Ngwasemukilile mulifuchi lyaFrance, munganda yaParis mu 1941. Ngwalivwishilenga kuwaha vyuma ngwalinangwilenga kushikola. Oloze chaluvinda omu ngwapwile namyaka yakusemuka 10, ngwavijile musongo watulo (TB) ngocho kangwayilenga kushikolako. Vandotolo vangulwezele ngwavo ngutwamenga kaha hembo. Shikaho hatukweji vavavulu ngwatangilenga ndikishonali, nakwivwilila hajipolongalamu jahachisaji chahapeho vavuluka ngwavo Radio Sorbonne munganda yaParis. Ngwevwile kuwaha chikuma omu ndotolo angulwezele ngwenyi, ngunayoyo jino, kaha ngunahase kuputuka kuya kushikola. Ngwalyambile ngwami, ‘Chikupu vene vandotolo veji kuzatanga mulimo waulemu chikuma.’ Kufuma vene haze ngwashinganyekele kukapwa ngundotolo mangana ngukokenga vatu. Omu tata anguhulishilenga ngumulweze mulimo nangukazata, lwola lwosena ngwamukumbulwilenga ngwami, ‘Nguli nakusaka kukapwa ngundotolo.’ Echi chikiko changulingishile nguzange mulimo waundotolo.

Mutanga yetu twayilenga kuchachi yaKatolika. Oloze kangwatachikijilenga vyavivulu hali Kalungako, kaha nawa ngwapwile navihula vyavivulu vize kangwawanyine muvavikumbulwilako. Omu ngwapwile nakulinangula undotolo, hakiko jino ngwatachikijile ngwami vyuma vyakuyoya, vavitengele.

Nguli nakwanuka halwola lwatete omu ngwalinangwile hamaselusi amutondo, ngwalikomokelele omu maselusi amutondo eji kulikinga avene nge kunazumu chipwe nge kunatutu. Ngwamwene nawa omwo tuvyuma twatundende twatwama mukachi kamaselusi amutondo vavuluka ngwavo cytoplasm twalikwachilenga nge vanatuhake mumeya amungwa.  Kaha nomwo twalyechelenga nge vanatuhake mumeya akuhona mungwa. Tuvyuma kanetu navyuma vyeka vyeji kukafwanga tuvyuma twakuyoya nge kunazumu chipwe nge kunatutu. Hakumona jila vatungilamo maselusi, changulingishile ngukukulule ngwami kuyoya kachalijilile chiveneko.

Omu ngwalinangwile myaka yivali kushikola, ngwamwenenga unjiho wauvulu uze wasolwele nge Kalunga kwatwama. Omu twapwilenga mushikola yakulinangula havyuma vyakuyoya, twakekesele omu mujimba wamutu unahase kukafwa mutu akoneke minwe yenyi chipwe kuyolola. Kumona omu nyama, namishisa navifuhwa vyeji kuzachilanga hamwe chapwa chakukomwesa chikuma. Chakutalilaho, ngwalinangwile omwo mishisa yakwata kunyama yakulivoko nakuya nakukwata kuchifuhwa chamuchivali chaminwe. Kaha eyi mishisa yalisepasana nayikwavo yize yaya kusongo yaminwe. Kaha nawa nyama yakwata chikuma kumishisa yakuvifuhwa vyaminwe. Kachi nge minwe kavayitengele mujila kaneyiko, kachi kayazata kanawako. Chikupu vene, echi chasolola nge owo atengele mujimba wamutu, apwa wamangana chikuma.

Omu ngwalinangwile hakumonomu kemba eji kuputukanga kuhwima nge nasemuka, changulingishile ngulikomokele chikuma hamilimo yaTengi. Ngwalinangwile nge omu mwana eji kupwanga mujimo lyanaye, eji kuhwimanga peho kuhichila mumulumbu. Echi chikiko cheji kulingisanga mumahuyungu amwana uze achili mujimo lyanaye, muhone kupwa peho. Kahomu kweji kusalanga vyalumingo vyavindende nakusemuka, mumahuyungu amwana mweji kupwanga vyuma vimwe vize navikamukafwa akahwime kanawa. Omu eji kulinganga nge mwana nasemuka, shimbu kanda ahwime, wina weji kupwanga kumuchima weji kulisokanga nakulingisa manyinga ayenga kumahuyungu. Kaha halwola kanelu mumahuyungu amwana mweji kusokolokanga mangana mwingile peho. Kaha hahaze vene uze mwana eji kuputukanga jino kuhwima haukawenyi.

Shikaho ngwasakile jino kutachikiza ou atengele mujimba mujila kaneyi yakukomwesa. Ngocho ngwaputukile kutanga Mbimbiliya nakuhakako chikuma mangana. Ngwevwile kuwaha omu ngwatangile jishimbi jize jahanjikile haunyoji japwile mulushiko luze Kalunga, ashikile muyachi wavaIsalele hamyaka yakuzomboka 3,000 kunyima. Kalunga alwezele vaIsalele vavumbikenga majilo afuminenga mumajimo avo, nakusananga lwola lwosena, nakutumbika mutu kwaukawenyi uze naviji musongo wakulitambwisa. (Levi 13:50; 15:11; Lushi. 23:13) Mbimbiliya yahanjikilile chimweza omu vatu vanahase kutambwisa misongo vakwavo, vyuma vize vanevwishisa vaka-sayasi mumyaka yakalinwomu. Kaha nawa jishimbi jize jahanjika hakulisavala chalunga napwevo vasoneka mumukanda wavyaLevi, jakafwilenga vaIsalele vapwenga vakulikangula. (Levi 12:1-6; 15:16-24) Ngwatachikijile ngwami Tengi ahanyine jishimbi kaneji, kuli vaIsalele mangana jivakafwe mukuyoya chavo. Kaha navaze vajikavangijile avakiswile. Chikupu vene, ngwakunyukile ngwami, Mbimbiliya vayihwima kuli Kalunga, oloze halwola kana kangwatachikijile lijina lyenyiko.

Halwola ngwapwile nakulinangula vyaundotolo hayunivesiti, ngwawanyine mwanapwevo walijina lyaLydie uze ngwazangile. Kaha kuheta mu 1965 omu ngwapwile kwakamwihi nakumanyisa shikola yami twalimbachile. Kaha mu 1971 twapwile navana vatatu, oloze oholyapwa tuli navana 6. Puwami Lydie nangukundwizanga chikuma mumilimo yami yaundotolo namutanga.

Ngwazachile myaka yitatu muchipatela shimbu kanda ngutunge chipatela chami. Omu ngwakumishile  kutunga ngwaputukile kuzachila hachipatela chami, kaha kwejile vaveji vavali lunga napwevo vaze ngwavulukanga kumaputukilo achihande chino. Omu ngwaputukile kusoneka vitumbo vyalunga, puwenyi angwambile ngwenyi: “Ndotolo kanda usoneka vitumbo vyakutunga namanyingako.” Ngwalikomokelele kaha ngwamwihwile ngwami: “Mwomwo ika?” Angukumbulwile ngwenyi: “Twapwa tuVinjiho jaYehova.” Ngwalyambile ngwami, kanda kuchivwengaho lyehi liuka vavuluka ngwavo Vinjiho jaYehova chipwe vene vyuma vanangula hachihande chamanyingako. Ambachile Mbimbiliya yenyi mungonga nakungutangila Chisoneka chize chahanjika hamanyinga. (Vili. 15:28, 29) Kahou pwevo nalunga lyenyi vangulumbunwinyine vyuma naukatesamo Wangana waKalunga, nakukafumisako kuyanda, namisongo, nakufwa. (Kuso. 21:3, 4) Ngwawahililile nakuvalweza ngwami “Vyuma muli nakungulweza vikiko ngunashinganyekanga kufuma kuunyike wami. Vikiko ngwasakwililile kuzata mulimo waundotolo mangana ngwami ngufumiseko kuyanda.” Vyuma twashimutwilile vyangwivwishile chikuma kuwaha, kaha twashimutwilile haola yimwe nachimbwa. Halwola ayile ou lunga napuwenyi ngwahanjikile mumuchima wami ngwami, ami kunahu ngunalitwamina kuya kuChachi yaKatolika. Kaha nawa ngwalinangwile nge Tengi atwama nalijina lyenyi ikiye Yehova.

Ou lunga napuwenyi vashimutwilile nayami mapapa katatu hachipatela chami, kaha hamapapa osena awa twashimutwilile kafwe kuhambakana haola yamuundu. Kufumaho ngwavasanyikile kuzuvo yami mangana tukapwe nalwola lwaluvulu lwakushimutwila havyuma yahanjika Mbimbiliya. Numba tuhu puwami Lydie etavile naikiye kupwa kuchilongesa chaMbimbiliya oloze ketavilile ngwenyi vyuma twalinangwile kuchachi yaKatolika vyapwile vyakuhengako. Kutwala muze ngwasanyikile kapilishitu wakuchachi yetu yaKatolika ezenga kuzuvo yetu. Twashimutwililile havyuma vanangula kuchachi yaKatolika kuzachisa Mbimbiliya swi naufuku. Vyuma twashimutwililile halikumbi lize nauze kapilishitu vyakafwile puwami Lydie atachikize ngwenyi Vinjiho jaYehova veji kunangulanga muchano. Kutwala muze vyuma vatunangwile Vinjiho jaYehova vyatukafwile tuzange chikuma Yehova Kalunga, kaha kuheta mu 1974 vatumbapachishile.

Vyuma ngwalinangwile kutalisa kuvyuma ajina Kalunga kukalingila vatu vyakwachile chikuma hakuyoya chami. Yami napuwami Lydie twamwene kuzachila Yehova kupwa chuma chachilemu chikuma mukuyoya chetu. Twafwililile kulela vana vetu kweseka najindongi jamuMbimbiliya. Kuzanga chikuma Kalunga navakwetu vatu chapwile chuma chachilemu chikuma mutanga yetu.—Mateu 22:37-39.

Yami napuwami Lydie tweji kwivwanga kuwaha hakwanuka omu vana vetu vakavangijilenga jishimbi  twavalwezelenga. Vatachikijile ngwavo mutanga yetu twakavangijilenga lushimbi lwaYesu lwakwamba ngwavo: “Lizu lyenu lyakwamba ngwenu ‘Eyo’ lipwenga vene eyo, kaha ‘Nduma,’ lipwenga vene nduma.” (Mateu 5:37) Chakutalilaho, omu mwanetu umwe wapwevo apwile namyaka 17, alombele naye mangana amwitavise ayenga nakuhema navakwavo oloze naye amukanyishile. Sepa lyenyi umwe amulwezele ngwenyi, “Nge vanoko vanakane, kaha lweza vaiso.” Oloze mwanetu amukumbulwile ngwenyi “Omu vanakane vamama navatata kaveshi kungwitavisako.” Chikupu vene vana vetu vosena 6 vatachikijile ngwavo twapwa tuvakulinunga mwomwo yakukavangiza jindongi jamuMbimbiliya. Tweji kusakwililanga Yehova mwomwo oholyapwa vausoko wetu vavavulu vali nakuzachila Yehova.

Numba tuhu kulinangula muchano chalumwine vyuma ngwalitomenene kulinga, oloze ngwasakile kuzachisa chinyingi chaundotolo ngwapwile nacho ngukafwe vatu jaKalunga. Shikaho ngwalisuwile kuyanga nakuzachila hachipatela chahaMbetele yamuParis, kufumaho ngwayilenga nawa nakuzachila chipatela chahaMbetele yayihya yamuLouviers. Ngunapunga nakuya nakuzachila haMbetele hamyaka kafwe 50. Hamyaka yoseneyi ngunapunga nakuya nakuzachila haMbetele, ngunatungu masepa vavavulu chikuma, kaha veka vali jino mumyaka yamuji 90. Likumbi limwe ngwawahililile chikuma omu ngwaliwanyine namuka-Mbele umwe wamuhya. Angulwezele ngwenyi hakusemuka chenyi yami ngwasapulwishile naye myaka kafwe 20 kunyima.

Hamyaka yoseneyi ngunazachila Yehova, ngunamono omu Yehova natwaminyinanga vatu jenyi nakuvakinga muliuka lyenyi. Kahechi chinangulingisa ngumuzange chikuma. Kuheta muji 1980, Lizavu lyaKutwaminyina lyahakileko polongalamu muUnited States yakukafwa vandotolo vawane mwakukila Vinjiho jaYehova chakuzeneka kuvahaka manyinga.

Mu 1988, Lizavu lyaKutwaminyina lyahakileko lipatimende lyalihya haMbetele, vavuluka ngwavo Milimo yaMijimbu YamuVipatela. Hakavanga lipatimende kaneli lyatalilenga jiKomiti jaKulivwasana naVipatela muUnited States mangana likafwe Vinjiho jaYehova vaze vapwile nakuviza. Omu Lizavu lyaKutwaminyina lyetavishile lipatimende kaneli lipwenga namumitango yeka, Komiti yaKulivwasana naVipatela vayihakile namuFrance. Ngunevunga kuwaha chikuma hakumonomu liuka lyaYehova linazakamanga vandumbwetu vaze vanapunga nakuviza. Vyuma ngwashinganyekele vyateselemo.

Muchishishisa chakuka kaha vatu kumisongo yavo, ngwatachikijile ngwami chuma chachilemu chikuma shina kukafwa vatu vatachikize Yehova Kalunga uze atuhana kuyoya nakumuzachila. Omu ngwatambwile litayamende, ami napuwami Lydie twalisonekesele upayiniya washimbu yosena, ngocho kakweji hikakweji twazachilenga jiola jajivulu mumulimo wakwambululula mujimbu wamwaza waWangna waKalunga. Noholyapwa tuchili nakuzata noho hakumina ngolo jetu mumulimo kanou wakuyovola vatu kushipilitu.

Nguchili nakutwalaho lika kuzata mulimo waundotolo nakuka vatu vali nakuviza, oloze ngwatachikijile ngwami nandotolo wakwipangweji keshi kuhasa kuka misongo yosena chipwe kufumisako kufwako. Shikaho nguli nakutalilila kulwola luze kakweshi kukapwa kukola, misongo nakufwako. Mukaye kakakahya kaze kali nakwiza, nangukayoya myaka yayivulu nakukalinangula kuvyuma atenga Kalunga, kuhakilako najila atengelamo mujimba wamutu. Chikupu vene, vyuma vize ngunatalililanga kufuma kuunyike wami vimwe vinatesamo, ngocho nguli nakutalilila kulwola luze navikatesamo vyosena.