Ӕз райгурдтӕн 1941 анзи Парижи, хумӕтӕг цард ка кодта, уӕхӕн бийнонти. Ахур кӕнун берӕ уарзтон, фал мӕбӕл 10 анзи ку цудӕй, уӕд туберкулезӕй фӕссӕйгӕ дӕн ӕма мӕ бон скъоламӕ цӕун нӕбал адтӕй. Зӕгъӕн дӕр ин нӕййес, е мин куд зин адтӕй, уой. Дохтиртӕ мин загътонцӕ, фулдӕр рӕстӕг мӕ хъанӕй лӕуун ке гъӕуй, цӕмӕй мӕ рӕугутӕн никки фулдӕр зӕран ма ракӕнон. Гъема цалдӕр мӕйи хъанӕй фӕдтӕн ӕма игъустон Парижи университетӕй радиопередачитӕмӕ, удта ма дзурдуат дӕр кастӕн. Дохтиртӕ мин ку загътонцӕ, ке радзӕбӕх дӕн, уӕд мӕ цийнӕн кӕрон дӕр н’ адтӕй. Уомӕн ӕма мӕ бон адтӕй нӕуӕгӕй скъоламӕ цӕун. Мӕхенимӕр расагъӕс кодтон: «Дохтиртӕ дессӕгтӕ кӕнунцӕ!» Уотемӕй мӕ бафӕндадтӕй дохтир исун, цӕмӕй адӕни дзӕбӕх кодтайнӕ. Ӕма мӕ нӕ фидӕ ку фӕффӕрсидӕ, кӕмӕй мӕ фӕндуй исун, уӕд ин алкӕддӕр фӕззӕгъинӕ, дохтир ке уодзӕн. Гъе уӕдӕй фӕстӕмӕ е адтӕй мӕ бӕллец.

Мӕ ниййергутӕ сӕхе католиктӕбӕл нимадтонцӕ. Фал ӕз ба Хуцауи туххӕй берӕ нӕ зудтон, удта мӕ фарстатӕн дӕр дзуӕппитӕ н’ адтӕй. Ӕма ӕрмӕстдӕр университети медицини факультетмӕ ку бацудтӕн, уӕд ӕй балӕдӕрдтӕн, алцидӕр Хуцау ке сфӕлдиста.

Гъуди ма ’й кӕнун, еу хатт тюльпани кълеткитӕмӕ микроскоппӕй куд кастӕн, уой. Кълеткӕ ӕхуӕдӕг ӕхе куд гъӕуай кӕнуй тӕвдӕ ӕма уазалӕй, е мӕмӕ хъӕбӕр дессаг фӕккастӕй. Удта ма кастӕн, кълетки медӕг ци цитоплазмӕ ес, е ӕхе куд даруй, уомӕ – цӕхгун дони фӕмминкъийдӕр уй, кӕдзос дони ба фӕуустурдӕр уй. Кълеткити ма никкидӕр берӕ хабӕрттӕ цӕуй, ӕма уой фӕрци зайӕгойтӕ ӕма цӕрӕгойтӕ аллихузи уавӕртӕбӕл уайтагъддӕр райахур унцӕ. Алли кълеткӕ дӕр куд дессаги конд ӕй, уой уингӕй ӕй балӕдӕрдтӕн, зӕнхӕбӕл цард ӕхегъӕди ке нӕ фӕззиндтӕй.

 Дуккаг къурси ку ахур кодтон, уӕд ми никки хъӕбӕрдӕр байрагӕс ӕй, Хуцау ке ес, е. Анатомий урокти цудан, адӕймаги цонг рӕмбуйникъӕдзӕй куд конд ӕй, уой фӕрци нӕ бон ке ӕй не ’нгулдзитӕ къӕдзӕ кӕнун ӕма ӕррӕстӕ кӕнун. Хуӕцъӕфтӕ, науӕртӕ ӕма уӕнгбӕттӕнтӕ кӕрӕдзей хӕццӕ куд ӕмгуст кӕнунцӕ, е устур дессаг ӕй. Зӕгъӕн, рӕмбуйникъӕдзӕй дӕлдӕр ци хуӕцъӕфтӕ ес, уонӕй сӕ еу ӕнгулдзи дуккаг стӕги хӕццӕ ке еу кӕнуй науӕри фӕрци. Еци науӕр дууӕ дехи фӕууй, ӕма уой фӕрци гӕнӕн ес, цӕмӕй ӕ бунмӕ ӕндӕр науӕр рацӕуа. Е ба ӕй еу кӕнуй ӕнгулдзи кӕрони хӕццӕ. Науӕртӕ ӕнгулдзити стгутӕмӕ ӕнгом ӕвӕрд ӕнцӕ. Ӕма уотӕ конд ку н’ адтайуонцӕ, уӕд ӕнгулдзитӕ саздахъи хузӕн къӕдзӕ адтайуонцӕ, науӕртӕ ба, ке нийвазтонцӕ, уӕхӕн саздахъи бӕттӕни хузӕн. Ӕз ӕй бӕлвурдӕй балӕдӕрдтӕн: адӕймаги бауӕр ка искодта, е устур зунди хецау ӕй.

Цард ка сфӕлдиста, уой зунд ма мӕ никки хъӕбӕрдӕр деси бафтудта, сувӕллон куд райгуруй, уой ку цудан, уӕд. Цалинмӕ сувӕллон мади губуни фӕууй, уӕдмӕ ӕхуӕдӕг нӕ фӕууолӕфуй. Тауӕггур ӕ мадӕй фӕййесуй, ӕма уой туххӕй алвиолитӕ (рӕугути медӕг минкъий тумбул дзӕкъолӕгондтӕ) уӕлдӕфӕй идзаг нӕма фӕуунцӕ. Фал ма сувӕллони райгурдмӕ цалдӕр къуӕрей ку фӕгъгъӕуй, уӕд сурфӕктантӕй байдзаг унцӕ. Ӕма сувӕллон ку райгуруй ӕма фиццаг хатт ку исуолӕфуй, уӕд дессаги хабӕрттӕ ӕрцӕуй: ӕ зӕрди ци зихъир фӕууй, е исӕхгӕнуй ӕма тог ӕ рӕугутӕмӕ ниццӕвуй. Алвиолитӕ тагъд-тагъдӕй уӕлдӕфӕй идзаг кӕнун райдайунцӕ, сурфӕктан ба сӕ нӕ фӕууадзуй, цӕмӕй кӕрӕдзебӕл банихӕсонцӕ, ӕма сувӕллон еци фӕдбӕл райдайуй ӕхуӕдӕг уолӕфун.

Хъӕбӕр мӕ бафӕндадтӕй, еци дессӕгтӕ ка сфӕлдиста, уой туххӕй фулдӕр базонун. Ӕма уомӕ гӕсгӕ райдӕдтон Библи лӕмбунӕг кӕсун. 3 000 анзей размӕ Хуцау ӕ адӕнӕн кӕдзосдзийнади туххӕй ци закъӕнттӕ равардта, етӕ мӕ деси бафтудтонцӕ. Зӕгъӕн, гъудӕй сӕ сӕ цъумуртӕ нигӕнун, сӕхе ӕхснун ӕма хуӕцгӕ нез кӕмӕ ес, уони иннетӕй еуварс кӕнун (Лев. 13:50; 15:11; Дук. з. 23:13). Етӕ уобӕл дзорӕг адтӕнцӕ, ӕма Библи науки разӕй фӕцӕй. Уомӕн ӕма незтӕ куд парахат кӕнунцӕ, уой ахургӕндтӕ кӕд исбӕрӕг кодтонцӕ, уобӕл дууӕ ӕносемӕй ӕндӕр нӕма цӕуй. Нӕлгоймаг ӕма силгоймаги астӕу ци фӕууй, уой фӕдбӕл Левити киунуги ци закъӕнттӕ ес, етӕ ӕнӕгъӕнӕ адӕнихатти ӕнӕнездзийнадӕ гъӕуай кодтонцӕ (Лев. 12:1–6; 15:16–24). Сфӕлдесӕг син еци закъӕнттӕ сӕхе пайдайӕн равардта, ӕма еци закъӕнттӕ ка ӕнхӕст кодта, уонӕн арфӕ кодта. Ӕз ӕй балӕдӕрдтӕн, Библи Хуцауи Дзурд ке ӕй. Фал уӕд Хуцауи ном нӕма зудтон.

Университети ма ку ахур кодтон, уӕд базонгӕ дӕн еу дзӕбӕх кизгӕ Лидий хӕццӕ ӕма ’й бауарзтон. 1965 анзи, ахур ма ку кодтон, уӕд нӕ цард байеу кодтан. 1971 анзмӕ нин адтӕй ӕртӕ сувӕллони. Уой фӕсте ба ма нин никкидӕр ӕртӕ райгурдӕй. Лиди мин алкӕддӕр хуарз ӕнхусгӕнӕг адтӕй, айдагъ хӕдзари нӕ, фал ма кусти дӕр.

Ӕртӕ анзи сӕйгӕдони ракустон, уой фӕсте ба мӕхе клиникӕ райгон кодтон. Уобӕл ци рацудӕй, ӕма мӕмӕ, райдайӕни ке кой ракодтон, еци лӕг ӕма уосӕ ӕрбацудӕнцӕ. Лӕгӕн цӕхуӕн хуастӕ ниуазгӕ ’нцӕ, уой ку финстон, уӕд мин  ӕ уосӕ уотӕ: «Дохтир, ӕрмӕстдӕр, дӕ хуарзӕнхӕй, еци хуасти тог ма уӕд». Ӕз дӕр бадес кодтон: «Уӕд цӕмӕннӕ?» Е ба мин уотӕ: «Уомӕн ӕма мах Йегови Ӕвдесӕнтӕ ан». Ӕз ба Йегови Ӕвдесӕнти туххӕй некӕд неци фегъустон ӕма тогмӕ цӕхуӕн цӕстӕй кӕсунцӕ, уой дӕр нӕ зудтон. Уӕд силгоймаг ӕ Библи исиста ӕма мин бавдиста, тоги туххӕй си ци финст ес, уой (Гъуд. 15:28, 29). Удта ма мин радзурдтонцӕ, зӕнхӕ Хуцауи Паддзахади дӕлбарӕ ку уа, уӕд цард цӕхуӕн уодзӕй: гъезӕмарӕ некебал кӕндзӕй, незтӕ нӕбал уодзӕй ӕма мӕлгӕ дӕр некебал кӕндзӕй (Рарг. 21:3, 4). «Е ба ци дессаг ӕй! Ӕз ба сувӕллонӕй ардӕмӕ гъе уомӕ ку бӕллун! Дохтир дӕр уой туххӕй ку ’сдӕн, цӕмӕй адӕни сӕ гъезӕмӕрттӕй ервӕзун кӕнон». Сӕ хӕццӕ гъе уотӕ дзӕбӕх фӕдздзубандитӕ кодтан, ӕма ’й лӕдӕргӕ дӕр нӕ бакодтон, сахат ӕма ӕрдӕг куд ратахтӕй, уой. Ку рандӕ ’нцӕ, уӕд ӕй балӕдӕрдтӕн, католикти хӕццӕ мин еумӕйагӕй ке нецибал ес. Удта ма ’й базудтон, ке гъуддӕгтӕбӕл дес кодтон, еци Сфӕлдесӕгӕн ном ке ес – Йеговӕ!

Еци Ӕвдесӕнти хӕццӕ ма мӕ клиники ӕртӕ хатти фембалдан. Ӕма алли хатт дӕр сахатгай фӕххабӕрттӕ кӕнианӕ. Цӕмӕй Библий туххӕй бӕстондӕр радзубандитӕ кодтайанӕ, уой туххӕй сӕ нӕхемӕ ӕрбахудтон. Лиди дӕр Библи ахур кӕнунбӕл исарази ӕй. Фал ӕ минкъийӕй ардӕмӕ католикон динбӕл хуӕст адтӕй ӕма си не ’руагӕс кодта, еци ахурӕдтӕ раст ке н’ адтӕнцӕ, е. Гъема ӕз дӕр нӕ аргъауӕни саугини нӕхемӕ ӕрбахудтон ӕма ӕмбесӕхсӕвӕмӕ фӕдздзубандитӕ кодтан, айдагъ Библийӕй пайда кодтан, уотемӕй. Уой фӕсте ӕй Лиди ӕхуӕдӕг дӕр балӕдӕрдтӕй, Йегови Ӕвдесӕнтӕ рӕстдзийнадӕбӕл ке ахур кӕнунцӕ, уой. Уӕдӕй фӕстӕмӕ Йеговӕмӕ хӕстӕгӕй-хӕстӕгдӕр кодтан ӕма 1974 анзи донаргъуд райстан.

Мӕ цард цӕхгӕрмӕ раййивта, ку ’й базудтон, Хуцаумӕ адӕни туххӕй ци фӕндӕ ес, уой. Мӕнӕн дӕр ӕма Лидийӕн дӕр Йеговӕн лӕггадӕ кӕнун царди фиццаг бунати иссӕй. Фӕндадтӕй нӕ нӕ сувӕллӕнттӕн дӕр Библий уагӕвӕрдтӕ бауарзун кӕнун. Ахур сӕ кодтан Хуцауи ӕма адӕни уарзунбӕл, ӕма уой фӕрци нӕ бийнонтӕ ӕнгомдӕр кодтонцӕ (Матф. 22:37–39).

Нӕ сувӕллӕнттӕ ’й зудтонцӕ, нӕ еу ци зӕгъа, уобӕл иннӕ дӕр ке исарази уодзӕй. Нӕ бийнонти уӕхӕн ӕвӕрд ӕгъдау адтӕй: «„Гъо“ загътайтӕ, уӕд уӕ дзурд уӕд „гъо“, „нӕъ“ загътайтӕ, уӕдта – „нӕъ“» (Матф. 5:37). Нӕ хестӕр кизгӕбӕл 17 анзи ку цудӕй, уӕд ӕй Лиди е ’мбӕлтти  хӕццӕ кумӕдӕр нӕ рауагъта. Уӕд ин е ’мбал кизгуттӕй еу уотӕ бакодта: «Кӕд дӕ дӕ мадӕ нӕ уадзуй, уӕд дӕ фидӕй дӕхе ракорӕ». Нӕ кизгӕ ба ин уотӕ: «Неци си рауайдзӕй. Алкӕддӕр ӕмхузӕн фӕдздзорунцӕ». Не ’гас сувӕллӕнттӕ дӕр ӕй уидтонцӕ, Библий уагӕвӕрдти фӕрци нӕ бийнонтӕ ӕнгомдӕр ке кӕнунцӕ. Нӕ бийнонтӕй беретӕ Йегови над равзурстонцӕ, ӕма нин е хъӕбӕр ӕхцӕуӕн ӕй.

Кӕд мин Йеговӕ царди фиццаг бунати иссӕй, уӕддӕр ма медицинӕ берӕ уарзтон. Ӕма мӕ фӕндадтӕй, цӕмӕй ми Йегови гъуддӕгти пайда уа. Уомӕ гӕсгӕ Вефилмӕ курдиадӕ балӕвардтон. Уӕд ма адтӕй Парижи, фӕстӕдӕр ба сӕ бунат Лувьемӕ раййивтонцӕ. Ӕма нур 50 анзей бӕрцӕ Вефили бийнонтӕн ӕнхус кӕнун. Уал анземӕ мин хъӕбӕр берӕ ӕмбӕлттӕ фӕззиндтӕй. Еуӕй-еуетӕбӕл си 90 анземӕй фулдӕр цӕуй. Еу уӕхӕни ба базонгӕ дӕн еу ӕригон вефилаги хӕццӕ. Ӕма куд рабӕрӕг ӕй, уотемӕй ин 20 анзей размӕ банхус кодтон аци дуйнемӕ рантӕсун.

Йеговӕ ӕ адӕнӕн ӕ организаций фӕрци разамунд куд дӕттуй ӕма сӕ куд гъӕуай кӕнуй, уой уингӕй ӕй никки хъӕбӕрдӕр бауарзтон. 1980 анзмӕ хӕстӕг Америки Еугонд Штатти ӕнсувӕртӕ архайун райдӕдтонцӕ, Разамонӕг совет ци программӕ бацӕттӕ кодта, уомӕ гӕсгӕ. Уой фӕрци медицини косгутӕн сӕ бон адтӕй фулдӕр базонун Йегови Ӕвдесӕнтӕ тог цӕмӕннӕ уадзунцӕ, уой туххӕй.

Уой фӕсте, 1988 анзи, Разамонӕг совет Вефили райгон кодта нӕуӕг хайадӕ – Сӕйгӕдӕнттӕн информацидӕттӕг хайадӕ. Фиццӕгти е дзуапп лӕвардта, Америки Еугонд Штатти сӕйгӕдӕнтти хӕццӕ ка ӕмгуст кодта, еци комитеттӕн. Етӕ Ӕвдесӕнтӕн ӕнхус кодтонцӕ, цӕмӕй иссирдтайуонцӕ, ӕнӕ тогӕй ка дзӕбӕх кӕнуй, уӕхӕн дохтирти. Уой фӕсте уӕхӕн комитеттӕ фӕззиндтӕнцӕ иннӕ бӕстити дӕр. Франций дӕр фӕззиндтӕй. Йегови организаци, хуӕртӕ ӕма ӕнсувӕртӕй сӕйгӕ ка фӕууй, уонӕн куд ӕнхус кӕнуй, е мӕмӕ хъӕбӕр дессаг кӕсуй.

Медицинӕ адтӕй мӕ фиццаг уарзт. Фал мин царди сӕйрагдӕр ци ӕй, уобӕл ку расагъӕс кодтон, уӕд ӕй балӕдӕрдтӕн, алцӕмӕй сӕйрагдӕр ке ӕй адӕнӕн ӕндӕрхузи ӕнхус кӕнун – гъӕуй син банхус кӕнун, цӕмӕй царддӕттӕг Хуцау Йегови хӕццӕ бафедауонцӕ. Пенсий ку рацудтӕн, уӕд Лидий хӕццӕ пионертӕй лӕггадӕ кӕнун райдӕдтан. Алли мӕйӕ дӕр берӕ рӕстӕг рахецӕн кӕнианӕ, цӕмӕй адӕнӕн хуарз хабар игъосун кодтайанӕ. Абони дӕр нӕ бон цӕйбӕрцӕ ’й, уойбӕрцӕ архайӕн, адӕни ка ервӕзун кӕнуй, еци гъуддаги.

Нур дӕр ма адӕни дзӕбӕх кӕнун. Фал син еци ӕнхус ӕрмӕстдӕр рӕстӕгмӕ фӕууй. Цийфӕнди дӕсни дохтирӕн дӕр ӕ бон нӕй адӕймаги еугур незтӕй дӕр исдзӕбӕх кӕнун кенӕ ’й мӕлӕтӕй багъӕуай кӕнун. Ӕма ӕз хъӕбӕр зӕрдиагӕй ӕнгъӕлмӕ кӕсун, рист, незтӕ ӕма мӕлӕт ку нӕбал уонцӕ, еци рӕстӕгмӕ. Уӕхӕн цард хъӕбӕр тагъд ралӕудзӕй ӕма мин уодзӕй берӕ рӕстӕг, цӕмӕй, Хуцау ци дессӕгтӕ сфӕлдиста, уони лӕмбунӕг ӕртасон, уой хӕццӕ ба ма, адӕймаги бауӕр куд конд ӕй, уой дӕр. Ӕцӕгӕйдӕр, сувӕллонӕй цӕмӕ бӕлдтӕн, е ӕнхӕст кӕнун райдӕдта. Фал ибӕл федарӕй ӕууӕндун, никки хуӕздӕр цард разӕй ке ӕй!