I RARO i te Ture, ka ārikiia te kukupa e te rupe no te oronga ei atinga kakara kia Iehova. Kua taiku kapitiia teia nga manu i roto i te ture, e ka rauka ua i te akaatinga e tai o teia manu me kare tetai e rauka mai. (Levi. 1:14; 12:8; 14:30) Eaa ra i meitaki ei te reira? No te mea, kare te manu kukupa e rauka ua mai i te au taime ravarai. Eaa te tumu?

E noo ana te manu kukupa ki te au ngai ravarai i Iseraela i te au tuatau maana. Ia Okotopa i te au mataiti, ka rere ratou ki te au enua maanaana i te tua tonga, e ka oki mai ki Iseraela i te tuatau tupuanga rau. (Peʼe 2:11, 12; Iere. 8:7) I Iseraela i taito, ka ngatā i te iti tangata o Iseraela i te oronga i te kukupa ei atinga i te tuatau anu.

Inara ko te rupe, kare teia manu e rere ana ki tetai au enua ke, no reira ka rauka ua te reira i te au taime ravarai i Iseraela. Tei maata atu, e angai ana te tangata i te rupe. (Akaaite ia Ioane 2:14, 16.) Akakite te puka Bible Plants and Animals, “pouroa te au oire i Palestine, e au rupe angai ta ratou. E au vaarua tetai i roto i te patu o te are o te tangata tei maaniia ei ngai nooanga no te au manu.”—Akaaite ia Isaia 60:8.

Akaari maira a Iehova e e Atua aroa aia e te tau ua na te āriki anga i te au manu ka rauka ua i Iseraela i te au taime ravarai ei atinga.