Haʼu moris iha tinan 1941 iha París, rai-Fransa. Haʼu-nia família la riku. Haʼu gosta aprende buat foun, maibé bainhira haʼu tinan sanulu, haʼu hetan tuberkuloze no labele bá tan eskola. Haʼu sente triste. Doutór sira rekomenda atu haʼu deskansa deʼit tanba haʼu-nia pulmaun fraku. Durante fulan balu, haʼu lee disionáriu ida no rona ba programa edukasaun husi Universidade París iha rádiu. Bainhira doutór dehan katak haʼu diʼak ona no bele fila fali ba eskola, haʼu sente kontente. Haʼu hanoin: ‘Doutór sira halo serbisu neʼebé furak.’ Hahú husi tempu neʼebá, haʼu hakarak atu kura ema nia moras. Bainhira apá husu kona-ba serbisu neʼebé haʼu hakarak atu halo kuandu sai boot, haʼu sempre hatán: “Haʼu hakarak sai doutór.” Entaun sai doutór mak importante liu iha haʼu-nia moris.

Haʼu-nia família mak Katólika. Maibé haʼu ladún hatene kona-ba Maromak no haʼu mós iha pergunta barak. Bainhira haʼu komesa estuda medisina, haʼu fiar metin liután katak iha Kriadór neʼebé kria moris hotu.

Haʼu sei hanoin-hetan dala primeiru haʼu haree ai-horis nia sélula hodi uza mikroskópiu. Haʼu admira oinsá sélula ida proteje an husi manas no malirin. Haʼu mós haree oinsá substánsia iha sélula laran sai kiʼik kuandu kona masin no sai boot kuandu kona bee moos. Tanba sélula iha abilidade oioin, organizmu sira bele adapta tuir ambiente. Sélula ida-idak mak komplikadu tebes, no neʼe ajuda haʼu atu fiar katak moris la mosu mesak deʼit.

 Durante tinan segundu iha eskola medisina, haʼu haree evidénsia seluk tan katak Maromak iha. Bainhira haʼu estuda kona-ba ema nia isin-lolon, haʼu aprende oinsá ita-nia liman ajuda ita-nia liman-fuan atu loke no taka. Dalan neʼebé múskulu liga ba ruin sira no serbisu hamutuk mak furak tebes. Porezemplu, haʼu aprende katak iha ita-nia liman iha tendaun no mós múskulu. Tendaun iha liman ajuda liga múskulu iha liman ba liman-fuan nia ruin. Tuirmai tendaun neʼe fahe ba rua no mós iha tendaun seluk neʼebé liga ba liman-fuan nia tutun. Iha mós uat sira seluk neʼebé liga metin tendaun sira-neʼe ba liman-fuan nia ruin. Se ita-nia liman-fuan la halo iha dalan hanesan neʼe, ita-nia tendaun sira sei estika an makaʼas no la serbisu ho didiʼak. Haʼu bele haree ho klaru katak iha duni Kriadór matenek neʼebé kria ema nia isin-lolon.

Haʼu admira liután Kriadór kuandu haʼu aprende oinsá bebé komesa kedas dada iis depois nia moris. Bebé neʼebé iha ninia inan nia knotak hetan oksijéniu husi ninia inan. Ninia pulmaun seidauk funsiona no buat neʼebé haree hanesan ‘balaun kiʼik-kiʼik’ iha pulmaun laran seidauk nakonu ho ár. Semana balu antes inan atu partu, substánsia ruma mosu iha balaun sira-neʼe nia parte laran. Kuandu bebé ida moris-mai buat kmanek oioin akontese. Kuak iha bebé nia fuan taka. Ida-neʼe halo raan suli ba bebé nia pulmaun. No balaun kiʼik-kiʼik iha pulmaun laran sai nakonu ho ár tanba substánsia neʼebé iha laran. Iha momentu neʼe kedas, bebé bele dada iis rasik.

Haʼu hakarak koñese Ida neʼebé kria buat furak sira-neʼe, tan neʼe haʼu komesa lee Bíblia. Haʼu admira tebes lei sira kona-ba saúde neʼebé Maromak fó ba ema Izraél maizumenus tinan 3.000 liubá. Maromak haruka ema Izraél atu hariis beibeik, atu keʼe kuak bainhira sira atu soe-bee boot no tuirmai taka fali, no mós kuarentena ema neʼebé iha moras neʼebé bele daʼet. (Lev 13:50; 15:11; Deut 23:13) Tinan barak liubá, Bíblia fó sai ona kona-ba buat sira-neʼe, maibé tinan 150 liubá mak sientista sira foin deskobre kona-ba oinsá moras hadaʼet. Haʼu mós rekoñese katak ukun-fuan sira neʼebé fó sai iha livru Levítico kona-ba relasaun seksuál mós ajuda nasaun Izraél atu iha moris saudavel. (Lev 12:1-6; 15:16-24) Haʼu komprende katak Kriadór halo ukun-fuan sira-neʼe ba ema Izraél nia diʼak no nia haraik bensaun ba ema neʼebé halo tuir ida-neʼe. Haʼu komesa fiar metin katak Bíblia mak Maromak nia Liafuan. Maibé haʼu seidauk hatene Maromak nia naran.

Bainhira haʼu estuda medisina, haʼu hasoru feto joven ida naran Lydie, no haʼu laran-monu ba nia. Ami kaben iha tinan 1965 kuandu haʼu estuda daudaun medisina. Iha tinan 1971, ami iha oan naʼin-tolu no ikusmai iha oan naʼin-tolu tan. Lydie apoia haʼu-nia serbisu nuʼudar doutór no mós iha família.

Haʼu serbisu iha ospitál durante tinan tolu no tuirmai haʼu loke klínika. Lakleur, feen-laʼen neʼebé ohin haʼu temi mai atu hetan tratamentu. Bainhira haʼu atu  hakerek reseita ai-moruk nian ba laʼen neʼe, ninia feen hatete: “Favór doutór, fó ai-moruk neʼebé la iha raan.” Haʼu hakfodak no husu: “Tebes? Tanbasá?” Nia hatán: “Ami mak Testemuña ba Jeová.” Haʼu nunka rona kona-ba Testemuña ba Jeová ka sira-nia hanorin kona-ba raan. Feen neʼe foti ninia Bíblia no hatudu ba haʼu eskritura sira kona-ba tanbasá sira la simu raan. (Após 15:28, 29) Tuirmai sira esplika ba haʼu kona-ba buat neʼebé Maromak nia Ukun sei kumpre, no oinsá Ukun neʼe sei halakon terus, moras no mate. (Apok 21:3, 4) Haʼu hatete: “Neʼe mak haʼu-nia mehi husi kiʼik kedas. Haʼu sai doutór tanba hakarak halakon ema nia terus.” Haʼu kontente tebes, tan neʼe ami koʼalia ba oras ida ho balu. Bainhira feen-laʼen neʼe fila, haʼu lakohi tan sai ema Katólika. Haʼu aprende ona katak Kriadór nia naran mak Jeová.

Haʼu hasoru feen-laʼen neʼe dala tolu iha haʼu-nia klínika no tempu ida-idak ami koʼalia durante oras ida liu. Haʼu konvida sira mai haʼu-nia uma atu ami bele uza tempu barak liután atu koʼalia kona-ba Bíblia. Maski Lydie mós tuir estuda Bíblia, maibé nia lakohi simu katak Katólika nia doutrina mak sala. Tan neʼe, haʼu konvida padre ida ba ami-nia uma. Ami debate toʼo kalan-boot kona-ba igreja nia hanorin hodi uza Bíblia deʼit. Rezultadu husi diskusaun neʼe mak Lydie fiar metin katak Testemuña hanorin lia-loos. Tuirmai, ami-nia domin ba Jeová aumenta liután no ami hetan batizmu iha tinan 1974.

Buat neʼebé haʼu aprende kona-ba Jeová nia hakarak book haʼu atu troka buat neʼebé importante liu iha haʼu-nia moris. Ba haʼu no Lydie, serbí Jeová mak buat neʼebé importante liu. Ami deside metin atu haboot ami-nia oan tuir Bíblia nia matadalan. Ami hanorin ami-nia oan atu hadomi Maromak no hadomi ema. Ida-neʼe hametin ami-nia relasaun diʼak nuʼudar família.—Mt 22:37-39.

Haʼu no Lydie sempre konkorda malu kona-ba ami-nia desizaun sira, neʼe fó impaktu boot ba ami-nia oan sira. Sira hatene katak iha ami-nia uma, ami halo tuir Jesus nia matadalan neʼebé hatete: “Se imi dehan ‘sin’, tenkesér sin, no ‘lae’, tenkesér lae.” (Mt 5:37) Porezemplu, bainhira ami-nia oan-feto ida tinan 17, Lydie la fó lisensa  ba nia atu bá hamutuk ho joven balu. Joven feto ida hatete ba nia: “Se ó-nia amá la fó lisensa, husu fali ó-nia apá.” Maibé nia hatete: “Neʼe saugati deʼit. Sira sempre konkorda malu.” Ami-nia oan naʼin-neen komprende katak ami iha hanoin neʼebé hanesan kona-ba aplika Bíblia nia prinsípiu. Ami agradese ba Jeová tanba ohin loron ami-nia família barak serbí Jeová.

Maski haʼu tau uluk lia-loos, maibé haʼu hakarak nafatin atu serbisu nuʼudar doutór no ajuda Maromak nia povu. Tan neʼe, haʼu halo serbisu voluntáriu nuʼudar doutór iha Betel iha París no tuirmai iha Betel foun iha Louviers. Haʼu ajuda ona iha Betel maizumenus tinan 50. Durante tempu neʼe, haʼu habelun ho ema oioin iha família Betel, sira balu agora tinan 90 liu. Haʼu mós kontente kuandu haʼu hasoru ema Betel foun ida. Haʼu aprende katak haʼu mak ajuda ninia amá partu nia tinan 20 liubá.

Haʼu-nia domin ba Jeová sai boot liután bainhira haʼu haree oinsá nia dirije no proteje ninia povu liuhusi ninia organizasaun. Maizumenus iha tinan 1980, Grupu Administradór organiza programa ida iha Estadus Unidus atu ajuda Testemuña komunika ho doutór no enfermeira sira.

Tuirmai iha tinan 1988, Grupu Administradór halo departamentu foun iha Betel naran Departamentu informasaun kona-ba tratamentu médiku. Foufoun, departamentu neʼe tau matan ba Komisaun neʼebé Komunika ho Ospitál neʼebé harii iha Estadus Unidus atu ajuda Testemuña sira hetan doutór neʼebé respeitu ita-nia desizaun kona-ba raan. Bainhira Komisaun neʼebé Komunika ho Ospitál forma iha mundu tomak, komisaun sira-neʼe mós forma iha rai-Fransa. Haʼu kontente tebes atu haree oinsá Jeová nia organizasaun hatudu domin no apoia irmaun-irmán sira bainhira sira moras.

Uluk buat neʼebé haʼu gosta liu mak serbisu nuʼudar doutór. Maibé haʼu rekoñese katak buat neʼebé importante liu mak ajuda ema koñese no serbí Jeová, Hun ba moris, duké kura sira nuʼudar doutór. Kuandu haʼu para tiha serbisu atu manán osan, haʼu no Lydie uza oras barak fulan-fulan atu haklaken liafuan diʼak kona-ba Maromak nia Ukun nuʼudar pioneiru regulár. Ami nafatin hakaʼas an atu hola parte iha serbisu importante neʼe.

Haʼu kontinua ajuda ema neʼebé moras. Maibé haʼu rekoñese katak maski doutór ida mak matenek, nia labele kura moras hotu ka prevene ema atu mate. Haʼu hein namanas ba tempu neʼebé moras no mate sei la iha tan. Mundu foun besik loos ona, no iha neʼebá haʼu bele aprende kona-ba Maromak nia kriasaun ba nafatin, inklui mós ema nia isin-lolon. Lakleur haʼu-nia mehi kuandu haʼu sei kiʼik, sei sai realidade. Haʼu fiar katak lakleur tan buat neʼebé diʼak liu sei toʼo mai.