Andajpenuska París (Francia) 1941 jimbo, familiarhu ma enga no jatsikuarheripka. Ji kánikua tsitisïreenga jorhenguarhini, ísï jimbo kánikuani no sési pʼikuarheraspka engani tuberkulosisi pʼamenchapka engani 10 jatiripka ka ma tiempu jimbo nóteruni úspkia nirani eskuela. Doktorichajtsïni arhispti eskani no jámapiringa jauarani jimbokaksï juchiiti pulmonicha débili jarhaspka. Ísï jimbo, máru kutsïcha jimbo solu arhintasïreenga diksionariu ma ka kurhaasïreenga radiu Sorbona enga Universidad de París anapuepka. Engajtsïni doktoricha arhipka eskani sési jarhaspkia ka eskani úpiringia eskuela nirani, kánikua tsípispka. Eratsespka: “Doktorichaksï ambakiti ambe úsïndi”. Desde jiáni uératini, uékaspka sési pʼikuastantani pʼamenchatichani. Engareni juchiiti taati arhienga: “¿Amberi uékasïni jindeeni engari kʼéakia?”. Ji méntkisï arhisïreenga: “Doktoriuaka”. Ka ísï niáraspka kánikua tsitini medisineri ambe.

Juchiiti familia katolikuespti, joperu ji no káni mítespka Tata Diosïri ambe. Ka uánikua ambe kurhamarhikuarhisïreenga. Engani na ueenapkia jorhenguarhini Medisineri ambe unibersidadirhu, kuenta íntskukuarhespka eska nema úska eska tsípikua jauaka.

Miásïnga engani primeru xanhari exeapka tulipaniri sélulechani mikroskopiu ma jimbo. Ískurini pakataspti exeni ambe enga újka sélula ma enga aparhikuarhijka o enga tsʼirakuarhijka. Ístuni exespka eska sitoplasma (sustansia ma enga sélularhu incharini jaka) sapichu úkuarhintasïnga enga itukuarhu peeranhajka ka kʼéri úkuarhintasïndi enga itsïrhu peeranhajka. I ambe enga újka sélula ka máteru ambe, úsïndi eska iámindu ambe enga tsípiti jaka seguiriuaka tsípiti jarhani nájkiruka klima mójtakurhiaka.  Engani exepka na enga xáni sési úkata jaka sélulecha, kuenta íntskukuarhespka eska tsípikua no ísku úkuarhiska.

Engani tsimani uéxurhini páni japkia jorhenguarhini Medisineri ambe, exespka sánderu ambe enga xarhatajka eska Tata Diosï jarhaska. Pori ejemplu, engachi jorhenguarhini japka kʼuiripuecheri kuerpuni, exespkachi eska na enga úkata jaka jájki, úsïnga eskachi uaaka ch’unujkurhani ka eskaksï deduecha uaaka mítakuarheni. Kánikuaksï sési peerakata jarhasti nani engaksï jaka múskuluecha, ligamentuecha ka tendonicha. Pori ejemplu, jorhenguarhispka eska tendoni ma enga kúndantajka jájkirhu anapu múskuluni ma dedueri úni ma jingoni, tsimapuru arhukurhitixaka. Ka inde tendoniri terujkanikuarhu, jarhasti máteru tendoni enga niárajka asta dedurhu puntarhu. Enga tendoni ísï tsimapuru arhukurhitini jaka úsïndi eska ima tendoni enga terujkanikuarhu jaka no manakuarhiaka. Ístu, kʼuiripetani jimbo tendonichaksï úsïndi kúnguarhitini jarhani únicha jingoni. Enga no ísï úkata japiringa, engachi uinhapkurhantapiringa, jájkiri tendonichaksï no úpirindi márku kúnguarhitini jarhani dedueri únicha jingoni. Exespka eska uétarhispka kánikua jánhaskakua para úni kueraani kʼuiripuecheri kuerpuni.

Engani jorhenguarhipka na enga andajpenujka charhaku ma, sánderuni janhanharhispka Kueraajpirini. Jorhenguarhispka eska ante de charhaku ma andajpenuni, úsïnga oksijenu p’irani imeeri amambeeri kordoni umbilikali jimbo. Enga ísï úkuarhijka, albéoluecha engaksï xárhajka komueska pisïki sapirhaticha, engaksï pulmonicharhu incharini jarhajka, nótkiksï tarhiata jatarini jarhasïndi. Ka enga na niárani jarhajkia jurhiatikua para charhaku andajpenuni, sustansia ma enga ísï mítekateka komu surfaktante, kuájchakuasïndi incharinisï albéoluechani. Jimajkani, enga charhaku andajpenujka ka ueenani jirejtani, charhakueri mintsitarhu míkuarhintasïndi pʼorhota ma ka i ambe úsïndi eska iurhiri niáraaka pulmonicharhu. Enga i ambe úkuarhini jarhajka, surfaktante jarhuatasïndi paraka albéoluecharhu uiniaka tarhiata. Ma ratu jimbojku, charhaku úsïndia jandiajku jirejtani.

Uékasïreenga míteni imani enga kueraaka iámindu ini ambe, ísï jimbo ueenaspka arhintani Bibliani. Kánikua tsitispka engani arhintapka ambe enga Tata Diosï juramukuapka israelitechani parakaksï no xáni pʼamenchapiringa. Tata Diosï juramukuaspti israelitechani eskaksï túskupiringa kuatsïtani ka eskaksï someni jikuapiringa, ka enga nema pʼamenchakua ma p’ipiringa enga úpiringa kéritaani máteruechani, jatsispti para támu jarhani máru jurhiatikuecha jimbo (Lev. 13:50; 15:11; Deut. 23:13). Biblia tʼuini uandasïreendia ini ambe, peru apenasi 150 uéxurhini ísïistia engaksï sientifikuecha exeka na engaksï kʼuiripuecha kérikuarhiajka pʼamenchakuechani. Ístuni kuenta íntskukuarhespka eska juramukuecha engaksï seksueri ambe uandajka ka engaksï libru de Levítico jimbo jaka, jarhuataasïreendi israelitechani paraksï no xáni pʼamenchani (Lev. 12:1-6; 15:16-24). Niáraspka kurhanguni eska Kueraajpiri íntskuaspka ini juramukuecha israelitechani parakaksï sési japiringa ka eska újchakuraaspka imeechani engaksï kurhajchapka. Niáraspka jakajkuni eska Biblia jindeeska Tata Diosïri uandakua. Peru útasï no mítespka na enga arhinhajka Tata Diosï.

Medisineri ambe jorhenguarhixapka engani mítepka uátsïni ma enga Lydie arhinhajka. Niáraspkachi kánikua xénchperani ka tembuperaspkachi 1965 jimbo. Jiánisï, nótkini kʼamaraxapka ambe engani jorhenguarhini japka. Ka 1971 jimbo, kánguarhiaxapkachia tanimu juchaari seisi sapiicheri. Lydie  kánikuarini jarhuatasïndi juchiiti ánchikuarhitarhu ka familiarhu.

Tanimu uéxurhini jimbo ánchikuarhispka ospitali ma jimbo ante de jatsini juchiiti klinika. Ísï tátsekua, temungurhiri ma niáraspti juchiiti klinikarhu, ima tsimani pasienticha engani uénakuarhu uandaaka. Apenasini karaxapka ambe engani íntskupiringa acheetini engareni témba arhipka: “Doktori, ¿uaajtsïni íntskuni medisina enga no iurhiri jukaaka?”. Ískurini pakataspti ka kurhamarhispka: “¿Meru? ¿Andi?”. Imarini arhispti: “Jimbokachi Jeobaeri testigueska”. No méni kurhaaxapka Jeobaeri testiguecheri ambe ka ni ambe engaksï eratsejka iurhiriri ambe. Tembarini Biblia jingoni exeraspti andiksïsï no jiókuarhieni iurhiri jatantani (Uku. 15:28, 29). Tátsekuajtsïni tsimarhani aianguspti eska Tata Diosïri Reinu, kʼamajkuaka kómu nitamakuani, pʼamenchakuechani ka uarhikuani (Jaŋ. 21:3, 4). Kánikua tsípiparini arhiaspka: “¡Ambe engajtsïni arhini jaka, jindeesti ambe ma engani desde sapichku uékeenga! ¡Doktorini uéraska parani sési pʼikuastantaani pʼamenchatichani!”. Sésichi uandontskuarhespka ma ora ka terujkani. Enga temungurhiri na níntapkia, nóteruni uékasïrengia katolikueni. Ístuni jorhenguarhispka eska Kueraajpiriri nombri engani ji xáni janhanharhienga, jindeeska: Jeoba.

Ima temungurhiri tanimu xanhari jurhaspti klinikarhu ka jukari ma orachi uandontskuarhesïreenga. Pʼímarhiaspka juchiniu parakachi úpiringa uandontskuarheni sánderu Biblieri ambe. Lydie uékaspti juchantsïni jingoni jorhenguarhini Biblieri ambe, joperu no jiókuarhisïreendi eska máru ambe enga iglesia katolika jorhentpijka no jurhimbikua ambeepiringa. Ísï jimbo, pʼímarhispka saserdotini juchiniu. Bibliani úraparini, asta chúrikua jamberichi uandontskuarhespka ima amberi enga iglesia katolika jorhentpijka. Inde ambe úspti eska Lydie seguru japiringa eska ambe engaksï jorhentpijka Jeobaeri testiguecha, jurhimbikueska. Jiáni uératini, ueenaspkachi kánikua xénchani Tata Diosï Jeobani ka itsï atakuarhispkachi 1974 jimbo.

Engani jorhenguarhipka ambe enga Tata Diosï Jeoba uéjka úni kʼuiripuechani jimbo, úspti eskani orheta peerapiringa sánderu jukaparhakua ambe. Lydie ka ji, niáraspkachi sánderu jukaparharani Tata Diosï Jeobani marhuakuni. Eratsetixapkachi ísï kʼuiriperani juchaari sapiichani eska Biblia na uandajka. Jorhendaspkachi juchaari sapiichani xénchani Tata Diosï Jeobani ka kʼuiripuechani ka inde ambe úspti eskachi sánderu májku kʼéri japiringa (Mat. 22:37-39).

Juchaari uájpeechaksï sési mítespti eska Lydie ka ji méntkisïchi deakuerdu jarhasïreenga engachi uékeenga úni ambe ma. Tsípisïngachi engachi miántajka indeni ambe. Imeechaksï mítespti eskachi jatsispka  para kurhajchani ambe enga Jesúsi uandapka: “Mátirku uanda je ‘jo’ o ‘nómbe’” (Mat. 5:37, TNM). Pori ejemplu, enga juchaari nanaka 17 jatiripka, Lydie no jurajkuspti imeeri amiguecha jingoni nirani. Ma imeeri amiga arhispti: “Engakeni chiiti mama no jurajkuka, chiiti papani arhi”. Ka juchaari nanaka arhispti: “¿Ka para ambe? Méntkisïksï deakuerdu jarhasïndi”. Juchaari seisi uájpeechaksï exesïreendi eska Lydie ka ji, méntkisïchi úsïreenga ambe enga Biblia uandajka. Diosmaiamukuachi arhisïnga Tata Diosï Jeobani jimbokaksï iásï uánikua juchaari parienticha imani marhuakusïngia.

Ambe engani jorhenguarhipka úspti eskani sánderu jukaparharapiringa Tata Diosïri ambe. Peru útasï uékasïreenga úrani ambe engani míteka medisineri ambe para jarhuataani erachichani. Ísï jimbo, aiakukuarhespka para ánchikuarhini París anapu Betelirhu komu doktori ka tátsekua máteru Betelirhu enga Louviers únhapka. Sáno 50 uéxurhini páxakaia engani nirajka Beteli jarhuajpeni. Ini tiempu jimbo, niáraspka kánikua sési pájperani uánikua betelitecha jingoni. Máruksï jukari 90 jatiristia. Ka ma jurhiani, ísku pakaraspka engani mítepka jimbanhi betelitani ma engareni aiangupka eska 20 uéxurhini antesi, ji jarhuataspka imeeri amambani ambakentani enga ima andajpenupka.

Iámindu ini tiempu jimbo, niáraska sánderu xénchani Tata Diosï Jeobani jimbokani exeska na enga ima újchakurajka ka arhistakuni imeeri iretani. Pori ejemplu, 1980 jimbo ísï, Grupu enga Orhejtsïkuajka iámindu kúnguarhikuechani, uandaspti eska Estados Unidos japiringa programa ma para jarhuataani doktorichani sánderu sési kurhanguni andiksïsï Jeobaeri testiguecha no jiókuarhijki iurhiri jatantani.

Tátsekua, 1988 jimbo, Grupu enga Orhejtsïkuajka iámindu kúnguarhikuechani, jimbanhi grupu ma úspti enga arhinhajka Nani engachi intsïnhajka Informasioni Ospitalicheri ambe. Orheta, i grupu orhejtsïkuasïreendi Grupuechani engaksï Jarhuataajka Testiguechani engaksï Uétarhinchajka Tratamientu ma engaksï Estados Unidos japka. Engaksï í grupuecha niárapka máteru paisicharhu únhani. Ístuksï niáraspti Francia únhani. Ískuni pakarasïnga exeni na enga Tata Diosï Jeobaeri kúnguarhikua, xáni sési kuidariuajka erachichani engaksï p’amenchani jarhajka ka sánderu jiáni engaksï uétarhinchani jarhajka.

Kánikua tsitisïreenga medisineri ambe. Kuenta íntskukuarhespka eska jarhaska sánderu jukaparhakua ambe eska tsinaani pʼamenchatichani, ka jindeesti: jarhuataani k’uiripuechani parakaksï sési pájperaaka Tata Diosï Jeoba jingoni, imani jingoni enga újka eska tsípikua jauaka. Engani jubilarikuarhipkia, Lydie ka ji ueenaspkachi ísï marhuani komu prekursori regulari, ísïchi úsïnga ma mesi jimbo kánikua aianhpini Tata Diosïri Reinueri ambe. Iásï jamberi, kánikuachi jánguarhintasïnga para jarhuajpeni ini ánchikuarhitarhu enga k’uiripuechani p’ímutantaajka.

Útasïni seguirixaka jarhuataani imeechani engaksï p’amenchani jarhajka. Peruni exesïnga eska ni sikiera sánderu ambakiti doktori ma úsïnga kénditaani iámindu pʼamenchakuechani o kʼamajkuni uarhikuani. Jimbosïni uékani jakaia eska niáraaka ima jurhiatikua engaksï nóteru jauakia pʼamenchakuecha ni uarhikua. Jimbanhi parhakpinirhu enga axuterku jakaia, uaaka para méntkisï jorhenguarhini Tata Diosïri kueraakateri ambe, asta na enga xáni sési úkata jaka kʼuiripuecheri kuerpu. Ísïisti, úkuarhistia máru ambe ima ambeeri engani uékeenga jiáni engani sapichuepka. Seguru jarhaska eska sánderu ambakiti ambe janoxakaia.