HIKUYA hi Nawu wa Moxe, Yehovha a a yamukela swituvana ni swivambalana akuva ku hambiwa magandzrelo hi swone. Tinyanyana leti ti hlayiwa kun’we ka milawu leyi vulavulaka hi magandzrelo nakone ha tibidzri a ti tizrela ntxhumu wun’we. (Lv 1:14; 12:8; 14:30) Ha yini leswo a swi pfuna? Xin’we xa swivangelo hi leswaku a hi minkama hinkwayu a swi nabyala ku kuma swivambalana. Ha yini?

Swivambalana i tinyanyana leti tsrhamelaka ku zruzra nakone a swo kumeka ntsena a Israyele hi nkama wa malanga. Loko ku sungula wuxika kolomu ka Otubru, ti zruzrela a matikweni lawa ma hisaka kutani ti tlhelela a Israyele loko ku nghena malanga. (Lis 2:11, 12; Yr 8:7) Leswi swi hlaya leswaku a Israyeleni wa khale, a swi va kazratela va-Israyele ku nyikela magandzrelo hi swivambalana hi nkama wa wuxika.

Kambe a swituvana a swi zruzrazruzri nakone a swi kumeka a Israyele tinguva hinkwatu. Handle ka leswo, vhanu a va swi fuya makaya. (Dzringanisa Yohan 2:14, 16.) Hi ku ya hi buku ledzri liki Plantas E Animais Da Bíblia, “vhanu hinkwavu a tikweni dzra Palestina, a va fuya swituvana. Muti ni muti a wu ni mbangu wa ku fuyela ka wone swituvana. Nakone tiyindlu tin’wana a ti ni timbhovo a makhumbini akuva swituvana swi tsrhama kone.”—Dzringanisa Ezaya 60:8.

Kutani ku va Yehovha a pfumeleli va-Israyele ku hamba magandzrelo hi tinyanyana leti kumekaka nkama hinkwawu, a swi kombisa leswaku a ni lizrandzru nakone a wa dzringanisela.