MUKHUALA wakhalele muhana enya Isalele njila ha guhana milambu ya tukhulumbia nu mayembe gudi Yehowa. Tangua mikhuala yana zuelela milambu, yana guzuelela tunjila etu mbadi hamoshi. Athu ajiya guhana gakhulumbia ha fundo dia yembe, nga yembe ha fundo dia gakhulumbia. (Levi 1:14; 12:8; 14:30) Mukunda natshi yakhalele ndaga yabonga? Handaga matangua ako tukhulumbia tuakhalelego mumonega. Mukunda natshi?

Tukhulumbia tuakhalele mujinga gu Isalele mu sungi ya muanya wakola. Uvi gutuama egi sungi ya guhuma isendese, tuakhalele mulenga ha guya mu ifutshi yakhalele nu muanya wakola. Gungima, tuakhalele muvutuga luko gu Isalele gula sungi ya muanya yasendesa. (Lungi. 2:11, 12; Yel. 8:7) Gishina giene yakhalele lamba gudi enya Isalele ha guheta tukhulumbia ha guhana milambu mu sungi ya guhuma.

Uvi mayembe akhalelego mukatuga ha guya mu ifutshi iko. Hene gu Isalele mayembe akhalele mumonega tangua diagasue. Athu akhalele nji guafuga gu jinzo jiawo. (Fuanesa nu Yone 2:14, 16.) Mukanda umoshi wa anglais Bible Plants and Animals udi muzuela egi: “Mu membo agasue akoma nu azonda a gu Palestine, athu akhalele mufuga mayembe. Muthu wagasue wakhalele nu ganzo gagubambela mayembe gumbo dienji.”—Fuanesa nu Yeshaya 60:8.

Luholo Yehowa wahanele enya Isalele njila ya guhana milambu ya tunjila tuakhalele mumonega tangua diagasue, wamonesele diago egi udi Nzambi wa guzumba nu gashigo muenya ndaga jiakola-kola.