JEHOVA okwa li a pitika Aaisraeli mompango ye ye mu pe omayambo goonguti dhomiihwa nosho wo dhuushimba. Omaludhi ngaka gaali goonguti oga popilwa pamwe mompango ndjoka kombinga yomayambo, nomuntu okwa li ha vulu okugandja oludhi lumwe ngele olukwawo ke lu na. (Lev. 1:14; 12:8; 14:30) Omolwashike sha li shi na uuwanawa? Etompelo limwe olyo kutya oonguti dhomiihwa kadha li aluhe hadhi monika nuupu. Omolwashike mbela?

Oonguti dhomiihwa ohadhi tembuka nohadhi kala moshitopolwa shaIsraeli pethimbo lyoomwedhi dhuupyu. MuKotoba ohadhi tembukile kiilongo ya pupyala mbyoka yi li kuumbugantu, nohadhi galukile muIsraeli poshitemamvula. (Ondjimb. 2:11, 12; Jer. 8:7) Onkee shoka osha li hashi shi ningitha oshidhigu kAaisraeli ya gandje omayambo goonguti dhomiihwa pethimbo lyokufu.

Mepingathano naashono, oonguti dhuushimba ihadhi tembuka, onkene omo dha li hadhi kala aluhe moshitopolwa shaIsraeli omumvo aguhe. Shimwe ishewe oonguti ndhika odha li hadhi tekulwa. (Yelekanitha Johannes 2:14, 16.) Embo Bible Plants and Animals otali ti kutya “momikunda adhihe nomoondolopa dhomuPalestina, aantu oya li haya tekula oonguti dhuushimba. Omunegumbo kehe okwa li e na oshikuku nenge oshikololo shi li mekuma, moka dha li hadhi kala.” — Yelekanitha Jesaja 60:8.

Kungawo Jehova okwa li a ulike kutya omunahole noku na ondjele sho a li ha taamba omayambo goonguti ndhoka Aaisraeli ya li haya vulu okumona nuupu momukokomoko gwomumvo aguhe.