1941 hkʼawꞈ htaˇ ngaˬ paw ve yoˬ. Ngaˬ hui ve yehˬ kʼa lehˬ caˇ lawꞈ dawˬ lawꞈ cawˬ ve yoˬ. Hpaˉlanˍ mvuhˇ miˬ Pehˇriˆ venˇ lo ngaˬ hui chehˇ ve yoˬ. Ngaˬ liꞈ henˇ ve dawˇ cawˇ jaˇ. Ngaˬ 10 hkʼawꞈ htaˇ, mawꞈ hoꞈ a naˍ hpehꞈ leh liꞈ henˇ yehˬ lo kʼai maˇ gʼa ve pa taw, ngaˬ nyi ma hkʼaˬ hkʼe taw luˬ ve htaꞈ dawˇ nyi sheˍ. Awˬ tsuhˇ hpoˆ kanˉ hkʼe taw maˇ gʼa te tuˬ, ngaˬ ku˗iˍ hkʼoˆ lo hkʼaˬ htaˆ kaꞈ gʼa zuhꞈ taˍ ve tehꞈ saˍ laꞈ gʼonˍ kʼoˆ laˇ ve yoˬ. Leh ngaˬ ku˗iˍ hkʼoˆ lo laiˉ ha pa gʼa zuhꞈ taˍ ve yoˬ. Hkʼe te leh, ngaˬ diˆ shaˍ naˍ liˍ liꞈ gʼaw leh Pehˇriˆ venˇ liꞈ tanˇ mvuhˇ ve liꞈ henˇ yehˬ awˬ meh Shaw baw viˆ htiˆ yuˆ (ri˗di˗o) awˬ hkawˇ tawˆ ve htaꞈ kaꞈ ngaˬ na ve yoˬ. Ngaˬ na˗oˬ leh liꞈ henˇ yehˬ lo kʼai hpehꞈ˗oˬ tehꞈ saˍ laꞈ gʼonˍ kʼoˆ laˇ htaˇ, ha lehˬ jaˇ. Ngaˬ dawˇ ve, ‘saˍ laꞈ gʼonˍ hpehꞈ ve lehˬ shu ve a shaꞈ htaꞈ ga piˇ ve pa taw daꞈ jaˇ.’ Chaw naˬ htaꞈ haꞈ shaˉ piˇ tuˬ ngaˬ saˍ laꞈ gʼonˍ te gaˇ ve yoˬ. Ngaˬ uiˍ la kʼo, aˬ htoꞈ ma te gaˇ ve ngaˬ pa na laˇ htaˇ, ‘saˍ laꞈ gʼonˍ te gaˇ ve’ tehꞈ kʼoˆ piˇ ve yoˬ. Oˇ htaˇ tanˬ leh saˍ laꞈ gʼonˍ te gaˇ ve yoˬ.

Ngaˬ ve yehˬ kʼa lehˬ Caˬbuˉ ve bon moˍ hkʼaw chehˇ ve yoˬ. Yaꞈ hkʼaˇ, ngaˬ Gʼuiˬ sha ve awˬ lawn htaꞈ hkʼa dehꞈ maˇ shiˍ sheˍ leh ngaˬ ve na hkawˇ laiˉ maˬ htaꞈ maˇ hkʼawꞈ laˇ sheˍ ve yoˬ. Leh ngaˬ saˍ laꞈ gʼonˍ hpawˇ gʼa henˇ˗oˬ htaˇ, hpanˍ shehˍ hpaˇ cawˬ ve tehꞈ ngaˬ yonˍ la ve yoˬ.

Suhˉ veˆ hkʼaw ve she˗e (cell) htaꞈ ngaˬ awˬ paˇ lo ca nyi htaˇ, gʼa mawˬ ve awˉ lawˉ teˇ pawˆ hpehꞈ ve yoˬ. Suhˉ veˆ chi ve haw ve leh gawˬ ve hkʼaw kaꞈ ti gʼa ve pa taw, suhˉ veˆ chi ve she˗e hkʼa peu˗eˬ hkʼaw ngaˬ gʼa mawˬ ve kaꞈ dawˇ cawˇ jaˇ. Suhˉ veˆ chi ve aˉ lehꞈ mehˬ ve iˉ kaˆ hkʼaw tuˍ keu piˇ htaˇ ho˗eˬ leh iˉ kaˆ daꞈ kuiˬ hkʼaw kʼawꞈ tuˍ keu piˇ htaˇ, awˬ veˆ kʼaw daꞈ la ve yoˬ. Suhˉ veˆ chi teˇ hpaˍ lehˬ hkʼaˬ kaˬ lo ti kaꞈ gʼa ve yoˬ. Anˇ lawꞈ lawꞈ ve hkʼaw suhˉ veˆ  chi ve hkʼaw ve she˗e htaꞈ ngaˬ gʼa mawˬ htaˇ, a shaꞈ teꞈ ve awˬ ceuˬ lehˬ yawˇ hkʼaˇ yawˇ cawˬ la ve maˇ heˆ tehꞈ ngaˬ yonˍ ve yoˬ.

Saˍ laꞈ gʼonˍ henˇ ve 2 hkʼawꞈ gaˬ˗oˬ htaˇ, Gʼuiˬ sha awˬ tehˬ cawˬ ve tehꞈ ngaˬ shaˉ hkiˆ gʼa mawˬ ve yoˬ. Chaw yaˇ ve awˬ to hkʼaw ve awˬ hkʼeun teˇ hpaˍ htaꞈ ngaˬ chaˬ nyi htaˇ, laꞈ gʼawˇ lehˬ laꞈ naw kʼawꞈ˗ehˬ te gʼa tuˬ leh mawˇ yuˬ gʼa tuˬ te piˇ ve yoˬ. Awˬ shaˍ diˬ leh awˬ muꞈ ku kanˉ teˇ geh hkʼa dehꞈ te gʼa ve pa taw, anˇ tuˬ cawˬ jaˇ ve yoˬ. Tawˇ pa haˉ te kʼo, awˬ shaˍ diˬ hkʼaw ve awˬ caˆ leh laꞈ tcuhˉ hkʼaw ve awˬ caˆ, laꞈ naw 2 tcuhˉ teˇ tcuhˉ hkʼaw awˬ caˆ nyiˇ hpawˇ lo kʼai gʼa leh, awˬ kaˍ lo ve awˬ caˆ teˇ caˆ laꞈ naw meuˇ lo ve awˬ muꞈ ku htaꞈ nehˉ daꞈ taˍ ve tehꞈ ngaˬ gʼa henˇ ve yoˬ. Chi hkʼoˆ kaꞈ, awˬ caˆ chi ve teˇ hpaˍ awˬ muꞈ ku htaꞈ hkʼa dehꞈ nehˉ taˍ ve yoˬ. Chi hkʼe maˇ te ve kʼo, kanˉ maˇ te sha tuˬ te piˇ ve yoˬ. Hkʼe te leh, chaw yaˇ htaꞈ hpanˍ shehˍ hpaˇ lehˬ cuˇ yiˍ cawˬ jaˇ ve htaꞈ ngaˬ gʼa mawˬ ve yoˬ.

Yaˇ paw ve awˬ lawn htaꞈ ngaˬ gʼa henˇ htaˇ, hpanˍ shehˍ hpaˇ ve awˬ lawn htaꞈ ngaˬ gʼa shiˍ ve ha lehˬ jaˇ. Yaˇ ehˉ awˬ e ve gʼuˇ peˬ hkʼaw chehˇ htaˇ, yawˇ hkʼaˇ yawˇ shaˉ maˇ gʼawˬ. Awˬ tsuhˇ ponˆ hkʼaw shaˉ gʼawˬ tuˬ ve mvuhˇ haw hpuˇ awˬ e ve awˇ siˍ cenˇ (oxygen) htaꞈ yehˇ ve yoˬ. Yaꞈ hkʼaˇ, oˇ ve teˇ yanˇ lehˬ, shaˉ gʼawˬ tuˬ ve mvuhˇ haw hpuˇ ehˉ chi teˇ hpaˍ lehˬ bonˬ lonˇ maˇ meuˆ sheˍ ve htaꞈ shuˍ ve yoˬ. Yaꞈ hkʼaˇ, yaˇ paw la yoˬ 2-3 shinˉ htaˇ, yaˇ ehˉ ve awˬ tsuhˇ ponˆ hkʼaw iˉ kaˆ daꞈ jaˇ ve cawˬ ve yoˬ. Yaˇ ehˉ paw la˗oˬ htaˇ, shaˉ awˉ lawˉ teˇ pawˆ gʼawˬ ve, yaˇ ehˉ ve nyi ma shiˍ caˆ hoˆ leh nyi ma shiˍ hkʼaw ve awˬ suhˍ caˆ awˬ tsuhˇ ponˆ geh kʼai ve yoˬ. Oˇ ve teˇ yanˇ yaˇ ehˉ shaˉ gʼawˬ htaˇ, awˬ tsuhˇ ponˆ hkʼaw daꞈ jaˇ ve iˉ kaˆ maˇ cawˬ ve kʼo, mvuhˇ haw shaˉ maˇ loꞈ˗e gʼa leh yaˇ ehˉ shaˉ maˇ gʼawˬ gʼa tuˬ te piˇ ve yoˬ. Awˬ tcuhˇ ponˆ hkʼaw iˉ kaˆ daꞈ jaˇ ve cawˬ ve pa taw, yaˇ ehˉ yawˇ hkʼaˇ yawˇ shaˉ gʼawˬ gʼa tuˬ te piˇ ve yoˬ.

Awˬ ceuˬ chi teˇ hpaˍ hkʼa peu˗eˬ hpanˍ shehˍ hpaˇ Gʼuiˬ sha htaꞈ ngaˬ shiˍ gaˇ tuˬ te laˇ ve yoˬ. Hkʼe te leh, ngaˬ Liꞈ hpu htaꞈ hkʼa dehꞈ gʼaw ve yoˬ. Gʼuiˬ sha Iˉsaˍreˍlaˆ chaw htaꞈ daꞈ kehˬ ve awˬ liˇ tawˇ hkawˇ piˇ ve lehˬ aˉ kaꞈ yiˍ htaˇ gʼa tuˇ tuˍ ve, hkʼaˬ htaˆ kaꞈ iˉ kaˆ gʼa hehˉ ve, leh hkiˬ tuꞈ a anˍ hpehꞈ ve chaw teˇ kaˬ lo gʼa chehˇ ve, awˬ liˇ tawˇ hkawˇ chi yawˇ hui htaꞈ piˇ ve 3,000 hkʼawꞈ hpaˆ˗oˬ ve ngaˬ gʼaw nyi htaˇ anˇ jaˇ. (Oˉ kʼoˍ pui ve 13:50; 15:11; Bon maˍ ve 23:13) Liꞈ hpu hkʼaw awˬ lawn chi htaꞈ kʼoˆ taˍ ve laiˉ hinˉ hkʼawꞈ gaˬ˗oˬ. Yaꞈ hkʼaˇ, chaˬ nyi tehˆ nyi paˍ awˬ lawn chi htaꞈ shiˍ ve lehˬ, 100 hkʼawꞈ hpaˆ ceh tiˉ sheˍ. Chi hkʼoˆ kaꞈ, Oˉ kʼoˍ pui ve liꞈ hkʼaw daꞈ kehˬ ve awˬ liˇ htaꞈ caˉ daꞈ ve, Iˉsaˍreˍlaˆ chaw gʼaꞈ te ve kʼo, awˬ bon cawˬ leh chehˇ sha cawˬ sha tuˬ yoˬ. (Oˉ kʼoˍ pui ve 12:1-6; 15:16-24) Gʼuiˬ sha Iˉsaˍreˍlaˆ chaw htaꞈ haꞈ ve pa taw, teˇ ceuˬ le le htaꞈ hpanˍ leh awˬ liˇ tawˇ hkawˇ chi yawˇ hui htaꞈ piˇ ve tehꞈ ngaˬ kʼoˆ gʼa ve yoˬ. Leh Gʼuiˬ sha ve tawˇ hkawˇ na ve chaw teˇ gʼaˇ le le htaꞈ awˬ bon naꞈ piˇ tuˬ yoˬ. Liꞈ hpu lehˬ Gʼuiˬ sha dawˇ pawnˍ piˇ ve pa taw, cawˬ la ve yoˬ tehꞈ ngaˬ yonˍ gʼa ve yoˬ. Yaꞈ hkʼaˇ, oˇ ve teˇ yanˇ Gʼuiˬ sha aˬ htoꞈ ma meh ve ngaˬ maˇ shiˍ sheˍ.

Ngaˬ saˍ laꞈ gʼonˍ henˇ htaˇ, Lu˗diˇ htaꞈ mawˬ daˬ leh yawˇ htaꞈ dawˇ cawˇ jaˇ. 1965 hkʼawꞈ htaˇ, ngaˬ saˍ laꞈ gʼonˍ henˇ ve teˇ tawn hkʼe gaˬ leh ngaˬ huiˉ maˬ heuˆ daꞈ ve yoˬ. 1971 hkʼawꞈ gaˬ leh ngaˬ huiˉ maˬ yaˇ 3 gʼaˇ cawˬ ve yoˬ. Hkʼe te leh, ngaˬ hui yaˇ hkʼa peu˗eˬ 6 gʼaˇ cawˬ ve yoˬ. Ngaˬ miˇ ma lehˬ ngaˬ saˍ laꞈ gʼonˍ te ve hpawˇ kaꞈ laiˉ ceuˬ ga laˇ leh yehˬ kʼa hkʼaw kaꞈ nyi haꞈ shaˉ laˇ ve yoˬ.

Ngaˬ naˆ tsuhˇ yehˬ lo saˍ laꞈ gʼonˍ ve kanˉ 3 hkʼawꞈ te peuꞈ hkʼawꞈ nawˉ, ngaˬ hkʼaˇ ngaˬ ve naˆ tsuhˇ yehˬ  ehˉ paw ve yoˬ. Ngaˬ naˆ tsuhˇ yehˬ ehˉ paw gehˇ sheˍ htaˇ, awˉ lawˉ htaˇ kʼoˆ kʼai peuˬ ve awˬ hpawˇ awˬ miˇ ma chaw naˬ 2 gʼaˇ naˆ tsuhˇ yehˬ lo laˬ ve yoˬ. Ngaˬ awˬ hpawˇ htaꞈ naˆ tsuhˇ hkʼaˬ hkʼe te dawˬ tuˬ liꞈ bvuhꞈ piˇ htaˇ, yawˇ ve awˬ miˇ ma ngaˬ htaꞈ kʼoˆ laˇ ve, “awˬ suhˍ pawnˇ daꞈ taˍ ve naˆ tsuhˇ ngaˬ hui maˇ heuˆ mehˍ.” Ngaˬ maˇ kaˇ jaw leh yawˇ htaꞈ na piˇ ve, “aˬ htoꞈ ma pa taw le?” Yawˇ kʼoˆ piˇ ve, “ngaˬ huiˉ maˬ lehˬ Yaˬhoˉvaˬ ve Shaˉhkiˆhkanˍ ve chaw hpehꞈ ve yoˬ.” Ngaˬ Yaˬhoˉvaˬ ve Shaˉhkiˆhkanˍ ve chaw awˬ lawn maˇ kaˇ jaw leh yawˇ hui awˬ suhˍ maˇ yehˇ ve ngaˬ maˇ shiˍ. Awˬ miˇ ma Liꞈ hpu yuˬ leh yawˇ hui aˬ htoꞈ ma pa taw, awˬ suhˍ maˇ yehˇ ve hpeuꞈ maˍ piˇ ve yoˬ. (Tcuh yaˇ 15:28, 29) Gʼuiˬ sha ve mvuhˇ miˬ lehˬ tuꞈ ve hkanˍ ve, naˬ ve gawˬ ve, leh suh ve maˇ kʼawꞈ cawˬ tcuh tehꞈ yawˇ hui Liꞈ hpu awˬ tawn hpeuꞈ maˍ laˇ ve yoˬ. (Hpeuꞈ maˍ ve 21:3, 4) Ngaˬ ha lehˬ ve hkʼaw kʼoˆ piˇ ve, “nawˬ kʼoˆ maˍ laˇ ve awˬ lawn lehˬ, chi ngaˬ yaˇ ehˉ htaˇ dawˇ teh taˍ ve awˬ ceuˬ hpehꞈ ve yoˬ. Ngaˬ saˍ laꞈ gʼonˍ te ve lehˬ chaw naˬ htaꞈ ga piˇ gaˇ ve pa taw yoˬ.” Leh yawˇ hui kʼoˆ maˍ laˇ ve tawˇ htaꞈ ngaˬ na gaˇ jaˇ leh 1 naˍ riˍ hpaˆ tawˇ yaw daꞈ ve yoˬ. Yawˇ hui kʼoꞈ˗e peuꞈ hkʼawꞈ nawˉ, nga Caˬbuˉ ve bon moˍ hkʼaw maˇ kʼawꞈ chehˇ˗o tehꞈ dawˇ cheˆ ve yoˬ. Hkʼe te leh, hpanˍ shehˍ hpaˇ Gʼuiˬ sha Yaˬhoˉvaˬ meh ve tehꞈ ngaˬ gʼa shiˍ la ve yoˬ.

Peuˬ hkʼawꞈ nawˉ, yawˇ hui ngaˬ ve naˆ tsuhˇ yehˬ ehˉ lo 3 hpaˆ kʼawꞈ laˬ ve yoˬ. Teˇ pawˆ le le ngaˬ hui tawˇ laiˉ naˍ riˍ yaw daꞈ ve yoˬ. Liꞈ hpu hkʼaw ve awˬ lawn ngaˬ kʼawꞈ shiˍ gaˇ ve pa taw, yawˇ hui ngaˬ ve yehˬ lo laˬ tuˬ jehˬ piˇ ve yoˬ. Ngaˬ hui Liꞈ hpu ve awˬ lawn yaw daꞈ chehˇ htaˇ ngaˬ miˇ ma kaꞈ chehˇ taˍ ve yoˬ. Yaꞈ hkʼaˇ, Caˬbuˉ ve bon maˍ yaꞈ ve tehꞈ ngaˬ miˇ ma maˇ haꞈ yuˬ. Hkʼe te lehˬ Caˬbuˉ awˬ hoˉ ngaˬ ve aˉ hkʼa lo tawˇ ca yaw daꞈ la tuˬ jehˬ piˇ ve yoˬ. Yawˇ hui Liꞈ hpu ve awˬ lawn yaw daꞈ ve aˬ laˬ hkʼe shehˍ kʼaw hkuin gaˬ ve yoˬ. Yaw daꞈ peuˬ hkʼawꞈ nawˉ, Yaˬhoˉvaˬ ve Shaˉhkiˆhkanˍ ve chaw maˍ ve awˬ ceuˬ lehˬ, awˬ tehˬ hpehꞈ ve tehꞈ yawˇ ve awˬ miˇ ma kaꞈ yonˍ la ve yoˬ. Yawˇ huiˉ maˬ Yaˬhoˉvaˬ htaꞈ haꞈ jaˇ. 1974 hkʼawꞈ htaˇ, ngaˬ huiˉ maˬ Baˆtiˆsaˬ haꞈ yuˬ tuˬ dawˇ cheˆ ve yoˬ.

Gʼuiˬ sha lehˬ chaw yaˇ htaꞈ a shaꞈ teꞈ hkʼaˇ hkʼaˬ hkʼe cawˬ tcuh gaˇ ve ngaˬ shiˍ htaˇ, ngaˬ dawˇ teh taˍ ve awˬ ceuˬ kaꞈ pa kʼai ve yoˬ. Oˇ teˇ yanˇ Yaˬhoˉvaˬ ve kanˉ te ve ngaˬ hui a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ ve yoˬ. Ngaˬ hui ve yaˇ htaꞈ Liꞈ hpu hkʼaw ve awˬ liˇ awˬ hkʼaˇ maˍ piˇ leh Yaˬhoˉvaˬ leh awˬ nu ve chaw htaꞈ yaˇ haꞈ tuˬ maˍ piˇ ve yoˬ. Chi ngaˬ hui ve yehˬ kʼa hkʼaw ve chaw htaꞈ meuˆ daꞈ tuˬ te laˇ ve yoˬ.—Maꞈhtehˍ 22:37-39.

Peuˬ taˉ ve htaꞈ kʼawꞈ dawˇ nyi htaˇ, ngaˬ huiˉ maˬ teˇ gʼaˇ maˇ heˆ leh teˇ gʼaˇ dawˇ cheˆ ve htaꞈ haꞈ yuˬ  ve tehꞈ yaˇ gʼa shiˍ ve yoˬ. Yeˍsuˆ kʼoˆ ve, “nawˬ ve tawˇ hkawˇ lehˬ, yoˬ kʼo yoˬ, maˇ heˆ kʼo maˇ heˆ tehꞈ ceh tiˉ kʼoˆ loˬ.” Chi ve lehˬ, ngaˬ hui ve aˉ hkʼaw lo ve awˬ liˇ hpehꞈ ve tehꞈ yaˇ teˇ hpaˍ shiˍ ve yoˬ. (Maꞈhtehˍ 5:37) Tawˇ pa haˉ te kʼo, ngaˬ hui ve yaˇ miˇ teˇ gʼaˇ a shaꞈ 17 hkʼawꞈ htaˇ, awˬ chawˇ geh ca guiˇ˗e tuˬ lawˬ ve yoˬ. Yaꞈ hkʼaˇ, awˬ e yawˇ htaꞈ maˇ kʼai tcuh. Awˬ chawˇ teˇ gʼaˇ ngaˬ hui ve yaˇ htaꞈ kʼoˆ piˇ ve, “nawˬ e maˇ kʼai tcuh laˇ ve kʼo, nawˬ pa geh ca kʼawꞈ lawˬ˗e nyi sheˍ.” Ngaˬ hui ve yaˇ miˇ kʼoˆ piˇ ve, “ngaˬ pa ngaˬ e hkʼa shuˍ dawˇ ve yoˬ.” Ngaˬ huiˉ maˬ Liꞈ hpu hkʼaw ve awˬ liˇ awˬ hkʼaˇ gʼaꞈ te ve htaꞈ yaˇ 6 gʼaˇ mawˬ ve yoˬ. Chi teˇ hkui ngaˬ hui ve yaˇ leh awˬ hawehˍ teˇ hpaˍ geh Yaˬhoˉvaˬ ve kanˉ gʼa te ve awˬ bon uiˍ jaˇ.

Awˬ tehˬ ve chi ngaˬ dawˇ teh taˍ ve htaꞈ pa tuˬ te laˇ ve htawˇ, ngaˬ saˍ laꞈ gʼonˍ te htaˇ gʼa henˇ ve awˬ ceuˬ, chi teˇ hkui Gʼuiˬ sha ve chaw htaꞈ ga piˇ ve yoˬ. Pehˇriˆ venˇ lo Beˍteˍlaˆ hkʼaw ngaˬ gʼa ga piˇ la ve yoˬ. Beˍteˍlaˆ Lo˗vi˗ya lo jiˆ kʼai htaˇ, ngaˬ kaꞈ oˇ kaˬ lo ca ga piˇ˗e ve yoˬ. Ngaˬ Beˍteˍlaˆ hkʼaw saˍ laꞈ gʼonˍ ve kanˉ te ve aˬ laˬ hkʼe 50 hkʼawꞈ gaˬ˗o. Leh Beˍteˍlaˆ hkʼaw ve awˬ viˉ awˬ nyi laiˉ gʼaˇ ngaˬ meuˆ daꞈ ve awˬ chawˇ hpehꞈ ve yoˬ. Teˇ hpaˍ hpaˍ kʼo, 90 hkʼawꞈ hpaˆ˗o. Teˇ nyi htaˇ Beˍteˍlaˆ hkʼaw kanˉ te chehˇ ve chaw teˇ gʼaˇ htaꞈ ngaˬ mawˬ daꞈ ve yoˬ. ‘Ngaˬ e ngaˬ htaꞈ paw htaˇ, nawˬ toˆ laˇ ve’ tehꞈ yawˇ kʼoˆ laˇ htaˇ ngaˬ cheˆ˗e kʼai leh ha lehˬ jaˇ!

Ponˬ laˬ ve laiˉ hkʼawꞈ Yaˬhoˉvaˬ yawˇ ve kanˉ hkʼaˇ htaꞈ cuˇ leh yawˇ ve chaw htaꞈ beˆ maˍ piˇ leh haꞈ shaˉ piˇ ve htaꞈ ngaˬ gʼa mawˬ ve yoˬ. Chi hkʼe ve htaꞈ ngaˬ gʼa mawˬ htaˇ, Yaˬhoˉvaˬ htaꞈ haꞈ jaˇ. Aˬ laˬ hkʼe 1980 hkʼawꞈ htaˇ, Uˉ peunˍ ve Kawˍmiˍtiˍ kanˉ hkʼaˇ awˬ suhˉ teˇ maˬ kʼawꞈ teh ve yoˬ. Chi ve lehˬ, aˬ htoꞈ ma pa taw Yaˬhoˉvaˬ ve Shaˉhkiˆhkanˍ ve chaw awˬ suhˍ htaꞈ maˇ yehˇ ve saˍ laꞈ gʼonˍ teˇ hpaˍ shiˍ tuˬ ga piˇ ve yoˬ.

1988 hkʼawꞈ htaˇ Uˉ peunˍ ve Kawˍmiˍtiˍ Beˍteˍlaˆ hkʼaw kanˉ hkʼaˇ awˬ suhˉ teˇ maˬ teh ve awˬ meh lehˬ, naˆ tsuhˇ yehˬ lo caˉ daꞈ paˍ tehꞈ kʼoˆ ve yoˬ. Awˉ lawˉ htaˇ Aˍmaˬriˆkaꞈ mvuhˇ miˬ lo nyi haꞈ shaˉ paˍ teˇ hpaˍ hpaˍ naˆ tsuhˇ yehˬ lo caˉ daꞈ ve awˬ moˍ lehˬ (HLC) chaw naˬ Shaˉhkiˆhkanˍ ve chaw awˬ suhˍ htaꞈ caˉ daꞈ ve yawˇ hui dawˇ cheˆ ve htaꞈ saˍ laꞈ gʼonˍ yawˆ yan piˇ tuˬ ga piˇ ve yoˬ. Peuˬ hkʼawꞈ nawˉ, Hpaˉlanˍ mvuhˇ miˬ lo nyi haꞈ shaˉ paˍ teˇ hpaˍ hpaˍ naˆ tsuhˇ yehˬ lo caˉ daꞈ ve awˬ moˍ teh leh miˬ guiˬ chi hkʼoˆ teˇ kaˬ le le lo kaꞈ cawˬ tcuh ve yoˬ. Yaˬhoˉvaˬ ve kanˉ hkʼaˇ awˬ viˉ awˬ nyi htaꞈ hkʼa dehꞈ nyi haꞈ shaˉ ve ngaˬ gʼa mawˬ htaˇ dawˇ cawˇ jaˇ.

Ngaˬ a shaꞈ teꞈ kuiˬ hkʼaw saˍ laꞈ gʼonˍ te ve lehˬ, a yeˇ uiˍ jaˇ tehꞈ shawˍ ve yoˬ. Yaꞈ hkʼaˇ, ngaˬ dawˇ teh taˍ ve htaꞈ dawˇ nyi htaˇ, chaw naˬ htaꞈ ga piˇ tuˬ saˍ laꞈ gʼonˍ te ve a yeˇ uiˍ jaˇ ve maˇ heˆ tehꞈ ngaˬ shiˍ la ve yoˬ. Yaꞈ hkʼaˇ, awˬ nu ve chaw hpanˍ sheh hpaˇ Yaˬhoˉvaˬ htaꞈ shiˍ la leh yawˇ ve kanˉ te la tuˬ ga piˇ ve yoˬ. Ngaˬ a shaꞈ gaˬ leh kanˉ maˇ gʼa te˗o hkʼawꞈ nawˉ, ngaˬ leh ngaˬ miˇ ma hkʼaˬ htaˆ kaꞈ gʼuˇ suhˍ peuˍ ve tanˬ te ve yoˬ. Shu ve a shaꞈ htaꞈ ga piˇ tuˬ, chi ngaˬ huiˉ maˬ te gʼa ve hkʼe te ve yoˬ.

Chi teˇ hkui kaꞈ chaw naˬ htaꞈ ngaˬ ga gʼa ve hkʼe ga piˇ chehˇ ve yoˬ. Saˍ laꞈ gʼonˍ cheuˬ jaˇ ve htawˇ, a naˍ teˇ ceuˬ le le maˇ heˆ leh chaw maˇ gʼa suh˗e tuˬ ga piˇ gʼa ve maˇ heˆ tehꞈ ngaˬ shiˍ ve yoˬ. Hkʼe te leh, teˇ gʼaˇ˗e kaꞈ maˇ gʼa naˬ tuˬ, maˇ kʼawꞈ gʼa suh tuˬ ve awˬ nyi htaꞈ ngaˬ law chehˇ ve yoˬ. Leh oˇ ve teˇ yanˇ ngaˬ hkʼaˬ htaˆ kaꞈ awˬ yanˇ cawˬ leh Gʼuiˬ sha hpanˍ taˍ ve awˬ ceuˬ teˇ hpaˍ leh chaw yaˇ awˬ to htaꞈ anˇ lawꞈ lawꞈ ve hkʼaw hpanˍ taˍ ve chi htaꞈ caˉ daꞈ ve ngaˬ gʼa henˇ tuˬ yoˬ. Ngaˬ yaˇ ehˉ htaˇ kaꞈ dawˇ teh taˍ ve maˇ maw maw kʼo, awˬ tehˬ hpehꞈ la tuˬ yoˬ tehꞈ yonˍ gʼa ve yoˬ.