Nasemekelwe mu 1941 mu muzhi wa Paris, mu France, kabiji bansemi bami kechi bajinga banonshi ne. Natemenwe bingi kufunda, onkao mambo, kyankolele bingi ku muchima kimye kyo nakolelwe kikola kya TB byo nafikizhe myaka jikumi, kabiji nalekele sukulu. Badokotala baambile’mba nafwainwa kulaalangatu pa mwanya pa kuba’mba mapwapwa abulenga kwikala mu lukatazho. Onkao mambo, pa bañondo bavula bingi natanganga dikishonale ne kuteleka ku waileshi wa Sorbonne wa pa sukulu mukatampe wa mu Paris. Kimye dokotala kyo ambuujile’mba nabukwa kabiji nakonsha kutendeka sukulu jibiji, nasangalele bingi. Naambile mu muchima namba, ‘Badokotala bengila mwingilo wanema bingi.’ Kufumatu kyo kya kimye, nebikijile kikonkwanyi kya kukwasha bakolwa. Kimye kyonse inge batata bangipuzha’mba ñanyi bintu byo ukeba kuba mu bwikalo bobe, naambanga’mba, “Mbena kukeba kwikala dokotala.” Kwikala dokotala kyo kintu kyo nanemekele bingi.

Kisemi kyetu kyajinga kya Bakatolika. Bino kechi nayukile byavula pe Lesa ne, kabiji najinga na mepuzho avula bingi abujile mikumbu. Kimye kyo natendekele kufunda budokotala pa sukulu mukatampe, po po nashiinwe kuba’mba bumi bwalengelwe.

Mbena kuvuluka kimye kitanshi kyo namwene biji maselo a kichi kwingijisha maikolosikopo. Nakuminye pa kumona maselo byo ezhikijila ene ku kyuya ne mashika. Kabiji namwene ne bintu bitelwa’mba cytoplasm (bintu bikala mu jiselo) byo bifinankana inge babikapo mukele ne byo  bivunguluka inge bebibika mu mema abula kintu kikwabo ne. Abino bintu ne bikwabotu, bikwasha bilengwa bicheche kuyuka byakwikala kwesakana na nkiilo. Byo namwene byakobankana maselo, nashiinwe kuba’mba bumi kechi bwaishilekotu bwine ne.

Mu mwaka wa bubiji ye najinga pa sukulu na kufunda budokotala, nemwenejile bishiino byavula bimwesha’mba Lesa ko aji. Kimye kyo twafunjilenga pa biji mubiji wa muntu, twafunjile pa byalengwa mukoko wa muntu byo bilengela minwe kwivunga ne kuvunguluka. Jishinda misunyi jo yalamachilamo ku bikupa ne mishipeshipe byo bingijila pamo ke kya kukumya bingi. Kabiji nafunjile kuba’mba mishipeshipe yakwata misunyi imo ya ku kuboko ne ku kikupa kya ku munwe yaabanapo pabiji, ne kulenga byabu papichila mishipeshipe yaya kwapelela minwe. Kabiji bisisa bikwata ino mishipeshipe ne kwiibika kwipi na bikupa bya minwe. Inge kya kuba minwe kechi yalengelwe mu jino jishinda ne, mishipeshipe inge kechi ivunguluka ne, kabiji minwe inge kechi ingila bulongo ne. Nammwesheshetu kuba’mba walengele mubiji wa muntu uji na maana akila.

Kabiji natundaikilwe bingi pa mingilo ya Mulenga byo nafunjile pa bisemwa mwana. Nafunjile kuba’mba, mwana saka akijitu jishi, utambula mwela wa oxygen kufuma kwi inanji kupichila mu kalongolo. Onkao mambo, mu mapwapwa kechi mwikala mwela ne. Kimye kya kusemwa inge kekinangijile pepi, kuji bintu bimo bya mafuta-mafuta biya na kwikala mu mapwapwa. Kepo inge mwana wasemwa, kuji bintu byavula bingi byubiwa pa kuba’mba atendeke kupema. Lupako wikala mu muchima wa mwana ushinka. Kino kilengela mashi kutendeka kuya ku mapwapwa. Pa kyonkakye kimye, abya bintu bya mafuta-mafuta bikala mu mapwapwa bishinkuka pa kuba’mba mutwele mwela bukiji bukiji. Ponkapotu mwana utendeka kupema.

Nakebelenga kuyuka mwine walengele bino bintu bya kukumya. Onkao mambo, natendekele kutanga Baibolo na mukoyo. Nakuminye bingi pa mizhilo ya butooto Lesa yo apele kisaka kya Isalela kala kukila pa myaka 3,000. Lesa wakambizhe bena Isalela kuzhiika bincha byafuma munda, kowa kimye kyonse na mema, ne kubika kwa bunke muntu ubena kumwesha biyukilo bya kuba’mba uji na kikola kisambukilañana. (Levi 13:50; 15:11; Mpitu. 23:13) Baibolo wamwesha mashinda musambukila bikola, bino bashayuka ba sayansi bafundatu pa ano mashinda mu myaka ya kulutwe kuno. Kabiji namwene kuba’mba mizhilo yakainye bulalelale yanembwa mu buku wa Bena Levi yakwashishenga bantu kwikala na butuntulu bwa mubiji bwawama. (Levi 12:1-6; 15:16-24) Nashiinwe kuba’mba Mulenga wapele bena Isalela ino mizhilo kuba’mba bekalenga bulongo, kabiji wapesheshe boba bakookelanga mikambizho yanji. Kabiji nashiinwe kuba’mba Baibolo ke buku wanembelwe na lutangijilo lwa Lesa ye nabujile kuyuka jizhina pa kyo kya kimye.

Kimye kyo najinga pa sukulu mukatampe na kufunda bya budokotala, namonañene na nsongwakazhi wa jizhina ja Lydie, kabiji namutemenwe. Twatwelele mu masongola mu mwaka wa 1965 saka kwashalatu myaka icheche kupwisha sukulu. Byo twafikilenga mu mwaka wa 1971, twajinga na baana basatu, kabiji mu kuya kwa myaka twasemene baana bakwabo basatu. Benakwami bankwashanga bingi mu mwingilo wami wa budokotala ne mu kisemi.

 Naingijile mu kipatela kikatampe saka nkyangye kwikala na kipatela kyami. Byo papichiletu moba acheche, kwaishile ba mulume ne mukazhi bakolelwe bo naambapo ku ntatwilo baishile na kukeba muchi. Byo naubiletu amba ntendeke kunembela muchi wa balume, bakazhi bañambijile’mba: “Mwane badokotala kwitunembela muchi muji mashi ne.” Nakuminye kabiji naipwizhe’mba: “Byonkabyotu? Mambo ka?” Bankumbwile’mba: “Twi Bakamonyi ba kwa Yehoba.” Bakamonyi ba kwa Yehoba kechi nebayukile ne, kabiji kechi nayukile byo bafunjisha pa mashi ne. Uno inetu watolele Baibolo ne kummwesha kinembelo kibalengela kubula kuswa kwibabika mashi. (Byu. 15:28, 29) Kepo bano ba mulume ne mukazhi bandumbulwijile bikoba Bufumu bwa Lesa, kuba’mba bukafumyapo buyanji, bikola, ne lufu. (Lum. 21:3, 4) Naambile’mba: “Kintu kyo mubena kumbuula kyo kintu kyo nkebesha bingi mu bwikalo bwami kufumatu ku bwanyike! Naikele dokolotala pa kuba’mba nkwashenga bantu babena kuyanda.” Naumvwine bingi bulongo kya kuba twisambile pa jiola jimo ne kichika. Bano ba mulume ne mukazhi byo bayile, nafuukwilepo kuleka kwikala Katolika, kabiji nafunjile kuba’mba Mulenga wa bintu bya kukumya uji na jizhina ja Yehoba.

Bano ba mulume ne mukazhi Bakamonyi namonañene nabo pa kipatela kyami bimye bisatu, kabiji pa bino bimye byonse, twaikalanga na mwisambo kukila pa jiola jimo. Nebechile ku nzubo kwami pa kuba’mba tukekale na kimye kyabaya kya kwisamba pa Baibolo. Nangwa kya kuba bakazhi bami baswile kutanwapo kimye kyo twafunjilenga Baibolo, bino kechi baswile kuba’mba mafunjisho amo a mu Katolika kechi ajinga a kine ne. Onkao mambo, naichile bantangi ku nzubo kwetu. Twichochekele pa mafunjisho a chechi kufika ne bufuku, kabiji twaingijishengatu Baibolo. Uno mwisambo walengejile benakwami kushiinwa kuba’mba Bakamonyi ba kwa Yehoba bafunjisha bukine. Kufumatu kyo kya kimye, butemwe bo twatemwa Yehoba Lesa bwabayile kabiji twabatizhiwe mu 1974.

Byo nafunjile pa kyaswa muchima wa Lesa ku bantu kwandengijile kupimpula bintu byo nanemekele mu bwikalo bwami. Amiwa ne ba Lydie twatangizheko kwingijila Yehoba mu bwikalo bwetu. Twafuukwilepo kufunjisha baana betu malamuna a mu Baibolo. Twafunjishe baana betu kutemwa Lesa ne bantu. Kabiji kino kyalengejile kisemi kyetu kukwatanakana.—Mat. 22:37-39.

Inge twalanguluka mwapita bwikalo bwetu, amiwa ne benakwami javula tuseka inge twavuluka baana betu byo bayukile’mba twafuukwilanga bintu pamo. Bayukile kuba’mba twalondelanga mukambizho wa kwa Yesu wa kuba’mba  “‘Ee’ wenu ekale ee, ne ‘Ine’ wenu ekale ine.” (Mat. 5:37) Pa kimye kimo, mwanetu wamukazhi wajinga na myaka 17, wakebelenga kuya na kukaya na jibumba ja banyike bakwabo, bino bainanji bamukainye. Mwanyike umo pa jino jibumba wabuujile uno mwanetu amba, “Inge bainobe bakukanye, ulombe kwi bashobe!” Bino mwanetu wakumbwile’mba: “Akyo kechi kyakonsha kwingila ne. Bonse babiji bayilatu mumo.” Kya kine, baana betu bonse batanu na umo bayukile’mba twakwatankene mu kulondela mafunde a mu Baibolo. Tusanchila bingi Yehoba mambo lelo jino tuji na kisemi kikatampe kya bapopweshi ba Yehoba.

Nangwa kya kuba bukine bwapimpwile bintu byo nanemekele mu bwikalo bwami, bino nakebelenga kwingijisha mwingilo wami wa budokotala kukwasha bantu ba Lesa. Onkao mambo, nepaine kwingilako moba amo pa Betele mu muzhi wa Paris, kabiji natwajijile kwingila uno mwingilo nangwa kimye musampi kyo bamuvilwijile mu muzhi wa Louviers. Pano ke myaka 50 yo naingila uno mwingilo pa Betele na kukelela kufuma pa nzubo. Pa iye myaka yonse, nalenga balunda bavula bingi mu kisemi kya Betele, kabiji bamo baji na myaka kukila pa 90. Kabiji juba jimo nakuminye bingi pa mulongo waishile na kwingijila pa Betele. Kyatainwe kuba’mba amiwa yami dokotala wapaapishe bainanji kimye kyo asemenwe kabiji papita ne myaka 20.

Pa myaka yonse yo naingijila Yehoba, butemwe bo namutemwa bwabayilako pa kumona byo atangijila ne kuzhikijila bantu kupichila mu jibumba janji. Mu mwaka wa 1980, Jibumba Jitangijila janengezhezhe mutanchi mu United States wa kukwasha badokotala ne bamingilo bakwabo mu bipatela kuyuka ene mambo Bakamonyi ba kwa Yehoba o bakaina kwibabika mashi.

Kabiji mu 1988, Jibumba Jitangijila jalengele dipatimenti pa Betele itelwa’mba Dipatimenti Ipana Mabulañano a bya mu Bipatela. Patanshi uno dipatimenti watangijilanga Tuvoto twa Bambañana na ba Mingilo mu Bipatela (HLC) twalengelwe mu United States kukwasha Bakamonyi kutaana badokotala bakonsha kwibabuka kwa kubula kwibabika mashi. Tuno tuvoto byo twalengelwe mwaya ntanda yonse, ne mu France namo kano kavoto kalengelwe. Kintundaika bingi pa kumona jibumba ja Yehoba byo jikwasha balongo ne banyenga bakolwa.

Patanshi natemenwe bingi mwingilo wami wa budokotala. Bino byo nalangulukilepo jikwabo pa bintu byanemesha, namwene kuba’mba lubuko lwawama ke kubuka bantu lwa ku mupashi, ko kuba’mba kukwasha bantu kupwana na mwine Nsulo ya bumi aye Yehoba Lesa. Byo natambwile penshonyi, amiwa ne benakwami twaikele bapainiya kabiji twaingilanga maola avula pa ñondo pa ñondo mu mwingilo wa kusapwila mambo awama a Bufumu bwa Lesa. Ne luno twatwajijila kwingila papelela bulume bwetu uno mwingilo ukapulusha bantu.

Natwajijila na kukwasha bakolwa. Bino nayuka kuba’mba nangwatu badokotala bene bashenyenye kechi bakonsha kubuka bikola byonse nangwa kukanya lufu ne. Onkao mambo, mbena kutengela kimye misongo, bikola, ne lufu kyo bikabula kwikalako jibiji ne. Mu ntanda ipya ijitu pepi, nkatwajijila kufunda byavula pa bilengwa na Lesa, kubikapotu ne jishinda ja kukumya jalengelwamo mubiji wa muntu. Kya kine, kintu kyo nakebeshenga ku bwanyike kikafika. Nashiinwa kuba’mba kulutwe kuji bintu byawama bingi.