M’a nase na 1941 na Paris, Fransia den un famia humilde. Mi tabata gusta siña. Pues, bo por imaginá bo kon tristu mi a bira ora mi a haña tuberkulósis ku mi 10 aña anto ku mi mester a stòp di bai skol. Dòkternan a bisa ku mi mester a keda riba kama pasobra mi pulmonnan tabata suak. Pues, pa un par di luna mi a pasa mi tempu lesando dikshonario i skuchando Radio Sorbonne di Universidat di Paris. Ora e dòkternan a bisa ku mi a kura i ku mi por a kuminsá bai skol bèk, mi a bula di alegria! Den mi mes mi a bisa: “Loke e dòkternan ei ta hasi ta inkreibel!” For di e momento ei, mi soño tabata pa kura hende malu. Kada biaha ku mi tata a puntra mi kiko mi ke bira ora mi bira grandi, mi tabata kontest’é: “Dòkter.” I ta asin’ei medisina a bira mi pashon.

Mi famia tabata katóliko. Mi no tabata sa muchu tokante Dios, i mi tabatin hopi pregunta. Ta despues ku mi a kuminsá studia pa dòkter na universidat, mi a bira konvensí ku bida ta obra di un Kreador.

Mi ta kòrda e promé biaha ku mi a mira e sèl di un tùlp bou di un mikroskop. Mi a keda impreshoná ora mi a mira kon e sèl ta reakshoná na friu i kayente. Tambe mi a opservá ku sitoplasma (loke tin den e sèl) ta kontraé ora e drenta den kontakto ku salu anto e ta ekspandé ora e drenta den kontakto ku awa. Tur e tipo di reakshonnan ei ta hasi posibel ku organismonan por adaptá na kambio den ambiente. Mirando kon kompliká kada sèl ta hinká den otro, mi a mira ku bida no a bini gewon di su mes.

 Durante mi di dos aña den medisina, mi a mira mas prueba ku Dios ta eksistí. Den lès di anatomia, nos a mira ku e manera ku nos brasa ta hinká den otro ta hasi posibel ku nos dedenan por dobla i para règt. E manera kon tur múskulo, pees i wesu ta konektá i funshoná huntu ta hopi maravioso. Por ehèmpel, mi a siña ku tin un pees ku ta konektá ku un di e múskulonan di nos brasa i ta bai te na e di dos wesu di nos dede. Einan e ta parti den dos i ta forma manera un brùg. Anto esei ta hasi posibel ku un otro pees ku ta konektá ku e punta di dede por pasa bou di dje i keda na su lugá. Tin tehido (weefsels) ku ta tene e peesnan pegá ku nos wesunan di dede. Sin e mekanismonan akí, nos dedenan lo no por funshoná. Mi por a mira bon kla ku Esun ku a diseñá kurpa ta hopi inteligente.

Mas mi a studia loke ta sosodé ora un yu nase, mas impreshoná mi a keda ku e Kreador. Mi a siña ku ora e bebi ta den barika di su mama, e ta haña oksígeno via di e kabuya di lombrishi (navelstreng). Anto p’esei e blasnan chikitu ku tin den su pulmon no ta yená ku aire ainda. Un par di siman promé ku e bebi nase, parti paden di e blasnan ta haña lag di un líkido spesial. Ora e bebi nase i hala su promé rosea, hopi kos maravioso ta kuminsá sosodé. E buraku den e bebi su kurason ta sera i awor sanger ta bai na e pulmonnan. Na e momento importante ei, e lag di e líkido spesial ku tin parti paden di e blasnan ta evitá nan di plak i di stroba aire drenta. Den un fregá di wowo e bebi por hala rosea riba su mes.

Mi kier a konosé Esun ku a krea tur e kosnan maravioso ei, pues mi a kuminsá lesa mi Beibel ku mas interes. Mi a keda impreshoná ku e leinan di higiena ku Dios a duna e nashon di Israel un 3.000 aña pasá. Dios a instruí nan pa dera nan sushi, baña regularmente i pone kualke hende ku ta mustra síntoma di un malesa kontagioso den karentena. (Lev. 13:50; 15:11; Deu. 23:13) Beibel a papia tokante tur e kosnan akí, pero ta den e último 150 añanan numa sientífikonan a bin komprondé kon malesa ta plama. Anto mi a mira ku e leinan di higiena seksual ku tin den Levítiko a yuda ku henter e nashon di Israel por a keda salú. (Lev. 12:1-6; 15:16-24) Mi a bin komprondé ku e Kreador a duna e israelitanan e leinan akí pa nan mes bon i ku el a bendishoná esnan ku tabata obediente. Mi a keda konvensí ku Beibel ta inspirá pa Dios, pero na e momento ei mi no tabata sa Su nòmber.

Ora mi tabata na universidat mi a konosé un mucha muhé ku yama Lydie, i mi a gust’é masha hopi mes. Na 1965 nos a kasa, ora mi ku mi tabata na mitar kaminda ku mi estudio. Pa 1971 ya nos tabatin tres di nos seis yunan kaba. Lydie semper a apoyá mi, tantu den mi trabou komo dòkter komo den nos famia.

Mi a traha na hospital pa tres aña promé ku mi a habri mi mes ofisina. Poko tempu despues, e dos pashèntnan ku mi a  menshoná na kuminsamentu a bini pa un konsulta. Nèt ora mi tabata bai skirbi un resèpt pa e esposo, e esposa a pidi mi: “Plis dòkter, remedi ku no tin sanger.” Tur sorprendí mi a puntr’é: “Serio? Dikon?” El a kontestá mi: “Nos ta Testigunan di Yehova.” Ami nunka a tende di Testigunan di Yehova ni pakiko nan no ta tuma sanger. E esposa a saka su Beibel i a mustra mi dikon nan no ta tuma sanger. (Echo. 15:28, 29) Djei, nan a konta mi tur e kosnan ku e Reino di Dios ta bai hasi; e ta bai kita tur sufrimentu, tur malesa i morto. (Rev. 21:3, 4) Tur kontentu mi a bisa nan: “E kos ku boso ta bisando mi ta mi soño di infansia! Ta p’esei mi a bira dòkter, pa aliviá hende su sufrimentu.” Mi a gusta nos kòmbersashon asina tantu ku nos a papia un ora i mei asina. Pa ora nan a bai, den mi kurason mi no tabata katóliko mas. Mi a haña sa ku e Kreador ku mi tabata atmirá asina tantu tabatin un nòmber: Yehova.

E pareha Testigu ei a bini tres biaha na mi ofisina i kada biaha nos a papia mas ku un ora. Mi a invitá nan pa bini mi kas ya asina nos tabatin mas tempu pa papia tokante Beibel. Aunke ku Lydie a bai eens pa studia huntu ku nos, tòg e no kier a aseptá ku algun di e kosnan ku nos a siña for di e katólikonan tabata robes. P’esei, mi a invitá e pastor di parokia pa bini na nos kas pa nos kompará loke misa ta siña ku loke Beibel ta bisa. Nos a keda kòmbersá te lat den anochi. E kòmbersashon ei a konvensé Lydie ku Testigunan di Yehova ta siña e bèrdat. Despues di esei, nos amor pa Yehova a krese te na e punto ku nos a batisá na 1974.

Loke mi a siña tokante Dios su propósito pa humanidat a pone mi reevaluá mi prioridatnan den bida. Pa ami i Lydie, sirbi Yehova a bira e kos di mas importante den nos bida. Nos tabata determiná pa lanta nos yunan segun e normanan di Beibel. Nos a siña nos yunan pa stima Dios i stima hende. I esei a uni nos famia asta mas.—Mat. 22:37-39.

Ora ami ku Lydie pensa bèk riba kon e muchanan tabata reakshoná ora nan mira ku nos semper tabata uní den nos desishonnan, nos ta gewon hari. Nan tabata sa ku loke Hesus a bisa di “laga boso ‘sí’ ta sí, i boso ‘nò,’ nò” tabata e regla di kas. (Mat. 5:37) Por ehèmpel, ora un di mi yu muhénan  tabatin 17 aña, el a bai pidi su mama si e por a sali ku un grupo di amigu. Lydie a bis’é ku nò. Un di e muchanan a bisa nos yu muhé: “Si bo mama no ta laga bo bai, pidi bo tata no.” Pero nos yu muhé a kontest’é: “Aino yu. Nan ta traha huntu.” Sí, nos seis yunan por a mira ku ora ta trata di apliká prinsipionan di Beibel, nos tabata uní. Nos ta hopi kontentu ku vários hende di nos famia ta sirbiendo Yehova.

Aunke ku e bèrdat a kambia mi prioridatnan den bida, tòg mi kier a usa loke mi tabata sa komo dòkter pa yuda mi rumannan. P’esei, mi a bai traha komo kòmiuter na Bètel di Paris i despues na esun nobo na Louviers. Mi tin kasi 50 aña ta yuda na Bètel. I durante e tempu ei, mi a bira bon amigu di algun di e bètelitanan. Tin di nan tin mas ku 90 aña awor. Un dia, mi a haña un sorpresa masha bunita mes ora ku mi a sera konosí ku un bètelita nobo. M’a bin haña sa ku mi a yuda su mama hañ’é un 20 aña promé.

Atraves di e añanan, mi amor pa Yehova a sigui krese segun mi a mira kon e tabata guia i protehá su pueblo mediante su organisashon. Rònt di 1980, Kuerpo Gobernante a bini ku un areglo na Merka pa yuda mehorá e komunikashon entre Testigunan di Yehova i e profeshonalnan médiko.

Djei, na 1988, Kuerpo Gobernante a forma un departamento nobo na Bètel ku yama Servisio di Informashon di Hospital. Na promé instante, e departamento akí tabata supervisá tur Komité di Kontakto ku Hospital (HLC) ku tabata na Merka. HLC tabata yuda pashèntnan Testigu di Yehova haña tratamentu sin sanger. Ora e areglo akí tabata disponibel pa henter mundu, Fransia tambe a haña su HLC. Mi ta keda impreshoná di mira kon Yehova su organisashon ta kuida nos rumannan malu durante e tempu ku mas nan mester di dje.

Medisina tabata mi pashon. Pero segun mi a analisá mi prioridatnan, mi a bin komprondé ku e mihó manera ku por kura hende ta den sentido spiritual. Esei ta dor di yuda nan konosé i sirbi Yehova Dios, e Fuente di bida. Despues ku mi a baha ku penshon, ami ku Lydie a kuminsá traha pionero i te awe nos ta sigui hasi tur loke nos por den a trabou akí ku ta salba bida.

Te ainda mi ta sigui hasi loke mi por pa yuda hende malu. Pero, mi a bin komprondé ku ni e mihó dòkter na mundu no por kura tur malesa ni evitá morto. P’esei, mi no por warda pa e tempu yega ora no ta bai tin doló, malesa ni morto mas. Mi sa ku un djis akí e mundu nobo ei ta bai yega. Anto e ora ei lo mi tin eternidat pa haña sa mas tokante Dios su kreashon, inkluso e manera maravioso ku el a traha nos kurpa. Mi sa ku pronto mi soño di infansia lo kumpli den su totalidat. P’esei, mi ta konvensí ku lo mihó ta na kaminda.