Năștisailem ando bărș 1941 ande iech familia mai ciori anda Paris. Placialas-ma but te sichioav. Gândisaren tumen chichi de perado somas cana sas-ma deș bărșa hai ci mai daisardem te jiav ca i școala anda codoia că pelem nasfalo hai sas-ma tuberculoza. Le doctori phende manghe te beșav ando pato caște na chiniarav mânre plămâni. Ande le șiona cai avile, citisardem iech dicționaro hai așundemas le emisiuni cai sas-le co Radio Sorbona, iech posto catar i Universitatea anda Paris. Ci daisarav te phenav chichi de bucurime somas cana o doctoro phendea manghe că ci mai som nasfalo hai că daisarav te jiav parpale ca i școala. Phendem manghe: „Le doctori cheren ciaces minuni!”. Anda codo momento, sea so camlem sas te sastiarav le nasfalen. Cana mânro dad pușlea-ma: „So cames te cărdios cana barios?”, mânro răspunso sas de fiesavi data sa codo: „Camav te avav doctoro”. Cadea, i medicina arăslea te avel po iechto than ande mânro ilo.

Chiar cana barilem ande iech familia catolico, ande mânri goghi, o fapto că o Del existil ci sas claro hai sas-ma but pușimata savende ci primisardem răspunso. Pachiaiem că si iech Creatoro numai pala so începosardem te studiiv i medicina ca i facultatea.

Anav manghe amintea cana dichlem i iechto data co microscopo le celule anda iech lulughi. Mânro ilo barilea cana dichlem sar i celula daștilas te feril-pe contra o tachimos sau o șâl. Sa cadea, dichlem sar i citoplasma, iech substanța cai si andre andi celula, chidel-pe cana si lon hai pâtrel-pe cana si pai. Cadal reacții hai aver but ajutin le organismea te adaptin-pe ca diferime condiții anda o medio.  Le but buchia anda save si cărdi fiesavi celula cărde-ma te pachiav că i viața ci daisardea te cherel-pe corcori.

Ando duito bărș ca i facultatea, arachlem mai but dovezi că o Del existil. Ca le cursuri anda i anatomia le manușeschi, studiisardem anda so si cărdi i muisi, cai ajutil le naia te banghion hai te ortosaren-pe. Sas iech bari buchi te hachiarav sar le mușchi, ligamentea hai tendoanea cherenas șucar buchi ande iech than. Sar exemplo, sichilem că le tendoanea cai phanden iech anda le mușchi andai muisi catar i falanga mediano chichiva naiengo hulaven-pe ande dui hai cheren poduri tela save alunechin le tendoane cai arăsăn ando vârfo le naiengo. Zurale țesuturi încăren le tendoanea pașă catar le cocala andal naia. Bi cadal mecanismea, le tendoanea andai palma daștinas te înclen avri, sar iech arco cai beșel orta. Sas claro anda mande că, con cărdea o corpo le manușesco, silo zurales goghiaver.

Ande mânre iacha barilea vi mai but Codo cai cărdea i viața cana studiisardem o modo sar năștil-pe iech șiavorro. Sichilem că, angla te năștil-pe, iech șiavorro sastevesto primisarel oxigeno catar i dei prin o cordono ombilicalo. Cadea că, le alveole – gone cai sile andre andel plămâni – ci sile încă aero ande lende. Chichiva curchența angla te năștil-pe o șiavorro, le pereți de andral anda le alveole sile pachiarde catar iech lichido specialo cai bușiol surfactanto. Ca i nașterea, i iechto respirația le șiavorreschi del drom ca iech seria procesea zurales importanto. Iech țâni hâv anda o ilo le șiavorresco phandavel-pe, hai o rat jial caring le plămâni. Ande codo momento importanto savestar încărel i viața le șiavorreschi, datorime codole lichidosche, le pereți anda le alveole ci lipin-pe iech averestar cana cadala pheren-pe sigo aerosa. Ande țâra timpo, o țânorro silo pregătime te phurdel corcoro.

Începosardem te citisarav ande iech modo serioso i Biblia caște prinjianav Codoles cai cărdea sea cadal buchia zurales șucar. Ci avilea manghe te pachiav cana citisardem andi Biblia că acana mai but sar 3000 bărșa o Del dea legi anda o ujimos anda i națiunea Israel. Pala lesche instucțiuni, le israeliți trebunas te pachiaren penghe excrementea, te halaven-pe sea o timpo paieia hai te șion andi carantina codolen cai sas-le simptome anda iech nasfalimos cai daștilas te lel-pe. (Lev. 13:50; 15:11; Deut. 23:13) Le norme andai Biblia sicaven iech baro hachiarimos anda o modo sar len-pe le nasfalimata, hachiarimos cai le manușa anda știința începosarde te aven-le numai andel palutne șăla bărșa. Sa cadea, le legi anda o ujimos sexualo anda o lil Levitico ajutinas ca o sastimos la națiuneaco. (Lev. 12:1-6; 15:16-24) Dem mânri sama că o Del dea le israelițenghe cadal legi ande lengo miștimos hai andea but miștimata codolenghe cai lenas-pe pala lende. Arăslem te pachiav că i Biblia sili inspirime le Devlestar, casco anav ci prinjiandemas-les ande codo timpo.

Cana somas ca i facultatea, începosardea te placial-ma iech tărni po anav Lydie. Cărdeam o abiav ando bărș 1965, cana man mai sas-ma dipaș andal bărșa ca i facultatea. Ji ando bărș 1971, năștisai-le trin anda amare șiov șiavorre. I Lydie sas pașa mande ande  sea le momentea, cadichi po plano profesionalo, hai vi andi familia.

Cărdem buchi trin bărșa ande iech spitalo, hai pala codoia pâtărdem mânri clinica. Țâra timpo pala codoia, ca i clinica avilea iech familia, le dui pacienți anda save dem duma co începuto. Cana somas gata te scriiv le rromesche iech tratamento, leschi rromni phendea manghe: „Mangas-tu doctorii, te scriisares amenghe iech tratamento bi ratesco”. Dichlem bare iachența caring lende hai pușlem: „Sostar?”. Voi phendea: „Sam Martori le Iehovasche”. Ci mai așundemas ji atunci anda Le Martori le Iehovasche hai nici anda so pachianas von anda o rat. (Fap. 15:28, 29) I gaji încaladea peschi Biblia hai sicadea manghe sostar line cadai decizia. Pala codoia, dine manghe duma anda so va cherela o Regato le Devlesco. Așundem că va duriarela i duch, o nasfalimos hai o merimos. (Rev. 21:3, 4) Phendem: „Cadaia si so camlem me te cherav de cana somas țâno! Camlem te arăsav doctoro caște ajutisarav le manușen caște na mai aven cadea de but duchade”. Le buchia anda save deam duma cărde te bariol mânro ilo cadea de but, că nici na jianglem cana nachlea iech ceaso hai dipaș. Pala so le dui tiliarde, andral ande mânro ilo, ci mai somas catolico. Mai but, sichilem că mânre cuci Creatoros sas-les iech anav, Iehova!

Mai dichlem-ma codole Martorența încă trin-var ca i clinica hai de fiesavi data deam duma mai but sar iech ceaso. Achardem-le amende chăre caște das duma mai but anda so phenel i Biblia. Chiar cana i Lydie camlea te beșel co studio biblico, sas lache pharo te pachial că chichiva sicaimata catolico ci sas-le ciace. Cadea că achardem ieche rașaies amende chăre hai deam duma andal sicaimata la changhereache ji pi riat târzio, hai folosisardeam numai i Biblia. Pala le buchia anda save deam duma, i Lydie arăslea te pachial că Le Martoren le Iehovasche sas-le o ciacimos. Anda codo momento, amari iubirea anda o Iehova Del, barilea hai boldeam-ame ando bărș 1974.

Le buchia cai sichilem-le anda o scopo le Devlesco le manușența cărde-ma te paruvav so camlem te cherav mânra viațaia. Amari viața sas te cheras amari buchi anda o Iehova. Samas hotărâme te sicavas amare șiaven palal norme andai Biblia. I iubirea anda o Del hai anda amare pașarde arăslea i mai importanto buchi anda amende. (Mat. 22:37-39)

Cana dichas parpale, me hai i Lydie asas anda sar dichenas le șiave o phanglimos mașcar amende sar dada. Von jianenas că i  regula anda o chăr sas i porunca le Isusoschi: „Cana den duma, «da» te avel «da» hai «na» te avel «na»”. (Mat. 5:37) Sar exemplo, iechdata, i Lydie ci mechlea iecha anda amare șeia cai sas-la 17 bărșa te jial ando foro mai bute tărnența. Varecon anda o grupo phendea lache: „Dacă chi dei ci mechel-tu, jia che dadeste”. Amari șei phendea: „Ci cherav chanci dacă cherav cadea. Vi vo phenel sa cadea”. Amare șiov șiave dichle că le dui anda amende aplichisaras ande iech than le principii andai Biblia. Sam recunoscători le Iehovasche că but jene anda amari familia slujin lesche.

Chiar cana o ciacimos parudea so camlem te cherav mânra viațaia, camlem te folosisarav le buchia medicalo cai prinjiandem-le ando miștimos le slujitorengo le Iehovasche. Cadea că, slujisardem sar doctoro co Betelo anda Paris hai pala codoia co Betelo anda Louviers. Cherav i naveta co Betelo de cam 50 bărșa. Ande cado timpo, cărdem manghe lașe amala, hai iechen anda lende silen acana mai but sar 90 bărșa. Ande iech ghies, cana prinjiandem iech nevo betelisto, bucurisarde-ma te așunav că ajutisardem ca leschi nașterea acana mai but sar 20 bărșa!

Andel bărșa cai nachle, dichlem sar o Iehova îndrumisarel hai feril pesche poporos prin peschi organizația. Cadea că, mânri iubirea anda leste barilea. Co începuto le bărșengo ’80, o Corpo de Guvernare cărdea iech programo andel Statele Unite ca le Martori te daștin te den duma mai ușoro codolența cai sas-le medici.

Pala codoia, ando bărș 1988, o Corpo de Guvernare cărdea ando Betel o Servicio anda Informații Sanitaro. Co începuto, cado departamento supraveghilas le comitetea cai sas-le phanglimos le spitalența (CPS), cărde andel Statele Unite caște ajutin codolen cai sas-le Martori te avel-le iech lași îngrijirea medicalo. Pala codoia, sas cărde comitetea sar cadala ande sea i lumea, vi andi Franța. Bariol mânro ilo te dichav sar i organizația le Iehovaschi lel sama pherdi iubirea pe amare phrala cai sile nasfale!

I medicina sas mânri iechto iubirea. Tha, cana gândisardem-ma so camlem te cherav mânra viațaia, hachiardem că i mai importanto buchi si te ajutisarav le manușen te sastion spiritualo, adică te cheren pacea Codoleia cai dea-le i viața, o Iehova Del. Cana arăslem ca i pensia, me hai i Lydie începosardeam o pionierato regularo. Vi acana las partea, cadea sar daisaras, ande cadai lucrarea cai salvil vieți.

Vi aghies, cherav sea so daisarav caște ajutisarav codolen nasfale. Tha dav mânri sama că nici o mai lașio doctoro ci daștil te cherel te na mai avel nasfalimos hai merimos. Anda codoia, de abia ajucărav o timpo cana o nasfalimos hai o merimos, ci va mai avena. Codoi nevi lumea si sea mai pașă. Atunci, va avela-ma sea o timpo te sichioav mai but anda i creația le Devleschi, vi anda o modo zurales șucar ande savo sas cărdo o corpo le manușesco. Ji acana, so camlem te cherav de cana somas țâno pherdilea-pe pe dipaș. Tha, som siguro că vo va avela te pherel-pe cu sea andi lumea nevi.