Bɛwole me wɔ 1941 wɔ Paris, France. Ɛnee me abusua ne ɛnlɛ ezukoa dɔɔnwo. Ɛnee me nye die debiezukoalɛ nwo, ɔti mɔɔ menyianle avinliwule wɔ mekɛ mɔɔ ɛnee meli ɛvolɛ bulu na yemɔ ati ɔwɔ kɛ megyakyi sukulu la, ɔyɛle me nyane kpalɛ! Kɛ mɔɔ ɛnee me ɛvovoa ne ɛyɛ bɛtɛɛ la ati, dɔketama ne hanle kɛ anrɛɛ menda menla. Ɔti wɔ siane dɔɔnwo anu, ɛnee edwɛbohilelɛ buluku bie ala a mekenga a yɛɛ metie gyimalilɛ bie mɔɔ bɛyɛ ye wɔ Radio Sorbonne mɔɔ wɔ University of Paris azo la. Mɔɔ me dɔketa ne hanle kɛ mede kpɔkɛ na mebahola meahɔ sukulu la, me nye liele kpalɛ. Menganle mengilele me nwo kɛ, ‘Gyima mɔɔ dɔketama yɛ la le kɛnlɛma!’ Ɔvi mekɛ zɔhane menzile kpɔkɛ kɛ medame noko mebayɛ awie mɔ ayile kenle bie. Mekɛ biala mɔɔ me papa babiza me kɛ menyi a duzu a mebayɛ la, edwɛkɛ ko ne ala a meka a, “Mebayɛ dɔketa.” Ɔti ɛnee dɔketa mɔɔ mebayɛ la a anwo hyia me kpalɛ a.

Ɛnee yɛ abusua ne le Katelekema. Noko ɛnee menze Nyamenle anwo edwɛkɛ dɔɔnwo yɛɛ ɛnee melɛ kpuya dɔɔnwo. Membɔle ɔ bo kɛ mesukoa debie wɔ yunivɛsiti la yɛɛ menwunle ye wienyi kɛ amgba bɛbɔle ngoane a.

Mekakye mekɛ mɔɔ limoa mɔɔ menzukoale ngoane ngɛkɛba mɔɔ wɔ baka nu la anwo debie la. Kɛzi ngoane ngɛkɛba ne mɔ bɔ bɛ nwo bane wɔ mekɛ mɔɔ debie wuluwulu yɛɛ weɛlɛkɔkɔ baha bɛ la yɛ me azibɛnwo. Eza menwunle kɛ saa bɛfa ngyenle bɛgua ngoane ngɛkɛba ne mɔ azo a, debie bie mɔɔ wɔ bɛ nu la nwenwe yɛɛ bɛfa bɛ bɛgua nzule nu a, ɔyɛ kpole. Ɔlua ɛhye nee ninyɛne gyɛne mɔɔ bɛkola bɛyɛ la ati, abɔdeɛ ngyikyi  bɔbɔ kola tɛnla ɛleka mɔɔ bɛwɔ la ɔnva nwo kɛzi tɛnlabelɛ ne bayɛ la. Mɔɔ menwunle kɛzi ngoane kɛkɛba ko biala le kpomgbondee la, ɔmaanle menwunle kɛ bɛbɔle ngoane.

Mengɔle yunivɛsiti la ye ɛvolɛ nwiɔ ne azo, menwunle daselɛ dɔɔnwo mɔɔ kile kɛ Nyamenle wɔ ɛkɛ ne la. Mɔɔ yɛlɛsukoa sonlabaka ne anwo debie la, menwunle kɛ bɛyɛle yɛ sa ne wɔ adenle mɔɔ ɔkola ɔmaa yɛkpo yɛ sa mrɛlɛsɛka ne na yɛtenrɛ nu la azo. Kɛzi nwonane nee ndinli ne mɔ sosɔ mbowule ne mɔ na bɛbɔ nu bɛyɛ gyima la yɛ nwanwane. Menzukoale kɛ ndinli bie mɔɔ wɔ yɛ sa anwo la kɔsɔ mrɛlɛsɛka ne bowule bie anu. Ndinli ɛhye anu kyɛ nwiɔ na ɛkɛ ne kpogya amaa ndinli fofolɛ mɔɔ se kɔ yɛ sa ati la ahola aze ɔ bo. Ndinli ɛhye mɔ kɔyia wɔ ɛleka mɔɔ bikye mrɛlɛsɛka ne mbowule ne mɔ la. Saa bɛanyɛ yɛ sa mrɛlɛsɛka ne mɔ wɔ adenle ɛhye azo a, anrɛɛ ndinli ne mɔ anu basesa na yɛ sa ayɛ keketee mɔɔ ɔnrɛhola ɔnrɛyɛ gyima kpalɛ a. Menwunle ye wienyi kɛ Ahenle mɔɔ yɛle sonlabaka ne la ze nrɛlɛbɛ totohyia.

Mekɛ mɔɔ melɛsukoa kɛzi bɛwo kakula la anwo debie la, me nye raliele Ahenle mɔɔ bɔle ngoane la anwo kpole kpalɛ. Menzukoale kɛ adɔma la ɛkolɛ nu a, ɔdua ɔ kotoa ne mɔɔ zɔ ye mame la azo a ɔdie ɛnwomenle a. Ɔti anwoma biala ɛnle debie ngyikyingyikyi bie mɔɔ le kɛ baluu mɔɔ wɔ ye ɛvovoa ne anu la anu. Ɔka ekyi bɛwo ye a, nzule ba baluu ne ko biala anu. Akee bɛwo adɔma ne na ɔdie ye ɛnwomenle mɔɔ limoa la a, ninyɛne mɔɔ yɛ nwanwane la sisi. Tokule bie mɔɔ wɔ adɔma ne ahonle nu la tua na ɛhye maa mogya kɔ ye ɛvovoa ne anu. Mekɛ ko ne ala anu, nzule ne mɔɔ wɔ baluu ne mɔ anu la ɛmmaa baluu ne ɛmbetabeta nwo na ɛhye maa anwoma kola kɔ nu. Ɛkɛ ne ala adɔma ne bɔ ɔ bo kɛ ɔdie ɛnwomenle.

Ɛnee mekpondɛ kɛ menwu Ahenle mɔɔ bɔle nwanwane ninyɛne ɛhye mɔ la, ɔti menzukoale Baebolo ne anyebolo zo. Me nye liele bɔkɔbɔkɔyɛlɛ nwo mɛla mɔɔ ɛnee boka ngyekyeleɛ mɔɔ Nyamenle nee Yizilayɛma yɛle wɔ ɛvolɛ mɔɔ bo 3,000 mɔɔ ɛze ɛhɔ anwo la anwo. Nyamenle zele Yizilayɛma kɛ bɛvu bɛ tiefi bɛwula, bɛbia bɛ nwo dahuu na bɛye awie biala mɔɔ ɛlɛnyia ewulenzane la bɛvi bɛ avinli. (Lɛv. 13:50; 15:11; Dit. 23:13) Baebolo ne hanle ninyɛne ɛhye mɔ anwo edwɛkɛ, noko abɔdeɛ nwo nrɛlɛbɛvolɛma nwunle kɛzi ewulenzane salo la ɛtɛkyɛle biala. Eza menwunle kɛ nla nwo mɛla mɔɔ wɔ Lɛvitikɔso buluku ne anu la boale maanle ne kpɔkɛdelɛ. (Lɛv. 12:1-6; 15:16-24) Mendele ɔ bo kɛ Yizilayɛma boɛyɛlɛ ti a Bɔvolɛ ne vale mɛla ɛhye mɔ maanle bɛ a, na ɔyilale bɛdabɛ mɔɔ bɛlile zolɛ la. Menliele mendole nu kɛ Nyamenle sunsum a bɛvale bɛhɛlɛle Baebolo ne a, noko ɛnee menze Nyamenle duma wɔ mekɛ zɔhane.

Mekɛ mɔɔ melɛkɔ yunivɛsiti la, menyiale bɛlɛra bie mɔɔ bɛfɛlɛ ye Lydie la na mengulole ye. Yɛgyale wɔ 1965 mɔɔ ɛnee metɛwiele sukulu la. Ɔkadwu 1971 la, ɛnee me nee ye ɛwo yɛ mra nsia ne anu nsa. Lydie ɛboa me kpalɛ wɔ me gyimayɛlɛ nu nee yɛ abusua ne anu.

Menyɛle gyima ɛvolɛ nsa wɔ asopiti bie anu kolaa na meabuke me ɛdeɛ ne. Yeangyɛ yɛɛ agyalɛma ne mɔɔ menganle bɛ nwo edwɛkɛ la rale ɛkɛ a. Ɛnee melɛkɛlɛ ayile meamaa nrenyia ne na  ɔ ye hanle kɛ: “Dɔketa, mesɛlɛ wɔ yɛngulo ayile mɔɔ mogya wɔ nu la.” Ɔzinle me nwo, membizale ye kɛ: “Amgba? Kɛmɔti ɛ?” Ɔbuale kɛ: “Yɛle Gyihova Alasevolɛ.” Ɛnee metɛtele Gyihova Alasevolɛ anwo edwɛkɛ anzɛɛ adwenle mɔɔ bɛlɛ ye wɔ mogya nwo la ɛlɛ. Raalɛ ne yele ye Baebolo na ɔhilele me Ngɛlɛlera mɔɔ bɛ kpɔkɛzilɛ ne gyi zolɛ la. (Gyi. 15:28, 29) Akee ɔ nee ɔ hu hilele me debie mɔɔ Nyamenle Belemgbunlililɛ ne bayɛ la; ɔbaye amaneɛnwunlɛ, anwodolɛ nee ewule yeavi ɛkɛ. (Yek. 21:3, 4) Menganle kɛ: “Mɔɔ bɛlɛka bɛahile me la le debie mɔɔ ɔvi me ngakula nu amuala ɛnee mekulo kɛ meyɛ a! Membanyɛle dɔketa amaa meaboa menli mɔɔ ɛlɛnwu amaneɛ la.” Me nye liele nwo ɔti me nee bɛ bɔle adawu dɔnehwele ko nee foa. Agyalɛma ne kavi ɛkɛ ne la, ɛnee mezi kpɔkɛ kɛ menrɛyɛ Katelekenli bieko na menzukoale kɛ bɛfɛlɛ Bɔvolɛ ne mɔɔ me nye die ɔ nwo kpalɛ la Gyihova!

Menyiale agyalɛma ne fane nsa wɔ me asopiti ɛkɛ, na mekɛ biala yɛbɔ adawu mɔɔ bo dɔnehwele ko. Menganle kɛ bɛrɛla me sua nu amaa yɛanyia mekɛ dɔɔnwo yɛazukoa Baebolo ne. Lydie liele dole nu kɛ ɔbadɛnla Baebolo ɛzukoalɛ ne anu, noko ɛnee ɔnlie ɔndo nu kɛ Katelekema ngilehilelɛ ne bie mɔ ɛnle nɔhalɛ. Ɔti menvɛlɛle ɛsɔfo bie membale yɛ sua nu ɛkɛ. Yɛvale Baebolo ne yɛzuzule asɔne ne ngilehilelɛ ne mɔ anwo too nɔɔzo. Adawu zɔhane boale Lydie maanle ɔnwunle kɛ Gyihova Alasevolɛ a kilehile nɔhalɛ ne a. Ɛhye anzi, ɛlɔlɛ mɔɔ yɛlɛ yɛmaa Gyihova Nyamenle la yɛle kpole na bɛzɔnenle yɛ mu nwiɔ wɔ 1974.

Mɔɔ menzukoale bodane mɔɔ Nyamenle lɛ maa alesama la, menwunle ninyɛne mɔɔ anwo hyia kpalɛ la. Me nee Lydie nwunle kɛ Gyihova ɛzonlenlɛ a anwo hyia kpalɛ a. Yɛbɔle kpɔkɛ kɛ yɛbava Baebolo ngyinlazo yɛatete yɛ mra ne mɔ. Yɛhilehilele yɛ mra ne mɔ kɛ bɛhulo Nyamenle nee bɛ gɔnwo mɔ na ɛhye maanle yɛ abusua ne yɛle ko.​—Mat. 22:37-39.

Saa me nee Lydie kakye kɛzi yɛ mra ne mɔ nwunle kɛ yɛ adwenle yɛle ko wɔ ninyɛne nwo la a, ɔmaa yɛsele. Ɛnee bɛze kɛ yɛfa Gyisɛse adehilelɛ mɔɔ se “bɛmaa bɛ ‘Ɛhɛe’ ɛyɛ ɛhɛe, bɛ ‘Kyɛkyɛ’ ɛyɛ kyɛkyɛ” la yɛdi gyima. (Mat. 5:37) Kɛ neazo la, mɔɔ yɛ ra raalɛ ko lile ɛvolɛ 17 la, Lydie ammaa ye adenle yeammaa ɔ nee ɔ gɔnwo mɔ anvinde. Ɔ gɔnwo mɔ ko hanle hilele ye kɛ, “Saa wɔ mame ɛnrɛmaa wɔ adenle a, ka kile wɔ papa!” Noko yɛ ra raalɛ ne buale ye kɛ: “Nwolɛ ɛngyia kɛ mebabiza ye. Bɛ mu nwiɔ bɛ adwenle le ko.” Yɛ mra nsia ne nwunle kɛ me nee me ye adwenle le ko wɔ  Baebolo ngyinlazo nwo. Yɛda Gyihova ase kɛ ɛnɛ yɛ abusua ne anu amra dɔɔnwo ɛlɛsonle ye la.

Nɔhalɛ ne maanle mengakyile debie mɔɔ ɛnee hyia me kpalɛ la ɛdeɛ, noko ɛnee mekulo kɛ mefa mɔɔ meze wɔ ayileyɛlɛ nwo la meboa Nyamenle menli ne. Ɔti mendule me nwo memaanle kɛ mebaboa Bɛtɛle abusua ne mɔɔ wɔ Paris yɛɛ nzinlii Bɛtɛle fofolɛ ne mɔɔ bɛzile ye wɔ Louviers la. Meva ɛvolɛ kɛyɛ 50 a meyɛ ɛhye a, mevi sua nu a mekɔ a. Menyia agɔnwolɛma kpalɛ dɔɔnwo wɔ Bɛtɛle abusua ne anu, kɛkala bie mɔ ɛbo ɛvolɛ 90. Kenle ko bie menyiale kpavolɛ bie mɔɔ ɛra Bɛtɛle fofolɛ la na me nye liele. Bɛwo ye la, medame a menliele ye mame awolɛ wɔ ɛvolɛ 20 mɔɔ ɛze ɛhɔ la a!

Wɔ ɛvolɛ dɔɔnwo anu, menwu kɛzi Gyihova ɛlua ye ahyehyɛdeɛ ne azo ɛhile ye menli adenle na yebɔ bɛ nwo bane la na ɛhye ɛmaa ɛlɔlɛ mɔɔ melɛ memaa ye la ɛyɛ kpole. Wɔ 1980 ne anu, Neazo Eku ne yɛle ngyehyɛleɛ bie wɔ United States mɔɔ baboa ayileyɛlɛma yeamaa bɛade kpɔkɛ mɔɔ Gyihova Alasevolɛ si ye wɔ ayileyɛlɛ nwo la abo kpalɛ la.

Akee wɔ 1988, Neazo Eku ne yɛle Hospital Information Services gyimalilɛleka ne. Mɔlebɛbo ne, ɛnee gyimalilɛleka ɛhye nea Asopiti Ngitanwolilɛ Kɔmatii (HLC) ne mɔ mɔɔ wɔ United States mɔɔ bɛboa Alasevolɛ mɔɔ ɛnde kpɔkɛ bɛmaa bɛnyia ayileyɛlɛ kpalɛ la azo. Mɔɔ bɛdɛlɛle ngyehyɛleɛ ne anu bɛhɔle ewiade amuala la, bɛdele HLC ne bie wɔ France. Saa menwu kɛzi Gyihova ahyehyɛdeɛ ne fi ɛlɔlɛ nu boa mediema mɔɔ ɛnde kpɔkɛ la wɔ mekɛ mɔɔ bɛhyia moalɛ la a, ɔsi me nwo!

Dɔketa mɔɔ mekulo kɛ meyɛ la a ɛnee hyia me kpalɛ a. Noko menzuzule mɔɔ ɔwɔ kɛ ɔkyia me anwo bieko la, menwunle kɛ sunsum nu ayileyɛlɛ a hyia kpalɛ a, menli mɔɔ yɛboa bɛ yɛamaa bɛabikye Gyihova Nyamenle, ngoane Maavolɛ ne la. Mɔɔ mengɔle pɛnhyɛne la, me nee Lydie yɛle dahuu adekpakyelɛma na yɛbɔle Nyamenle Belemgbunlililɛ ne edwɛkpa ne nolo. Yɛyɛ biala mɔɔ yɛbahola la wɔ ngoanelielɛ gyima ɛhye anu.

Mekɔ zo meyɛ biala mɔɔ mebahola la meboa bɛdabɛ mɔɔ bɛnde kpɔkɛ la. Noko meze kɛ dɔketa mɔɔ bɔ mɔdenle kpalɛ bɔbɔ la ɛngola ɛnyɛ anwodolɛ kɔsɔɔti ayile yɛɛ ɔngola ɔnzi ewule adenle. Ɔti me nye la mekɛ mɔɔ nyanelilɛ, anwodolɛ nee ewule bavi ɛkɛ ne la. Wɔ ewiade fofolɛ ne mɔɔ ɛlɛbikye ndɛndɛ la anu, mebanyia dahuu ngoane na meahola meazukoa Nyamenle abɔdeɛ nee kɛzi sonlabaka ne yɛ nwanwane la anwo ninyɛne dɔɔnwo. Ɔnrɛhyɛ, mɔɔ ɔvi me ngakula nu ɛnee mekulo kɛ meyɛ la bara nu. Medie medi kɛ ninyɛne mgbalɛ dɔɔnwo lua adenle zo!