MOIZI Mmla’n se kɛ Izraɛlifuɛ’m be kwla fa auble annzɛ okunmomo be yi tɛ man Zoova. Mmla’n nun’n, kpɛ sunman’n be kan anunman nɲɔn sɔ’m be ndɛ likawlɛ. Yɛ sɛ b’a ɲanman kun’n, be kwla fa kun’n be yi tɛ. (Sau. 1:14; 12:8; 14:30) ?Ngue ti yɛ i sɔ’n ti kpa-ɔ? Afin blɛ sɔ’n nun’n auble’m be ɲanlɛ yo ya. ?Ngue ti-ɔ?

Laa Izraɛli lɔ’n, aunyɛyɛ blɛ’n nun yɛ auble’m be ba lika’n nun-ɔn. Sanngɛ kɛ Ɔktɔblu anglo’n ko ju mɔ ayrɛ’n ko ba’n, be tu be kɔ lika nga lɔ’n lo’n. Kpɛkun munngun blɛ’n nun’n, be sa be sin Izraɛli lɔ. (Fɛf. 2:11, 12; Zer. 8:7) Ɔ maan sɛ Izraɛlifuɛ kun waan ɔ́ fá auble yí tɛ ayrɛ blɛ nun’n, ɔ́ yó kekle mɛ́n i.

Sanngɛ okunmomo’m be liɛ’n, be tu kɔman lika uflɛ. Ɔ maan be kwla ɲan wie blɛ kwlaa nun. Asa ekun’n, sran’m be ta be. Fluwa kun seli kɛ: “Palɛstinin asa’n su lɔ’n, sran’m be ta okunmomo mun. Awlo kwlaa nun’n, sran’m be kpɛ buɛ wie talɛ wun naan okunmomo’m be la nun.”—An nian Ezai 60:8 nun.

Zoova mannin Izraɛlifuɛ’m be atin kɛ be fa anunman nga be kwla ɲan be blɛ kwlaa nun’n be yi tɛ be mɛn i. I sɔ’n kle kɛ ɔ klo sran naan i like yolɛ yoman ya.