MOISESAN Leyiparjamajja, qhorukutunaka jan ukajj palomanaka ofrendat loqtañajj Jehová Diosatakejj walikïskänwa. Sacrificionak loqtañat parlki uka leyinakanjja, uka pä jamachʼinakarojj juntupuniw aytasi. Israelitanakajj qhorukutunaka jan ukajj palomanakwa ofrendat loqtapjjaspäna (Lev. 1:14; 12:8; 14:30). ¿Kunatsa ukham lurañajj walikïskäna? Qhorukutunak jikjjatañajj janiw faciläkänti. Kunatsa jan faciläkäna uk uñjañäni.

Qhorukutunakajja, juntʼu phajjsinakanakwa Israel markan jakapjje. Octubre phajjsinsti, sur toqeruw sarjjapjje, kawkjantï jukʼamp juntʼüki uka markanakaru. Ukatjja qhepa jallojj purki ukhaw Israel markar kuttʼanjjapjjaraki (Cant. 2:11, 12; Jer. 8:7). Ukhamajja qhorukutunak sacrificionakapatak juyphi pachan jikjjatañajj israelitanakatak chʼamakïnwa.

Niyakejjay palomanakajj yaqha cheqar jan sarapkchitejja, marpachaw Israel markan jikjjatasïna. Janiw ukakïkiti, jaqenakas palomanak uywapjjarakirïnwa (Juan 2:14, 16 liytʼarakïta). Mä librojj akham siwa: “Palestina cheqan taqpach jachʼa, jiskʼa markanakanwa jaqenakajj palomanak uywapjjerïna. Taqe uta perqanakanwa palomanakatakejj jaqen lurat pʼiyanakajj utjäna, ukanwa palomanakajj jakapjjäna” sasa (Isaías 60:8 liytʼarakïta).

¿Kunsa ukajj Jehová Diosat yatichistu? Munasiri, amuytʼiri Diosätapwa yatichistu, kuna laykutejj Israel markan marpach utjkäna uka jamachʼinakwa ofrendat katoqasïna.