Nkazaarwa omu 1941, omu Paris, France. Omu ka yaitu tukaba tutali baguuda. Nagonzaaga muno kusoma, nahabweki tekerezaaho obusaasi obunahuliire obunkaba nyine emyaka ikumi, obubansangiremu oburwaire bwa TB obwandetiire kuleka kusoma! Ba dakitaali bakangambira ngu nyikale omu kitabu habwokuba ebihaha byange bikaba bicekere. Nahabweki kumara emyezi nyingi, nkamara obwire bwange ninsoma katondogorozi, kandi n’okuhuliiriza puroguraamu eza ha Radio Sorbonne eya University of Paris. Nkasemererwa muno dakitaali wange obuyangambiire ngu nkizire kandi ngu ninsobora kugaruka ha isomero. Nkatekereza nti ba dakitaali bakora omulimo ogw’omugaso muno! Kuruga obu ekirooto kyange kikafooka eky’okujanjaba abantu. Buli murundi ise nyowe yankaguzaaga ekindukugonza kukora omu bwomeezi, namugarukamuga ekintu kimu, “Ningonza kufooka dakitaali.” Nukwo natandikire nti kugonza kufooka dakitaali.

Eka yaitu tukaba tuli Bakatuliki. Baitu nkaba ntamanyire bingi ebirukukwata hali Ruhanga, kandi nkaba nyine ebikaguzo bingi. Hanyuma y’okutandika kusomerra obwa dakitaali ha yunivasite, nubwo nakigumize ngu obwomeezi bukahangwa.

Ninyijuka obunarozere obutafaali bw’ekyakyo ekirukwetwa tulip habw’omurundi gwange ogw’okubanza obu ninkozesa microscope. Nkahunirra muno omulingo obutafaali bunu bwerindamu ekirro n’embeho. Kandi nketegereza ngu ensande ey’eri munda omu katafaali kanu, ekeeha obukatekwa omu kisura kandi ey’eyongera obukateekwa omu maizi. Habw’obusobozi bunu hamu n’ensonga ezindi, obuntu obutaito obwine obwomeezi nibusobora kumanyira kwikara omu nyikara ezirukwahukana. Obunarozere omulingo ogurukuhuniiriza  muno buli katafaali kaakozerwemu, nk’eyongera kukigumya ngu obwomeezi butereteho bwonka.

Omu mwaka gwange ogwakabiri ha yunivasite, nk’eyongera kurora obwakaiso oburukugumya ngu mali Ruhanga aroho. Obutwali nitusomaho omubiri gw’omuntu, tukeegaho omulingo omukono gwaitu gutusobozesa kuzinga hamu n’okugonyorra ebyara byaitu. Omulingo enyama ez’omu mukono zikwatiire h’amagufa kandi n’omulingo buli kimu kikorra hamu niguhuniiriza muno. Ekyokurorraho, nkeega ngu haroho ekikana ekiteeraniza enyama eziri omu mukono gwaitu nigufa eryakabiri eriri omu kaara kaitu. Ekikana kinu kyebaganizaamu ekisobozesa ekikana ekindi ekirukugenda ha igufa ery’okubanza omu kaara kuraba hansi yakyo. Ebikana binu bikwatira kimu ha igufa ly’akaara. Kakuba ebyaara byaitu bitarakozerwe omu mulingo ogu, tibyakusoboire kwezinga rundi kwegonyorra. Nkakirorra kimu ngu ayakozere omubiri gw’omuntu mugezi muno.

Obunayegere omulingo enkerembe etandika kwikya hanyuma y’okuzaarwa, nkeyongera kuhunirra habw’emirimo y’Omuhangi waitu. Omwana obwaba atakazairwe atunga orwoya orw’okwikya kurabira omu rulera rwa nyina. Egi niyo ensonga habwaki obusaho bw’orwoya obutaito obuli omu bihaha by’omwana buba butakagiiremu orwoya. Omu wiiki nke omwana atakazairwe, buli kasaho ak’orwoya kaijuramu amaizi ag’embaganiza. Hanyuma y’omwana kuzaarwa kandi akaikya habw’omurundi gwe ogw’okubanza, ebintu ebirukuhuniiriza bibaho. Ekihuru ekiri omu mutima gw’omwana kiigarra kandi kinu kihambiriza esagama kugenda omu bihaha. Habwokuba obusaho obw’orwoya buba bwijwiremu amaizi ag’embaganiza, aho naaho bwijuramu orwoya. Kandi aho naaho, omwana aba nasobora kweikiza wenka.

Nkaba ningonza kumanya Ogu ayahangire ebintu binu ebirukuhuniriza, nahabweki nkatandika kuteekaho muno omutima ha bintu ebinkaba ninsoma omu Baibuli. Nkahunirra muno habw’ebiragiro Yahwe eby’akaba ahaire Abaisaleri emyaka erukuhingura omu 3000 enyuma ebirukukwata ha bwecumi. Ruhanga akaba aragiire Abaisaleri kuziika obubi bwabo, kwoga butoosa, kandi nosoroora omuntu wena ayabaga aine obwokurorraho obw’oburwaire oburukuturra. (Lev. 13:50; 15:11; Bir. 23:13) Baibuli ekaba ebalizeeho ebintu binu kara muno, baitu abanyasayansi nubwo barugire kuzonzoora omulingo endwaire ziturramu nk’emyaka 150 yonka enyuma. Kandi ebiragiro ebirukwata ha kuteerana ebiri omu kitabu eky’Ebyabalevi bikakonyera ihanga lya Isaleri lyona kwerinda endwaire. (Lev. 12:1-6; 15:16-24) Nkakyetegereza ngu Omuhangi akaha Abaisaleri ebiragiro binu nukwo bagasirwe kandi yahaga emigisa abo ababyoroberaga. Nkakigumiza kimu ngu Baibuli ekaba eterekereziibwe omwoyo gwa Ruhanga, n’obukiraaba ngu omu kasumi ako nkaba ntamanyire ibara lye.

Obunkaba ninsoma bwa dakitaali ha yunivasite, nkatangatangana omwisiki omuto arukwetwa Lydie, ayafookere mugonzebwa wange. Tukataaha obuswere omu 1965 obunkaba ntakamaliriize emisomo yange. Nambere omwaka 1971 gwahikiire, nyowe na Lydie twali tuhikize abaana basatu, h’abaana mukaaga abatwine. Lydie ansagikire muno omu mulimo gwange nka dakitaali kandi n’omu kurolerra eka yaitu.

Nkabanza kukora omu irwarro kumara emyaka esatu, nukwo natandikaho kiliniki eyange. Omusaija na mukazi we, abarwaire ababiri abahyaka  abambalizeehoga ha kubanza, bakaija kuserra obujanjabi ha kiliniki yange. Obunkaba ndi haihi kuhandiikira iba omubazi, mukazi we akansaba ati: “Caali dakitaali, ninkusaba otatuhandiikira omubazi ogurumu esagama.” Nkahuniira muno, namukaguza nti: “Mali? Habwaki?” Akangarukamu ati: “Tuli Bakaiso ba Yahwe.” Nkaba takahurahoga Abakaiso ba Yahwe rundi ekibegesa ha sagama. Omukazi ogu akaihayo Baibuli ye kandi yanyoleka kusigikirra ha Byahandiikirwe habwaki bacwamu kwanga kukozesa esagama. (Eng. 15:28, 29) Kandi omukazi ogu na musaija we bakagumizaamu banyoleka ebintu Obukama bwa Ruhanga burakora; nk’okumaraho okubonabona, oburwaire, hamu n’okufa. (Kus. 21:3, 4) N’okusemererwa kwingi nk’agamba nti: “Ekimungambiire nikyo kitaaha kiri kirooto kyange kuruga omu buto! Nkafooka dakitaali nukwo nsobole kukeehya okubonabona.” Nkasemererwa muno, twamaliira tubalize kumara esaaha emu n’ekicweka. Nambere omukazi ogu na musaija we bagendiire, nkaba mazire kucwamu omu mutima gwange ngu tinkyali Mukatuliki, kandi nkeega ngu Omuhangi ounayegombaga muno aine ibara, Yahwe!

Nkongera natangatangana omusaija na mukazi we abo emirundi esatu omu kiliniki yange, kandi buli murundi twabazaaga tuhinguza esaaha emu. Nkabaraaliiza omu ka yange nukwo tusobole kutunga obwire oburukukiraho obw’okubazaaho Baibuli. N’obukiraaba ngu Lydie akaikiriza kutweteranizaaho omu kwega kwaitu okwa Baibuli, akanga kwikiriza ngu enyegesa ezimu ezibaali batwegeseze omu Bukatuliki zaali zigwire. Nahabweki, nkaraaliza omupadiiri owa parishi kwija omu ka yaitu. Tukateera empaka ha nyegesa za Baibuli kuhika ekiro, obu nitukozesa Baibuli yonka. Ebitwabalizeeho bikagumya Lydie ngu Abakaiso ba Yahwe nibegesa amananu. Hanyuma y’ebi, okugonza kwaitu hali Yahwe Ruhanga kukeyongera kwatuletera itwena kubatizibwa omu 1974.

Ebinayegere ha kigendererwa kya Ruhanga hali abantu bikandetera kuhindura ebintu ebinaroraga nk’ebirukukira obukuru omu bwomeezi bwange. Nyowe na Lydie, tukebembeza kuheereza Yahwe omu bwomeezi bwaitu. Tukacweramu kimu kukuza abaana baitu nitusigikirra ha misingi ya Baibuli. Tukegesa abaana baitu kugonza Ruhanga hamu n’abantu, kandi eki kikatwiriza haihingana nk’eka.​—Mat. 22:37-39.

Nyowe na Lydie, tukira kuseka obutwijuka omulingo abaana baitu bakaba bakimanyire nk’oku twaikiranganizaaga ha ncwamu zaitu. Bakaba bakimanyire ngu ekiragiro ky’eka yaitu kikaba nikisigikirra ha buragirizi bwa Yesu oburukugamba ngu “ebigambo byanyu bikalege biti Ego, ego; nangwa, nangwa.’’ (Mat. 5:37) Ekyokurorraho, omu ha bahara  baitu obwakaba aine emyaka 17, Lydie atamwikirize kugenda n’ekiguruupu eky’abaana abandi abato. Omu h’abaisiki kuruga omu kiguruupu eki akagambira muhara waitu ngu, “Maama wawe araaba atarukukwikiriza, saba bbabba wawe!” Muhara waitu akamugarukamu ati: “Oku kusiisa obwire kwonka. Abo babaza kimu.” Abaana baitu mukaaga bakakirora ngu nitukwataniza omu kuteeka omu nkora emisingi ya Baibuli. Nitusiima muno Yahwe habwokuba kasumi kanu, abarukukira obwingi omu ka yaitu nibaheereza Yahwe.

N’obukiraaba ngu amananu gakahindura ebintu ebinayebembezaaga omu bwomeezi bwange. Nkaba ningonza kukozesa obukugu bwange nka dakitaali kugasira abantu ba Ruhanga. Nahabweki, nkehayo kukonyera nka dakitaali ha Beseri omu Paris kandi hanyuma ha Beseri empyaka omu Louviers. Mazire emyaka haihi 50 ninkonyera ha Beseri. Ntungire abanywani nfe na nfe ha Beseri kandi abamu omuli banu bali omu myaka 90. Kandi nkasemererwa kiro kimu obunatangatangaine Omubeseri omuhyaka. Tukakizoora ngu ninyowe n’abaire muzaalisa nyina obwakaba n’amuzaara emyaka 20 enyuma!

Kumara emyaka nyingi, okugonza kwange hali Yahwe kweyongiire habw’okurora omulingo alindamu kandi ayebembera abantu be n’akozesa ekitebe kye. Emyaka eya 1980, obwekaba netandika Akatebe Akalemi kakatandikaho entekaniza omu United States, eyakukonyire badakitaali hamu n’abantu abandi abaha obujanjabi kwetegereza encwamu ey’Abakaiso ba Yahwe ey’okwanga esagama.

Omu 1988, Akatebe Akalemi kakatandikaho ekitongole ekihyaka ha Beseri ekirukwetwa Hospital Information Services. Ha kubanza, ekitongole kinu kyarolerraga Hospital Liaison Committees (HLC) ezikaba zitandikirweho omu Amerika kukonyera badakitaali kuteekamu ekitiinisa encwamu yaitu ey’okwanga esagama. Entekaniza enu obuyatandikirweho n’omu mahanga agandi omu nsi yoona, obutebe obwa HLCs bukatandikwaho omu France. Kimpuniriza muno kurora omulingo ekitebe kya Yahwe nikisagika ab’oruganda na banyaanya itwe abarwaire ababa bali omu bwetaago!

Nkaba ningonza muno kufooka dakitaali. Baitu obu n’atekerizeeho ebintu ebinkaba nintwara kuba ebirukukira obukuru omu bwomeezi bwange, nkakyetegereza ngu ekintu ekirukukirayo obukuru nikyo kukiza abantu omu by’omwoyo kurabira omu kubakonyera kutunga enkoragana enungi na Yahwe Ruhanga endugiiro y’obwomeezi. Hanyuma y’okuhuumura ha mulimo, nyowe na Lydie tukafooka bapayoniya ab’akasumi koona eky’atukonyire kumara esaaha nyingi omu mulimo ogw’okutebeza amakuru amarungi. Nahati nitukora kyona ekirukusoboka kwejumbira omu mulimo gunu ogurukujuna obwomeezi bw’abantu.

Nahati ninkyakora kyona ekirukusoboka kukonyera abarwaire. Baitu nkimanyire ngu na dakitaali arukukirayo obukugu tasobora kukiza endwaire zoona rundi kutanga okufa. Nahabweki ndindiriire n’ekihika kingi akasumi nambere haliba hatakyaroho obusaasi, endwaire, hamu n’okufa. Omu nsi empyaka ey’eri haihi kwija, ninyija kusobora kutunga omugisa ogw’okwegaho ebihangirwe bya Yahwe kumara ebiro n’ebiro, otwalireemu n’okwegaho omulingo ogurukuhuniiriza omubiri gwaitu gw’ahangirwemu. Amananu gali, ekirooto kyange kuruga omu buto kiri haihi kuhikirirra kimu. Ninkigumiza kimu ngu ebirungi biri haihi kwija!