MU mikenj ya Mawej yaakishiley Moyiz, Yehow wiitabil bwa biin Izaleel kumulambulobw makucy mabidy ni tuukudimb tubidy. Toony tubidy oot, baakady teng biituteel mu mikenj habitaatal milambw ni muut waakady mwa kulambul makucy eecy tuukudimb. (Lev 1:14; 12:8; 14:30) Bwabiny byaakady bilengel bwa kulong nook? Kabingil kaakady neey: makucy kamakady teng mamweek. Bwabiny?

Makucy i toony tumwaamwangal ni bitusaasangan mu bulab bwa Izaleel mu suuny yidy ni cyuuy civul. Suuny a Diikumy woos, tumwaamwangal hakwaaluk kucyaash tutal mu bibunj bidy ni cyuuy civul, ni tuhingomw mu Izaleel mu muvw a cyuuy. (Muss. 2:11, 12; Jer. 8:7) Mu Izaleel wa kal, byaakady bikasakan bwa biin Izaleel kutwaalobw makucy bu mulambw mu ciisang cya muvw a mashik.

Ki, tuukudimb katwaakadyoh bend tumwangal, ki bwabiny twaakady teng tumweek mu Izaleel. Bwaal bukwaabw bwa kumanyik budy neey: baakady biitumun ku cibel. (Fwanyikij ni Jah 2:14, 16.) Bilondeshel mukand a mu Angleh: Bible Plants and Animals, (uleeleeb bwa mitond ni nyam yidyobw bateel mu Bibl) uleeleej neey: “mu misok yoos ni tawuny ya mu Palesitin baakady bamunomw tuukudimb. Muut woos waakady ni cyaab cya kwiitumunyin, eecy mulong diitubw mu ciman, cyaab cyaakady toony oot mwa kushikatil.”​—Fwanyikij ni Yeshaay 60:8.

Nook, Yehow wiibaleejel mwaakadyey ni lukat ni mwiikal ni meej malengel ha kwiitab bwa kumulambulobw toony twaakady tumweek bikasakan mu Izaleel mivw yoos.