LANDILA Nsiku a Mose, mbwela ye mayembe zavewanga se lukau lwatondakana kwa Yave. E nuni zazi zau zole, nkumbu miayingi kumosi ziyikwanga muna Nsiku uvovelanga tukau. O muntu wafwana vana mbwela se lukau vana fulu kia yembe. (Lev. 1:14; 12:8; 14:30) Ekuma ediadi diakadilanga diambote? Kadi nkumbu miayingi e mbwela ke zatoma monekanga ko. Ekuma?

E mbwela i nuni zitoma yalukanga. Muna nsungi a mvula, olenda zo solola muna zunga yawonso ya Isaele. Kansi, vava nsungi a mbangala iyantikanga, e nuni zazi ziyalukanga yo kwenda mu nsi zina mu nsungi a mvula, i bosi zivutukanga diaka kuna Isaele muna nsungi a mvula. (Nks. 2:11, 12; Yer. 8:7) Ediadi disongele vo kuna Isaele yankulu, diampasi diakalanga kwa Aneyisaele mu vana e mbwela se lukau muna nsungi a sivu.

Kuna diak’e sambu, mayembe ke meyalukanga ko. Muna kuma kiaki, diasazu dikalanga mu solola mayembe kuna Isaele muna nsungi zawonso za mvu. Kadi mayembe twelwa matwelwanga. (Tezanesa ye Yoane 2:14, 16.) Landila nkanda mosi uvovelanga oma ma bulu ye nti, usonganga vo “o wantu muna mbanza ye zunga kiawonso kia Palestina mayembe batwelanga.” Konso nzo yakalanga ye mpak’a mayembe vana nludi yovo mawulu vana yaka, muna mayembe mazingilanga.—Tezanesa ye Yesaya 60:8.

Muna yambula vo Aneyisaele bavananga e nuni zamonekanga muna konso nsungi se tukau, Yave wasonga vo nkwa zola ye ke nkwa mambu mangolo-ngolo ko.