Ua fanauhia vau i Pari, Farani, i 1941. Ua paari au i roto i te hoê utuafare haihai. Mea au roa na ˈu e haapii e e feruriruri. I te ahururaa râ o to ˈu matahiti, ua roohia vau i te maˈi tutoo e aita ˈtura vau i nehenehe e haere faahou i te haapiiraa. Ua faaue mai te taote ia faaea noa vau i nia i te roˈi ia ore to ˈu mahaha e fifi atu â. E rave rahi avaˈe ïa to ˈu faaea-noa-raa mai tera a taio noa ˈi i te titionare e a faaroo noa ˈi i te porotarama radio a te haapiiraa teitei Sorbonne no Pari. I te taime i parau mai ai ta ˈu taote ua ora to ˈu maˈi e e nehenehe au e hoˈi i te haapiiraa, oaoa iti rahi to ˈu. Na ô atura vau ia ˈu iho: ‘Mea faahiahia roa te ohipa ta te mau taote e rave!’ I reira ïa to ˈu faaotiraa e riro ei taata rapaau i te feia maˈi. I te mau taime atoa i ani mai ai to ˈu papa eaha te ohipa ta ˈu e hinaaro e rave, ua pahono noa vau, “Hinaaro vau e riro ei taote.” Tera ïa tei riro ei mea faufaa roa ˈˈe no ˈu i taua taime ra.

E Katolika matou, aita râ vau i ite rahi no nia i te Atua e mea rahi ta ˈu uiraa. I muri noa ˈˈe i to ˈu haamataraa i te haapii i te toroa taote i te haapiiraa teitei, ua papu ia ˈu e ua poietehia tatou.

Te haamanaˈo ra vau i te taime matamua a hiˈopoa ˈi au i te hoê tiare na roto i te hiˈo faararahi. Ua faahiahia roa vau i te huru hamaniraa o te mau taoˈa tahi ora o teie tiare, eaha to ratou huru i te tau veavea e te tau toˈetoˈe. Ua hiˈopoa maite atoa vau i te cytoplasme, te tahi atu tuhaa o te tiare. Ia tuuhia te reira i roto i te miti, e paari roa mai, area i roto i te pape, e rarahi mai ïa. Maoti tera huru hamaniraa e te tahi atu huru, e nehenehe te mau taoˈa tahi ora o te tiare e ora noa ˈtu eaha te tupuraa. I to ˈu hiˈopoa-maite-raa i teie mau taoˈa tahi ora, ua papu ia ˈu e aita te reira i tupu noa mai mai tera.

 I te pitiraa o te matahiti haapiiraa toroa taote, ua papu roa ˈtu â ia ˈu e te vai mau ra te hoê Atua. A haapii ai matou i te huru hamaniraa o te tino taata, ua hiˈopoa maite matou eaha tei tauturu i te mau manimani rima ia hautiuti. Mea faahiahia roa ia ite e nafea te mau uaua iˈo e te mau ivi e ohipa amui ai. Ei hiˈoraa, ua haapii au e te vai ra te mau uaua o te nati ra hoê uaua iˈo o te tuhaa i nia mai i te rima i te pitiraa o te ivi o te manimani rima. E afahia teie mau uaua mai te mau eˈa turu te huru ia nehenehe te tahi atu mau uaua e tae atu i te poro o te manimani rima a hee maitai ai te reira. Na te tahi puohuraa meumeu e tapea mai i te mau uaua tei piri mai ra i te ivi o te manimani rima. Aita anaˈe tera faanahoraa, e tô mai ïa te mau uaua mai te taura o te fana. No reira i papu maitai ai ia ˈu e na te tahi puai rahi i poiete i te tino taata.

Ua faahiahia roa ˈtu â vau i tei poiete i te mau mea ora atoa. Ua haapii au mea nafea te hoê pêpe e huti ai i te aho i muri aˈe i to ˈna fanauraahia. I roto i te opu o to ˈna mama, e fanaˈo te pêpe i te mataˈi ora na roto i te taura pito. Aita ïa te pêpe e huti atura i te aho maoti te mau pute e vai ra i roto i to ˈna mau mahaha. A piri mai ai râ te fanauraa, e tapoˈihia te rotoraa o te mau pute tataitahi i te hoê pape taa maitai. A fanauhia ˈi te pêpe, mea faahiahia roa ia ite eaha te tupu i roto i to ˈna tino a huti ai o ˈna i te aho i te taime matamua. I roto i te mafatu o te pêpe, e piri te hoê apoo. E tauturu te reira ia faahaere i te toto i roto i to ˈna mau mahaha. I tera taime, e ohipa te pape taa maitai ia ore te mau pute i roto i te mahaha e piripiri te tahi i te tahi, a î ai te mataˈi i roto i taua mau pute ra. I reira, e nehenehe ïa te pêpe e huti i te aho.

Ua hinaaro vau e haapii no nia i tei poiete i teie mau mea faahiahia mau, haamata ˈtura ïa vau i te taio maite i te Bibilia. Ua faahiahia roa vau i te mau ture no nia i te ea ta te Atua i horoa i te mau Iseraela a 3 000 matahiti aˈenei. Ua faaue te Atua i te mau Iseraela ia tapoˈi i to ratou tutae, ia horoi tamau i to ratou rima i te pape e ia faataa ê i te feia maˈi i te toea o te nunaa. (Lev. 13:50; 15:11; Deut. 23:13) Ua faahiti aˈena te Bibilia i teie mau faanahoraa no te ara i te maˈi pee, area te mau aivanaa, a 150 matahiti noa hoi to ratou taaraa i te reira. Ua taa atoa ia ˈu no te aha i horoahia ˈi te mau ture i roto i te Levitiko ia taoto te hoê tane i te hoê vahine. Na roto i tera faanahoraa, eita ïa te nunaa e viivii. (Lev. 12:1-6; 15:16-24) Ua taa ïa ia ˈu e ua horoa tei poiete i teie mau ture na te mau Iseraela no to ratou maitai e ua haamaitai o ˈna i te feia tei haapao i ta ˈna mau faaueraa. Ua papu ia ˈu e ua papaihia te Bibilia i raro aˈe i te aratairaa a te varua o te Atua, te hoê Atua ta ˈu i ore i matau atura.

Te haapii noa ra vau i te toroa taote a farerei ai au ia Lydie. Ua haamatau mâua e faaipoipo atura i 1965 e aita ta ˈu tau haapiiraa i hope atura. I 1971, e toru ïa tamarii ta mâua e i muri mai, fanau faahou mai nei e toru â tamarii. I roto i ta ˈu ohipa ei taote e i roto atoa i te utuafare, ua riro Lydie ei tauturu mau no ˈu.

Ua ohipa vau i te fare maˈi e toru matahiti hou a matara ˈi ta ˈu iho piha rapaauraa taata. I tera atoa taime to ˈu farereiraa na hoa faaipoipo ta ˈu  i faahiti i te omuaraa o ta ˈu faatiaraa. Ua maˈihia te tane e i to ˈu tapaopaoraa i te raau e titauhia ia haere e tii, na ô mai nei te vahine: “Taote, eiaha e toto i roto i te raau.” Ma te maere, ani atura vau: “No te aha hoi?” Pahono mai nei o ˈna: “E Ite no Iehova mâua.” Aita vau i faaroo aˈenei no nia i te mau Ite no Iehova e ta ratou faaotiraa no nia i te toto. Faaite mai nei te vahine i te irava Bibilia o te faataa ra no te aha eita raua e farii i te toto. (Ohi. 15:28, 29) Faaite atoa mai nei raua ta ˈna tane eaha ta te Faatereraa arii a te Atua e faatupu no a muri aˈe, e ore roa te mauiui, te maˈi e te pohe. (Apo. 21:3, 4) Parau atura vau ma te oaoa: “Te parau mai ra orua e e tupu iho â ta ˈu i moemoeâ noa na! Tera te tumu vau i riro mai ai ei taote, no te tamǎrû hoi i te mauiui.” No to ˈu oaoa rahi, ua tauaparau matou hoê hora e te afa. A vaiiho mai ai raua ia ˈu, ua faaoti au e faarue i te haapaoraa Katolika e ua haapii atoa vau e o Iehova te iˈoa o tei poiete i te mau mea atoa ma te faahiahia mau!

Farerei faahou atura vau na hoa faaipoipo Ite no Iehova e toru taime i te piha rapaauraa e i taua mau taime ra, ua tauaparau matou hau i te hoê hora. I muri aˈe, ua titau manihini au ia raua i to ˈu fare no te tauaparau no nia i te Bibilia. Ua apiti atoa mai Lydie no te haapiiraa Bibilia noa ˈtu aita o ˈna i farii e mea hape te mau haapiiraa Katolika. Ua titau manihini ïa vau i te hoê perepitero Katolika i te fare no te tauaparau no nia i ta ratou mau haapiiraa, ma te faaohipa noa râ i te Bibilia. Ua paraparau matou e tae roa ˈtu i te maororaa po. I reira to Lydie papuraa e o te mau Ite no Iehova te haapii ra i te parau mau. I muri mai, ua rahi atu â to mâua here ia Iehova e bapetizohia ˈtura mâua ei Ite no Iehova i 1974.

I to ˈu haapiiraa no nia i te opuaraa a te Atua no te huitaata, ua hiˈopoa vau eaha te mea faufaa roa ˈˈe i roto i te oraraa. No mâua Lydie o te taviniraa ïa ia Iehova. Ua faaoti papu mâua i te haapii i ta mâua mau tamarii ia ora ia au i te mau ture aveia Bibilia. Ua haapii mâua ia ratou ia here i te Atua e i te taata e maoti te reira i hoê ai to matou utuafare.​—Mat. 22:37-39.

E ata na mâua Lydie a haamanaˈo ai i te huru o te mau tamarii i mua i te mau faaotiraa ta mâua e rave no te utuafare. Ua ite ratou i te faaueraa a Iesu “ia riro . . . ta outou ‘E’ ei e, ta outou ‘Eita’ ei eita” e tera atoa ta matou ture i te fare. (Mat. 5:37) Teie te tahi faatiaraa no nia i te hoê o ta mâua mau tamahine. I te 17raa o to ˈna matahiti, aita Lydie i faatia ia haere o ˈna na muri i to  ˈna mau hoa. Parau atura hoê o to ˈna mau hoa ia ˈna, “Aita anaˈe to oe mama e faatia, a ani ïa i to oe papa!” Pahono atura ta mâua tamahine: “Aita e faufaa. Hoê â manaˈo to to ˈu papa e to ˈu mama.” Ua ite iho â ta mâua na ono tamarii e ua hoê noa to mâua manaˈo i roto i te faaohiparaa i te mau faaueraa Bibilia. Auê mâua i te mauruuru ia Iehova i te iteraa e rave rahi o to mâua fetii i te riroraa mai ei Ite no Iehova!

Maoti te parau mau, ua taa ia ˈu e e ere ta ˈu ohipa i te mea faufaa roa ˈˈe i roto i to ˈu oraraa. Tera râ, ua hinaaro vau e faaohipa i to ˈu aravihi ei taote no te tauturu i te nunaa o te Atua. Ua tauturu ïa vau ei taote i te Betela no Pari e i muri aˈe, i te Betela apî no Louviers. Fatata 50 matahiti to ˈu taviniraa i te Betela ei rima tauturu. I te roaraa o tera mau matahiti, ua riro e rave rahi mero o te Betela ei hoa piri no ˈu. I teie mahana, e 90 tiahapa matahiti to vetahi o ratou. Ua maere atoa vau i ta te hoê mero apî o te Betela i parau mai a farerei ai mâua. Ua faatia mai o ˈna e na ˈu i tauturu i to ˈna mama ia faafanau ia ˈna a 20 matahiti i teie nei!

A mairi ai te tau, ua rahi atu â to ˈu here no Iehova i to ˈu iteraa e te faaohipa ra o ˈna i ta ˈna faanahonahoraa no te aratai e no te paruru i to ˈna nunaa. I te area matahiti 1980, ua haamau te Tino aratai i te hoê faanahoraa i Marite no te tauturu i te mau taote ia taa maitai i te faaotiraa a te mau Ite no Iehova ia ore e farii i te toto.

No reira, i 1988, ua haamau te Tino aratai i te Tuhaa haamaramaramaraa i te pae rapaauraa i te Betela. I te omuaraa, ua faatere teie tuhaa i te mau Tomite tuatiraa e te fare maˈi (CLH) haamauhia i Marite no te tauturu i te mau Ite no Iehova ia farerei i te mau taote o te faatura i ta ratou faaotiraa no nia i te toto. I te haamauraahia te CLH na te ao nei, ua haamau-atoa-hia te reira i Farani. Auê te faahiahia ia ite e nafea Iehova e tauturu ai i to tatou mau taeae e tuahine tei maˈihia na roto i ta ˈna faanahonahoraa i te taime tano!

Na mua ˈˈe, o te rapaauraa i te taata te mea faufaa roa ˈˈe i roto i to ˈu oraraa. I to ˈu hiˈopoa-maite-raa râ i to ˈu oraraa, ua taa ia ˈu e mea faufaa aˈe te tautururaa i te taata ia haapii no nia ia Iehova, te tumu o te ora e ia tavini ia ˈna. I muri mai i to ˈu faatuhaaraahia, ua rave mâua Lydie i te taviniraa pionie tamau e ua poro mâua i te parau apî oaoa o te Faatereraa arii a te Atua e rave rahi hora. Te tutava nei mâua i te rave i tei maraa ia mâua i roto i te ohipa pororaa e faaoraraa i te taata.

Te tamau noa nei au i te rave i te maraa ia ˈu no te tauturu i te feia maˈi. Teie nei râ, ua taa ia ˈu e eita e haere i te hoê taote maitai roa ia rapaau i te mau maˈi atoa aore ra ia faaore i te pohe. Te tiai ru nei ïa vau i te taime e ore roa ˈi te mauiui, te maˈi e te pohe. I roto i te ao apî, eita to ˈu taime e pau no te haapii atu â no nia i te mau mea atoa ta te Atua i poiete, mai te hamaniraa faahiahia mau o te tino taata. Ua tupu te tahi mau mea ta ˈu i moemoeâ noa na. Ua papu râ ia ˈu e mau mea maitai roa ˈˈe te tiai mai ra i mua nei!