Mi son nassesto in 1941, in Paris, nela Frància. La me fameia no la gavea tanti soldi. Con diese ani, go ciapà la tubercolose e me ga tocà fermarme de ndar ala scola. Mi son restà tanto disgustà parché me piasea tanto de imparar. I dotori i ga dito che me tochea restar in leto parché i me palmoni i era massa fiachi. In quel tempo, mi ledea un dissionàrio e scoltea la Ràdio Sorbonne, dela Università de Paris. Quando el dotor el me ga dito che ero drio restar meio e che podea tornar ala scola, go saltà de contento. Mi go pensà: “Che bravi che i ze i dotori!” Alora, me ga dato voia anca mi de guarir le persone. Par quela che quando el me pare el me domandea: “Cossa vuto far quando te vien grando?” Mi ghe disea: “Mi vui esser dotor.” E de lì avanti, mi go bio tanta voia de esser dotor.

La me fameia la era catòlica, ma mi savea poco e gnente sora Dio e me fea tante domande. Go scominsià a studiar nela università par esser dotor e son restà sicuro che Dio el gavea creà tute le robe.

Me ricordo tanto ben del giorno che go visto le sèlule de un fior. Son restà maraveià de veder cossa sucede rento la sèlula quando l’è fredo e quando l’è caldo. Me ga piasesto anca veder che una parte dela sèlula la resta pi granda quando la ze nela àqua e pi pìcola quando la ze nel sal. Par causa de questo e de tante altre robe che sucede rento la sèlula, tuto quel che ga vita l’è bon de seitar a viver, no ghe vol dir el posto che l’è. Quando go visto tuto quel che ghen’è rento  la sèlula, son restà sicuro che qualchedun el gavea creà tuto.

Nel secondo ano che ero drio studiar par esser dotor, go capio ancora de pi che ghen’è pròpio un Dio. Son restà maraveià quando go visto come i mùscoli, i ligamenti e i tendoni i laora tanto ben insieme. Mi go imparà che ghen’è un tendon che el va del mùscolo del brasso fin el secondo osso del deo. Alora el se spartisse in due, e el fà come se fusse un ponte. Cossita quelaltro tendon, che el va fin la ponta del deo, l’è bon de stirar e tornar indrio e restar nel medèsimo posto. I tendoni che ghen’è nei dei dela man i ze pròpio forti. Cossita, i dei i pol laorar ben parché i tendoni i pol stirar e tornar indrio.

Mi go visto che quel che el ga creà el nostro corpo el ga tanto saver. Son restà ancora pi maraveià quando go studià sora come un bambin el tira el fià dopo che el nasse. Vanti de nasser, un bambin no’l ga mai tirà el fià parché el ga sempre ricevesto el ossigénio che el ga bisogno dela so mare. Alora, i pìcoli baloni che ghen’è rento i palmoni no i se ga mai impinio de ària. Quando ghe manca arquante stimane par el bambin nasser, questi pìcoli baloni i fà una roba de nome surfactante. Par causa de questa roba, questi baloni no i resta mia pi tacadi. Cossita, el sangue el va par i palmoni e el bambin l’è bon de tirar el fià lu sol.

Mi go scominsià a leder la Bìblia parché volea cognosser meio el Dio che el gavea creà tute queste robe. Son restà maraveià de cognosser arquante lege che Dio el gavea dato ai israeliti, de pi de 3 mila ani indrio. Par esémpio, Dio el gavea dito che i israeliti i gavea de lavarse sempre e assar de quarantina una persona che la gavea una malatia che podea passarla ai altri. (Lev. 15:11; 13:50) Dio el gavea anca dito che, quando i israeliti i ndesse far le so sporchìssie, i gavea de far un buso e farle rento. (Deu. 23:13) Par causa de queste lege, le malatie no le passea mia ai altri. Fà sol intorno de 150 ani che i studiosi i lo ga savesto. Go anca capio che le lege sora el sesso nel libro de Levìtico le ga fato ben par la salute de tuti i israeliti. (Lev. 12:1-6; 15:16-24) Go capio che Dio el benedia quei che lo obedia e che el gavea dato queste lege a lori parché el ghe volea ben. Son restà sicuro che la Bìblia la ze la Parola de Dio, ma gnancora no cognossea el so nome.

Quando ero drio studiar nela università, go cognossesto una gióvena de nome Lydie, e me go passionà par ela. Noantri se ghemo maridà in 1965 quando ero ancora nela università. In 1971, belche gaveino tre dei nostri sei fioi. Lydie sempre la me ga incoraià a far el me laoro e anca la me ga giutà a tender dela nostra fameia.

Go laorà tre ani nte un ospedal e dopo go scominsià a laorar come dotor nte un posto che l’era sol mio. L’è stà in questa època che go parlà con quel omo e quela dona del scomìnsio. Quando go dito che el omo el gavea de tor un rimèdio, la dona la me ga dito:  “Dotor, volemo un rimèdio sensa sangue.” Mi no spetea mia questo. Alora ghe go domandà: “Sito sicura? Parché?” Ela la me ga dito: “Noantri semo Testimònie de Geovà.” Mi mai gavea sentio parlar dele Testimònie de Geovà e cossa che lore le pensea sora el sangue. Alora, la dona la ga ciapà la Bìblia e la me ga mostrà parché che lori no i doperea sangue. (Ati 15:28, 29) Dopo, lori i me ga parlà che el Regno de Dio el ndarà finir col sofrimento, cole malatie e cola morte. (Apo. 21:3, 4) Suito ghe go dito: “Mi volea una vita cossita ancora quando ero picinin. Son deventà dotor parché volea giutar le persone a sofrir manco.” Me ga piasesto tanto de quel che i me ga dito che ghemo ciacolà par una ora e mesa. Quando lori i ze ndati via, go dessidio che no ndaria pi esser catòlico. Son restà contento de saver che el nome del Creador che me piasea tanto l’è Geovà.

Quel omo e quela dona i ze ndati catarme ancora tre volte nel me laoro. Tute le volte ghemo ciacolà de pi de una ora. Alora li go convidà par ndar ala me casa par parlar de pi sora la Bìblia. Lydie la ga scominsià a studiar insieme, ma no la acetea che arquante robe dela ciesa catòlica le era sbaliade. Alora, go ciamà un prete par parlar con noantri. In quel giorno, ghemo ciacolà fin note sora quel che la ciesa la insegna doperando sol la Bìblia. Cossita, Lydie la ze restada sicura che le Testimònie de Geovà le insegnea la verità. Dopo de questo, el nostro amor par Geovà l’è deventà cada volta pi forte, e se ghemo batesà in 1974.

Quando go imparà quel che Dio el vol far par le persone, go scominsià a pensar de pi in quel che mi ero drio far nela me vita. Par mi e Lydie, servir a Geovà l’è deventà la roba pi importante dela nostra vita. Voleino anca slevar i nostri fioi de acordo con quel che la Bìblia la dise. Par esémpio, ghe ghemo insegnà a amar a Dio e ale persone e cossita la nostra fameia la ze restada pi unida — Mat. 22:37-39.

I nostri fioi i savea che mi e Lydie èrino de acordo nela maniera de slevarli. Par esémpio, lori i savea che feino quel che dise Mateo 5:37. In questo testo, Gesù el ga dito che el si ghe vol dir si e el nò ghe vol dir nò. Dele volte, mi e Lydie ridemo quando se ricordemo de come i nostri fioi i savea che erino sempre intesi. Par esémpio, la  nostra fiola che la gavea 17 ani la ga domandà che Lydie la assesse ndar insieme cole altre gióvene. Lydie la ghe ga dito che no la podea ndar. Alora, una dele gióvene la ga dito ala nostra fiola: “Alora domanda al to pare.” La nostra fiola la ghe ga dito: “Questo no va ben parché lori sempre i ze intesi.” I nostri sei fioi i savea che tuti i due voleino meter in pràtica quel che la Bìblia la insegna. Ancoi, semo tanto contenti parché tanti dela nostra fameia i serve a Geovà.

Quando go cognossesto a Geovà, la roba pi importante l’era servirlo. Ma mi volea doperar quel che mi savea come dotor par giutar i servi de Dio. Alora mi go giutà come dotor nel Betel de Paris e dopo nel Betel de Louviers. Fà belche 50 ani che laoro come dotor par giutar i beteliti. Son contento parché mi go cognossesto tante persone lì e arquante le ga belche de pi de 90 ani. Mi son restà anca maraveià de catar un betelita che mi gavea tendesto dela so mama quando lu l’è nassesto 20 ani indrio.

In tuti questi, ani mi go visto come Geovà el dopera la so organisassion par insegnar e proteger el so pòpolo. Questo me ga fato amar ancora de pi a Geovà. Par esémpio, nel scomìnsio dei ani 1980, el Corpo Governante el ga scominsià a giutar i dotori a saver cossa che le Testimònie de Geovà le pensa sora el sangue.

In 1988, el Corpo Governante el ga fato un departamento in Betel par spiegar ai dotori e ai ospedai tuto quel che ghe volea sora i tratamenti de salute par le Testimònie de Geovà. Nel scomìnsio, questo departamento el tendea dele Comission de contato coi ospedai (COLIH). Questa comission la giutea le Testimònie de Geovà nei Stati Unidi a far el meio tratamento sensa doperar el sangue. Dopo, le ze state creade altre comission cossita in tuto el mondo e anca qua nela Frància. Mi resto tanto contente de veder che la organisassion de Geovà la tende pròpio ben dei fradei quando lori i ga de pi bisogno.

Mi volea tanto guarir le persone. Ma go capio che pi importante che questo l’era giutar le persone a esser amighe del so Creador, Geovà. Par quela, dopo che go scominsià a ciapar la aposentadoria, mi e Lydie ghemo scominsià a tor de pi del nostro tempo par predicar le bone notìssie come pionieri regolar. E ancoi, seitemo a far el meio che podemo in questo laoro parché el pol dar vita eterna ale persone.

Mi seito a far quel che posso par giutar i maladi, ma sò che gnanca el pi bravo dotor l’è bon de finir fora cole malatie e cola morte. Par quela son premoso de veder el giorno che no ghen sarà pi dolor, malatie e gnanca la morte. Mi sò che in Paradiso, mi gavarò tuto el tempo par imparar sora quel che Dio el ga creà. Par esémpio, par studiar de pi sora come Dio el ga fato el nostro corpo. Sicuro che el futuro el sarà tanto bel e che quel che mi volea tanto da picinin ndarà suceder del bon!