Ke hlahetse Paris, Fora ka 1941 mme lapeng re ne re se barui. Ke ne ke rata sekolo haholo ka hoo o se o ka inahanela hore na ke ile ka utlwa bohloko hakaakang ha ke le dilemo di leshome mme ke fumana hore ke tshwerwe ke lefuba jwale ke tlameha ho tlohela sekolo! Dingaka di ile tsa nkgothalletsa hore ke phomole e le hore ke se ke ka kgathala ka sefubeng. Ke ile ka qeta dikgwedi tse mmalwa ke bala buka e hlalosang mantswe ebile ke mamela mananeo a seyalemoya sa yunivesithi ya Paris. Ke ile ka thaba haholo ha ngaka ya ka e mpolella hore ke fodile mme nka kgutlela sekolong. Ke ile ka bona hore mosebetsi wa dingaka ke wa bohlokwa. Ho tloha ka nako eo, toro ya ka e ne e le ho ba ngaka. Nako yohle ha ntate wa ka a ne a mpotsa hore na ke batla ho ba eng ha ke hola, ke ne ke dula ke re ke batla ho ba ngaka. Ka hoo ho ba ngaka e ile ya eba ntho ya bohlokwa haholo ho nna.

Heso re ne re le Makhatholike empa ke ne ke sa tsebe hakaalo ka Modimo mme ke ne ke ena le dipotso tse ngata. Ke ile ka qala ho kgodiseha hore dintho di bopilwe ha ke ne ke ithutela ho ba ngaka yunivesithi.

Ke hopola ka lekgetlo la pele ha ke ne ke qala ho sheba palesa ka motjhini o hodisang dintho tseo re sa kgoneng ho di bona ka mahlo. Ke ile ka hlollwa ha ke bona tsela eo sele e itshireletsang ka yona ha e utlwa motjheso le serame. Ke ile ka boela ka hlokomela hore lero la sele le a kopana ha le utlwa letswai ebe le a saroloha ha le utlwa metsi a hlwekileng. Ka lebaka lena le a mang, dintho tse phelang di ka kgona ho phela maemong a sa tshwaneng. Ha ke hlokomela  ka moo sele e nngwe le e nngwe e rarahaneng ka teng, ke ile ka hlokomela hore bophelo ha bo a eba teng feela tjee.

Ha ke le selemong sa ka sa bobedi sa ho ithutela ho ba ngaka, ke ile ka bona bopaki bo eketsehileng ba hore Modimo o teng. Ha re ntse re ithuta ka tsela eo mmele wa motho o entsweng ka yona, re ile ra bona hore sephaka se kgona ho dumella menwana ya letsoho hore e kobehe le ho otloloha. Tsela eo mesifa le masapo di kopantsweng ka yona le tsela eo di sebetsang mmoho ka yona e a hlolla. Mohlala, ke ile ka ithuta hore sephaka se na le mosifa o arohanang hore o be le mesifa e mmedi e yang menwaneng ya matsoho e mene ntle le o motona, e e thusang hore e se ke ya nyebella. Mesifa ena e kopane le menwana eo ya matsoho. Haeba mesifa e ne e sa sebetse ka tsela ena, ho ne ho ke ke ha eba bonolo hore menwana ya letsoho e otlolohe le ho kobeha. Ka hoo ke ile ka bona ka ho hlaka hore Moetsi wa motho o bohlale hona hoo!

Ke ile ka hlollwa le ho feta ke mosebetsi wa Moqapi wa bophelo ha ke ithuta ka moo ngwana a hemang ka teng ha a qeta ho hlaha. Ke ile ka ithuta hore pele lesea le hlaha, le fumana moya o hlwekileng ho mme wa lona ka lelana la mokgubu. Ke ka lebaka leo masobana a matshwafong a eso kang a eba le moya. Empa dibeke tse seng kae pele ngwana a hlaha, ho ba le lero le kenang ka hara masobana ao. Jwale ha ngwana a hlaha mme a qala ho hema, ho etsahala ntho e hlollang haholo. Lesobana le pelong ya ngwana le ya kwaleha mme sena se etsa hore madi a phallele matshwafong. Nakong eo ya bohlokwa, lero lane le keneng ka masobaneng a matshwafong le thibela masobana ao hore a kopane mme ntho eo e etsa hore moya o kene ha bonolo. Hanghang fela lesea leo le se le kgona ho hema ka bo lona le sa thuswe ke letho.

Ke ne ke batla ho tseba hore na ke mang ya entseng dintho tsena tse hlollang ka hoo ke ile ka bala Bibele ka ho teba. Ke ile ka hlollwa haholo ke melao ya bohlweki eo Modimo a neng a e file Baiseraele dilemo tse 3 000 tse fetileng. Modimo o ile a laela Baiseraele hore ba kwahele mantle a bona, ba itlhatswe ka metsi kgafetsa le hore ba behelle batho ba nang le mafu a tshwaetsanang ka thoko. (Lev. 13:​50; 15:​11; Deut. 23:​13) Bibele e ile ya bua ka ho hlaka hore na mafu a tshwaetsana jwang e leng ntho eo borasaense ba ileng ba tseba ka yona dilemong tse 150 tse fetileng. Ke ile ka hlokomela hore melao ya thobalano e fumanwang bukeng ya Levitike e ne e thusa Baiseraele hore ba phele hantle. (Lev. 12:​1-⁠6; 15:​16-24) Ke ile ka etsa qeto ya hore Mmopi ya fileng Baiseraele melao ena o ne a amehile ka bophelo ba bona mme o ne a hlohonolofatsa bohle ba neng ba mamela melao ya hae. Ke ile ka kgodiseha hore Bibele ke buka e tswang ho Modimo, eo ke neng ke sa tsebe lebitso la hae ka nako eo.

Ha ke ntse ke le yunivesithi ke ithutela ho ba ngaka, ke ile ka kopana le ngwanana ya bitswang Lydie eo ke ileng ka ratana le yena. Ka 1965 ha ke le haufi le ho qeta yunivesithi, re ile ra nyalana. Ka 1971, ho bana ba rona ba tsheletseng re ne re se re ena le ba bararo. Mosadi wa ka o ntsheheditse haholo mosebetsing wa ka le ka lapeng.

 Ke sebeditse sepetlele dilemo tse tharo pele ke bula tleliniki ya ka. Nakwana ka mora moo, banyalani bao ke buileng ka bona qalong ya pale ya ka ba ile ba tla tleliniking ya ka. Nakong eo ke neng ke ba ngolla meriana, mosadi o ile a etsa kopo ya hore meriana eo e se ke ya eba le madi. Ke ne ke maketse, ka hoo ka mo botsa hore na hobaneng. O ile a ntjwetsa hore ke Dipaki Tsa Jehova. Ke ne ke sa tsebe hohang ka Dipaki Tsa Jehova le hore na ba dumela eng tabeng ya madi. Mme eo o ile a sebedisa Bibele ho mpontsha mabaka a ho se sebedise madi. (Lik. 15:​28, 29) Ka mora moo, yena le monna wa hae ba ile ba mpontsha seo Mmuso wa Modimo o tla se finyella e leng ho fedisa mahlomola, ho kula le lefu. (Tše. 21:​3, 4) Ke ile ka ba bolella ke thabile hore ntho eo ba mpolellang yona haesale e le toro ya ka ho tloha ke sa le monyenyane! Ke bile ngaka hobane ke batla ho thusa batho. Ke ne ke thabile hoo re ileng ra buisana nako e ka etsang hora le halofo. Ka nako eo ke qetang ho buisana le bona, ke ne ke kgodisehile hore ha ke sa le Mokhatholike, jwale ka ithuta hore Mmopi eo esale ke mo rata o na le lebitso e leng Jehova!

Ke ne ke kopana le banyalani bao hararo tleliniking ya ka, mme nako le nako re ne re buisana ka nako e fetang hora. Ke ile ka re ba tle lapeng ha ka e le hore re ka buisana haholwanyane ka Bibele. Le hoja mosadi wa ka a ile a dumela ho ithuta Bibele, o ne a sa batle ho dumela hore dithuto tse ding tse neng di rutwa Khatholike di ne di fosahetse. Ka hoo, ke ile ka kopa moruti hore a tle ha rona. Re ile ra buisana ka dithuto tsa kereke ho fihlela e eba bosiu re sebedisa Bibele feela. Puisano eo e ile ya kgodisa mohatsaka hore Dipaki Tsa Jehova di ruta nnete. Ka mora moo re ile ra rata Jehova haholo hoo re ileng ra kolobetswa ka 1974.

Seo ke ileng ka ithuta sona ka morero wa Modimo ka batho se ile sa fetola dintho tse tlang pele bophelong ba ka. Ho sebeletsa Jehova e ile ya eba ntho e tlang pele bophelong ba ka le mohatsaka. Re ne re ikemiseditse ho hodisa bana ba rona re tataiswa ke Bibele. Re ile ra etsa hore molao wa ho rata Modimo le ho rata moahelani e be wona o momahanyang lelapa la rona.​—⁠Mat. 22:​37-⁠39.

Nna le Lydie re na le ho tsheha ha re hopola ka moo bana ba rona ba neng ba tseba ka moo re dumellanang ka teng ha re etsa diqeto. Ba ne ba tseba hore taelo ya Jesu e reng “lentswe la lona E le mpe le bolele E, Tjhe ya lona, Tjhe” e ne e le molao wa lapeng. (Mat. 5:​37) Mohlala, mohatsaka ha a ka a dumella moradi wa rona e moholo  hore a intshe le batjha ba bang ha a ne a le dilemo di 17. Ngwanana e mong o ile a re ho yena: “Haeba mme wa hao ha a batle, tsamaya o ilo kopa ho ntate wa hao.” Moradi wa rona o ile a mo araba a re: “Ho a tshwana, ba dula ba dumellana.” Ka hoo bana ba rona ba tsheletseng ba ne ba tseba hore re dula re dumellana ha re sebedisa melaomotheo ya Bibele. Re leboha Jehova haholo hore ebe boholo ba lelapa la rona le a mo sebeletsa kajeno.

Ka ha ke ne ke ntse ke batla ho ba ngaka, ke ne ke batla ho thusa bahlanka ba Modimo le hoja ho ithuta Bibele ho ile ha fetola dintho tse tlang pele bophelong ba ka. Ka hoo ke ile ka ithaopela ho sebetsa Bethele e Paris ke le ngaka yaba ha morao ke ya Bethele e Louviers. Ke na le dilemo tse ka bang 50 ke sebetsa Bethele ke ntse ke tloha hae. Ho fihlela hona jwale, ke se ke entse metswalle e mengata haholo lelapeng la Bethele mme e meng ya yona e se e le dilemong tsa bo 90. Ke ile ka boela ka thaba haholo ha ke kopana le motho e mong ya sebetsang Bethele eo ke neng ke sa mo nahana. Ke ile ka fumana hore ke ile ka pepisa mme wa hae ha a ne a eba le yena dilemo tse 20 tse fetileng.

Ho theosa le dilemo, ke ile ka rata Jehova le ho feta ha ke hlokomela ka moo a tataisang le ho hlokomela batho ba hae ka mokgatlong wa hae. Mathwasong a bo 1980, Sehlopha se Busang se ile sa etsa tokisetso ya hore ho be le puisano dipakeng tsa Dipaki Tsa Jehova le dingaka Amerika mabapi le ho tshela madi.

Ka 1988, Sehlopha se Busang se ile sa theha lefapha le letjha la bongaka Bethele le bitswang Lefapha la Boitsebiso ba Ditshebeletso Tsa Dipetlele. Qalong, lefapha lena le ne le okametse Dikomiti Tsa Bohokahanyi le Dipetlele tse ileng tsa thehwa Amerika ho thusa bakudi ba Dipaki hore ba fumane kalafo e loketseng. Ka hoo ha ho etswa tokisetso ya hore Dikomiti Tsa Bohokahanyi le Dipetlele di be teng lefatsheng lohle, di ile tsa eba teng le Fora. Ke dula ke hlollwa ha ke bona ka moo mokgatlo wa Jehova o thusang bara le baradibabo rona nakong eo ba hlokang thuso.

Haesale ke rata ho ba ngaka. Empa ha ke ntse ke nahana ka dintho tseo ke di ratang, ke ile ka hlokomela hore ntho ya bohlokwa ka ho fetisisa ke ho thusa batho hore ebe metswalle ya Modimo le ho ba thusa hore ba be haufi le Mohlodi wa bophelo, Jehova. Ka mora hore ke tlohele mosebetsi, nna le mohatsaka re qeta dihora tse ngata ka kgwedi re bolella batho molaetsa wa Mmuso re le bopulamadiboho ba ka mehla. Re ntse re sebetsa ka thata ka hohle ka moo re ka kgonang mosebetsing ona o pholosang bophelo.

Ka nakwana ke ntse ke tswela pele ho thusa batho ba kulang empa ke a hlokomela hore esita le ngaka e tsebang ditaba tsa yona hantle, e ntse e ke ke ya kgona ho fodisa mafu ohle le ho thibela lefu. Ka hoo ke lebeletse ka tabatabelo e kgolo nako eo ka yona bohloko, mahlomola le lefu di tla beng di le siyo. Lefatsheng le letjha le tlang ka potlako, ke tla ba le monyetla wa ho ithuta ka popo ya Modimo bophelo bohle ba ka ho akarelletsa le tsela e hlollang eo a entseng mmele wa motho ka yona. Ka nnete ntho eo esale ke e labalabela ho tloha ke sa le ngwana e tla phethahala ka botlalo haufinyane. Ke kgodisehile hore dikgolo di sa tla!