Kiyariwe eyaakha ya 1941, mwa emusi yoowiyeviha yaakhala oParis oFrança. Miyo wannakisivela oxuttera. Emaara kaarakano iyaaka 10, kaahiya orowa oxikola mwaha wooweera kaakhalano eretta ya elapaha (tuberculose), nto munnaweera wuupuwelela moota kaaripiwaaka murima. Mameediko yaakileela weera kintthuneya okhalaka vakaamani mwaha wooweera masaso aka yaavoreeyeya. Mwaha wa yeeyo, mwa minyeeri sintxipale, kaaviriha ehuhu kasomaka adicionario ni wiiwelela iprograma sa radio Sorbonne a Universidade ya oParis. Medico akileelakaru weera kaapatxera olama ni kitthikeleke weetta oxikola kaahakalala. Nto kaahuupuwela: ‘etthu mamedico ampakaaya ti yootikiniha!’ Okhuma vaavale okela muhoolo, yootthunaaka yaari yoowalamiha atthu. Vaavo apaapa yaakikohaya etthu kintthunaaka okhala kannuwa vale miyo kannawaakhula, “kintthuna okhala medico.” Ti hiiho kaapatxenraaka osiveliwa ni medicina.

Amusi aka yaari ookatolika. Miyo kaasuwela itthu vakaanene voohima sa Muluku, mene kaakhalano makoho mantxipale. Kapatxenre waakhulela weera ekumi eropattuxiwa kipatxerakaru omusoma medecina universidade.

Miyo kinnupuwela ekwaha yoopatxera konnaaka ecelula ya efulori kivarelaka muteko microscopio. Kaatikiniheya woona impari sa ecelula sinoonelaaya orira naari oviha. Nave kahoonelela weera citoplasma (esubustancia enkhala mpuwa mwa ecelula) ennavarihana ni sal ni annamwaramwareya maahi. Ereyasao ele ni ikina, sinneeriha weera erutthu ahu ewereke wiikhoveleliha ni opaka matxentxo ni itthu sinnirukurera. Koonelelakaru weera ecelula ti yooxupa wiiwexexa, kahoona weera ekumi khayenre othatuwa.

 Eyaakha aka ya naaveli kimpakaka medicina, kaahonelela weera Muluku ookhala. Mwa yoosoma ya anatomia, naasoma moota ethayi evarannaya ni itendao ni moota sinivaraaya vamoha—yeeyo eri yootikiniha ya engenharia! Mwa ntakihero, moota opakiwaaya moono, onnawereya wookola ni opintta ikatha. Nave kaaxuttera weera etendao envarihana ni ethayi ya vanikhatani ennakawanyeya yavara nikhuva na naaveli na mukathani, yeerihaka weera etendao enkela mukathani evireleleke okala vanipuroni vaya. Opwaha wa yeeyo, itecido soolipa sinnavarana ni itendao soowattamela makhuva a mukathani. Sahapakinwe hiiho, itendao sa mmatatani sarowa okhala soowookowa ni ikatha sa mmatatani khasaarowa ovaraka muteko nnene. Miyo kahoonelela weera mwilipa opanke erutthu ya mutthu toosuwelaxa vantxipale.

Kaatikiniheya ni Mpattuxa a ekumi kisomakaru moota mwana ommumulawe ekhwaha yoopatxera. Mwaana ahinaaye oyariwa onnaakela iphumu moorwela mwa cordão umbilical. Mwa yeeyo, aleveolos (akhaanene enkhala ntoko ebalao mpuwa mwa masasu) khansareya iphumu. Nto isemana vakhaaneene mwaana ahinaaye oyariwa, iparede sa mpuwa mwalveolo sinnahuruweliwa ni esubustancia eneeriwa surfactante. Vaavo mwaana oñyariwaawe ni ompatxeraawe omumula ekwaha yoopatxera, sinneereya itthu sootikiniha. Vamurimani va mwaana onnawaleya mwiithe, weerihaka weera ephome eroweke mmasasuni. Ehuhu ene yeeyo, surfactante onnakhottihera iparede sa alvéolo ovarana ni moohipisa sinnasareya iphumu. Ookolakaru ikatha mwaana onnapatxera omumula meekhawe.

Miyo kannatthuna omusuwela Mpattuxa a itthu iya sootheene sootikiniha. Khaapatxera omusoma Biblya ni yootthuna omwiiwexexa. Kaatikiniheya ni malamulo Muluku aavahaawe ana a Israeli voohima sa oratta mwa iyaakha 3.000 sa muttuli. Muluku ahaaleela ana a israeli weera yaatthunaka wiitthuwa ethipeleke nlitti ni yuuheleke, ni enyaweke emaara eri yoothene ni onvalaanya naari omuhela (quarentena) mutthu orinono eretta yoovalihaniwa. (Onam. 13:50; 15:11; Ola. 23:13) Ni miruku iya sa mBiblyani, sanneeriha weera iretta sihimwaramwareyeke. Etthu ela, masientista yoonelenle mwa iyaakha 150 sa muttuli. Nave kahoonelela weera malamulo yaavahinwaaya ana a israeli voohima sa orattela elopwana ni ethiyana eri ebuukhu ya Onamakeya sannakhavihera okhalano ekumi yooreera. (Onam. 12:1-6; 15:16-24) Khaphiyera wuupuwela weera mpattuxa ovanhe miruku iya, aavanhe uupuwelaka mureerelo aya. Ni emaara yaattharaaya miruku iya, Owo annareeliha. Mene miyo kaapatxera ororomela weera Biblya uupuxeriwe ni Muluku, mene nkaasuwenle nsina nawe.

Emaara kamusomaaka faculdade a medicina, kaamusuwela mwaamwali eeriwa Lydie ni aakisivela. Eyaakha ya 1965 naathelana, kihinaakuve ommaliha faculdade aka. Eyaakha ya 1971, neera nrinono ene anamwane araru, nto vano nrinono anamwane 6. Amwaaraka eniitthaniwa Lydie, khiyahiyerenre okikhavihera omutekoni waka ni veemusini vahu.

Miyo koovara muteko hospital mwa iyaakha tthaaru kihinaakuve ohula eclinika aka.  Moottharelana khaakhavihera ntheli nenle kihimmaaka woopatxerani. Ehuhu kaarowaaka waalepela epaphelo ya murette aalophwana, aathiyana yaahera: “Txontte, adoutore, nintthuna murette woohikhala ephome.” Kaattuttuxereya ni kaakoha: “Ekaikhai? Mwaha wa heeni?” Awo yahakhula: “Hiyo na Anamoona a Yehova.” Miyo nkatonko wiiwa voohoma sa Anamoona a Yehova moota enoonelaaya ephome. Avinyaka aamukuxa Biblya ni aakonihera mwaha wa heeni ahinaakhulelaaya ephome. (Mit. 15:28, 29) Moottharelana, owo ni aiyawe yaakileela itthu Omwene wa Muluku onrowaaya opaka muhoolo: omaliha ohaawa, iretta ni okhwa. (Apok. 21:3, 4) Ehuhu ene yeele miyo kaahera: “Etthu eyo munkileelanyu yaari yootthunaaka okhuma enamwane aka! Miyo kookhala medico weera kivukule ohaawa wa atthu.” Yaakisivela etthu yaahimaaya ni naatthekula nimalihaka ewoora ni emeya. Ntheli nne nipwahakaru kaalakela ohitthikela okatolika. Kaaxuttera weera mpatthuxa kamutikhinaaka vantxipale aakhalano nsina: Yehova!

Ntheli nne nahoorwa oclinika waka ikwaha sookhwanaka tthaaru, mwa ikwaha sootheene yaarwaaya nannatthekula opwaha ewoora emoha. Kahaawopa weera ekiphwanye owaani weera nuulume itthu sa mBiblyani. Lydie ahaakhulela weera nisomeke vamoha, mene khaakhulela weera sooxuttiha ikina sa okereja katolica saari sa ethiru. Mwa yeeyo, kanwopa paatiri weera nitthekule vamoha. Naatthekula voohima sa sooxuttiha sa okereja mpaka ohiyu eriyari ninvarihelaka muteko Biblya. Etthu ele yaamweeriha Lydie waakhulela weera Anamoona a Yehova yaaxuttiha ekhaikhai. Okhuma vaavale, omusivela wahu Yehova waahunnuwa, ni naBatiziwa eyaakha ya 1974.

Yootthuna ya Muluku ni atthu kaaxuttenraaka, yaakeriha otxentxa sootthunasaka. Lydie ni miyo, onvarela muteko Yehova yaakhala etthu yootepa ootthuneya mweekumini mwahu. Hiyo naalakela waahuwa anamwane ahu moovarihana ni malamulo a Biblya. Ninnaxuttiha omusivela Muluku ni atthu, nto eyo enneeriha emusi ahu okhala yoowiiraana.—Math. 22:37-39.

Anamwane ahu yaasuwela weera miyo ni Lydie nookhalano soothanla imoha ntoko asipaapa. Ikwaha ikina hiyo ninnatheya nuupuwelaka eyo. Awosa yaasuwela weera vate vahu naatthara miruku sa Yesu sineera “masu anyu ekhale ‘anyi’ anyi, ‘hoye,’ hoye.” (Math. 5:37) Mwa ntakihero, mwanihu mwaamwali emaara aaraweno iyaakha 17, Lydie khaamuhiya weera owo akhumeke vate ni asimwali akhwaawe yahanvarela muteko Yehova. Nto mwaamwali mukina amweerela  mwanihu: “Wakhala weera ameyanyu animookhottiherani okhuma vate, mwaavekeleke apapinyu.” Nto mwanihu aahaakhula: “eyo khenvareleya muteko. Asipapaka arinono soothanla imoharu.” Anamwane ahu ale 6 yaasuwela weera miyo ni amwaaraka nri owiiraana nivarelaka muteko miruku sa mBiblyani. Ninneera asantte vantxipale naawoonaka amusi ahu envarelaka muteko Yehova.

Mweekhaikhai omusuwela Yehova wootxentxa sootthunasaka sa mweekumini. Miyo kaatthuna ovarela muteko itthu kaaxuttenraaka ni emedicina weera kaakhavihere atthu a Muluku. Mwa yeeyo, miyo kaahiveherera weera kavare muteko ntoko meediku oBetheli ya oParis muhoolo waya oBethel ya Louviers. Miyo kinnakhavihera muteko oBethel ntoko meediku mwa iyaakha sinaatthamela 50. Mwa ehuhu ene yeeyo, koopaka onthamwene wooreera ni mabetelita antxipale, ni akina mwa yaawo aakhalano iyaakha 90. Nihuku nimoha kaakhalano yoottutuxera yoohakalaliha vaavo kaamusuwenlaaka mbetelita mmoha munyowani: miyo kotoko okhala ekwaartu awe iyaakha 20!

Mwa iyaakha sintxipale miyo kohoona moota Yehova onvariheralawe muteko mareherero awe weera aahoolele ni waakosoopa atthu awe. Eyo yaahatxeerera nsivelo naka wa yoowo. Mwa ntakihero, woopatxerani wa eyaakha ya 1980, Mukuttula Woolamulela waapaka eprograma wEstados Unidos weera yaakhavihereke mamediku wiiwexexa yoororomela ya Anamoona a Yehova voohima sa ephome.

Eyaakha ya 1988, Mukuttula Woolamulela waapaka edepartamento enyowani oBethel eneeriwa Serviços de Informações sobre Hospitais. Woopatxera edepartamento ela yaakosoopa Comissões de Ligação com Hospitais (HLC) yaapakiwe wEstados Unidos weera yaakhavihereke Anamoona a Yehova ophwanya nikhavihero na ekumi ehivareliwaka muteko ephome. Okhuma vaavawo, saapakiwa Colihs elapo yootheene, ohela mpuwa oFrança nno. Eri yootikiniha woona moota mareherero a Yehova araaya a nsivelo mowaavaha nikhavihero asinna nenlo awo antthunaaya!

Yootthunaaka yaari yoowaalamiha atthu, mwa yeeyo, kannasiveliwa ni medicina. Kiwehexexaka sootthuna saka, koosuwela weera olamiha wootthuneyaxa ori waakhavihera atthu mukhalelo wa omunepani, naari neere, waakhavihera atthu okhalano onthamwene ni ole onvaha ekumi, Yehova Muluku. Mwa yeeyo, kireformarikiru, Lydie ni miyo, ninnaviriha ehuhu yintxipale nivaraka muteko woolaleera mitthenka sooreera sa Omwene wa Muluku ntoko mapiyoneru anthiti. Mpaka olelo, hiyo ninniilipihera opaka ele hiyo ninweraahu weera nivare muteko ola onvuluxa ikumi.

Miyo kinnavirelela opaka ele kinweraaka weera kivukule ovoreya wa ale anvoreiwa. Mene miyo koosuwela weera hata mamediku khanwera omaliha iretta sootheene ni okhwa. Kinnahakalala kiwehereraka ehuhu ovoreya, iretta ni okhwa ohinrowaaya okhala tho. Koosuwela weera moohipisa, elapo enyowani kinookhalano ekumi yoohimala ni oxuttera Soopattuxiwa sa Muluku, ohela mpuwa moota opankaawe mootikiniha erutthu ya mutthu. Kinnaroromela weera ennarwa etthu yooreera, emaara yootthuna ya enamwane aka enroowaaya okwaniheriwa moomalela!