ITINI i Rikec ni Mosi, pakayni milingatay to sapatoˈaya a sarikec miceriday masowal ko no lotok a topi ato no lomaˈ a topi. Ano micadaan ni Yihofa ko lotok a topi, mamicada to lomaˈ a topi malo sapatoˈaya. (Lifi 1:14; 12:8; 14:30) Pakayni i Israil tamdaw hano o ngaˈayay hani? O cecay lalangian i, ono lotok a topi to cerid cowa ka kahenay a mahela. Misamaanay hani?

Ono lotok a topi minengnengay to romiˈad a malinah a ˈayam. Itini dihkoay a romiˈad, adihayay ko no lotok a topi i Israil. To mihecahecaan ka moetepan folad malinahay ko no lotok a topi tayra i katimol dihkoay a pala miliyas to sienaw, kacanglahan a romiˈad ngaˈ patikol i Israil. (Radiw ni Solomon 2:11, 12; Yirimiya 8:7) Mihaenay, nolitengan a Israil a tamdaw pasangaray mahela ko no lotok a topi i kasienawan, malo sapatoˈaya.

Kawra, ono lomaˈ topi cowa ka linah. Itini Israil lalomaꞌ no cecay miheca ngaˈayay maˈaraw camira. O roma i, o tamdaw pakaenay to no lomaˈ a topi. (Nengnengen ko Yohani 2:14, 16.) O cecay Lalomaˈ no Fangcalay Cudad Pinaˈorip Pinaloma a cudad sanay: “Itini Palestan, polong a niyaroˈ iraay ko tamdaw pakaenay to no lomaˈ a topi. Kahacecay lomaˈ iraay ko lomaˈ no topi, oya mimingay a ofang itini cafeng, ngaˈayay mikilomaˈ ko topi itira.”—Nengnengen ko Isaya 60:8.

Ci Yihofa makahiay to Israil tamdaw tano ngaˈayay mahela i laloma no cecay miheca a ˈayam malo sapatoˈaya, paihkalay konini to iraay ko olah Ningra, makahiay a pacaˈi.