Mo’nn ne an 1941 dan Lafrans, dan lavil Paris. Nou fami pa ti ena boukou larzan. Mo ti bien kontan aprann, me kan mo ti ena di-z-an, mo ti tom bien malad ek mo ti bizin aret lekol. Bann dokter ti konsey mwa pou res lor lili pou ki mo pa fatig mo poumon. Alor, pandan plizir mwa, mo’nn pas mo letan lir enn diksioner ek ekout bann emision edikatif lor Radio Sorbonne, ki ti fer par l’Université de Paris. Kan mo dokter ti dir mwa ki mo ti geri ek ki mo ti pou kapav rekoumans al lekol, mo ti extra kontan. Mo ti dir ar momem, ‘Travay ki bann dokter fer li extraordiner!’ Depi sa zour-la, mo ti anvi vinn enn dokter pou ki mo kapav geri bann dimounn. Ninport kan mo papa ti demann mwa seki mo ti anvi fer kan mo ti pou vinn gran, mo ti donn li mem repons, “Mo pou vinn enn dokter.” Alor, vinn enn dokter, ti kitsoz pli inportan dan mo lavi.

Nou fami ti Katolik. Me mo pa ti konn preske nanye lor Bondie. Mo ti ena boukou kestion, me mo pa ti gagn okenn repons. Se apre ki mo’nn al liniversite, pou etidie pou vinn enn dokter, ki mo’nn sir ki ena enn Kreater.

Mo rapel premie fwa ki mo ti get selil enn plant dan mikroskop. Mo ti inpresione kan mo ti trouve kouma enn selil protez limem kont saler ek freser. Mo ti trouve osi kouma enn cytoplasme (enn kitsoz ki ena dan enn selil) vinn tipti kan li gagn kontak ar disel ek vinn gro kan li gagn kontak ar delo. Gras-a sa, ek lezot kitsoz ankor, bann  tipti form lavi kapav adapte zot kan zot lanvironnman sanze. Kan mo ti trouve ki kantite enn selil li konplex, mo ti konpran ki lavi pa’nn aparet par azar.

Pandan mo deziem lane letid dan liniversite, mo ti trouv bann lezot prev ki Bondie existe. Kan nou ti etidie lor lekor imin, nou ti aprann kouma nou lebra ed nou pou kabos ek dres nou bann ledwa. Li extraordiner pou trouve kouma nou bann misk zwenn ar nou bann lezo pou travay ansam. Par exanp, mo ti aprann ki enn tandon atas enn misk nou lebra ar deziem lezo nou ledwa. Sa tandon-la diviz an de ek li form enn pon. Lerla, enn lot tandon pas anba sa pon-la pou al dan bout nou ledwa. Sa bann tandon-la tini bien for lezo nou bann ledwa. Si nou bann ledwa pa ti fer dan sa fason-la, nou bann tandon ti pou red ek nou bann ledwa pa ti pou fonksionn bien. Li kler ki sa Kikenn ki’nn fer lekor imin la, Li bien intelizan!

Kan mo ti aprann kouma enn ti-baba koumans respire apre ki li’nn ne, mo ti plis inpresione ar travay nou Kreater. Kan enn ti-baba ankor dan vant so mama, li pa bizin respire parski li gagn loxizenn ar so mama. Se pou sa rezon-la ki bann alvéole, setadir bann ti sak ki li ena dan so poumon, pankor ranpli ar ler. Me de-trwa semenn avan so nesans, enn likid spesial rekouver sa bann alvéole-la par andan. Lerla, kan ti-baba-la ne ek respire pou premie fwa, enn kitsoz extraordiner arive: Enn trou, ki li ena dan so leker, ferme. Lerla, disan al dan so bann poumon, ek gras-a sa likid spesial la, bann alvéole ki li ena dan so poumon ranpli ar ler. Ek deswit, li koumans respire par limem.

Mo ti anvi konn sa Kikenn ki ti kree sa bann kitsoz extraordiner la. Alor, mo ti koumans lir Labib an profonder. Mo ti inpresione par bann lalwa lor propte, ki Bondie ti donn bann Izraelit depi plis ki 3,000 an. Bondie ti donn zot lord pou anter zot bann malpropte, pou bengne regilierman, ek pou met an karantenn bann dimounn ki ena bann sintom enn maladi kontazie. (Lev. 13:50; 15:11; Det. 23:13) Inn gagn anviron 150 an depi ki lasians inn dekouver kouma bann maladi fane, alor ki Labib ti fini koz lor-la. Ek bann lalwa lor sexialite, ki trouv dan liv Levitik, ti ed nasion Izrael pou res an bonn sante. (Lev. 12:1-6; 15:16-24) Mo ti konpran ki Bondie ti donn bann Izraelit sa bann lalwa-la pou zot gagn bann bienfe, ek ki Li ti beni tou bann ki ti obeir so bann lalwa. Mo ti sir ki Bondie ti fer ekrir Labib, me mo pa ti ankor konn so nom sa lepok-la.

Mo ti ankor liniversite kan mo’nn zwenn Lydie. Mo’nn tom amoure ek nou’nn marye an 1965. Sa lepok-la, mo ti ena ankor lamwatie mo letid pou fer, pou ki mo kapav vinn dokter. Nou ena sis zanfan asterla, ek an 1971, trwa ti fini ne. Lydie inn bien soutenir mwa dan mo travay ek dan lafami.

 Mo ti travay trwa-z-an dan enn lopital avan ki mo ouver mo klinik. Inpe apre, enn koup, sa de pasian ki mo’nn mansione taler-la la, ti vinn get mwa. Mo ti pe ekrir enn lordonans pou misie-la, kan so madam ti dir mwa: “Silvouple Dokter, fode pa ena disan dan medsinn-la.” Mo ti etone ek mo ti dir li: “Vre! Kifer?” Li ti dir mwa: “Nou bann Temwin Zeova.” Zame mo pa ti tann koz lor bann Temwin Zeova ek lor seki zot ansegne lor disan. Madam-la ti montre mwa dan Labib kifer zot pa pran disan. (Zist. 15:28, 29) Apre sa, li ek so misie ti montre mwa seki Rwayom Bondie pou fer; li pou tir tou soufrans, maladi, ek lamor. (Rev. 21:3, 4) Mo ti dir zot: “Seki zot pe dir mwa la, depi ki mo tipti mo pe atann sa! Mo’nn vinn dokter pou tir bann soufrans mem!” Mo ti telman kontan, ki nou ti koze pandan enn er-t-an edmi. Kan sa koup-la ti ale, dan mo leker, mo ti nepli enn Katolik. Anplis, mo ti aprann ki sa Kreater ki ti telman inpresionn mwa la, apel Zeova!

Mo ti zwenn sa koup-la trwa fwa ankor dan mo klinik, ek sak fwa, nou ti koz plis ki enn er-t-an. Mo ti invit zot lakaz pou ki nou gagn plis letan pou koz lor Labib. Mem si Lydie ti asiste letid, li pa ti dakor ki sertin lansegnman Katolik, ki nou ti aprann, ti fos. Alor, mo ti invit enn pret lakaz. Ziska bien tar aswar, nou ti koz lor bann lansegnman Legliz ek nou ti servi zis Labib. Sa konversasion-la ti konvink Lydie ki bann Temwin Zeova ansegn laverite. Lerla, nou lamour pou Zeova ti kontign grandi ziska ki nou pran batem an 1974.

Kan mo ti aprann ki proze Bondie ena pou bann imin, sa ti sanz mo bann priorite. Pou Lydie ek mwa, servi Zeova ti vinn kitsoz pli inportan dan nou lavi. Nou ti bien deside pou elve nou bann zanfan dapre bann prinsip Labib. Nou ti ansegn zot pou kontan Bondie ek nou prosin, ek sa ti fer nou vinn pli pros ar nou kamarad.​—Mat. 22:37-39.

Lydie ek mwa, nou’nn touletan tom dakor lor bann desizion ki bizin pran, ek azordi, nou riye kan nou mazinn lefe ki sa finn ena lor nou bann zanfan. Zezi ti dir, “ki zot ‘Wi’ vedir wi, zot ‘Non,’ non,” ek bann zanfan ti kone ki sa ti nou lalwa dan lakaz.  (Mat. 5:37, NW) Par exanp, kan enn parmi nou bann tifi ti ena 17 an, Lydie ti anpes li sorti avek enn group kamarad. Enn tifi dan sa group-la ti dir nou tifi, “Si to mama pa pe les twa sorti, demann to papa!” Me nou tifi ti reponn: “Li bet mo fer sa. Zot touletan tom dakor.” Wi, nou sis zanfan ti trouve ki nou ti swiv bann prinsip Labib. Nou bien rekonesan anver Zeova, parski azordi, plizir manb nou fami pe servi Li.

Mem si laverite ti sanz mo bann priorite, mo ti anvi servi mo bann konpetans pou ed bann serviter Zeova. Alor, mo ti port mwa volonter pou al servi kouma dokter dan Betel ki ti trouv Paris, ek plitar dan nouvo Betel ki trouv Louviers. Pandan apepre 50 an, mo’nn servi kouma volonter dan Betel. Pandan sa letan-la, mo’nn gagn bann bon kamarad parmi bann Betelit, ek sertin parmi zot ena plis ki 90 an azordi. Enn zour, mo ti gagn enn sirpriz kan mo ti zwenn enn nouvo Betelit. Apepre 20 an avan, se mwa ki ti ed so mama pou akouse!

Pandan tou sa bann lane-la, mo’nn trouve kouma Zeova gid ek protez so bann serviter gras-a so lorganizasion, ek sa finn ogmant mo lamour pou Li. Dan koumansman bann lane 1980, Komite Santral inn kree enn program pou ed bann dokter ek bann dimounn ki travay avek bann pasian, pou konpran pli bien kifer bann Temwin Zeova pa pran disan.

Apre sa, an 1988, Komite Santral inn kree enn nouvo departman dan Betel ki apel Servis Informasion Ospitalie. O-koumansman, sa departman-la ti diriz travay Komite Liezon Ospitalie (KLO) ki ti kree dan Letazini, pou ed bann pasian Temwin Zeova pou trouv bann dokter ki respekte nou desizion pou pa pran disan. Kan ti etabli sa dispozision-la pou lemond antie, ti form enn group KLO dan Lafrans. Mo inpresione kan mo trouve kouma lorganizasion Zeova pran swin nou bann frer ek ser ki malad!

Mo bien kontan mo metie. Me kan mo’nn reflesi lor mo bann priorite, mo’nn konpran ki li pli inportan ki mo ed bann dimounn pou konn Zeova ek pou servi Li, olie ki mo ed zot pou geri. Kan mo’nn pran mo retret, Lydie ek mwa, nou’nn pran servis pionie permanan, ek sak mwa, nou pas plizir lertan pou pres bon nouvel Rwayom Bondie. Nou ankor pe fer nou best dan sa travay ki kapav sov lavi bann dimounn la.

Mo ankor pe ed bann dimounn ki malad. Me mo kone ki pena okenn dokter ki kapav geri tou bann maladi ek anpes bann dimounn mor. Alor, mo atann avek inpasians zour kot tou bann soufrans, maladi, ek lamor pou disparet. Dan lemond nouvo, mo pou ena leternite pou aprann plis lor bann kreasion Bondie, kouma par exanp, lor fason extraordiner ki Li’nn fer lekor imin. Seki mo ti pe atann depi ki mo zanfan, pou realize biento. Mo sir ki se bann kitsoz extraordiner ki pou arive!