Maaram Ka Ba?
Kay ano nga mapulsanon nga ginkakarawat sugad nga halad an tukmo ngan sarapati?
ILAROM han Balaud, an mga tukmo ngan sarapati ginkakarawat sugad nga mga halad kan Jehova. Inin duha nga tamsi pirme magkaupod nga gin-uunabi ha mga balaud mahitungod ha paghalad ngan puydi gamiton an usa sugad nga kasaliwan han usa. (Lev. 1:14; 12:8; 14:30) Kay ano nga mapulsanon ini? An usa nga rason tungod kay may mga panahon nga waray mga tukmo. Kay ano?
Tukmo
An mga tukmo nag-uukoy ha bug-os nga nasud han Israel ha mga bulan nga medyo mapaso. Kada Oktubre, nabalhin hira ha sur ngadto ha medyo mapaso nga mga nasud, ngan nabalik ha Israel ha katsaringsing. (Kanta ni Solo. 2:11, 12; Jer. 8:7) Tungod hito, makuri para ha mga Israelita ha kadaan nga Israel nga maghalad hin mga tukmo durante ha kathagkot.
Sarapati
Ha luyo nga bahin, an mga sarapati kaurogan na nga diri nabalhin, salit pirme may sarapati ha Israel ha bug-os nga tuig. Dugang pa, an mga sarapati puydi atamanon. (Ikompara an Juan 2:14, 16.) Sumala han libro nga Bible Plants and Animals, “an ngatanan nga baryo ngan bungto ha Palestina may inataman nga mga sarapati. An tagsa nga balay may-ada balay-balay hin sarapati, o buho ha bungbong, nga mauukyan han mga tamsi.”—Ikompara an Isaias 60:8.
Sarapati nga aada ha balay-balay hito
Salit iginpapakita ni Jehova nga mahigugmaon ngan makatadunganon hiya pinaagi ha pagkarawat han halad nga mga tamsi nga pirme may-ada ha Israel ha bug-os nga tuig.
