París (Francia) marcacho juc waccha familiacho 1941 watacho yurishcä. 10 watayoj caycaptë tuberculosis gueshyawan ricacurmi escuelaman aywargänachu, chayga laquichimarganmi; yachacuytaga alapa gustamajmi. Medicucunami wasilächo caycänäpaj nimargan, pulmonnëcunami mana ali caycargan. Chauraga achca quillacuna juc diccionariuta leir y Universidäpita Radio Sorbonata wiyar pasashcä. Nircur doctorcuna gueshyapita cachacashgana caycashgäpita nipäcamaptin cushicurgä escuelaman cutinäpaj. Chaypita “doctorcuna rurashganga alimi, nogapis doctor cashaj” nirmi yarpargä. Chauraga taytäta imaypis nej cä doctor canäpaj. Chay profesiunta cuyar galaycurgä.

Familiä católico captinpis Diospitaga ichiclatami musyargä, chaymi paypita imaypis tapucoj cä. Pero, medicinata yachacur galaycuptëmi cuentata gocurgä cay caway vidapa juc Camacojnin cashganta.

Yarpä juc cuticho tulipán waytapa ichic celulanta microscopiupa ricaptë ima pasashganta alalaptin o achachaptin. Jina rurincho caycaj citoplasma nishgan (celulapa rurincho yacu japuy) cachita garpupashgaga guenticäcushganta y yaculacho caycaptenga mashtacashganta ricargä. Chayno o jucnopapis cawaj cajcunaga maychopis yachacanmi. Chauraga ‘cay caway vidaga manachi quiquilanpitaga yurirganchu’ nergä.

Medicinata ishcay watatana yachacuycaptë masraj cuentata gocurgä Dios  cashganta. Anatomía nishgan clasicho ricargä runapa ricranga cucushpita maquiman almiraypaj rurashga caycashganta, pulpacuna, ancucuna shumaj tulucunaman lagashga caycan, chaynopa deducunata cuyurcachinapaj. Jina yachacurgä antebrazo nishgancho juc pulpapa juc ancu ishcayman raquicar pasan juc dedupa tuluncunacama. Ishcayman raquishga ancupa chaupinpana juc ancu pasaycan dedupa puntancama. Chaynopa ishcay caj ancuga cashgancho caycan y chay ancucuna tuluman lagacashgapis caycanmi. Tulucunaman lagacächej cajcuna jirashga japuyno mana captenga ancucuna manachi chutacanmanchu y deducunapis cuyucunmanchu. Chauraga cuentata gocur, ‘lapan cuerpunchitaga juc ali yachajchi camargan’ nergä.

Masrämi almiracurgä juc wamra yurinanpaj imano formacashganta yachacur. Wamraga mamanpa pachanlacho caycaptin, wayrata mamanla shogushganpitami cawan. Chaymi pulmonnincunachoga alvéolos nishgan globo japuy caycaptinpis lagacashgarämi caycan. Y wamra yurinanpäna caycaptinmi alvéolos nishgan listuna caycan wayra yaycunanpaj. Yurircuptinna itiga wayrata shogurcun; y shonguncho juc uchcu wichgacäcun pulmonnincunaman yawar aywananpaj. Chauraga alvéolos nishgan rurincho surfactante sustanciami yanapan lagacashga mana caycänanpaj. Y wamra quiquinnami wayrata shogur galaycun.

Chay almiraypaj Camacojta reguiytami munargä, chaymi Bibliata shumaj yachacur galaycurgä. Unay israelitacuna cawashgan wichanga, paycuna limpio cananpaj leynincunata Dios camacächishganta musyaycur alapami almiracurgä. Diosga mandargan ismaynincunata pampananpaj, maylacärinanpaj y pipis gueshyaycaptenga juc laducho shuyni caycänanpaj (Lev. 13:50; 15:11; Deut. 23:13). Chaycunapita Bibliaga mayna parlaycargan, cientificucunami ichanga guepatarämi tantiacärergan pipis gueshyaptin shuyni mana captenga waquincunata contagiashganta. Jina yachacurgä Israel nación ali saludyoj caycänanpäga, casaracushgacuna punucuptin nircur maylacärinanpaj, y warmicunapis yawar gueshyanwan caycaptenga maylacärinanpaj (Lev. 12:1-6; 15:16-24). Chay leycunata Camacoj Dios camacächishgantami tantiargä y cäsucojcunata bendecishgantapis. Y Bibliaga Diospa Palabran cashgantami seguro caycargä. Diospa jutintami ichanga musyargärächu.

Medicinata yachacuycaptëmi Lydie jutiyoj jipashta reguiycurgä. Ishcäcuna shumaj reguinacur 1965 watacho casaracärergä. Chaypäga Medicina profesiunta yachacuycashgäga pulanchona caycargä. Y 1971 watapäga wamräcuna quimsana caycargan. Lydiga shumajmi yanapämargan wamracunata ricar y aruynëchopis.

Juc hospitalchomi quimsa wata arurgä, nircur clinicäta quichargä. Chaycho atiendiycaptëmi juc runa warminwan chayamurgan atiendinäpaj, chaypitami ichiclata  galanancho wilacurgä. Chauraga, runanpaj recetata ruranäpaj caycaptëmi warmin nimargan yawarniynaj jampicunalata recetanäpaj. Chaymanna tapurgä: “¿Imanir?”. Payga contestamargan: “Nogacunaga Jehovapa testigunmi capäcö” nir. Jehovapa testiguncuna pïcuna cashganta ni yawarta mana chasquipäcushganta manami imaypis wiyargächu. Chaymi payga imanir yawarta mana chasquipäcushganta Biblianchomi leipämargan (Hech. 15:28, 29). Nircur, runanwanna yachachimargan Diospa Gobiernunla gueshyata, wanuyta ushacächenga y runacunapa problemancunatapis alchacächinanpaj cashganta (Apoc. 21:3, 4). Noganami nergä: “¡Gamcunaga wilapaycämanqui wamra cashgäpita munashgäta cumplicunanpämi! ¡Chaymi gueshyaycajcunata yanapänäpaj médico canäpäpis yachacurgä!”. Cushishgami caycargä y paycunawan casi ishcay hora parlapäcurgä. Chaypita shongulächo nergä católico mana canäpäna. Jina lapanta Camajpa jutin Jehová cashgantami yachacurgä.

Paycunaga quimsa cutimi clinicäman cutipäcamurgan y juc horapitapis mastami parlapacärej cä. Maslata parlapäcunapaj wasëman shapäcamunanpaj invitargä. Warmëpis nogacunawan Bibliata yachacunanpaj aunicurgan, ichanga catolicuno yachacushgan juc ishcay yachachicuycuna mana caj cashganta tantiananpaj sasami cargan. Chaymi cürata gayachirgä y Biblialawanmi chacaycama parlapäcushcä. Chaypita Lydiga cuentata gocurgan Jehovapa testiguncuna rasunpa cajta yachachipäcushganta. Nircur, ichic ichiclapa Jehovata cuyar galaycärergä, y 1974 watachona bautizacärergä.

Jehová runacunapaj imata rurananpaj cashganta yachacushgäga yarpachacächimargan imataj puntaman churanäpaj. Ishcäcunami calpachacärergä Jehovata más sirvinapaj y wamräcunatapis Biblia nishgannola ashmanapaj. Familiächo juc shongula capäcunäpaj calpachacärergä, cada cadala Jehovata y runa masinchicunatapis más cuyanapaj (Mat. 22:37-39).

Wamräcunapäga clarumi caycargan imachopis Lydiwan acuerducho caycashgäta, chaytaga asipacurmi yarpapäcö. “Aunirga auninqui, mana aunirga ‘mana’ ninqui”, chayno Jesús yachachicushgannola ruranapämi paycunaga musyapäcurgan (Mat. 5:37). Juc warmi wamranchi 17 watayoj caycaptin  juc cuticho amiguncunawan yargunanpaj Lydie mana consientirganchu. Y juc amiganshi nergan: “Mamayqui mana munaptenga taytayquita mañacuy”. Chaymanshi wamräga contestargan: “¿Imapaj? Paycunaga imachopis acuerduchomi caycan”. Sojta wamräcunapäga clarumi caycargan noga Lydiwan juc yarpayla Jehovapa tantiachicuynincunata cäsucärishgäta. Jehovatami agradecicärë, canan familiäpita achcaj payta sirvir caycashganta.

Rasunpa cajta yachacushgämi imata puntaman churanäpaj yanapämargan. Ichanga medicuno gueshyaycaj hermanucunata más yanapacuyta munargä. Chaymi París marcacho caycaj Betelcho betelitacunata yanapacurgä, nircur mushoj Betelcho Louviers marcacho caycaj betelitacunatapis. 50 watacunanona Betelman aywaycä. Achca betelitacunawan amigo capäcö, waquincunaga 90 watayojpis caycanmi. Juc cuticho juc betelitata reguiycur cushicurgä, yurinanpäshi mamanta yanapargä, chaypita 20 watana pasargan.

Sirvejnincunata Jehová imano pushaycashganta y imano yanapaycashganta yachacurmi, tiempuwanga Jehovata cada cadala más cuyanäpaj yanapämargan. Jucninmi cargan, 1980 watapita wichaypa Jehovapa testiguncunata Pushajcuna yawar asuntucho Jehovapa testiguncuna medicucunawan shumaj parlapacärinanpaj camacächishganmi.

Nircur 1988 watachona camacächergan Servicios de Información sobre Hospitales nishgan oficinata, cayga Estados Unidos naciunchomi galaycamurgan. Chaychomi hospitalcunawan yanapacoj hermanucunata yanapacärej Jehovapa testiguncunata hospitalcunacho yawarta mana churananpaj. Nircur juc naciuncunachopis camacächiptinna, Francia naciunchopis cay Comités de Enlace con los Hospitales nishgancuna camacächergan. Almiracömi yanapacuyta necesitaycashgan sirvejnincunata Jehová imano cuidashganta ricar.

Medicuno yanapacuytaga gustamanmi, ichanga cuentata gocurgä gueshyaycajcunata yanapashgäpitapis más aliga caycan Jehovawan amigo cananpaj yanapacushgämi. Jubilacurna Lydiwan precursor regularno yanapacur galaycärergä, chaynopa Diospa Gobiernunpita quilla quilla achca horacunata yachachipäcö. Waquincuna salvacunanpaj munarmi, calpachacurcaycä Diospita yachachicunapaj.

Gueshyaycajcunata yanapaycärämi, ichanga cuentata gocö ni maygan medicupis gueshyata ni wanuytapis ilgächiytaga camäpacunchu. Chaymi pasaypa munaycö shamoj tiempucho gueshya, wanuypis ilgänanpaj. Chay mushoj Pachachomi ichanga Jehová imayca camashgancunapita y cuerpunchi imano ali rurashga cashgantapis shumaj yachacushaj. Aumi, wamralaraj cashgäpita munashgätaga waquilanlatami logrargä, más ali cajtaga Paraisuchonami ricashaj.