MĨAONĨ ya Mose, Yeova nĩweetĩkĩlĩtye Aisilaeli maumasye ndumbũ na mavũĩ ta nthembo. Mavinda maingĩ nyũnyi isu syelĩ nĩsyawetanĩaw’a vamwe mĩaonĩ ĩla ĩneeneete nthembo, na mũndũ aĩ atonya kumya ĩla wakwata katĩ wa isu. (Ali. 1:14; 12:8; 14:30) Nĩkĩ ũndũ ũsu waĩ mũseo? Kĩtumi kĩmwe nĩ kana ndumbũ iyakothaa kũkwatĩkana. Nĩkĩ?

Ndumbũ nĩ nyũnyi syĩkalaa iithamathama, na ũmũnthĩ ikwatĩkanaa nthĩ ya Israel myeinĩ ĩla kwĩthĩawa kwĩ kũvyũ. Mweinĩ wa 10 kĩla mwaka, nithamĩĩaa nthĩ ila syĩ ngalĩ ya ĩtheo kũla kwĩthĩawa kwĩ na ũvyũvu, na ĩtina nisyokaa kũu ĩvinda ya mĩtĩ kũlaũka. (Wa. 2:11, 12; Yel. 8:7) Kwoou kĩu kĩonany’a kana tene waĩ ũndũ wĩ vinya kwa Aisilaeli kumya ndumbũ ta nthembo ĩvinda ya mbevo.

Kĩvathũkany’o na ũu, mavũĩ maithamathamaa, na kwoou maĩ matonya kũkwatĩkana nthĩ ya Isilaeli kĩla ĩvinda. Ũndũ ũngĩ nĩ kana, Aisilaeli aingĩ nĩmaĩthasya mavũĩ mũsyĩ. (Sianĩsya na Yoana 2:14, 16.) Kwosana na ĩvuku yĩtawa Bible Plants and Animals, “ndũa na taoni syonthe sya Valesitina syaĩ na andũ maĩthasya mavũĩ. Kĩla mwene mũsyĩ nĩwaseũvasya mbũthi ũkũtanĩ, vala nyũnyi isu syekalaa.”—Sianĩsya na Isaia 60:8.

Kwoou Yeova oonanisye nĩwendete Aisilaeli na nĩwamaeleawa kwa kũmetĩkĩlya maumasye ta nthembo nyũnyi syaĩ itonya kũkwatĩkana mwaka w’onthe.