Eki Waaba Nookimanya?
Ahabw’enki kyabaire nikigasha kuhayo enkombe n’amaiba nk’ebitambo?
OMU biragiro, enkombe n’amaiba bikaba nibiikirizibwa kuheebwayo ahari Yehova nk’ebitambo. Ebinyonyi bibiri ebi bikaba nibikira kugambwaho hamwe omu biragiro ebirikukwata aha bitambo, kandi kimwe kikaba nikibaasa kukora omu mwanya gw’ekindi. (Lev. 1:14; 12:8; 14:30) Ahabw’enki eki kyabaire kiri eky’omugasho? Enshonga eri ngu enkombe zikaba zitarikukira kureebeka. Ahabw’enki?
Enkombe
Enkombe n’ebinyonyi ebirikufuruka, kandi nibikira kuba biri omuri Israeli omu meezi g’omushana. Omu Kwaikumi nibifuruka biza omu mahanga agarimu obutagatsi, reero bigaruka omuri Israeli omushana gwatandika. (Kyesh. 2:11, 12; Yer. 8:7) Eki nikimanyisa ngu, ira Abaisraeli bakaba nibagumirwa kuhayo enkombe nk’ekitambo omu bwire bw’obutiti.
Eriiba
Kwonka, amaiba go tigarikukira kufuruka, n’ahabw’ekyo gakaba nigashangwa omuri Israeli omwaka gwona. Kandi ekikuru, abantu bakaba nibatunga amaiba omu maka gaabo. (Gyeragyeranisa Yohaana 2:14, 16. *) Kurugiirira aha kitabo Bible Plants and Animals, “omuri Palestine omu byaro n’omu tauni abantu bakaba nibatunga amaiba omu maka gaabo. Buri ka ekaba eine akaju nari ekihengyere omu kisiika ahu ebinyonyi ebi birikutuura.”—Gyeragyeranisa Isaaya 60:8.
Eriiba riri omu kaju kaaryo
N’ahabw’ekyo Yehova akooreka ngu aine rukundo n’embabazi, arikwikiriza ebiheebwayo by’ebinyonyi ebyabaire byorobi kubona omuri Israeli omwaka gwona.
[Obugambo obw’Ahansi]
^ kacw. 5 Ekigambo “enkombe” ekiri omuri Yohaana 2:14, 16, nikibaasa n’okumanyisa amaiba.
