Kont Taf?
Għala kien taʼ għajnuna għall-Iżraelin li Ġeħova aċċetta bħala sagrifiċċju kemm il-gamiem kif ukoll il-ħamiem?
FIL-LIĠI Mosajka, Ġeħova aċċetta bħala sagrifiċċju kemm il-gamiem kif ukoll il-ħamiem. Fil-liġi, dawn iż-żewġ għasafar kienu jissemmew flimkien u l-Iżraelin setgħu joffruhom bħala sagrifiċċju t-tnejn li huma. (Lev. 1:14; 12:8; 14:30) Dan għala kien t’għajnuna? Raġuni waħda kienet li l-gamiem ma kontx issibu s-sena kollha. Għala le?
Għax il-gamiem issibu f’Iżrael matul xhur sħan. Imma kull sena għall-ħabta t’Ottubru jpassi lejn pajjiżi sħan fin-naħa t’isfel u jerġgħu jmorru lura f’Iżrael fil-bidu t’April. (Għan. 2:11, 12; Ġer. 8:7) Għalhekk, dak iż-żmien, kien diffiċli għall-Iżraelin biex joffru l-gamiem bħala sagrifiċċju matul ix-xhur tax-xitwa.
Mill-banda l-oħra, il-ħamiem kont issibu f’Iżrael is-sena kollha, għax normalment ma jpassix. Barra minn hekk, il-ħamiem huwa għasfur li tistaʼ trabbih id-dar. (Qabbel Ġwanni 2:14, 16.) Skont il-ktieb Bible Plants and Animals, “f’kull villaġġ u raħal fil-Palestina n-nies kien ikollhom il-ħamiem id-dar. F’kull dar kont issib toqba tal-barumbara, jiġifieri toqba fil-ħajt, fejn l-għasafar kienu jgħixu.”—Qabbel Isaija 60:8.
B’dan, Ġeħova wera li hu mhux biss hu Alla taʼ mħabba imma wkoll raġonevoli, għax b’din il-liġi l-Iżraelin setgħu joffru għasafar bħala sagrifiċċju matul is-sena kollha.