Бијандиљум ко 1941 берш ко Париз ки јекх скромно фамилија. Бут уживинава сине те џав ки школа, ама бут разочаринѓум ман кеда ко деш берш насвалиљум тари туберколоза хем нашти сине више те џав ки школа. О доктори вакерѓа кај ка овел пошукар те ачховав кхере те шај те на уморинав ме плуќе. Адалеске, некобор масек ачхиљум кхере хем читинава сине енциклопедија хем шунава сине јекх образовно програма ко радио Сорбона таро Париско универзитети. Кеда пало несаво време мло доктори вакерѓа манге кај састиљум хем кај шај палем те џав ки школа, бут сиум сине бахтало. Тегани вакерѓум манге: „Адава со керена о докторија тано бут шукар!“ Оттегани мло суно сине те сасљарав е манушен. Хем кеда пхучела ман сине мо дад со мангава те овав кеда ка бајровав, ме секогаш одговоринава сине кај мангава те овав доктори. Аѓаар, и најважно бути ули манге и медицина.

Сар фамилија, амен сием сине католикија. Ама, на џанава сине бут башо Девел хем бут буќа на сине манге јасна. Чак одкеда почминѓум те џав ко факултети уверинѓум ман кај о живото сине створимо.

Сетинава ман кеда прво пути дикхљум преку микроскоп о клетке тари јекх лулуди. Бут сиум сине воодушевимо таро адава сар и клетка заштитинела пе таро тато хем таро шудро. Исто аѓаар, дикхљум сар и цитоплазма (јекх супстанција андре ки клетка) кхедела пе кеда авела ко контакт лондеа хем сар ширинела пе кеда тани чхивди ко чисто пани. Адалеске со иси лен асавки способност, хем бут јавера, о организмија шај те прилагодинен пе ко бут различна условија. Кеда дикхљум кобор  тани сложено секоја јекх клетка, уверинѓум ман кај о живото на уло случајно.

Кеда сиум сине ко дујто берш ко факултети баши медицина, дикхљум панда повише доказија кај о Девел постојнела. Ко часија баши анатомија, сиклиљум сар тани керди и манушикани подлактица хем сар адава поможинела те кхеда хем те испрајна амаре наја. О начин сар тане поврзиме о мускулија, о лигаментија хем о тетиве хем сар функциониринена заедно тано нешто посебно. На пример, сиклиљум кај и тетива која со поврзинела јекхе мускуле тари подлактица е дујто кокалоја таро амаро нај одвојнена пе ко дуј. Аѓаар керела пе јекх мости тело кова накхела јекх јавер тетива хем џала џи ко крајо таро нај, те шај те икерел ле ко тхан. Исто аѓаар, о зорало ткиво икерела о тетиве те ачхон паше узо кокала е наескоро. Те на овен сине створиме амаре наја ко асавко начин, о тетиве таро амаро вас ка овен сине бут зорале хем права, хем амен ка нашти сине те мрдина амаре наја. Таро акава шај сине јасно те дикхав кај окова со керѓа о манушикано тело тано бут интелигентно.

Панда повише сиум сине воодушевимо таро Створители џикоте проучинава сине сар почминела те дишинел јекх бебе одкеда бијанѓола. Сиклиљум кај џикоте о бебе тано ко воѓи пле дајаке, ов добинела кислород преку пли дај. Адалеске, о алвеоле — бут тикне балонија кола со аракхљовена ко плуќе — панда нашти те пхерѓон кислород. Ама некобор курке англедер те бијанѓовел о бебе, о андруно ѕидо тари секоја алвеола тани учхарди тари јекх посебно супстанција која со викинела пе сурфактант. Откеда о бебе бијанѓовела хем почминела прво пути те дишинел случинена пе повише чудесна буќа. Јекх дупка ко е бебескоро срце пханљола хем адава керела о рат те џал ко плуќа. О сурфактант поможинела о алвеоле те на лепинен пе кеда таро јекх пути пхерѓона кислород. Таро адава моменти о бебе шај више коркори те дишинел.

Мангљум те почминав те запознајнав околе со створинѓа акала чудесна буќа хем адалеске почминѓум те читинав и Библија посериозно. Сиум сине бут изненадимо таро законија баши хигиена со сине денде ко закони е Израелцонге англедер 3.000 берш. О Девел заповединѓа е Израелцонге те учхарен пумаро измети пхуваја, редовно те тховен пе пајнеа хем те чхивен ко карантин секас со иси ле симптомија башо несаво заразно насвалипе (3. Мој. 13:50; 15:11; 5. Мој. 23:13). Англедер 150 берш о научникија откринѓе сар ширинена пе о заразе а и Библија бут поангледер керела сине лафи башо адава. Исто аѓаар, халиљум кај о законија башо сексуална односија хем интимно хигиена сој тане пишиме ки 3. Мојсеева поможинѓе е Израелцонге те на заразинен пе (3. Мој. 12:1-6; 15:16-24). Халиљум кај о Створители денѓа акала законија е Израелцонге башо ленгоро шукарипе хем кај благословинела сине околен со сине послушна ко лескере заповедија. Уверинѓум ман кај и Библија тани таро Девел, каскоро со анав панда на џанава сине.

Џикоте џава сине ко факултети баши медицина, заљубинѓум ман ки јекх терни џувли која со викинела пе Лиди. Панда на завршинѓум е факултетеа кеда ко 1965 берш лелем амен. Џи ко 1971 берш сине амен више трин таро амаре шов чхаве. И Лиди поддржинела ман хем ки мли бути сар доктори хем ки фамилија.

Трин берш керѓум бути ки болница са џикоте на пхравѓум мли амбуланта. Кратко пало адава,  ки манде ко преглед ало јекх брачно пари. Адала уствари сине о дуј неве пациентија колен со спомнинѓум лен ко почеток. Откеда почминѓум те пишинав рецепта е ромеске, и ромни таро јекх пути вакерѓа манге: „Молинава тут, ма де несаво леко коте со иси рат“. Сиум сине изненадимо хем адалеске пучљум ла: „А соске?“ Ој одговоринѓа манге: „Амен сием е Јеховаскере сведокија“. Никогаш англедер на шунѓум башо е Јеховаскере сведокија или башо ленгоро стави башо рат. Тегани, ој икалѓа пли Библија хем читинѓа манге соске на приминена рат (Дела 15:28, 29). Тегани ој хем лакоро ром сикавѓе манге кај е Девлескоро Царство ка цидел са о муке, о насвалипе хем о мерибе (Отк. 21:3, 4). Воодушевимо таро адава со вакерѓе манге, одговоринѓум ленге: „Акава со вакерена ле манге тано мло суно панда таро тикнипе. Ме баш адалеске уљум доктори, те шај те поможинав околенге со иси лен мука“. Адава сине манге бут интересно хем адалеске ачхиљум те керав ленцар јекх текваш сати лафи. Откеда гело песке акава брачно пари, јасно сине манге кај на мангава сине више те овав католико. Хем дознајнѓум кај о Створители кова со створинѓа са о чудесна буќа, викинела пе Јехова!

Акале брачно пареа дикхљум ман панда трин пути ки мли амбуланта хем секова пути ачховаја сине те кера лафи повише таро јекх саати. Викинѓум лен те авен ки манде кхере те шај те овел амен повише време те кера лафи баши Библија. Иако ми ромни и Лиди бешела сине аменцар џикоте проучинаја сине и Библија, ој на прифатинела сине кај несаве таро католичка сикљојба тане погрешна. Адалеске викинѓум јекхе свештенико те авел аменде кхере. Леа дискутиринѓем башо е црквакере сикљојба џи касно раќате аѓаар со користинѓем само и Библија. Адава разговор уверинѓа мле ромња кај е Јеховаскере сведокија сикавена о чачипе. Таро адава време, амаро мангипе спрема о Јехова барило хем крстинѓем амен ко 1974 берш.

Адава со дознајнѓум која тани е Девлескири намера е манушенцар влијајнѓа бут упро адава сој манге најважно ко живото. Чхивѓем е Јехова ко прво тхан. Сием сине одлучна те воспитина амаре чхавен спрема о библиска мерилија. Сикавѓем лен те манген е Девле хем е манушен. Адава керѓа амен те ова попаше сар фамилија (Мат. 22:37-39).

Кеда ка сетина амен, ме хем и Лиди бут пути асаја башо адава сар реагиринена сине амаре чхаве ко адава со сием сине сложна сар родителија ко амаре одлуке. Ола џанена сине кај о начело со вакерѓа о Исус, амаро „оја“ нека  значинел „оја“, а амаро „на“ нека значинел „на“, сине закони ко амаро кхер (Мат. 5:37). На пример, кеда јекха таро амаре чхија сине ла 17 берш, и Лиди на дозволинѓа лаке те икљол те пхирел несаве амаленцар. Тегани некој тари адаја група вакерѓа амаре чхајаке: „Ако ти дај на мукхела тут, пуч те даде!“ Тегани амари чхај вакерѓа лаке: „Џабе ка пучав ле, ов да ка вакерел манге о исто“. Амаре шов чхаве шај сине те дикхен кај сине амен исто стави кеда керела пе лафи башо библиска начелија. Бут сием благодарна е Јеховаске со авдиве бут џене тари амари фамилија служинена е Јеховаске.

Откеда запознајнѓум о чачипе и медицина на сине манге више најважно. Ама ме понадари да мангава сине те користинав адава со сиум доктори те шај те поможинав е Девлескере народоске. Адалеске, пријавинѓум ман те поможинав сар доктори ко Бетел ко Париз, а покасно ко нево Бетел ко Лувје. Скоро 50 берш служинава сар бетелско соработнико. Ко са акава време запознајнѓум бут шукар амален тари бетелско фамилија. Несаве лендар иси лен повише таро 90 берш. Исто аѓаар, јекх диве сиум сине бут изненадимо кеда запознајнѓум јекхе неве бетелите. Дознајнѓум кај англедер 20 берш ме сиум сине о доктори кова со поможинѓа лескере дајаке те бијанел ле.

Ко са акала берша мло мангипе спрема о Јехова барило џикоте дикхава сине сар водинела хем заштитинела пле народо преку пли организација. Околу 1980 берш, о Водечко тело керѓа јекх подготовка ко САД те шај те поможинел е докторенге хем е медицинско персоналеске пошукар те хаљовен соске о пациентија сој Сведокија на мангена те приминен рат.

Ко 1988 берш, о Водечко тело керѓа јекх нево одделение ко Бетел кова со викинела пе сине Служба башо медицинска информацие. Ко почеток акава одделение наглединела сине јавере одборен ко САД со викинена пе сине Одбор со поможинела машкар о докторија хем е Јеховаскере сведокија. Акава одбор поможинела сине е Сведоконге те аракхен докторија кола со поштујнена амари одлука те на примина рат. Покасно асавке одборија керѓе пе ко цело свето хем ки Франција. Сиум сине бут бахтало те дикхав сар е Јеховаскири организација поддржинела е насвале пхрален хем пхењен кеда ваљани ленге помош.

Највише со мангава сине ко живото тано те овав доктори. Ама кеда дознајнѓум о чачипе, халиљум кај и најважно бути тани о мануша те сасљовен ко духовно поглед. Мангљум те поможинав е манушенге те запознајнен е Јехова кастар со авела о живото хем те служинен леске. Кеда пензиониринѓум ман, и Лиди хем ме почминѓем е општо пионерско службаја хем секова масек бут саатија проповединаја о шукар хабери башо е Девлескоро Царство.

Ме понадари да поможинава околенге сој насвале. Ама халиљум кај чак о најшукар доктори нане способно те сасљарел са о насвалипа или те чхинавел о мериба. Адалеске, едвај аџикерава о време кеда нане те овел више ни дукх, ни насвалипе а ни мерибе. Ко нево свето кова со авела бут сигате ка шај вечно те сикљовав башо буќа со створинѓа лен о Девел, машкар кова сој о чудесно манушикано тело. Панда хари, мло суно со сине ман таро тикнипе целосно ка исполнинел пе. Уверимо сиум кај аџикерена амен бут шуже времија!