BHI uhi nin Jehova gbe nin ibhokhan Izrẹl, ọle da ji ele da ha re idulu bi enekhukhu rẹ ze ji ọle. A kẹ wo tẹmhọn ene afianmhẹn nan kugbe sade a tẹmhọn emhin nan noo rẹ zọese. A sabọ rẹ noo ọnọn hi ki rẹ khin bhi ẹwẹ ele rẹ zọese. (Lev. 1:14; 12:8; 14:30) Bezẹle nin Jehova da ji ele da ha noo ele rẹ zọese? Emhin ọkpa nọn zẹle hi, a ikẹ miẹn idulu. Bezẹle?

Afianmhẹn ne tin yo ije kẹkẹ idulu khin. Ẹghe okale a rẹ wo miẹn ele bhi otọ Izrẹl. Bhi uki ọsi October, ele ki tin ha khian agbaẹbho ne ribhi obọ ọsi south bhi eji ovuẹn da manman zẹ. Ẹghe orọ ha ki sẹ, ele ki gbo vae bhi otọ Izrẹl. (Song of Sol. 2:11, 12; Jer. 8:7) Ọnan rẹman ghe, ọ dẹ nọghọ ibhokhan Izrẹl rẹ miẹn idulu rẹ ze bhi ẹghe nin ulinlin rẹ manman fi bhi otọ Izrẹl.

Bhi obọ nọnkẹle, enekhukhu itin kpanọ diọbhi agbaẹbho ebhebhe. Bhiriọ, a wo miẹn ele bhi otọ Izrẹl ukpe-ukpe. Sẹyẹ, a bẹẹ enekhukhu bhi uwa. (Fẹ John 2:14, 16 ghe.) Ebe natiọle Bible Plants and Animals yọle ghe, “enekhukhu ribhi idunmhun bi agọ rebhe bhi otọ Palestine. Ọdeọde bhi ene mhọn uwa bhi enin mhọn obhi uwa khere, la uhio bhi egbe uwa nin ene enekhukhu ha da sabọ ha nyẹnlẹn.”​—Fẹ Isaiah 60:8 ghe.

Bhiriọ, Jehova da rẹman ghe ọle mhọn oyẹẹ bi ẹwanlẹn, beji ọle rẹ ka nin ibhokhan Izrẹl ha noo ene ele sabọ miẹn bhi ẹwẹ ene afianmhẹn nan rẹ ha ze ji ọle.