I TE CIK, akuri ki amam onongo gitye i kin jami ma Jehovah jolo macalo gityer. Winyi aryo magi onongo kare ducu kiloko i komgi kacel i cik ma kwako miyo gityer dok onongo kitwero miyo amam me kaka akuri. (Levi 1:14; 12:8; 14:30) Pingo man onongo tye me kony? Tyen lok acel aye ni akuri onongo i kine mukene nongone pe yot. Pingo?

Akuri gubedo winyo ma gituk i kabedo mapatpat dok gibedo i lobo Icrael i dwe ma nongo piny lyet. I dwe me Apar ducu, gituk tung kupiny kun gicito i lobe ma nongo piny lyet iye, dok gituk gidok cen i lobo Icrael i kine ka dwe me Angwen. (Wer 2:11, 12; Jer. 8:7) Pi meno, i lobo Icrael macon, onongo tek adada pi Luicrael me nongo akuri me atyera i kare ma piny ngic.

Ki tungcel, amam pol kare pe gituk i kabedo maboco, pi meno onongo ginonge i lobo Icrael i kare mo keken. Medo i kom meno, amam onongo gitye i kin winyo ma kigwokogi paco. (Por ki Jon 2:14, 16.) Ma lubbe ki buk ma wiye tye ni Bible Plants and Animals, “caro ki taun ducu ma i lobo Palestina onongo gigwoko amam i pacigi. Rwod ot acel acel onongo tye ki ot amam i pacone, ka ma winyi magi gitwero bedo iye.”—Por ki Icaya 60:8.

I yo man, Jehovah onyuto ni en obedo ngat ma niang dok lamar kun jolo macalo gityer winyo ma Luicrael gitwero nongone i kare mo keken.