Nkhababika mu 1941, ku Paris, France, ndipo mbumba yakwithu yikaŵa yisambazi yayi. Nkhatemwanga chomene kusambira, kweni chitima chikanikora apo nkhaŵa na vyaka 10, chifukwa nkhalwara chikhoso chikuru cha TB, ndipo nkhaleka sukulu! Ŵadokotala ŵakati ntchiwemi nigonenge waka chifukwa maphapu ghane ghakaŵa ghakulopwa. Ntheura kwa myezi yinandi, nkhaŵazganga waka dikishonare na kupulikizga mapulogiramu gha vya sukulu gha University of Paris, agho ghakapharazgikanga pa Radio Sorbonne. Dokotala wane wati waniphalira kuti sono nachira ndipo ningakambiraso sukulu, nkhakondwa chomene. Mu mtima nkhati, ‘Ŵadokotala ŵakuchita ntchito yiwemi chomene!’ Kufuma waka nyengo yira, nkhamba kuŵa na maloto ghakuti nizakachizgenge ŵanthu ku matenda. Nyengo yiliyose para adada ŵanifumba ivyo nkhukhumba kuzakachita munthazi, zgoro lane likaŵa waka lakuti, “Nkhukhumba kuzakaŵa dokotala.” Ndimo nkhambira kutemwa ntchito ya udokotala.

Pa nyumba pithu tikaŵa Ŵakatolika. Kweni nkhamanyanga vinandi yayi vya Chiuta, ndipo nkhaŵa na mafumbo ghanandi agho nkhazgoreka yayi. Kweni nkhati namba kusambira vya udokotala ku yunivesite, ndipo nkhakhorwa kuti umoyo ukachita kulengeka.

Nkhukumbuka umo vikaŵira apo kakwamba nkhawona selo la vyakumera pa maikirosikopu. Nkhatindikika kuwona umo selo likujivikililira lekha ku chithukivu na kuzizima. Nkhawonaso umo tunthu twamukati mwa selo tukukhwinyatira para twakhwaskana na mchere kweniso umo tukutukumukira para twaŵikika mu maji ghawemi. Ivi na vinyake vinandi, vikovwira kuti twamoyo tuchokotuchoko tuzgoŵerenge malo ghakupambanapambana. Nkhati nawona umo selo lililose likugwilira ntchito, nkhakhorwa kuti umoyo ukaŵako wekha yayi.

 Mu chaka chachiŵiri cha masambiro ghane, nkhawonaso ukaboni unyake wakuti Chiuta waliko. Apo tikasambiranga vya thupi la munthu, tikamanya umo woko lithu likuchitira kuti minwe yithu yithifukenge na kunyoloka. Chakuzizikaso chinyake ni umo minofu yikudemelelera ku viwangwa, ndipo vyose vikugwilira ntchito pamoza. Mwachiyelezgero, nkhasambira kuti tumisipa uto tukovwira kuti umoza mwa minofu ya woko ya chiwangwa chachiŵiri cha munwe vibatikane pamoza, tukupanga mphanda, iyo yikuŵa nga ni buliji ilo likovwira kamsipa kanyake ako kakulazga kuumaliro wa munwe kujumpha kusi kwake. Tumisipa utu tukudemelera chomene ku viwangwa vya munwe. Minwe yithu yiŵenge kuti yili kupangika nthena yayi, mphanyi tumisipa utu nthwakunyoloka waka, ndipo minwe yithu mphanyi yikugwira makora yayi ntchito. Apa nkhawona kuti walipo wavinjeru chomene uyo wakapanga thupi la munthu.

Nkhatindikikaso chomene na milimo ya Mlengi apo nkhasambiranga ivyo vikuchitika para bonda wakubabika. Nkhasambira kuti pambere wandababike, bonda munthumbo wakupokera mphepo za okusijini kufuma kwa nyina. Ntheura, mu tumathumba twa mphepo uto tukuŵa mu maphapu gha bonda mukuŵavya mphepo. Para nyengo yakuti bonda wababike yikusendelera, mu kathumba kalikose mukuzura tumajimaji tunyake. Kufuma apo, para bonda wababika, pakuchitikaso vinthu vyakuzizwiska. Khululu la mu mtima wa bonda likujalika, ndipo ndopa zikwamba kunjira mu maphapu. Pa nyengo iyi, tumajimaji tura tukovwira kuti tumathumba twa mu maphapu tuleke kudemelerana apo mphepo zikunjiramo luŵiroluŵiro. Nyengo yeneyiyo, bonda wakwamba kuthuta payekha.

Nkhakhumbanga kumanya uyo wakalenga vinthu vyakuzizwiska ivi, ntheura nkhamba kulimbikira kuŵazga Baibolo. Nkhazizikika na malango gha utozi agho ghali mu phangano ilo Chiuta wakachita na mtundu wa Israyeli vyaka vyakujumpha 3,000 kumanyuma. Chiuta wakaphalira Ŵaisrayeli kuti ŵawundirenge mavi ghawo, ŵagezenge nyengo zose, kweniso kuti munthu waliyose uyo wali na vimanyikwiro vya nthenda yakwambukira ŵamujalirenge kwayekha. (Lev. 13:50; 15:11; Doto. 23:13) Baibolo likayowoyerathu umo matenda ghakuthandazgikira, kweni fundo iyi ŵasayansi ŵayibowozga mu vyaka vyasonosono apa. Chinyake icho nkhamanya ntchakuti malango ghakukhwaskana na kugonana agho ghali mu buku la Levitiko ghakawovwiranga mtundu wose wa Israyeli kuŵa na umoyo uwemi. (Lev. 12:1-6; 15:16-24) Nkhamanya kuti Mlengi wakapeleka malango agha ku Ŵaisrayeli kuti ŵakhalenge makora, ndipo wakaŵatumbikanga awo ŵakapulikiranga malango ghake. Nkhakhorwa kuti Baibolo ndakufuma kwa Chiuta, Chiuta uyo zina lake nkhalimanyanga yayi pa nyengo iyo.

Apo nkhaŵa ku yunivesite kusambira vya udokotala, nkhakumana na msungwana munyake zina lake Lydie, ndipo tikamba chibwezi. Tikatorana na msungwana uyu mu 1965 nkhati nakhala pachoko waka kumalizga masambiro ghane. Kuzakafika mu 1971, Lydie na ine tikaŵa kuti tababirana kale ŵana ŵatatu, pa ŵana ŵithu 6 awo tili nawo. Lydie waŵa movwiri muwemi chomene kwa ine, pa ntchito yane ya udokotala kweniso mu mbumba yithu.

Nkhagwira ntchito pa chipatala chinyake vyaka vitatu pambere nindajure chipatala chane. Nyengo yichoko waka nati najura chipatala chane, mfumu  na muwoli wake, ŵalwari ŵaŵiri awo nanguŵazunura pakwamba ŵara, ŵakiza kuzakapenja wovwiri. Apo nkhambanga kulemba munkhwala wa mwanalume, muwoli wake wakanipempha kuti: “Chonde, a Dokotala, kulembapo munkhwala wakusazgako ndopa yayi.” Ine nkhazizwa, ndipo nkhafumba kuti: “Nadi? Chifukwa wuli?” Iyo wakati: “Ndise Ŵakaboni ŵa Yehova.” Apa nkhaŵa kuti nindapulikepo vya Ŵakaboni ŵa Yehova nesi ivyo ŵakusambizga pa nkhani ya ndopa. Mwanakazi uyu wakafumiska Baibolo lake na kunilongora chifukwa cha mu Malemba icho chikuŵachitiska kuti ŵakanenge kupokera ndopa. (Mil. 15:28, 29) Kufuma apo, iyo na mfumu wake ŵakanilongora ivyo Ufumu wa Chiuta uzamuchita; uzamumazga masuzgo, ulwari, na nyifwa. (Chivu. 21:3, 4) Ine nkhati: “Ivyo mukuniphalira apa ndilo likaŵa loto lane kufuma pa wanichi. Nkhasambira udokotala kuti nipumuzgenge ŵanthu ku masuzgo.” Nkhakondwa chomene mwakuti tikadumbiskana ora limoza na hafu. Apo ŵanthu aŵa ŵakaweranga, mtima wane ukaŵa kuti wafumamo kale mu Katolika, ndipo nkhasambira kuti Mlengi uyo nkhazizikikanga nayo chomene wali na zina, ni Yehova!

Nkhakumana na banja la Ŵakaboni ili katatu pa chipatala chane, ndipo nyengo yiliyose para takumana tikadumbiskananga kujumpha ora limoza. Nkhaŵachemera ku nyumba kwane mwakuti tikaŵe na nyengo yinandi yakudumbiskana vya Baibolo. Nangauli Lydie wakazomera kuŵapo para tikusambira Baibolo, kweni wakakolerananga navyo yayi vyakuti visambizgo vinyake Vyachikatolika ivyo tikasambizgika vikaŵa vyautesi. Ntheura, nkhachema bambo wa pa parishi yinyake ku nyumba kwithu. Tikapwakaskana za visambizgo vya tchalichi m’paka usiku pakati, kugwiliskira ntchito Baibolo pera. Ivyo tikadumbirana apa vikamukhorweska Lydie kuti Ŵakaboni ŵa Yehova ŵakasambizganga vyaunenesko. Pamanyuma, tikamba kumutemwa chomene Yehova Chiuta mwakuti mu 1974 tose tikabatizika.

Ivyo nkhasambira vyakukhwaskana na khumbo la Chiuta ku ŵanthu vikanipangiska kusintha vyakuchita pa umoyo wane. Ine na Lydie, chinthu chakwamba pa umoyo withu sono chikaŵa kuteŵetera Yehova. Tikaŵikapo mtima kulera ŵana ŵithu kuyana na fundo za mu Baibolo. Tikasambizga ŵana ŵithu kuti ŵatemwenge Chiuta kweniso ŵanthu. Ichi chikawovwira kuti tiŵe ŵakukolerana chomene mu mbumba yithu.—Mat. 22:37-39.

Para tikulaŵiska kumasinda, kanandi ine na Lydie tikuseka waka pakughanaghanira umo ŵana ŵithu ŵakawoneranga umo tikaŵira ŵakukolerana. Ŵakamanya kuti ivyo Yesu wakayowoya vyakuti “‘Enya’ waŵenge nadi enya, ‘Chara’ winu, waŵenge nadi chara,” ndiyo fundo tikenderanga pa nyumba  yithu. (Mat. 5:37) Mwachiyelezgero, apo mwana withu munyake msungwana wakaŵa na vyaka 17, Lydie wakamuzomerezganga yayi kwenda na gulu linyake la ŵawukirano. Msungwana munyake pa gulu ili wakaphalira mwana withu kuti, “Usange amama ŵako ŵakukukanira, ukapemphe adada ŵako!” Kweni mwana withu wakati: “Nisuzgikirechi. Iwo vyawo ni vimoza.” Nadi, ŵana ŵithu wose 6 ŵakawonanga kuti tili ŵakukolerana pakulondezga fundo za mu Baibolo. Tikuwonga chomene Yehova kuti pasono ŵanandi mwa ŵachibali ŵithu ŵakuteŵetera Yehova.

Nangauli unenesko ukapangiska kuti nisinthe vyakuchita vyane, kweni nipera nkhakhumbanga kugwiliskira ntchito ivyo nkhasambira pa udokotala kovwira ŵanthu ŵa Chiuta. Ntheura nkhajipeleka kuteŵetera nga dokotala pa Beteli ku Paris, ndipo pamanyuma ku Beteli yiphya ya ku Louviers. Nachita uteŵeti wakwendera ku Beteli vyaka pafupifupi 50. Mu nyengo iyi, nasanga ŵabwezi ŵawemi chomene pakati pa mbumba ya Beteli, ŵanyake ŵa iwo sono ŵali na vyaka vya m’ma 90. Zuŵa linyake nkhakondwaso chomene nkhati nakumana na munyamata munyake uyo wakaŵa kuti wiza waka pa Beteli. Vikasangika kuti ndine nkhaŵa dokotala uyo wakawovwira anyina apo iyo wakababikanga vyaka 20 kumanyuma!

Vyaka ivyo vyajumphapo, chitemwa chane pa Yehova chasazgikira chomene pakuwona umo wakulongozgera na kuvikilira ŵanthu ŵake kwizira mu gulu lake. Kukwambilira kwa m’ma 1980, Wupu Wakulongozga ukanozga pulogiramu ku United States yakovwira kuti paŵe kupulikiskana pakati pa Ŵakaboni ŵa Yehova na ŵachipatala pa nkhani ya ndopa.

Pamanyuma mu 1988, Wupu Wakulongozga ukakhazikiska dipatimenti yinyake pa Beteli yakuchemeka Hospital Information Services. Pakwamba, dipatimenti iyi, yikalaŵiliranga Makomiti Ghakudumbiskana na Chipatala (HLC) agho ghakapangika ku United States kovwira Ŵakaboni ŵalwari kusanga ŵadokotala ŵakwenelera awo ŵakupulikiska pa nkhani ya ndopa. Ndondomeko iyi yati yakhazikiskika pa charu chose, ku France nako makomiti gha HLC ghakapangika. Nkhuzizwa kuwona umo gulu la Yehova likulongolera chitemwa pakovwira ŵabali na ŵadumbu awo mbalwari pa nyengo yakusuzga iyi!

Nkhayitemwanga chomene ntchito ya udokotala. Kweni nkhati nasanda ivyo nkhadangizganga pakwamba, nkhawona kuti kuchizga kwakukhumbikwa chomene nkhwauzimu, kovwira ŵanthu kuti ŵaŵe pafupi na Yehova Chiuta uyo Ntchisimi cha umoyo. Nkhati napumura pa ntchito, ine na Lydie tikamaliranga maora ghanandi pa mwezi, kupharazga makani ghawemi gha Ufumu wa Chiuta, nga mbapayiniya ŵanyengozose. Tichali kuchitako mulimo wa kuponoska umoyo uwu kuyana na umo tingakwaniskira.

Nichali kuchita ivyo ningafiska kovwira ŵanthu ŵalwari. Kweni nkhumanya kuti nanga wangaŵa dokotala wakumanya ntchito wuli, wangachizga yayi maulwari ghose panji kutondeska nyifwa. Ntheura nkhulindilira mwakunweka nyengo iyo vyakuŵinya, ulwari, na nyifwa vizamuŵakoso yayi. Mu charu chiphya ichi, nizamukhala muyirayira na kusambira vinandi vya chilengiwa cha Chiuta, nga umo wali kupangira thupi la munthu mwakuzizwiska. Nadi, ivyo nkhakhumbanga pa wanichi vyafiskika pachoko waka. Nili na chigomezgo chose kuti viwemi chomene vikwiza munthazi!