آپبیتی
مینوں ڈاکٹری نالوں وی چنگا پیشہ مل گیا
”تُسی جیہڑیاں گلاں دَس رہے او، اوہ تے میرے بچپن دا خواب نیں!“ میں ایہہ گل 1971 چ اپنے دو نویں مریضاں نُوں کہی۔ میں کجھ دیر پہلاں ای اپنا نواں کلینک کھولیا سی۔ اوہ مریض کون سن؟ تے میرا خواب کیہہ سی؟ آؤ، میں توانوں دَسنا واں کہ اوہناں نال گل کرکے میری زندگی دا مقصد کیویں بدل گیا تے مینوں کیویں لگیا کہ میرے بچپن دا خواب پورا ہون والا اے۔
میں 1941 چ فرانس دے شہر پیرس چ پیدا ہویا۔ میرے گھر والے اینے زیادہ امیر نئیں سن۔ مینوں پڑھن لکھن دا بڑا شوق سی۔ پر جدوں میں دس سال دا ای ساں تے مینوں ٹیبی دی بیماری ہو گئی۔ جدی وجہ توں مینوں سکول چھڈنا پیا۔ ایس وجہ توں میں بڑا نااُمید ہو گیا۔ ڈاکٹراں نے مینوں کہیا کہ میرے پھیپھڑے کمزور ہو گئے نیں۔ ایس لئی مینوں زیادہ توں زیادہ آرام کرن دی لوڑ اے۔ ایس وقت دے دوران میں کئی مہینیاں تک اِک ڈکشنری پڑھدا رہیا تے یونیورسٹی آف پیرس دے ریڈیو پروگرام سُندا رہیا۔ فیر جدوں ڈاکٹر نے دَسیا کہ میں ٹھیک ہو گیا واں تے میں سکول جا سکنا واں تے میں بڑا خوش ہویا۔ فیر میں سوچیا کہ ڈاکٹر جیہڑا کم کردے نیں، اوہ تے بڑا ای زبردست اے۔ اوہدوں توں ای میں لوکاں دِیاں بیماریاں نُوں ٹھیک کرن دا خواب ویکھن لگ پیا۔ جدوں وی میرے ابو مینوں ایہہ پچھدے سن کہ میں وڈا ہو کے کیہہ بننا چاہنا واں تے میں اوہناں نُوں ہر وار ایہہ ای کہنا ساں کہ میں ڈاکٹر بننا چاہنا واں۔ اِنج ڈاکٹر بننا میری زندگی دا مقصد بن گیا۔
ڈاکٹری دی تلیم حاصل کردے کردے میں خدا دے نیڑے ہو گیا
میرے گھر والے کیتھولک مشن دے سن۔ میں خدا بارے کجھ وی نئیں جان دا ساں۔ پر میرے بوہت سارے سوال سن جنہاں دے میں جواب جاننا چاہنا ساں۔ جدوں میں ڈاکٹری دی پڑھائی شروع کیتی تے مینوں یقین ہو گیا کہ جانداراں نُوں کسے نہ کسے نے تے بنایا اے۔
مینوں یاد اے کہ جدوں میں پہلی وار نرگس دے پُھل دے خلیاں نُوں خوردبین چ ویکھیا تے میں بڑا حیران ہویا کہ ایہہ خلیے سردی تے گرمی چ اپنے آپ نُوں زندہ کیویں رکھدے نیں۔ میں ایہہ وی ویکھیا کہ جیہڑا مادہ خلیے دے اندر ہوندا اے اوہ نمک دی وجہ توں سکڑ جاندا اے تے جدوں اوہ صاف پانی چ رکھیا جاندا اے تے اوہ پھیل جاندا اے۔ چھوٹے چھوٹے جاندار ایہناں خوبیاں دی وجہ توں ای اپنے آپ نُوں ماحول دے مطابق ڈھال لیندے نیں۔ جدوں میں ویکھیا کہ ہر خلیے چ کِنّاں حیران کر دین والا عمل ہوندا اے تے مینوں پکا یقین ہو گیا کہ جاندار اپنے آپ نئیں بنے۔
ڈاکٹری دی پڑھائی دے دُوجے سال چ ای میں ایس نتیجے تے پونچ گیا کہ خدا واقعی ہے وے۔ جدوں اَسی انسانی جسم بارے پڑھ رہے ساں تے اَسی ویکھیا کہ ساڈی بانہہ دے اگلے حصے نُوں اِنج بنایا گیا اے جدی وجہ توں ساڈیاں اُنگلاں اسانی نال مُڑ سکدیاں نیں تے سدھیاں ہو سکدیاں نیں۔ ساڈے جسم دے پٹھے تے ریشے جیویں کم کردے نیں، اوہ واقعی حیران کر دین والا عمل اے۔ مثال دے طور تے میں سکھیا کہ جیہڑے ریشے ساڈی بانہہ دے پٹھیاں نُوں ساڈی اُنگلی دی دُوجی ہڈی نال جوڑ دے نیں، اوہ دو حصیاں چ وَکھ ہو جاندے نیں۔ اِنج اِک پُل جیہا بن جاندا اے جدے تھلوں دی دُوجے ریشے ساڈی اُنگلی دے اگلے حصے تک پونچ دے نیں۔ ایہہ ریشے ساڈیاں اُنگلاں دِیاں ہڈیاں دے بوہت نیڑے ہوندے نیں۔ جے ساڈیاں اُنگلاں نُوں ایس طرحاں نہ بنایا گیا ہوندا تے ایہہ ریشے بڑے سخت ہوندے تے ایہناں چ بالکل لچک نہ ہوندی، تے اِنج ساڈیاں اُنگلاں صحی طرحاں کم نہ کر پاندیاں۔ ایہدے توں ثابت ہوندا اے کہ انسانی جسم نُوں بنان والی ہستی بوہت ای سمجھدار اے۔
اوہدوں میرے دل چ خالق لئی قدر ہور ودھ گئی جدوں میں ایہہ وی سکھیا کہ کیویں اِک بچہ پیدا ہون توں بعد ساہ لینا شروع کردا اے۔ جدوں بچہ ماں دے پیٹ چ ہوندا اے تے اوہنوں اِک ناڑ دے ذریعے آکسیجن مِلدی اے۔ اِنج ایس لئی ہوندا اے کیونکہ حالے تک اوہدے پھیپھڑیاں چ جیہڑیاں تھیلیاں ہوندیاں نیں اوہناں چ ہوا نئیں بھری ہوندی۔ پر بچے دے پیدا ہون توں کجھ ہفتے پہلاں اِک خاص قسم دا مادہ ہر تھیلی دے اندر والے حصے نُوں ڈھکنا شروع کر دیندا اے، تے فیر جدوں بچہ پیدا ہون توں بعد پہلی وار ساہ لیندا اے تے ایہدے بعد بڑا زبردست عمل ہوندا اے بچے دے دل چ پایا جان والا اِک سوراخ بند ہو جاندا اے تے ایس طرحاں خون پھیپھڑیاں ول جان لگ پیندا اے۔ اوس ویلے پھیپھڑیاں چ پائیاں جان والیاں تھیلیاں چ فوراً ہوا بھرن لگ پیندی اے۔ پر ایہناں وچ پایا جان والا مادہ ایہناں دی اندر والی تہہ نُوں آپس چ چمڑن نئیں دیندا۔ اِنج اِک بچہ اپنے آپ ساہ لین لگ پیندا اے۔
میں اوس ہستی بارے جاننا چاہنا ساں جنہے ایہہ ساریاں زبردست چیزاں بنائیاں۔ ایس لئی میں بڑے شوق نال بائبل پڑھن لگ پیا۔ میں صفائی ستھرائی دے بارے خدا دے اوہناں حکماں نُوں پڑھ کے حیران رہ گیا جیہڑے اوہنے 3000 ہزار پہلاں بنیاِسرائیل نُوں دِتے سن۔ خدا نے اوہناں نُوں ہدیت کیتی کہ اوہ فضلے نُوں مٹی نال ڈھک دین، باقاعدہ نہان دھون تے جے کسے نُوں چھوت دی بیماری لگی ہوئے تے اوہنوں دُوجیاں توں وَکھ رکھیا جائے۔ (احبار 13:50؛ 15:11؛ اِستثنا 23:13) بائبل چ ایہہ سب کجھ پہلاں توں ای دس دِتا گیا سی جد کہ سائنس داناں نُوں ایہدے بارے صرف 150 سال پہلاں ای پتہ لگیا سی کہ بیماریاں کیویں پھیل دِیاں نیں۔ میں ایہہ وی جان گیا کہ احبار دی کتاب چ جنسی طور تے پاک صاف رہن بارے جیہڑے قانون دِتے گئے نیں، اوہناں دی وجہ توں ساری قوم بیماریاں توں بچ سکدی سی۔ (احبار 12:1-6؛ 15:16-24) ایہہ گلاں پڑھ کے میں ایس نتیجے تے پونچیا کہ خدا نے بنیاِسرائیل نُوں ایہہ قانون اوہناں دے فائدے لئی دِتے سن تے ایہناں قانوناں نُوں منن والے لوکاں نُوں خدا برکتاں دیندا سی۔ مینوں پکا یقین ہو گیا کہ بائبل خدا وَلّوں اے۔ پر اوس ویلے میں خدا دا ناں نئیں جاننا ساں۔
مینوں بائبل دی صحی تلیم کیویں ملی؟
میں تے لیڈی، 3 اپریل 1965 نُوں ساڈی شادی دے دن
جدوں میں یونیورسٹی چ ڈاکٹر بنن دی تلیم لے رہیا ساں۔ میری ملاقات لیڈی ناں دی اِک کُڑی نال ہوئی۔ سانوں دونواں نُوں اِک دُوجے نال پیار ہو گیا تے اَسی 1965 چ شادی کر لئی۔ اوہدوں میری پڑھائی حالے پوری نئیں ہوئی سی کہ 1971 تک ساڈے تِن بچے وی ہو گئے۔ لیڈی نے ہمیشاں ہر گل چ میرا ساتھ دِتا اے بھانویں اوہ گھر دی گل ہووے یاں کم دی۔
اپنی تلیم پوری کرن دے بعد میں تِن سال تک اِک ہسپتال چ کم کیتا۔ ایہدے بعد میں اپنا کلینک کھول لیا۔ جِتھے مینوں اوہ دو مریض ملے جنہاں بارے میں شروع چ دَسیا اے۔ اوہ دونویں میاں بیوی سن۔ میں اوس بندے لئی دوائیاں لکھن ای والا ساں کہ اوہدی بیوی نے کہیا: ”ڈاکٹر صاحب، کوئی ایہو جہی دَوائی نہ لکھنا جدے چ خون ہووے۔“ میں حیران ہو کے پچھیا: ”کیوں؟“ اوہنے جواب دِتا: ”اَسی یہوواہ دے گواہ آں۔“ میں کدی وی نئی سُنیا سی کہ یہوواہ دے گواہ کون نیں تے اوہ خون کیوں نئی لیندے۔ اوس عورت نے بائبل چوں مینوں کجھ ایتاں وکھائیاں تے دَسیا کہ یہوواہ دے گواہ خون کیوں نئی لیندے۔ (اعمال 15:28، 29) ایہدے بعد اوس جوڑے نے مینوں دَسیا کہ خدا دی بادشاہی ہر طرحاں دی تکلیف، بیماری تے موت نُوں ختم کر دَوے گی۔ (مکاشفہ 21:3، 4) میں خوشی نال آکھیا کہ تُسی جیہڑیاں گلاں دَس رہے او، اوہ تے میرے بچپن دا خواب نیں۔ میں تے ڈاکٹر وی ایس لئی بنیا ساں کہ لوکاں دِیاں بیماریاں نُوں ٹھیک کر سکاں۔ مینوں اوہناں نال گل کرکے ایناں چنگا لگیا کہ اَسی ڈیڑھ گھنٹے تک گلاں کردے رہے۔ میں سکھ لیا کہ جیس خالق دی میں دلوں قدر کرنا واں اوہدا ناں یہوواہ اے۔
جدوں اوہ دونویں چلے گئے تے میں سوچ لیا کہ ہُن میں کیتھولک مشن چ نئی رہواں گا۔ اوہ جوڑا تِن وار میرے کلینک تے آیا تے ہر وار اِک گھنٹے توں زیادہ ساڈی گلبات ہوئی۔ میں اوہناں نُوں اپنے گھر بلایا تاکہ اَسی بائبل چوں ہور زیادہ گلبات کر سکئے۔ لیڈی وی ساڈے نال بیٹھدی سی پر اوہ ایہہ منن لئی تیار نئی سی کہ کیتھولک چرچ دے کجھ عقیدے غلط نیں۔ ایس لئی میں اِک پادری نُوں اپنے گھر سدیا۔ اَسی اوہدے نال چرچ دی تلیم بارے گل کردے ویلے صرف بائبل استمال کیتی تے ساڈی بحث اَدھی رات تک چل دی رہی۔ ایس گلبات توں بعد لیڈی نُوں یقین ہو گیا کہ یہوواہ دے گواہ جیہڑی تلیم دیندے نیں اوہ صحی اے۔ ساڈے دل چ یہوواہ لئی محبت اینی زیادہ ودھ گئی کہ 1974 چ اَسی دونواں نے بپتسمہ لے لیا۔
میں یہوواہ نُوں سب توں ودھ کے اہمیت دین لگ پیا
میں انساناں لئی یہوواہ خدا دے مقصد بارے جو کجھ سکھیا مینوں اوہدے توں پتہ چلیا کہ مینوں اپنی زندگی چ کیہڑی شے نُوں سب توں ودھ کے اہمیت دینی چاہی دی اے۔ اِنج ساڈے دونواں لئی یہوواہ دی خدمت سب توں اہم ہو گئی۔ اَسی فیصلہ کیتا کہ اَسی اپنے بچیاں دی دیکھبھال خدا دے اصولاں مطابق کراں گے۔ اَسی اوہناں نُوں خدا تے لوکاں نال محبت کرنا سکھایا۔ اِنج اَسی سارے اِک دُوجے دے ہور نیڑے ہو گئے۔—متی 22:37-39۔
ساڈے دونواں دے فیصلے ہمیشاں اِکوجہے ہوندے نیں۔ اَسی کدی کدار ایس گل نُوں یاد کرکے خوش ہنے آں کہ ایہدا ساڈے بچیاں تے کِنّاں گُوڑھا اثر ہویا اے۔ ساڈے بچے ایس گل نُوں بڑی چنگی طرحاں جان دے سن کہ ساڈے گھر چ اوسے اصول تے عمل کیتا جاندا اے جیہڑا یسوع مسیح نے دِتا سی کہ تواڈی ہاں دا مطلب ہاں ہووے تے تواڈی ناں دا مطلب ناں ہووے۔ (متی 5:37) مینوں یاد اے کہ جدوں ساڈی وڈی دھی 17 سال دی سی تے اوہنے لیڈی نُوں پچھیا کہ کیہہ اوہ اپنے کجھ دوستاں نال باہر گھمن پھرن جا سکدی اے۔ لیڈی نے اوہنوں منع کر دِتا۔ پر اوہدے دوستاں وچوں اِک نے ساڈی دھی نُوں کہیا: ”جے تیری امی تینوں نئیں جان دیندی تے تُوں اپنے ابو کولوں پچھ لے۔“ ساڈی دھی نے اوہنوں جواب دِتا ایہدا کوئی فائدہ نئیں ہوئے گا۔ اوہناں دونواں دی گل اِک ای ہوندی اے۔ ساڈے 6 بچے نیں تے اوہ سارے ویکھ سکدے نیں کہ بائبل دے اصولاں تے عمل کرن بارے ساڈی دونواں دی سوچ اِک جہی اے۔ اَسی یہوواہ دے بڑے شکرگزار آں کہ ساڈے خاندان دے زیادہتر لوک یہوواہ دی خدمت کردے نیں۔
اُنج تے بائبل دی تلیم سکھن دے بعد میں جان گیا ساں کہ مینوں اپنی زندگی چ سب توں ودھ کے کیہڑی چیز نُوں اہمیت دینی چاہی دی اے۔ پر میں سوچیا کہ میں اپنے پیشے نُوں خدا دے بندیاں دے فائدے لئی استمال کراں گا۔ ایس لئی میں بیتایل دے بھین بھراواں دی مدد کرن لئی ہر ہفتے کجھ دن اوتھے جان لگ پیا۔ میں تقریباً 50 سال توں بیتایل جا رہیا واں۔ میں اوہدوں وی بیتایل جانا ساں جدوں ایہہ پیرس چ سی۔ فیر بعد چوں جدوں ایہہ پیرس توں دُور اِک ہور علاقے چ چلا گیا تے میں اوتھے وی جان لگ پیا تے ایس طرحاں بیتایل دے کجھ بھین بھراواں نال میری بڑی گُوڑھی دوستی ہو گئی۔ اوہناں وچوں کجھ دی عمر تے ہُن 90 سال توں اُتے وے۔ فیر اِک دن میں بڑا حیران تے خوش ہویا جدوں میری ملاقات اِک ایہو جہے بھرا نال ہوئی جیہڑا نواں نواں بیتایل چ آیا سی۔ اوہ تقریباً 20 سال پہلاں میرے ای ہتھاں چ جمیا سی۔
میں ویکھیا کہ یہوواہ اپنے بندیاں دا بڑا خیال رکھدا اے
جیویں جیویں وقت لنگھ دا گیا میرے دل چ یہوواہ لئی محبت ہور گُوڑھی ہوندی گئی۔ کیونکہ میں ویکھیا کہ اوہ اپنی تنظیم دے ذریعے اپنے بندیاں دی رہنمائی تے دیکھبھال کردا اے۔ سن 1980 دے شروع چ گورننگباڈی نے امریکہ چ اِک پروگرام شروع کیتا تاکہ ڈاکٹراں تے نرساں نُوں ایہہ گل چنگی طرحاں سمجھ آ جائے کہ یہوواہ دے گواہ خون کیوں نئی لیندے۔
فیر 1988 چ گورننگباڈی نے بیتایل چ اِک نواں شعبہ شروع کیتا جیہڑا خون توں بغیر علاج بارے معلومات دیندا اے۔ شروع شروع چ ایہہ شعبہ امریکہ چ بنائیاں گئیاں ہسپتال رابطہ کمیٹیاں دی نگرانی کردا سی۔ ایہہ کمیٹیاں بھین بھراواں دی مدد کر دِیاں سن تاکہ اوہ ایہو جہے ڈاکٹراں کول جا سکن جیہڑے خون دے بغیر علاج کران بارے اوہناں دے فیصلے دا احترام کرن۔ جدوں گورننگباڈی نے ایہہ فیصلہ کیتا کہ پوری دُنیا چ ہسپتال رابطہ کمیٹیاں بنائیاں جان تے فیر فرانس چ وی ایہہ کمیٹیاں بنائیاں گئیاں۔ مینوں ایہہ ویکھ کے بڑی خوشی ہوندی اے کہ یہوواہ دی تنظیم لوڑ پین تے بیمار بھین بھراواں دی کِنّے پیار نال مدد کردی اے۔
میرا خواب کسے حد تک پورا ہو گیا اے
اَسی ہُن وی خوشی نال بادشاہی دی خوشخبری سنانے آں
اِک زمانے چ ڈاکٹری دا پیشہ میرے لئی سب توں اہم سی۔ فیر میں سمجھ گیا کہ اِک ڈاکٹر دے طور تے لوکاں دی مدد کرن نالوں زیادہ اہم ایہہ وے کہ میں یہوواہ دے نیڑے جان تے اوہدی خدمت کرن چ اوہناں دی مدد کراں کیونکہ اوہنے ای سانوں زندگی دِتی اے۔ فیر ریٹائر ہون دے بعد میں تے لیڈی پہلکار بن گئے۔ اَسی ہر مہینے کئی گھنٹیاں تک لوکاں نُوں خدا دی بادشاہی بارے دَسنے ساں۔ اَسی ہُن وی جِنّاں ہو سکے ایس زندگی بچان والے کم چ حصہ لینے آں۔
میں تے لیڈی، 2021 چ
میں ہُن وی بیماراں لئی جو کجھ وی کر سکنا واں اوہ میں کرنا واں۔ پر مینوں پتہ اے کہ چنگے توں چنگا ڈاکٹر وی لوکاں نُوں بیمار ہون تے مرن توں نئی بچا سکدا۔ ایس لئی میں اوس ویلے دا بڑی بےصبری نال اِنتظار کر رہیا واں جدوں موت، ہر طرحاں دی بیماری تے تکلیف نئیں رہوے گی۔ خدا دی دُنیا بڑی چھیتی آن والی اے تے اوہدوں میں خدا دِیاں بنائیاں ہوئیاں چیزاں بارے ہمیشاں تک سکھدا رہواں گا خاص کرکے انسانی جسم دی بناوٹ بارے۔ میرا شروع تو ای ایہہ خواب سی کہ میں لوکاں دِیاں بیماریاں نُوں ٹھیک کراں تے ایہہ خواب کسے حد تک پورا وی ہو گیا اے۔ پر نوِیں دُنیا چ ایہہ خواب صحی طرحاں پورا ہو جائے گا کیونکہ اوہدوں خدا بیماریاں دا ناںنشان مٹا دَوے گا۔
