­nik periarfis­saqas­saanga. Aap, meeraal­lungali kis­saatiga ungasin­ngitsuk­kut tamak­kiisumik eqquutitin­neqas­saaq. Qularin­ngilaralu nuan­ningaar­tut tupin­nangaar­tullu tak­kutingajalersut!