Μπιάντιλομ κι Γαλλία κο 1941, εκχέ φαμιλιάτε σο να ισινέ χουλανί ντα τζουβντιόλας κο Παρίσι. Μπεϊντίναβας μπουτ ο σχολείος, οτθάρ τσσουντόμ μπουτ μι γκίστε κάνα, αζομάν σο ισινόμας 10 μπρεσένγκο, νασφάλιλομ μπουτ ντα έπρεπε τι τσσιναβάβ-λες! Ο γιατροί βακερντέ μάνγκε τι ατσσάβ κο κρεβάτι για μα τι ζορίναβ μο πνευμόνια. Οτθάρ, μπουτ μασεκά για τι νακχέλ μο σαάτι διαβάναβας εκ λεξικός ντα ασουνάβας κο Ράδιο Σορβόνη ο εκπομπές σο τθερέλας ο Πανεπιστήμιος του Παρισιού. Κάνα μο γιατρός βακερντάς μάνγκε ότι αβιλόμας λατσσές ντα μπορίναβας τι τζαβ πάλι κο σχολείος, χουτάβας μι χαράταρ. Σκεφτίναβας: “Ανταβά σο κερένα ο γιατροί ισί μπουτ σουκάρ!” Οτθάρ μπερί, οντουβά σο μανγκάβας τι κεράβ ισινέ τι κεράβ λατσσές ι νασφαλέν. Κάνα μο ντατ πουτσέλας-μαν σο μανγκάβας τι αβάβ κάνα κα μπαριάβ, πάντα βακεράβας λέσκε: «Μανγκάβα τι αβάβ γιατρός». Οτθάρ, ο πο σημαντικός μάνγκε ισινέ τι αβάβ γιατρός.

Σαρ φαμιλί, ισινάμας Καθολικοί. Αλλά να τζανάβας μπουτ πράγματα ι Ντεβλέσκε, ντα τθεράβας μπουτ ερωτήσεις. Σάντε κάνα σπουδάναβας για τι αβάβ γιατρός πακιαντόμ ότι ο Ντεβέλ κερντάς-αμέν.

Ντάβα-μαν γκοντί ι πρώτη φαρ σο ντικχλόμ κύτταρα τουλιπάκε κο μικροσκόπιος. Σαστισάλομ κάνα ντικχλόμ σαρ αρακχαβέλα-πες εκ κύτταρος κατά τατιπέ ντα κατά σουρντιπέ. Ντικχλόμ ο κυτταρόπλασμας-ντα (σο ισί αντρέ κο κύτταρος) τι πφαντιόλ κάνα τσσουβντιόλα κο λον ντα τι πουτάρντιβελ κάνα τσσουβντιόλα πάκι πανίστε. Ο κύτταρα κερένα ανταλά ντα μπουτ γιαβερά πράγματα, οτθάρ ο οργανισμοί συνεχίνενα τι τζουβντιόν ατζέ-ντα κάνα λένγκο περιβάλλον  αλλάνελα. Κάνα ντικχλόμ καζόμ μπουτ πράγματα αβένα-πες αντρέ κο κάθε κύτταρος, αγαντόμ ότι η ζωή να κερντιλί κορκορί.

Ο δεύτερος μπρες κο πανεπιστήμιος ντικχλόμ ατζέ πο μπουτ πράγματα σο σικαβένα ότι ο Ντεβέλ κερντάς-αμέν. Κο μάθημας σο σικλιάας σαρ ισί ο σώμας εκχέ τζενέσκο, ντικχλάμ σαρ αμαρί μουσί ισί κερντί για τι βοηθίνελ αμαρέ παρμάκια τι κουνιάντιβεν. Ο τρόπος σο ισί ενωμέ αμαρέ μυς ι κοκαλέντζαρ ντα η μπουτί σο κερένα ισί μπουτ σουκάρ. Για παράδειγμας, σικλιλόμ ότι εκ τένοντας ενώνελα εκ μυς ι μουσιάκο ι δεύτερε κοκαλέσαρ ι παρμακίσκο. Ανταβά τένοντας χωρίντιβελα κο ντούι ντα αντικάς κερντιόλα εκ πφουρτ, σαρ τι βακεράας, σο τελάλ λάταρ νακχέλα εκ γιαβέρ τένοντας σο ερεσέλα ανγκλάλ κο παρμάκι ντα ατσσικιαρέλα-λες οτθέ σο πρέπει τι αβέλ. Ντα ζουρανέ ιστοί ατσσικιαρένα ανταλά τένοντες πασέ κο κόκαλα κι παρμακίνγκε. Άμα να κα αβένας-πες σαρέ ανταλά, αμαρέ παρμάκια να κα κερένας λατσσές μπουτί. Ντικχάβας ντιπ λατσσές ότι οντουβά σο λατσσαρντάς ο σώμας ι τζενέσκο ισί μπουτ γκοντιαβέρ.

Σαστισάλομ ατζέ πο μπουτ οντουλέσταρ σο κερντάς ο Ντεβέλ κάνα σικλιλόμ σο αβέλα-πες κάνα μπιάντιβελα εκ μαξίμι. Σικλιλόμ ότι, πριν τι μπιαντιόλ, εκ μαξίμι λέλα οξυγόνος κατά πορί πι νταγιάκι. Οτθάρ, ι μαξιμίσκε πνευμόνια να κχελένα καζόμ ισί αντρέ κο περ πι νταγιάκο. Καζόμ ερεσέλα ο σαάτι τι μπιάντιβελ, ο πνευμόνια αντράλ ιτσσάρντιβενα εκχέ πραγμάσαρ σο βακέρντιβελα επιφανειοδραστική ουσία. Σοράν κατά μπιανιπέ, ο μαξίμι λέλα πι πρώτη ανάσα ντα αβένα-πες χάνικ πράγματα ο εκ παλάλ κατά γιαβέρ σο κερένα-αμέν τι ατσσάς πουταρντέ μόσαρ. Εκ τρύπα κι καρδιά κι μαξιμίσκι πφαντιόλα, ντα αντικάς ο ρατ τζάλα κάρινγκ κο πνευμόνια. Αζομάν, η επιφανειοδραστική ουσία αρακχαβέλα ο πνευμόνια καζόμ πφερντιόνα σουγκό μπαρμπάλ. Αντικάς, ο μαξίμι μπορίνελα τι λελ κορκορό πι ανάσα.

Μανγκάβας τι σικλιάβ οντουλέσκε σο κερντάς ασακέ σουκάρ πράγματα, οτθάρ αρχισάλομ τι διαβάναβ ι Αγία Γραφή. Κερντέ-μαν τι ατσσάβ πουταρντέ μόσαρ ο νόμοι σο ντινάς ο Ντεβέλ κο Ισραήλ πριν από 3.000 ντα πο μπουτ μπρεσά για τι αρακχαβέν-πες κατά νασφαλίματα. Ο Ντεβέλ βακερντάς ι Ισραηλιτένγκε τι ιτσσαρέν οντουλά σο κερένας κάνα τζάνας οκόρινγκ, τι τθοβέν-πες μπουτ φαρ πανίσαρ ντα τι ατσσόν ντουρ κατά τζενέ σο τθερένας εκ νασφαλιπέ για μα τι πφερντιόνας βον-ντα. (Λευιτ. 13:​50· 15:​11· Δευτ. 23:​13) Η Γραφή κερέλας λάφι ανταλέ πραγματένγκε, αλλά ο επιστήμονες αρακχλέ σαρ πφιρντιόνα ο νασφαλίματα ο τελευταία 150 μπρεσά. Ντα ο νόμοι σο ισί κο Λευιτικό για το σεξ βοηθίνενας ι Ισραηλιτέν σαρ λαός μα τι νασφάλιβεν. (Λευιτ. 12:​1-6· 15:​16-24) Αγαντόμ ότι οντουβά σο κερντάς-λεν σαρέ ντινάς ανταλά νόμοι κο Ισραηλίτες λένγκε λατσσιμάσκε ντα ότι ευλογίνελας οντουλέν σο ντένας καν λέσκε εντολέντε. Αβιλόμ σίγουρος ότι η Αγία Γραφή ισί κατά Ντεβέλ​—εκχέ Ντεβλέσταρ σο λέσκο ναβ να σικλιλόμας ατζέ αζομάν.

Καζόμ σπουδάναβας ατζέ για τι αβάβ γιατρός, αρακχλόμ εκχέ τερνιά, ι Λιντιά, ντα μανγκλόμ-λα. Παντρισάλαμ κο 1965, κάνα κερντόμας ο επκάς μπρεσά ι μαθηματένγκε. Κο 1971, τθεράας τρινέ τσσαβέν ντα πο σοράν κερντάμ ατζέ τρινέν. Η Λιντί βοηθίνελα-μαν μπουτ, εμ μι μπουτιάτε σαρ γιατρός εμ αμαρέ φαμιλιάτε.

 Κερντόμ μπουτί τριν μπρεσά εκχέ νοσοκομειόστε ντα σοράν κεράβας μπουτί κορκορό. Εκ αντρόγυνος, σο βακερντόμ λένγκε κι αρχή, αβιλέ τι ντικχάβ-λεν. Οτθέ σο γκιλόμ τι γραφίναβ ο φάρμακα σο έπρεπε τι λελ ο ρομ, λέσκι ρομνί βακερντάς μάνγκε: «Γιατρέ, να μανγκάσα τι τθερέν ρατ ο φάρμακα». Σαστισάλομ ανταλέσαρ σο βακερντάς, ντα πουτσλόμ: «Μπαγιά; Σόσκε;» Βακερντάς μάνγκε: «Ισινάμ Μάρτυρες ι Ιεχωβάσκε». Να ασουντόμας γιαβέρ φαρ ι Ιεχωβάσκε Μαρτυρένγκε ή οντουλένγκε σο σικλιαρένας ι ρατέσκε. Η τζουβέλ νικαντάς πι Γραφή ντα σικαντάς μάνγκε σόσκε να μανγκένας ρατ. (Πράξ. 15:​28, 29) Σοράν, γιεκ πι ρομέσαρ σικαντέ μάνγκε σο κα κερέλ η Βασιλεία ι Ντεβλέσκι. Κα νασκιαρέλ ι ντουκχ, ο νασφαλίματα ντα ο μεριπέ. (Αποκ. 21:3, 4) «Ανταλά σο βακερένα μάνγκε μπεκλεντίναβα τι ντικχάβ-λεν χουρντιαρέλα!» βακερντόμ χαράσαρ. «Αβιλόμ γιατρός για τι λοκχιαράβ ι τζενέν κατά ντουκχ». Μπεϊντιντόμ αζόμ μπουτ οντουλά σο ασουντόμ σο κεράας λάφι εκ επκάς σαάτι. Κάνα ο αντρόγυνος νασλό, μανγκάβας τι τσσιναβάβ τι αβάβ Καθολικός ντα σικλιλόμας λένταρ ότι Οντουβά σο κερέλα-μαν τι σαστίναβ σαρέ οντουλέντζαρ σο κερντάς τθερέλας ναβ: Ιεχωβά!

Οντουβά αντρόγυνος αβιλέ ατζέ τριν φαρ τι ντικχάβ-λεν, ντα κάθε φαρ κεράας λάφι πο μπουτ από εκ σαάτι. Σοράν, βακερντόμ λένγκε τι αβέν μι κχερέστε για τι τθεράς πο μπουτ σαάτι τι κεράς λάφι ι Γραφιάκε. Παρόλο σο η Λιντί μανγκλάς τι μπεσέλ αμέντζαρ κι μελέτη, να πακιάλας ότι μερικά πράγματα σο σικλιλάμας σαρ Καθολικοί ισινέ λάθος. Οτθάρ, βακερντόμ εκχέ παπαζίσκε τι αβέλ αμαρέ κχερέστε. Κερντάμ λάφι σάντε αντράλ κατά Γραφή οντουλένγκε σο σικλιαρέλα η κχανγκιρί μέχρι σο γκιλό ντιπ αρατί. Αντικάς, η Λιντί πακιασάλι ότι ο Μάρτυρες ι Ιεχωβάσκε σικλιαρένας ι αλήθεια. Σοράν ανταλέσταρ, μανγκλάμ αζόμ μπουτ ι Ιεχωβά Ντεβλές σο μπολντιλάμ ο ντούι-ντα κο 1974.

Κάνα σικλιλόμ οντουλά σο μανγκέλα τι κερέλ ο Ντεβέλ ι τζενένγκε, αλλαξάλι σαρί μι ζωή. Η Λιντί ντα με τσσουντάμ πρώτα αμαρέ ζωγιάτε ι υπηρεσία ι Ιεχωβάσκι. Μανγκάας τι μπαριαράς αμαρέ τσσαβέν αντικάς σαρ βακερέλα η Αγία Γραφή. Σικλιαρντάμ-λεν τι μανγκέν ι Ντεβλές ντα ι τζενέν. Ανταβά κερντάς-αμέν γιεκ σαρ φαμιλί.​—Ματθ. 22:​37-39.

Ι Λιντιάσαρ μπουτ φαρ ασάσα κάνα ντάσα-αμέν γκοντί σαρ αγαβένας αμαρέ τσσαβέ ότι ισινάμας ενωμέ. Τζανένας ότι η εντολή ι Ιησούσκι «τουμαρό “Βα” τι αβέλ βα, τουμαρό “Όχι”, όχι» ισινέ ο κανόνας αμαρέ κχερέστε. (Ματθ. 5:​37) Για παράδειγμας,  κάνα εκ τανί αμαρέ τσσαΐνταρ ισινέ 17 μπρεσένγκι, η Λιντί να μουκχλάς-λα τι νικιόλ μερικέ τερνέντζαρ. Εκ τερνί λένταρ βακερντάς αμαρέ τσσαγιάκε: «Άμα να μουκχέλα-τουτ τι ντάι, πουτς τι νταντές!» Αλλά αμαρί τσσάι βακερντάς λάκε: «Σινανέ κα πουτσάβ-λες. Πάντα σο βακερέλα ο εκ βακερέλα-λες ο γιαβέρ-ντα». Βα, αμαρέ σιοβ τσσαβέ ντικχένας ότι ο ντούι-ντα ντάας καν κο λάφια κι Γραφιάκε. Ισινάμ πφερντέ εκτίμηση ι Ιεχωβάσκε σο μπουτ αμαρέ τζενένταρ υπηρετίνενα ι Ιεχωβάς.

Κάνα σικλιλόμ ι αλήθεια, τσσιναντόμ τι πακιάβ ότι ο πο σημαντικός μάνγκε ισινέ τι αβάβ γιατρός. Όμως, μανγκάβας τι βοηθίναβ ι Ντεβλέσκε λαός οντουλέντζαρ σο τζανάβας σαρ γιατρός. Οτθάρ χωρίς τι ποκίντιβαβ, κερντόμ μπουτί σαρ γιατρός κο Μπέθελ κο Παρίσι ντα πο σοράν κο νεβό Μπέθελ σο αβιλό κο Λουβιέ. Βοηθίναβα κο Μπέθελ πασέ 50 μπρεσά. Σαρό ανταβά βακίτι, κερντόμ μπουτ λατσσέ αμαλέν κατά φαμιλί Μπέθελ, σο μερικοί λένταρ νακχλέ ο 90. Ντα εκ ντιβές αβιλό-πες κάτι σο να μπεκλεντίναβας κάνα γνωριντόμ εκχέ νεβέ Μπεθελιτής. Σικλιλόμ ότι με ισινόμας ο γιατρός σο βοηθιντάς λέσκε νταγιά τι μπιανέλ-λες πριν από 20 μπρεσά!

Σαρέ ανταλά μπρεσά, μο μανγκιπέ ι Ιεχωβάσκε μπαριλό, καζόμ ντικχάβας σαρ οδηγίνελα ντα αρακχαβέλα πι λαός αντράλ κατά οργάνωση. Πασέ κο 1980, ο Κυβερνών Σώμας κερντάς εκ πρόγραμμας κο Ηνωμένες Πολιτείες σο βοηθίνελας ι γιατρόν τι αγαβέν πο λατσσές οντουβά σο πακιάνα ο Μάρτυρες ι Ιεχωβάσκε ι ρατέσκε.

Σοράν, κο 1988, ο Κυβερνών Σώμας κερντάς εκ νεβό τμήμας κο Μπέθελ σο βακέρντιβελα Υπηρεσίες Πληροφοριών για Νοσοκομεία. Κι αρχή, ανταβά τμήμας ντέλας οδηγίες κο Επιτροπές Προσέγγισης Νοσοκομείων κο Ηνωμένες Πολιτείες για τι αρακχέν γιατρόν σο σεβάνενα οντουλά σο πακιάσα ι ρατέσκε. Κάνα βακέρντιλο τι αβέν Επιτροπές Προσέγγισης Νοσοκομείων σαρό κο ντουνιάς, κερντιλέ κι Γαλλία-ντα. Ατσσάβα πουταρντέ μόσαρ κάνα ντικχάβα σαρ η οργάνωση ι Ιεχωβάσκι ισί πασέ κο νασφαλέ πφραλά ντα πφενιά κάνα τθερένα-λες ανάγκη!

Ο πο σημαντικός μάνγκε ισινέ τι αβάβ γιατρός. Αλλά καζόμ σκεφτίναβας σο τσσουβάβας πρώτος μι ζωγιάτε, αγαντόμ ότι ο πο σημαντικός για τι βοηθίναβ ι τζενέν να ισινέ τι αβάβ γιατρός, αλλά τι βοηθίναβ-λεν τι αβέν αμαλά οντουλέσαρ σο κερντάς ι ζωή, ι Ιεχωβά Ντεβλέσαρ. Κάνα νικίστιλομ κι σύνταξη, η Λιντί ντα με αρχισάλαμ τι ντας μπουτ σαάτια κάθε μάσεκ για τι βακεράς ο λατσσέ αμπέρια ι Ντεβλέσκε Βασιλειάκε σαρ τακτικοί σκαπανείς. Ατζέκ ατζέκ κεράσα καζόμ πο μπουτ μπορίνασα ανταβά έργος σο σώνελα ζωές.

Να τσσιναντόμ τι κεράβ ο πο λατσσό για τι βοηθίναβ ι νασφαλέν. Αγαβάβα όμως ότι, ατζέ-ντα ο πο λατσσό γιατρός, ναστί κερέλα λατσσές σαρέ ο νασφαλίματα ντα ναστί τσσιναβέλα ο μεριπέ. Οτθάρ, μπεκλεντίναβα τι αβέλ ο βακίτι σο η ντουκχ, ο νασφαλίματα ντα ο μεριπέ να κα αβέν. Ανταλέ νεβέ ντουνιάστε σο ισί μπουτ πασέ, κα τθεράβ καζόμ μπρεσά μανγκάβα για τι σικλιάβ πο μπουτ πράγματα οντουλένγκε σο κερντάς ο Ντεβέλ, αντρέ ανταλέντε ο μπουτ σουκάρ τρόπος-ντα σο ισί κερντό ο σώμας ι τζενέσκο. Οντουβά σο μπεκλεντίναβας χουρντιαρέλα κα νικιόλ μπαγιά σαρό ατζεχάνικ. Ισινόμ σίγουρος ότι ο πο λατσσέ ντιβεσά ισί ανγκλ’ αμέντε!