Zahˇ dawˬ kʼoꞈ dawˬ˗ahˇ Yeˬhawˇbaˬ kʼaˬ kʼoeˬ hawˇ˗eu kʼaˬ guˬ lawˇ gaˇ ha geuꞈ˗eu meh. Lawˇ˗eu shehˇ˗eu jeˬ˗ahˇ ngehˬ keuˆ ngeh aˇ jiˇ heu nyiˬ jeˬ˗ahˇ tiˬ kawˆ loꞈ˗ehˇ ngehˬ keuˆ taˬ˗awˇ, tiˬ jeˬ maˬ za naˇ tiˬ jeˬ lawˇ nya˗eu meh. (Uˬduˬtahˬ˗eu 1:14; 12:8; 14:30) Heu naˇ aˬ jeˬ miˇ neh muiˬ˗eu nga? Aˬ jeˬ miˇ neh nga lehˇ ngeuˇ naˇ, kʼaˬ guˬ heu naˇ aˬ myah luꞈ poˆ za nya˗eu lehˇ maˬ ngeuˇ˗eu miˇ neh meh. Aˬ jeˬ miˇ neh nga?

Aˬ jeˬ miˇ neh ehˇ naˇ kʼaˬ guˬ heu naˇ pawˇ˗iˇ pawˇ˗iˇ˗ehˇ cah˗eu aˇ jiˇ pyeuꞈ˗eu miˇ neh meh. Aˇ jiˇ heu naˇ jawˇ la yamˬ˗ahˇ Iˇsaˬleˬlaˆ miˇ kʼahˬ doe ni gaˆ dzaˬ˗awˇ, tseˇ siˬ siˬ keuˆ laˇ shaw naˇ aˇ jiˇ heu laꞈ oˆ paw jaˆ˗eu yaw lahˇ lahˇ˗eu miˇ kʼahˬ paw pawˇ˗iˇ˗eu meh. Jawˇ la doˆ le naˇ Iˇsaˬleˬlaˆ miˇ kʼahˬ˗ahˇ gʼoˆ laˇ˗eu meh. (Dawˬcaˇ 2:11, 12; Yeˬlaˬmiˇ 8:7) Teu miˇ neh tsahˬ gaˆ yamˬ keuˆ laˇ naˇ Iˇsaˬleˬlaˆ tsawˇ haˬ deuˬ˗euˬ gʼaˇ duˬ kʼaˬ guˬ poˆ˗eu yaw shaˬ meh.

Ehˇ kʼawꞈ kʼaˬ kʼoeˬ naˇ tiˬ gaˇ˗iˬ pawˇ iˇ˗eu maˬ baw˗eu miˇ neh, Iˇsaˬleˬlaˆ miˇ kʼahˬ˗ahˇ kʼoꞈ lah ni za nya˗eu meh. Kʼoeˇ uˬ taꞈ kʼaˬ kʼoeˬ˗ahˇ cu kʼawꞈ cu nya˗eu meh. (Yoˇhaˬ 2:14, 16 nehˬ˗ehˇ sheu cehˆ.) Paˇ dmˬ tiˬ dmˬ˗ahˇ (Bible Plants and Animals) “Paˆlehˬsaˬ˗taiꞈ miˇ kʼahˬ˗ahˇ meuˬ doe pu doe ni kʼaˬ kʼoeˬ jawˇ˗eu meh. Iˇ kahˇ yawˬ kahˇ na luꞈ˗ahˇ kʼaˬ kʼoeˬ lawˬ muˇ naˬ nya˗eu maˇ byoe dahˇ˗eu meh” lehˇ ehˇ taˬ˗euˬ meh.—Iˇsaˬyaˇ 60:8 nehˬ˗ehˇ sheu cehˆ.

Yeˬhawˇbaˬ heu loꞈ˗ehˇ kʼoꞈ lah ni za nya˗eu aˇ jiˇ˗ahˇ lawˇ gaˇ ha geuꞈ˗eu heu naˇ, Yeˬhawˇbaˬ˗aˬ nui gaˬ ahˇ˗eu Miˬyehˇ pyeuꞈ˗awˇ, aˬ yawꞈ jeˬ yawꞈ˗ahˇ haw tsaˬ nya˗eu Miˬyehˇ pyeuꞈ˗eu lehˇ siˬ laˇ˗eu meh.