NAWLBIA tangah Jehovah sin raithawinak caah ṭhuro le laileng cu a pahnih in cohlan a si. Mah va pahnih cu raithawinak he aa tlaimi nawlbia ah hmunkhat ah langhterṭi peng a si i pakhat canah a dang pakhat kha hman khawh a si. (Lev. 1:14; 12:8; 14:30) Mah cu zeicah a ṭhat? A ruang pakhat cu ṭhuro cu a zungzal in a um lo. Zeicah?

Ṭhuro cu aa ṭhial lengmangmi va an si i khualum caan chung Israel ram ah an um. October thla fatin thlanglei in a lum deuhnak ram hna ah an i ṭhial i khuasik thawkka ah Israel ram ah an rak kir ṭhan. (Sol. 2:11, 12; Jer. 8:7) Mah cu hlanlio Israel ram ah khuasik caan chung cu raithawinak caah ṭhuro a har tinak a si.

Phundang in, laileng cu hmunhma aa ṭhialmi an si lo caah kumkhat chung Israel ram ah hmuh khawh a si. Mah lengah laileng cu inn ah zuatmi a si. (Johan 2:14, 16 he tahchunh.) Cauk (Bible Plants and Animals) pakhat nih hitin a ti: “Palestine ram i khuate le khuapi dihlak ah laileng kha inn ah an zuat. Inn kip nih laileng inn asiloah vanpang ah va an um khawhnak kua an ngei.”—Isaiah 60:8 he tahchunh.

Israel ram ah kumkhat chung hmuh khawh a simi va in raithawinak a cohlannak thawngin Jehovah nih dawtnak a ngeimi le a tlarimi a si kha a langhter.