A WET ben e sori taki sma ben mag gi stondoifi nanga osodoifi leki ofrandi gi Yehovah. Ala ten a wet ben kari den tu fowru disi makandra èn sma ben kan tyari a wan noso a trawan leki ofrandi (Lef. 1:14; 12:8; 14:30). Fu san ede disi ben bun? Wán reide, na taki stondoifi no ben de fu feni ala ten. Fu san ede?

Stondoifi na fowru di e tan na ala sei fu Israel na ini den waran mun fu a yari. Ibri oktober, den e hari go na a zuidsei, na kondre pe a moro waran èn mofoyari den e drai kon baka na Israel (Singi 2:11, 12; Yer. 8:7). Disi ben meki en muilek gi den Israelsma fu owruten fu gi stondoifi leki ofrandi na ini a kowru pisi ten fu a yari.

Ma na tra sei, osodoifi no gwenti hari go na tra kontren. Sobun, a heri yari den ben de fu feni na ini Israel. Boiti dati, sma ben e kweki den doifi disi na oso tu. (Luku Yohanes 2:14, 16.) A buku Bible Plants and Animals e taki dati „ala den dorpu nanga foto na ini Palestina ben abi osodoifi. Ala oso ben abi wan doifikoi noso olo na ini a skotu pe den fowru disi ben e tan.”​—Luku Yesaya 60:8.

A de krin taki Yehovah ben lobi en pipel èn taki a no ben e fruwakti tumusi furu fu den fu di a ben gi den na okasi fu tyari ofrandi di ben de makriki fu feni.