Zaho teraka tamy 1941, ta Paris, a France. Tsy pan̈arivo lafamìko. Zaho ten̈a tia mianatra, ke diso fan̈antinan̈a mare zaho koa fa naharen̈y fa voany tiberkilaozy zaho ke tsy afaka mandeha lekaoly. Folo taon̈o zaho tamy zen̈y. Nirahiny dokotera nandrinandry tan̈abony fandrian̈a fo zaho, amy zen̈y tsy lonja avokavokonaka. Ke tan̈atiny fanjava maromaro, zaho niasa namaky diksionera fo ndreky nitandren̈y programo tamy Radio Sorbonne. Izio fandaharan̈a nalefany Iniversiteny Paris. Dokoteranaka koa fa nivolan̈a fa zaho janga sady mety mandeha a lekaoly, haravoan̈a tsisy ambaka izy ninaka. Ho zaho tamy jeriko tan̈y: ‘Tsara asandro dokotera aby io!’ Nanomboko tamy zen̈y, nôfinôfinaka hitaha olo marary. Ke isaka babako nan̈ontany zaho ino asa tiako hatao lera zaho be, ho zaho taminany: “Zaho tihan̈ano dokotera.” Io nanjary raha ten̈a maventy taminaka.

Katolìky fianakavian̈anay, fa tsy naro aby raha haiko momba Zan̈ahary. Maro raha nan̈itikitiky sain̈inaka fa tsy nahitako valiny. Efa tafarany zaho nanomboko nianatra Médicine zaho vo resy lahatra fa nisy namôron̈o marin̈y atsika.

Tsaroako tamy zaho voanalohany nandiniky seliliny raha maniry, lany fan̈ahy zaho nahita fa vitany selily miaro ain̈inany aminy hafanan̈a ndreky nintsy. Hitako koa fa misônkin̈y sitôplasma (ranondraha an̈atiny selily) koa fa avoa sira, baka io mivavatra ndraiky izio izikoa fa atao an̈aty rano tsotra. Baka amy raha zen̈y ndreky raha maro hafa koa mahavy raha manampahin̈ana madiniky ho velon̈o fo ndray miovaova tany misy iro. Ten̈a maro garamidany selily tsiaraikiaraiky! Ke zaho koa fa  nandiniky izio, nanjary resy lahatra zaho fa tsy navinavy ho azy fiain̈ana.

Tamy zaho 2^ème année, nahainaro fo porofo nahitako fa misy ankitin̈y Zan̈ahary. Zahay koa fa nianatra momba vatan̈anolombelon̈o, nianaranay karakory havitàntsika man̈abian̈a ndreky mamody felantan̈anantsika. Ten̈a mahavarian̈a mahita fifandraisany hozatra ndreky taolan̈a, fotony miaraka miasa aby iro jiaby. Ohatra, nianaranay fa hozabe aby io mifandray aminy hozatrany tan̈ana ndreky amy taolan̈a faharoe amy ratsantan̈ana. Hozatra io amy zay mivaky aroe, ke manjary karaha titezan̈a. Misy hozabe hafa mandalo ambaniny hozatra mivaky aroe io, baka io izio mitohy ziska amy tendrontan̈ana. Baka amy zen̈y mahavy hozabe aby io tsy mihetsiketsiky miala amy plasindro. Avio misy selily mitambatambatra (tamba-tsela na tissus), mahery sady fatatra mampipetaka iro hozatra aby io amy taolan̈any ratsantan̈ana. Izikoa tsy tiô raha jiaby zen̈y, hihenjan̈a iro hozabe aby io ke tsy hiasa tsara ratsantan̈anantsika. Hitako tsarabe fa ten̈a mahay ankitin̈y Araiky niasa vatan̈anolombelon̈o io.

Nahainihafatra fo zaho amy fahaizany Jehovah miasa raha, tamy zahay nianatra akory ataony tsaiky vo teraka mangala fahin̈ana. Nianarako fa tsaiky araiky koa mbala ankibony reniny tsy miain̈y baka aminy ôron̈o, fa mahazo ôksizainy baka amy mamany, avy amy tadimpoetry. Zen̈y mahavy tran̈ony tsiko aminy havokavokony tsaiky mbala an̈atiny kibo tsy mibontaka, fotony mbala tsisy tsiko. Kanefa herin̈iandra vitsivitsy alohany tsaiky io hiboaka, misy ranondraha karaha menaka zay mamôn̈o tran̈ony tsiko aby io baka an̈aty. Mahagaga fa miaraka tsaiky io teraka, izy direkty mahavita miain̈y aminy ôron̈o. Mifody direkty lavaka an̈atiny fôny zazamena io, ke mandeha firaka aminy havokavokonany an̈y lio. Baka amy ranondraha karaha menaka in̈y mahavy tran̈ony tsiko aminy havokavokony tsaiky io tsy mifampipetaka fa direkty feno tsiko. Ke iô ny iô, tsaiky io efa mahavita miain̈y aminy ôron̈o edy.

Tiako ho hay azovy Zan̈ahary namôron̈o raha mahagaga aby io, ke nanomboko namaky Baiboly isanandra zaho. An̈isany raha nahalany fan̈ahy zaho iziô lalàn̈a momba fahasalaman̈a namezany Zan̈ahary iro Israelita aby io, efa mandilatra 3 000 taon̈o lôso zay. Zan̈ahary nivolan̈a tamindro fa tay mila alevin̈y, avio iro mila manasa tan̈ana matetiky amy rano. Nivolan̈a koa izy fa mila asintaka zay olo avoany aretin̈y mifindra, fa tsy aharoharo aminolo. (Lev. 13:50; 15:11; Deot. 23:13) Baiboly efa nikoran̈a momba zen̈y, kanefa mbala vo 150 taon̈o tatoato fo iro manampahaizan̈a momba siansy aby io nahay raha momba aretin̈y mifindra zen̈y. Avio lalàn̈a momba fanasan̈a ain̈y amy Levitikosy ao koa nan̈ampy iro Israelita aby io ho salama fo. (Lev. 12:1-6; 15:16-24) Hitako baka amy zen̈y fa lalàn̈a namezany Pamôron̈o io natao hiarovan̈a iro Israelita aby io. Ke lan̈iany olo nan̈araka lalàn̈a aby io nahazo hatsaran̈a. Nanjary resy lahatra zaho fa ten̈a Volan̈a Zan̈ahary ankitin̈y Baiboly, fa mbala tsy haiko fo azovy an̈aran̈any Zan̈ahary.

Tamy zaho nianatra Médicine, zaho fanôjy tamy tsaiky man̈angy araiky zay, Lydie an̈arany. Nanjary tiako mare izy. Mbala vo nisasaka fo fianaran̈anaka, zahay nan̈ano mariazy, tamy 1965. Tamy 1971, efa telo zanakanay. Tsiota zanakanay jiaby. Lydie ten̈a nan̈ampy zaho, na taminy asanaka amy maha dokotera zaho zen̈y, na tamy raha momba tokantran̈onay.

 Niasa tamy lopitaly araiky zay zaho tan̈atiny telo taon̈o, baka io zaho nan̈abian̈a Cabinet Médical. Tsy ela tafaranizen̈y, iro olo fivadiany nikoran̈iko tan̈abo tarỳ in̈y navy hizaha fahasalaman̈andro. Egy zaho hanoratra aody amiako iro in̈y, nivolan̈a madamo io: “Azafady Dokotera, ataova aody tsisy lio.” Lany fan̈ahy zaho, ke zaho nan̈ontany: “Zen̈y? Nan̈ino?” Ho izy taminaka: “Zahay Vavolombelon̈o Jehovah.” Zaho tamy zen̈y mbala tsiary naharen̈y Vavolombelon̈o Jehovah zen̈y na ino raha ampianarindro momba lio. Naboakany madamo io Baibolinany, baka io naboakany zaho andininteny nahavy izy tsy man̈eky ampidiran̈a lio. (Asa. 15:28, 29) Naboakandro zaho koa fa Fanjakan̈any Zan̈ahary han̈adoso tehotehoko, aretin̈y, ndreky fahafatesan̈a. (Apok. 21:3, 4) Ravoravo mare zaho nivolan̈a tamindro karaha ty: “Nôfinôfinaka tamy zaho mbala hely raha koran̈inaro zen̈y!” Baka io zaho nivolan̈a fa “efa zen̈y edy antony nan̈anaovako dokotera, fotony zaho tihampahivan̈a olo.” Tiako loatra koran̈anay, ke nahadin̈y lera araiky sy sasany zahay nikoran̈a fo. Iro roe fivadiany koa fa lôso, tan̈atiny jeriko tan̈y zaho efa tsy Katolìky eky. Nanjary haiko fa manan̈a an̈aran̈a Pamoron̈o tiako hay be ela jiaby in̈y: Jehovah!

Intelo zahay nifanôjy tamy tany fiasako. Mandilatra lera araiky koran̈anay isaka zahay fanôjy. Nikahiako tantran̈onaka tan̈y iro, beky mahampy tsarabe fotoan̈a ikoran̈anay raha momba Baiboly. Nan̈eky nianatra Baiboly niaraka taminay i Lydie, fa izy fo tsy nan̈eky fa diso raha sasany nampianarin̈y zahay tamy Katolìky. Ke nikahiako tantran̈onay mompera araiky zay. Nan̈ano adihevitry momba fampianaran̈any leglizy katolìky zahay firaka alin̈y, avio Baiboly fo nampiasainay. Ke resy lahatra i Lydie fa marin̈y ankitin̈y raha ampianariny Vavolombelon̈o Jehovah. Tafaranizen̈y, nahainitombo fo fitiavanay Jehovah Zan̈ahary ke natao batisa zahay roe tamy 1974.

Nisy vokany lalin̈y taminaka fahaizako fikasan̈any Zan̈ahary momba olombelon̈o, fotony nanjary fanompoan̈a Jehovah ny raha ten̈a maventy tamy fiain̈ananay roe fivadiany. Ke tapakevitry zahay hitarimy zanakanay mifan̈araka amy toro lalan̈any Zan̈ahary amy Baiboly ao. Zahay nampianatra zanakanay ho tia Zan̈ahary ndreky ho tia olo. Ke ten̈a nan̈ampy fianakavian̈anay hifankatia raha zen̈y.​—Mat. 22:37-39.

Miezaka zahay roe fivadiany miray sain̈y izikoa fa misy fanapahankevitry tsy maintsy ataonay. Zaho matsiaro zen̈y, matetiky zahay roeny Lydie mimoe koa fa mahatsiaro raha nivolan̈indro zanakanay aby io. Haindro baka Jesosy efa nivolan̈a fa “izikoa fa ‘ia’ ia, avio koa fa ‘ehe’ ehe.” Miezaka  zahay man̈araka fitsipiky zen̈y an̈atiny tokantran̈onay. (Mat. 5:37) Nisy fotoan̈a, araiky tamy zanakanay man̈angy, taminizy 17 taon̈o, nangataka lalan̈a tamy mamany handeha hiboaka hiaraka taminiry kamaradiny. Araiky tamindro karamadiny aby io amy zay nivolan̈a taminany: “Izikoa mamanao tsy man̈eky, mivolàn̈a amy papanao!” Fa ho zanakanay io: “Apà! Iro raha jery araiky.” Hitandro zanakanay tsiota aby io fa zahay miezaka miray sain̈y sady man̈araka toro lalan̈a amy Baiboly. Ten̈a mankasitraka Jehovah zahay, fotony amy zioty, ankamarozany fianakavian̈anay manompo Jehovah.

Marin̈y ndraiky fa niova raha ten̈a maventy aminaka zaho koa fa nahay fahamarin̈ana. Fa ndray zen̈y, tiako hampiasain̈a han̈ampian̈a vahoakany Jehovah fo fahaizan̈anaka amy maha dokotera zaho. Ke zaho nan̈ano asa antsitrapô tamy Betelany Paris, avio ta Louviers izikoa fa nifindra tan̈y Betela. Efa 50 taon̈o zay zaho nivezivezy nan̈ano asa antsitrapô amy Betela. Tan̈atiny fotoan̈a jiaby zen̈y, sasany tamy fianakavian̈any Betela nanjary namako marikitry. Sasany amindro io iziô efa kadiriny 90 taon̈o. Tandraraiky, nisy raha tsy nampoiziko foeky zaho koa fa nifanôjy Betelita vaovao zay. Nivolan̈a izy fa, zaho zen̈y nampiteraka mamany, tamy mamany niteraka izy, 20 taon̈o lôso zay!

Tan̈atiny taon̈o maro jiaby zen̈y, nahainitombo fo fitiavako Jehovah, arakarakany nahitako fa Jehovah mampiasa fandaminan̈anany, hitaridalan̈a ndreky hiaro vahoakanany. Kadiriny tamy 1980 tan̈y, Filankevipitantan̈ana nitady fomba baka hazava amy dokotera ndreky amy piasany fahasalaman̈a ta Etazonỳ tsarabe, antony mahavy Vavolombelon̈o Jehovah mifidy tsy hampidiran̈a lio.

Ke tamy 1988, nikeny Filankevipitantan̈ana hisiany sampandraharaha vaovao araiky tamy Betela, tsy ino zen̈y fa “Sampan’asan’ny Filan-kevitra Momba ny Hopitaly.” Tamy voanalohany, izio niandraikitry asany Komity Mifandray amy Lopitaly (KMH), ta Etazonỳ. Sampandraharaha io man̈ampy Vavolombelon̈o Jehovah marary hahita dokotera vôn̈ono han̈aja safidindro tsy han̈eky hampidiran̈a lio. Izikoa fa niparitaka erantany fandaharan̈a io, nanjary nisy KMH koa ta France. Ten̈a manohin̈y fônaka mahita fa be fitiavan̈a fandaminan̈any Jehovah man̈ampy iro rahalahy ndreky ranabavy marary hahazo fan̈ampian̈a amy fotoan̈a ten̈a ilàndro izy.

Taloha, han̈ano dokotera ny raha ten̈a maventy taminaka. Fa baka tiô, tontohitry zaho fa fitahan̈a olo amy lafiny arapan̈ahy ny raha ten̈a maventy, tsy ino zen̈y fa fan̈ampian̈a olo hihavan̈a amy Jehovah Zan̈ahary Loharanony fahin̈ana. Zaho koa fa retirety, nan̈ano pisava lalan̈a maharitry zahay roeny Lydie, ke isaka fanjava zahay mandany lera maro hitorian̈a vaovao tsara momba Fanjakan̈any Zan̈ahary. Mifen̈y fo zahay ziska iziô man̈ano erakany vitanay aminy asa man̈avotro fahin̈ana io.

Mbala mitaha olo marary fo zaho firaka zioty. Fa haiko fo fa nata dokotera farany mahay tsy hahavita hitaha aretin̈y jiaby ndreky hisakana olo tsy hofoaty. Ke efa tsy din̈iko foeky fotoan̈a tsy hisiany tehotehoko, aretin̈y, ndreky fahafatesan̈a. Efa marikitry donia vaovao. Ke amy leranizen̈y, hianatra raha maro niasainy Jehovah fo zaho mandrakizay. An̈isanizeny vatan̈anolombelon̈o. Mahagaga fomba niasàny izio. Ke ho tanteraka eky nôfinôfinaka tamy zaho mbala hely in̈y. Matoky zaho fa mbala ho tsaratsaranizen̈y raha ho hisy aminy hoavy.